Venkatesha on Stotra Samhita

श्रीनिवास गद्यम्

Mon, 01 Jan 0001 00:00:00 +0000

Gadyam

श्रीनिवास गद्यम्

श्रीमदखिल-महीमण्डल-मण्डन-धरणिधर-मण्डलाखण्डलस्य'
निखिल-सुरासुर-वन्दित-वराहक्षेत्र-विभूषणस्य' शेषाचल-
गरुडाचल-वृषभाचल-नारायणाचलाञ्जनाचलादि शिखरिमालाकुलस्य' नादमुख-बोधनिधि-वीधिगुण-साभरण-सत्त्वनिधि-तत्त्वनिधि-भक्तिगुणपूर्ण-श्रीशैलपूर्ण-गुणवशंवद-परमपुरुष-कृपापूर-विभ्रमदतुङ्गशृङ्ग-गलद्गगनगङ्गासमालिङ्गितस्य' सीमातिग गुण रामानुजमुनि नामाङ्कित बहु भूमाश्रय सुरधामालय
वनरामायत वनसीमापरिवृत विशङ्कटतट निरन्तर विजृम्भित भक्तिरस
निर्झरानन्तार्याहार्य प्रस्रवणधारापूर विभ्रमद-सलिलभरभरित महातटाक मण्डितस्य' कलिकर्दम मलमर्दन कलितोद्यम विलसद्यम
नियमादिम मुनिगणनिषेव्यमाण प्रत्यक्षीभवन्निजसलिल मज्जन
नमज्जन निखिलपापनाशन पापनाशन तीर्थाध्यासितस्य'
मुरारिसेवक जरादिपीडित निरार्तिजीवन निराश भूसुर वरातिसुन्दर सुराङ्गनारति कराङ्गसौष्ठव कुमारताकृति कुमारतारक समापनोदय तनूनपातक महापदामय विहापनोदित सकलभुवन विदित कुमारधाराभिधान-तीर्थाधिष्ठितस्य' धरणितल गत सकल हतकलिल शुभसलिल गतबहुल विविधमल हति चतुर रुचिरतर विलोकनमात्र विदलित विविधमहापातक स्वामिपुष्करिणी समेतस्य' बहुसङ्कट
नरकावट पतदुत्कट कलिकङ्कट कलुषोद्भट जनपातक विनिपातक
रुचिनाटक करहाटक कलशाहृत कमलारत शुभमज्जन जल सज्जन भरित निजदुरित हतिनिरत जनसतत निरर्गलपेपीयमान सलिल
सम्भृत विशङ्कट कटाहतीर्थ विभूषितस्य' एवमादिम भूरिमञ्जिम
सर्वपातक गर्वहातक सिन्धुडम्बर हारिशम्बर विविधविपुल पुण्यतीर्थनिवहनिवासस्य' श्रीमतो वेङ्कटाचलस्य शिखरशेखर-
महाकल्पशाखी' खर्वीभवदति गर्वीकृत गुरुमेर्वीशगिरि मुखोर्वीधर कुलदर्वीकर दयितोर्वीधर शिखरोर्वी' सतत सदूर्वीकृति चरणघन गर्वचर्वण निपुण तनुकिरणमसृणित गिरिशिखरशेखरतरुनिकर
तिमिरः' वाणीपतिशर्वाणी दयितेन्द्राणीश्वर मुख नाणीयोरसवेणी निभशुभवाणी नुतमहिमाणी' यस्तर कोणी भवदखिलभुवनभवनोदरः' वैमानिकगुरु भूमाधिक गुण रामानुज कृतधामाकर करधामारि दरललामाच्छकनक दामायित निजरामालय' नवकिसलयमय तोरणमालायित वनमालाधरः' कालाम्बुद मालानिभ नीलालक
जालावृत बालाब्ज सलीलामल फालाङ्गसमूलामृत धाराद्वयावधीरण' धीरललिततर विशदतर घन घनसारमयोर्ध्वपुण्ड्ररेखाद्वयरुचिरः' सुविकस्वर दलभास्वर कमलोदर गतमेदुर नवकेसर ततिभासुर परिपिञ्जर कनकाम्बर कलितादर ललितोदर तदालम्ब जम्भरिपु मणिस्तम्भ गम्भीरिमदम्भस्तम्भ समुज्जृम्भमान पीवरोरुयुगल
तदालम्ब पृथुल कदली मुकुल मदहरणजङ्घाल जङ्घायुगलः'
नव्यदल भव्यगल पीतमल शोणिमल सन्मृदुल सत्किसलयाश्रुजल-
कारि बल शोणतल पदकमल निजाश्रय बलबन्दीकृत शरदिन्दुमण्डली विभ्रमदादभ्र शुभ्र पुनर्भवाधिष्ठिताङ्गुलीगाढ निपीडित पद्मापनः' जानुतलावधि लम्बि विडम्बित वारण शुण्डादण्ड विजृम्भित नीलमणिमय कल्पकशाखा विभ्रमदायि मृणाललतायत समुज्ज्वलतर कनकवलय वेल्लितैकतर बाहुदण्डयुगलः' युगपदुदित कोटि खरकर हिमकर मण्डल जाज्वल्यमान सुदर्शन पाञ्चजन्य समुत्तुङ्गित शृङ्गापर बाहु युगलः' अभिनवशाण समुत्तेजित महामहा नीलखण्ड मतखण्डन निपुण नवीन परितप्त कार्तस्वर कवचित महनीय पृथुल सालग्राम परम्परा गुम्भित नाभिमण्डल पर्यन्त लम्बमान प्रालम्बदीप्ति समालम्बित विशाल वक्षःस्थलः' गङ्गाझर तुङ्गाकृति भङ्गावलि भङ्गावह सौधावलि बाधावह धारानिभ हारावलि दूराहत गेहान्तर मोहावह महिम मसृणित महातिमिरः' पिङ्गाकृति भृङ्गारु निभाङ्गार दलाङ्गामल निष्कासित दुष्कार्यघ निष्कावलि दीपप्रभ नीपच्छवि तापप्रद कनकमालिका पिशङ्गित सर्वाङ्गः' नवदलित दलवलित मृदुललित कमलतति मदविहति चतुरतर पृथुलतर सरसतर कनकसरमय रुचिकण्ठिका कमनीयकण्ठः' वाताशनाधिपति शयन कमन परिचरण रतिसमेताखिल फणधरतति मतिकरकनकमय नागाभरण परिवीताखिलाङ्गावगमित शयन भूताहिराज जातातिशयः' रविकोटी परिपाटी धरकोटी रपताटी कितवाटी रसधाटी धर मणिगणकिरण विसरण सततविधुत तिमिरमोह गर्भगेहः' अपरिमित विविधभुवन भरिताखण्ड ब्रह्माण्डमण्डल पिचण्डिलः' आर्यधुर्यानन्तार्य पवित्र खनित्रपात पात्रीकृत निजचुबुक गतव्रणकिण विभूषणवहनसूचित श्रितजनवत्सलतातिशयः' मड्डुडिण्डिम ढमरु झर्झर काहली पटहावली मृदुमर्द्दलाशि मृदङ्ग दुन्दुभि ढक्किकामुक हृद्य वाद्यक मधुरमङ्गल नादमेदुर विसृमर सरस गानरस रुचिर सन्तत सन्तन्यमान नित्योत्सव पक्षोत्सव मासोत्सव संवत्सरोत्सवादि विविधोत्सव कृतानन्दः' श्रीमदानन्दनिलय विमानवासः' सतत पद्मालया पदपद्मरेणु सञ्चितवक्षःस्थल पटवासः' श्रीश्रीनिवासः' सुप्रसन्नो विजयताम्॥१॥
नाटारभि भूपाल बिलहरि मायामालव गौला असावेरी' सावेरी
शुद्धसावेरी देवगान्धारी' धन्यासी बेगड हिन्दुस्थानी कापी तोडी नाटकुरञ्जी' श्रीराग सहन अठाण सारङ्गी दर्बारु पन्तुवराली वराली' कल्याणी पूर्वीकल्याणी यमुनाकल्याणी हुसेनी जञ्झोटी कौमारी'
कन्नड खरहरप्रिया कलहंस नादनामक्रिया मुखारी' तोडी पुन्नागवराली
काम्भोजी भैरवी' यदुकुलकाम्भोजी आनन्दभैरवी शङ्कराभरण मोहन
रेगुप्ती सौराष्ट्री' नीलाम्बरी गुणक्रिया मेघगर्जनी' हंसध्वनि शोकवराली मध्यमावती जेञ्जुरुटी सुरटी' द्विजावन्ती मलयाम्बरी कापि
परशुधनासरी देशिकतोडी' आहिरी वसन्तगौली सन्तु केदारगौला कनकाङ्गी रत्नाङ्गी गानमूर्ति' वनस्पति वाचस्पति दानवती मानरूपी सेनापति' हनुमत्तोडी धेनुका नाटकप्रिया कोकिलप्रिया रूपवती गायकप्रिया' वकुलाभरण चक्रवाक सूर्यकान्त हाटकाम्बरी
झङ्कारध्वनि' नटभैरवी गीर्वाणी हरिकाम्भोजी धीरशङ्कराभरण नागानन्दिनी यागप्रिया' विसृमर सरस गानरसेत्यादि सन्तत
सन्तन्यमान नित्योत्सव पक्षोत्सव मासोत्सव संवत्सरोत्सवादि
विविधोत्सव कृतानन्दः' श्रीमदानन्दनिलयवासः' सतत पद्मालया पदपद्मरेणु सञ्चितवक्षःस्थल पटवासः' श्रीश्रीनिवासः' सुप्रसन्नो विजयताम्॥२॥
श्री-अलर्मेल्मङ्गासमेत श्रीश्रीनिवास स्वामी' सुप्रीतः सुप्रसन्नो वरदो
भूत्वा' पनस पाटली पालाश बिल्व पुन्नाग चूत कदली चन्दन
चम्पक मञ्जुल मन्दार हिन्तुलादि तिलक मातुलुङ्ग नारिकेल
क्रौञ्चाशोक माधूकामलक हिन्दुक नागकेतक पूर्णकुन्द पूर्ण गन्ध रस
कन्द वन वञ्जुल खर्जूर साल कोविदार हिन्ताल पनस विकट
वैकसवरुण तरुधमरण विचुलङ्काश्वत्थ यक्ष वसुध वर्माध मन्त्रिणी'
तिन्त्रिणी बोध न्यग्रोध घटपटल जम्बूमतल्ली वसति वासती जीवनी
पोषणी प्रमुख निखिल सन्दोह तमाल माला महित विराजमान चषक
मयूर हंस भारद्वाज कोकिल चक्रवाक कपोत गरुड नारायण नानाविध पक्षिजाति समूह ब्रह्म-क्षत्रिय-वैश्य-शूद्र-नानाजात्युद्भव देवता
निर्माण' माणिक्य-वज्र-वैडूर्य-गोमेधिक-पुष्यराग-पद्मरागेन्द्र प्रवालमौक्तिक-स्फटिक-हेम-रत्नखचित धगद्धगायमान रथगज
तुरग पदादि सेवा समूह' भेरी-मद्दल-मुरवक-झल्लरी-शङ्ख-काहल नृत्यगीत-तालवाद्य-कुम्भवाद्य-पञ्चमुखवाद्य अहमीमार्गन्नटीवाद्य किटिकुन्तलवाद्य सुरटीचौण्डोवाद्य तिमिलकवितालवाद्य
तक्कराग्रवाद्य घण्टाताडन ब्रह्मताल समताल कोट्टरीताल ढक्करीताल ऎक्काल' धारावाद्य पटह कांस्यवाद्य भरतनाट्यालङ्कार किन्नर किम्पुरुष
रुद्रवीणा मुखवीणा वायुवीणा' तुम्बुरुवीणा गान्धर्ववीणा नारदवीणा' स्वरमण्डल रावणहस्तवीणास्तक्रियालङ्क्रियालङ्कृतानेक-
विधवाद्य वापीकूपतटाकादि गङ्गा यमुना रेवा वरुणा शोणनदी शोभनदी'
सुवर्णमुखी वेगवती वेत्रवती क्षीरनदी बाहुनदी गरुडनदी कावेरी ताम्रपर्णी प्रमुखा महापुण्यनद्यः' सजलतीर्थैः सहोभयकूलङ्गत सदाप्रवाह ऋग्यजुःसामाथर्वण वेदशास्त्रेतिहासपुराण-सकलविद्याघोष भानुकोटिप्रकाश चन्द्रकोटिसमान नित्यकल्याण परम्परोत्तरोत्तराभिवृद्धिर्भूयादिति' भवन्तो महान्तोऽनुगृह्णन्तु।
ब्रह्मण्यो राजा धार्मिकोऽस्तु। देशोऽयं निरुपद्रवोऽस्तु।
सर्वे साधुजनाः सुखिनो विलसन्तु। समस्तसन्मङ्गलानि सन्तु। उत्तरोत्तराभिवृद्धिरस्तु। सकलकल्याणसमृद्धिरस्तु॥३॥
॥हरिः ॐ॥

वेङ्कटेश-अष्टकम्

Mon, 01 Jan 0001 00:00:00 +0000

Ashtakam

वेङ्कटेश-अष्टकम्

वेङ्कटेशो वासुदेवः प्रद्युम्नोऽमितविक्रमः।

सङ्कर्षणोऽनिरुद्धश्च शेषाद्रिपतिरेव च॥१॥

जनार्दनः पद्मनाभो वेङ्कटाचलवासनः।

सृष्टिकर्ता जगन्नाथो माधवो भक्तवत्सलः॥२॥

गोविन्दो गोपतिः कृष्णः केशवो गरुडध्वजः।

वराहो वामनश्चैव नारायण अधोक्षजः॥३॥

श्रीधरः पुण्डरीकाक्षः सर्वदेवस्तुतो हरिः।

श्रीनृसिंहो महासिंहः सूत्राकारः पुरातनः॥४॥

रमानाथो महीभर्ता भूधरः पुरुषोत्तमः।

चोळपुत्रप्रियः शान्तो ब्रह्मादीनां वरप्रदः॥५॥

श्रीनिधिः सर्वभूतानां भयकृद् भयनाशनः।

श्रीरामो रामभद्रश्च भवबन्धैकमोचकः॥६॥

भूतावासो गिरिवासः श्रीनिवासः श्रियः पतिः।

अच्युतानन्त गोविन्दो विष्णुर्वेङ्कटनायकः॥७॥

सर्वदेवैकशरणं सर्वदेवैकदैवतम्।

समस्तदेवकवचं सर्वदेवशिखामणिः॥८॥

इतीदं कीर्तितं यस्य विष्णोरमिततेजसः।

त्रिकाले यः पठेन्नित्यं पापं तस्य न विद्यते॥९॥

राजद्वारे पठेद् घोरे सङ्ग्रामे रिपुसङ्कटे।

भूतसर्पपिशाचादिभयं नास्ति कदाचन॥१०॥

अपुत्रो लभते पुत्रान् निर्धनो धनवान् भवेत्।

रोगार्तो मुच्यते रोगाद् बद्धो मुच्येत बन्धनात्॥११॥

यद्यदिष्टतमं लोके तत् तत् प्राप्नोत्यसंशयः।

ऐश्वर्यं राजसम्मानं भुक्तिमुक्तिफलप्रदम्॥१२॥

विष्णोर्लोकैकसोपानं सर्वदुःखैकनाशनम्।

सर्वैश्वर्यप्रदं नॄणां सर्वमङ्गलकारकम्॥१३॥

मायावी परमानन्दं त्यक्त्वा वैकुण्ठमुत्तमम्।

स्वामिपुष्करिणीतीरे रमया सह मोदते॥१४॥

कल्याणाद्भुतगात्राय कामितार्थप्रदायिने।

श्रीमद्वेङ्कटनाथाय श्रीनिवासाय मङ्गलम्॥१५॥

॥इति श्री-ब्रह्माण्डपुराणे ब्रह्मनारदसंवादे वेङ्कटगिरिमाहात्म्ये श्री-वेङ्कटेश-अष्टकं सम्पूर्णम्॥

वेङ्कटेशद्वादशनामस्तोत्रम्

Mon, 01 Jan 0001 00:00:00 +0000

Nama Stotram

वेङ्कटेशद्वादशनामस्तोत्रम्

वेङ्कटेशो वासुदेवो वारिजासनवन्दितः।

स्वामिपुष्करिणीवासः शङ्खचक्रगदाधरः॥१॥

पीताम्बरधरो देवो गरुडारूढशोभितः।

विश्वात्मा विश्वलोकेशो विजयो वेङ्कटेश्वरः॥२॥

एतद् द्वादशनामानि त्रिसन्ध्यं यः पठेन्नरः।

सर्वपापविनिर्मुक्तो विष्णोः सायुज्यमाप्नुयात्॥३॥

॥इति श्री-वेङ्कटेशद्वादशनामस्तोत्रं सम्पूर्णम्॥

PDF:A5 / print Kindle Kindle Scribe

वेङ्कटेश करावलम्बस्तोत्रम्

Mon, 01 Jan 0001 00:00:00 +0000

वेङ्कटेश करावलम्बस्तोत्रम्

श्रीशेषशैल-सुनिकेतन दिव्यमूर्ते
नारायणाच्युत हरे नलिनायताक्ष।
लीलाकटाक्ष-परिरक्षित-सर्वलोक
श्रीवेङ्कटेश मम देहि करावलम्बम्॥१॥

ब्रह्मादिवन्दितपदाम्बुज शङ्खपाणे
श्रीमत्सुदर्शन-सुशोभित-दिव्यहस्त।
कारुण्यसागर शरण्य सुपुण्यमूर्ते
श्रीवेङ्कटेश मम देहि करावलम्बम्॥२॥

वेदान्त-वेद्य भवसागर-कर्णधार
श्रीपद्मनाभ कमलार्चितपादपद्म।
लोकैक-पावन परात्पर पापहारिन्
श्रीवेङ्कटेश मम देहि करावलम्बम्॥३॥

लक्ष्मीपते निगमलक्ष्य निजस्वरूप
कामादिदोष-परिहारक बोधदायिन्।
दैत्यादिमर्दन जनार्दन वासुदेव
श्रीवेङ्कटेश मम देहि करावलम्बम्॥४॥

तापत्रयं हर विभो रभसा मुरारे
संरक्ष मां करुणया सरसीरुहाक्ष।
मच्छिष्य इत्यनुदिनं परिरक्ष विष्णो
श्रीवेङ्कटेश मम देहि करावलम्बम्॥५॥

श्री-जातरूपनवरत्न-लसत्किरीट
कस्तूरिकातिलकशोभिललाटदेश।
राकेन्दुबिम्ब-वदनाम्बुज-वारिजाक्ष
श्रीवेङ्कटेश मम देहि करावलम्बम्॥६॥

वन्दारुलोक-वरदान-वचोविलास
रत्नाढ्यहार-परिशोभित-कम्बुकण्ठ।
केयूररत्न-सुविभासि-दिगन्तराल
श्रीवेङ्कटेश मम देहि करावलम्बम्॥७॥

दिव्याङ्गदाञ्चित-भुजद्वय मङ्गलात्मन्
केयूरभूषण-सुशोभित-दीर्घबाहो।
नागेन्द्र-कङ्कण-करद्वय कामदायिन्
श्रीवेङ्कटेश मम देहि करावलम्बम्॥८॥

स्वामिन् जगद्धरणवारिधिमध्यमग्नं
मामुद्धराद्य कृपया करुणापयोधे।
लक्ष्मीं च देहि मम धर्म-समृद्धिहेतुं
श्रीवेङ्कटेश मम देहि करावलम्बम्॥९॥

दिव्याङ्गराग-परिचर्चित-कोमलाङ्ग
पीताम्बरावृत-तनो तरुणार्क-दीप्ते।
सत्काञ्चनाभ-परिधान-सुपट्टबन्ध
श्रीवेङ्कटेश मम देहि करावलम्बम्॥१०॥

रत्नाढ्यदाम-सुनिबद्ध-कटि-प्रदेश
माणिक्य-दर्पण-सुसन्निभ-जानुदेश।
जङ्घाद्वयेन-परिमोहित-सर्वलोक
श्रीवेङ्कटेश मम देहि करावलम्बम्॥११॥

लोकैकपावन-सरित्परिशोभिताङ्घ्रे
त्वत्पाददर्शन दिने च ममाघमीश।
हार्दं तमश्च सकलं लयमाप भूमन्
श्रीवेङ्कटेश मम देहि करावलम्बम्॥१२॥

कामादि-वैरि-निवहोऽच्युत मे प्रयातः
दारिद्र्यमप्यपगतं सकलं दयालो।
दीनं च मां समवलोक्य दयार्द्र-दृष्ट्या
श्रीवेङ्कटेश मम देहि करावलम्बम्॥१३॥

श्रीवेङ्कटेश-पदपङ्कज-षट्पदेन
श्रीमन्नृसिंहयतिना रचितं जगत्याम्।
ये तत्पठन्ति मनुजाः पुरुषोत्तमस्य
ते प्राप्नुवन्ति परमां पदवीं मुरारेः॥१४॥

॥इति श्री-शृङ्गेरि-जगद्गुरुणा श्री-नृसिंहभारती-स्वामिना रचितं श्री-वेङ्कटेश-करावलम्बस्तोत्रं सम्पूर्णम्॥

वेङ्कटेश मङ्गलाशासनम्

Mon, 01 Jan 0001 00:00:00 +0000

वेङ्कटेश मङ्गलाशासनम्

श्रियः कान्ताय कल्याणनिधये निधयेऽर्थिनाम्।

श्रीवेङ्कटनिवासाय श्रीनिवासाय मङ्गलम्॥१॥

लक्ष्मी-सविभ्रमालोक-सुभ्रू-विभ्रमचक्षुषे।

चक्षुषे सर्वलोकानां वेङ्कटेशाय मङ्गलम्॥२॥

श्रीवेङ्कटाद्रि-शृङ्गाग्र-मङ्गलाभरणाङ्घ्रये।

मङ्गलानां निवासाय श्रीनिवासाय मङ्गलम्॥३॥

सर्वावयवसौन्दर्य-सम्पदा सर्वचेतसाम्।

सदा सम्मोहनायास्तु वेङ्कटेशाय मङ्गलम्॥४॥

नित्याय निरवद्याय सत्यानन्दचिदात्मने।

सर्वान्तरात्मने श्रीमद्-वेङ्कटेशाय मङ्गलम्॥५॥

स्वतस्सर्वविदे सर्वशक्तये सर्वशेषिणे।

सुलभाय सुशीलाय वेङ्कटेशाय मङ्गलम्॥६॥

परस्मै ब्रह्मणे पूर्णकामाय परमात्मने।

प्रयुञ्जे परतत्त्वाय वेङ्कटेशाय मङ्गलम्॥७॥

आकालतत्त्वमश्रान्तमात्मनामनुपश्यताम्।

अतृप्त्यमृतरूपाय वेङ्कटेशाय मङ्गलम्॥८॥

प्रायः स्वचरणौ पुंसां शरण्यत्वेन पाणिना।

कृपयाऽऽदिशते श्रीमद्-वेङ्कटेशाय मङ्गलम्॥९॥

दयामृत-तरङ्गिण्यास्तरङ्गैरिव शीतलैः।

अपाङ्गैः सिञ्चते विश्वं वेङ्कटेशाय मङ्गलम्॥१०॥

स्रग्भूषाम्बरहेतीनां सुषमावहमूर्तये।

सर्वार्तिशमनायास्तु वेङ्कटेशाय मङ्गलम्॥११॥

श्रीवैकुण्ठविरक्ताय स्वामिपुष्करिणीतटे।

रमया रममाणाय वेङ्कटेशाय मङ्गलम्॥१२॥

श्रीमत् सुन्दरजामातृमुनिमानसवासिने।

सर्वलोकनिवासाय श्रीनिवासाय मङ्गलम्॥१३॥

मङ्गलाशासनपरैर्मदाचार्य-पुरोगमैः।

सर्वैश्च पूर्वैराचार्यैः सत्कृतायास्तु मङ्गलम्॥१४॥

॥इति श्री-वेङ्कटेश-मङ्गलाशासनं सम्पूर्णम्॥

वेङ्कटेश प्रपत्तिः

Mon, 01 Jan 0001 00:00:00 +0000

वेङ्कटेश प्रपत्तिः

ईशानां जगतोऽस्य वेङ्कटपतेर्विष्णोः परां प्रेयसीं
तद्वक्षःस्थल-नित्य-वासरसिकां तत्क्षान्ति-संवर्धिनीम्।
पद्मालङ्कृतपाणिपल्लवयुगां पद्मासनस्थां श्रियं
वात्सल्यादिगुणोज्ज्वलां भगवतीं वन्दे जगन्मातरम्॥१॥

श्रीमन् कृपाजलनिधे कृतसर्वलोक
सर्वज्ञ शक्त नतवत्सल सर्वशेषिन्।
स्वामिन् सुशील सुलभाश्रितपारिजात
श्रीवेङ्कटेश चरणौ शरणं प्रपद्ये॥२॥

आनूपुरार्पितसुजातसुगन्धिपुष्प-
सौरभ्यसौरभकरौ समसन्निवेशौ।
सौम्यौ सदाऽनुभवनेऽपि नवानुभाव्यौ
श्रीवेङ्कटेश चरणौ शरणं प्रपद्ये॥३॥

सद्योविकासिसमुदित्वरसान्द्रराग-
सौरभ्यनिर्भरसरोरुहसाम्यवार्ताम्।
सम्यक्षु साहसपदेषु विलेखयन्तौ
श्रीवेङ्कटेश चरणौ शरणं प्रपद्ये॥४॥

रेखामयध्वजसुधाकलशातपत्र-
वज्राङ्कुशाम्बुरुहकल्पकशङ्खचक्रैः।
भव्यैरलङ्कृततलौ परतत्त्वचिह्नैः
श्रीवेङ्कटेश चरणौ शरणं प्रपद्ये॥५॥

ताम्रोदरद्युतिपराजितपद्मरागौ
बाह्यैर्महोभिरभिभूतमहेन्द्रनीलौ।
उद्यन्नखांशुभिरुदस्तशशाङ्कभासौ
श्रीवेङ्कटेश चरणौ शरणं प्रपद्ये॥६॥

सप्रेमभीति कमलाकरपल्लवाभ्यां
संवाहनेऽपि सपदि क्लममादधानौ।
कान्ताववाङ्मन-सगोचर-सौकुमार्यौ
श्रीवेङ्कटेश चरणौ शरणं प्रपद्ये॥७॥

लक्ष्मीमहीतदनुरूपनिजानुभाव-
नीलादिदिव्यमहिषीकरपल्लवानाम्।
आरुण्यसङ्क्रमणतः किल सान्द्ररागौ
श्रीवेङ्कटेश चरणौ शरणं प्रपद्ये॥८॥

नित्यानमद्विधिशिवादिकिरीटकोटि-
प्रत्युप्त-दीप्त-नवरत्न-महःप्ररोहैः।
नीराजनाविधिमुदारमुपाददानौ
श्रीवेङ्कटेश चरणौ शरणं प्रपद्ये॥९॥

विष्णोः पदे परम इत्युतिदप्रशंसौ
यौ मध्व उत्स इति भोग्यतयाऽप्युपात्तौ।
भूयस्तथेति तव पाणितलप्रदिष्टौ
श्रीवेङ्कटेश चरणौ शरणं प्रपद्ये॥१०॥

पार्थाय तत्सदृश-सारथिना त्वयैव
यौ दर्शितौ स्वचरणौ शरणं व्रजेति।
भूयोऽपि मह्यमिह तौ करदर्शितौ ते
श्रीवेङ्कटेश चरणौ शरणं प्रपद्ये॥११॥

मन्मूर्ध्नि कालियफणे विकटाटवीषु
श्रीवेङ्कटाद्रिशिखरे शिरसि श्रुतीनाम्।
चित्तेऽप्यनन्यमनसां सममाहितौ ते
श्रीवेङ्कटेश चरणौ शरणं प्रपद्ये॥१२॥

अम्लानहृष्यदवनीतलकीर्णपुष्पौ
श्रीवेङ्कटाद्रि-शिखराभरणायमानौ।
आनन्दिताखिल-मनो-नयनौ तवैतौ
श्रीवेङ्कटेश चरणौ शरणं प्रपद्ये॥१३॥

प्रायः प्रपन्न-जनता-प्रथमावगाह्यौ
मातुः स्तनाविव शिशोरमृतायमानौ।
प्राप्तौ परस्परतुलामतुलान्तरौ ते
श्रीवेङ्कटेश चरणौ शरणं प्रपद्ये॥१४॥

सत्त्वोत्तरैः सतत-सेव्यपदाम्बुजेन
संसार-तारक-दयार्द्र-दृगञ्चलेन।
सौम्यौ पयन्तृमुनिना मम दर्शितौ ते
श्रीवेङ्कटेश चरणौ शरणं प्रपद्ये॥१५॥

श्रीश श्रिया घटिकया त्वदुपायभावे
प्राप्ये त्वयि स्वयमुपेयतया स्फुरन्त्या।
नित्याश्रिताय निरवद्यगुणाय तुभ्यं
स्यां किङ्करो वृषगिरीश न जातु मह्यम्॥१६॥

॥इति श्रीवेङ्कटेश प्रपत्तिः सम्पूर्णा॥

वेङ्कटेश-स्तोत्रम्

Mon, 01 Jan 0001 00:00:00 +0000

वेङ्कटेश-स्तोत्रम्

कमलाकुच-चूचुक-कुङ्कुमतो नियतारुणितातुल-नीलतनो।

कमलायतलोचन लोकपते विजयी भव वेङ्कटशैलपते॥१॥

सचतुर्मुख-षण्मुख-पञ्चमुख-प्रमुखाखिलदैवतमौलिमणे।

शरणागतवत्सल सारनिधे परिपालय मां वृषशैलपते॥२॥

अतिवेलतया तव दुर्विषहैरनुवेलकृतैरपराधशतैः।

भरितं त्वरितं वृषशैलपते परया कृपया परिपाहि हरे॥३॥

अधिवेङ्कटशैलमुदारमते जनताभिमताधिकदानरतात्।

परदेवतया गदितान्निगमैः कमलादयितान्न परं कलये॥४॥

कलवेणुरवावशगोपवधू शतकोटिवृतात्स्मरकोटिसमात्।

प्रतिवल्लविकाभिमतात्सुखदाद् वसुदेवसुतान्न परं कलये॥५॥

अभिरामगुणाकर दाशरथे जगदेकधनुर्धर धीरमते।

रघुनायक राम रमेश विभो वरदो भव देव दयाजलधे॥६॥

अवनीतनया-कमनीयकरं रजनीकरचारुमुखाम्बुरुहम्।

रजनीचरराजतमोमिहिरं महनीयमहं रघुराम मये॥७॥

सुमुखं सुहृदं सुलभं सुखदं स्वनुजं च सुखायममोघशरम्।

अपहाय रघूद्वहमन्यमहं न कथञ्चन कञ्चन जातु भजे॥८॥

विना वेङ्कटेशं न नाथो न नाथः
सदा वेङ्कटेशं स्मरामि स्मरामि।
हरे वेङ्कटेश प्रसीद प्रसीद
प्रियं वेङ्कटेश प्रयच्छ प्रयच्छ॥९॥

अहं दूरतस्ते पदाम्भोजयुग्म-
प्रणामेच्छयाऽऽगत्य सेवां करोमि।
सकृत्सेवया नित्यसेवाफलं त्वं
प्रयच्छ प्रयच्छ प्रभो वेङ्कटेश॥१०॥

अज्ञानिना मया दोषानशेषान् विहितान् हरे।

क्षमस्व त्वं क्षमस्व त्वं शेषशैल-शिखामणे॥११॥

॥इति श्री-वेङ्कटेश-स्तोत्रं सम्पूर्णम्॥

वेङ्कटेश सुप्रभातम्

Mon, 01 Jan 0001 00:00:00 +0000

Suprabhatam

वेङ्कटेश सुप्रभातम्

कौसल्या सुप्रजा राम पूर्वा सन्ध्या प्रवर्तते।

उत्तिष्ठ नरशार्दूल कर्तव्यं दैवमाह्निकम्॥१॥

उत्तिष्ठोत्तिष्ठ गोविन्द उत्तिष्ठ गरुडध्वज।

उत्तिष्ठ कमलाकान्त त्रैलोक्यं मङ्गलं कुरु॥२॥

मातः समस्तजगतां मधुकैटभारेः
वक्षोविहारिणि मनोहरदिव्यमूर्ते।
श्रीस्वामिनि श्रितजनप्रियदानशीले
श्रीवेङ्कटेशदयिते तव सुप्रभातम्॥३॥

तव सुप्रभातमरविन्दलोचने
भवतु प्रसन्नमुखचन्द्रमण्डले।
विधिशङ्करेन्द्रवनिताभिरर्चिते
वृषशैलनाथदयिते दयानिधे॥४॥

अत्र्यादिसप्तऋषयः समुपास्य सन्ध्याम्
आकाशसिन्धुकमलानि मनोहराणि।
आदाय पादयुगमर्चयितुं प्रपन्नाः
शेषाद्रिशेखरविभो तव सुप्रभातम्॥५॥

पञ्चाननाब्जभवषण्मुखवासवाद्याः
त्रैविक्रमादिचरितं विबुधाः स्तुवन्ति।
भाषापतिः पठति वासरशुद्धिमारात्
शेषाद्रिशेखरविभो तव सुप्रभातम्॥६॥

ईषत्प्रफुल्ल-सरसीरुह-नारिकेल-
पूगद्रुमादि-सुमनोहरपालिकानाम्।
आवाति मन्दमनिलः सह दिव्यगन्धैः
शेषाद्रिशेखरविभो तव सुप्रभातम्॥७॥

उन्मील्य नेत्रयुगमुत्तमपञ्जरस्थाः
पात्रावशिष्टकदलीफलपायसानि।
भुक्त्वा सलीलमथ केलिशुकाः पठन्ति
शेषाद्रिशेखरविभो तव सुप्रभातम्॥८॥

तन्त्रीप्रकर्षमधुरस्वनया विपञ्च्या
गायत्यनन्तचरितं तव नारदोऽपि।
भाषासमग्रमसकृत्करचाररम्यं
शेषाद्रिशेखरविभो तव सुप्रभातम्॥९॥

भृङ्गावली च मकरन्दरसानुविद्ध-
झङ्कारगीत निनदैः सह सेवनाय।
निर्यात्युपान्तसरसीकमलोदरेभ्यः
शेषाद्रिशेखरविभो तव सुप्रभातम्॥१०॥

योषागणेन वरदध्निविमथ्यमाने
घोषालयेषु दधिमन्थनतीव्रघोषाः।
रोषात्कलिं विदधते ककुभश्च कुम्भाः
शेषाद्रिशेखरविभो तव सुप्रभातम्॥११॥

पद्मेशमित्रशतपत्रगतालिवर्गाः
हर्तुं श्रियं कुवलयस्य निजाङ्गलक्ष्म्या।
भेरीनिनादमिव बिभ्रति तीव्रनादं
शेषाद्रिशेखरविभो तव सुप्रभातम्॥१२॥

श्रीमन्नभीष्टवरदाखिललोकबन्धो
श्रीश्रीनिवास जगदेकदयैकसिन्धो।
श्रीदेवतागृहभुजान्तरदिव्यमूर्ते
श्रीवेङ्कटाचलपते तव सुप्रभातम्॥१३॥

श्रीस्वामिपुष्करिणिकाऽऽप्लवनिर्मलाङ्गाः
श्रेयोऽर्थिनो हरविरिञ्चसनन्दनाद्याः।
द्वारे वसन्ति वरवेत्रहतोत्तमाङ्गाः
श्रीवेङ्कटाचलपते तव सुप्रभातम्॥१४॥

श्रीशेषशैल-गरुडाचल-वेङ्कटाद्रि-
नारायणाद्रि-वृषभाद्रि-वृषाद्रि-मुख्याम्।
आख्यां त्वदीय वसतेरनिशं वदन्ति
श्रीवेङ्कटाचलपते तव सुप्रभातम्॥१५॥

सेवापराः शिव-सुरेश-कृशानु-धर्म-
रक्षोऽम्बुनाथ-पवमान-धनाधिनाथाः।
बद्धाञ्जलि-प्रविलसन्निजशीर्ष-देशाः
श्रीवेङ्कटाचलपते तव सुप्रभातम्॥१६॥

धाटीषु ते विहगराज-मृगाधिराज-
नागाधिराज-गजराज-हयाधिराजाः।
स्वस्वाधिकार-महिमाऽधिकमर्थयन्ते
श्रीवेङ्कटाचलपते तव सुप्रभातम्॥१७॥

सूर्येन्दु-भौम-बुध-वाक्पति-काव्य-सौरि-
स्वर्भानु-केतु-दिविषत्परिषत्प्रधानाः।
त्वद्दास-दास-चरमावधि-दासदासाः
श्रीवेङ्कटाचलपते तव सुप्रभातम्॥१८॥

त्वत् पादधूलिभरितस्फुरितोत्तमाङ्गाः
स्वर्गापवर्गनिरपेक्ष-निजान्तरङ्गाः।
कल्पागमाऽऽकलनयाऽऽकुलतां लभन्ते
श्रीवेङ्कटाचलपते तव सुप्रभातम्॥१९॥

त्वद्गोपुराग्रशिखराणि निरीक्षमाणाः
स्वर्गापवर्गपदवीं परमां श्रयन्तः।
मर्त्या मनुष्यभुवने मतिमाश्रयन्ते
श्रीवेङ्कटाचलपते तव सुप्रभातम्॥२०॥

श्रीभूमिनायक दयादिगुणामृताब्धे
देवाधिदेव जगदेकशरण्यमूर्ते।
श्रीमन्ननन्त-गरुडादिभिरर्चिताङ्घ्रे
श्रीवेङ्कटाचलपते तव सुप्रभातम्॥२१॥

श्रीपद्मनाभ पुरुषोत्तम वासुदेव
वैकुण्ठ माधव जनार्दन चक्रपाणे।
श्रीवत्सचिह्न शरणागत-पारिजात
श्रीवेङ्कटाचलपते तव सुप्रभातम्॥२२॥

कन्दर्पदर्पहरसुन्दरदिव्यमूर्ते
कान्ताकुचाम्बुरुह-कुड्मल-लोलदृष्टे।
कल्याणनिर्मलगुणाकर दिव्यकीर्ते
श्रीवेङ्कटाचलपते तव सुप्रभातम्॥२३॥

मीनाकृते कमठ कोल नृसिंह वर्णिन्
स्वामिन् परश्वथ तपोधन रामचन्द्र।
शेषांशराम यदुनन्दन कल्किरूप
श्रीवेङ्कटाचलपते तव सुप्रभातम्॥२४॥

एला-लवङ्ग-घनसार-सुगन्धि-तीर्थं
दिव्यं वियत्सरिति हेमघटेषु पूर्णम्।
धृत्वाऽद्य वैदिकशिखामणयः प्रहृष्टाः
तिष्ठन्ति वेङ्कटपते तव सुप्रभातम्॥२५॥

भास्वानुदेति विकचानि सरोरुहाणि
सम्पूरयन्ति निनदैः ककुभो विहङ्गाः।
श्रीवैष्णवाः सततमर्थित-मङ्गलास्ते
धामाऽऽश्रयन्ति तव वेङ्कट सुप्रभातम्॥२६॥

ब्रह्मादयः सुरवराः समहर्षयस्ते
सन्तः सनन्दन मुखास्तव योगिवर्याः।
धामान्तिके तव हि मङ्गलवस्तुहस्ताः
श्रीवेङ्कटाचलपते तव सुप्रभातम्॥२७॥

लक्ष्मीनिवास निरवद्यगुणैकसिन्धो
संसार-सागर-समुत्तरणैकसेतो।
वेदान्तवेद्य निजवैभव भक्तभोग्य
श्रीवेङ्कटाचलपते तव सुप्रभातम्॥२८॥

इत्थं वृषाचलपतेरिह सुप्रभातं
ये मानवाः प्रतिदिनं पठितुं प्रवृत्ताः।
तेषां प्रभातसमये स्मृतिरङ्गभाजां
प्रज्ञां परार्थसुलभां परमां प्रसूते॥२९॥

॥इति श्री-वेङ्कटेश सुप्रभातम् सम्पूर्णम्॥