Stotra · Śiva · Devī
शिवशिवास्तुतिः
Śivaśivāstutiḥ
About this stotra
The Śiva-Śivā Stuti — a hymn to Śiva and Pārvatī.Script
नमो नमस्ते गिरिशाय तुभ्यं
नमो नमस्ते गिरिकन्यकायै।
नमो नमस्ते वृषभध्वजाय
सिंहध्वजायै च नमो नमस्ते॥१॥
नमो नमो भूतिविभूषणाय
नमो नमश्चन्दनरूषितायै।
नमो नमः फालविलोचनाय
नमो नमः पद्मविलोचनायै॥२॥
त्रिशूलहस्ताय नमो नमस्ते
नमो नमः पद्मलसत्करायै।
नमो नमो दिग्वसनाय तुभ्यं
चित्राम्बरायै च नमो नमस्ते॥३॥
चन्द्रावतंसाय नमो नमस्ते
नमोऽस्तु चन्द्राभरणाञ्चितायै।
नमः सुवर्णाङ्कितकुण्डलाय
नमोऽस्तु रत्नोज्ज्वलकुण्डलायै॥४॥
नमोऽस्तु ताराग्रहमालिकाय
नमोऽस्तु हारान्वितकन्धरायै।
सुवर्णवर्णाय नमो नमस्ते
नमः सुवर्णाधिकसुन्दरायै॥५॥
नमो नमस्ते त्रिपुरान्तकाय
नमो नमस्ते मधुनाशनायै।
नमो नमस्त्वन्धकसूदनाय
नमो नमः कैटभसूदनायै॥६॥
नमो नमो ज्ञानमयाय नित्यं
नमश्चिदानन्दघनप्रदायै।
नमो जटाजूटविराजिताय
नमोऽस्तु वेणीफणिमण्डितायै॥७॥
नमोऽस्तु कर्पूररसाकराय
नमो लसत्कुङ्कुममण्डितायै।
नमोऽस्तु बिल्वाम्रफलार्चिताय
नमोऽस्तु कुन्दप्रसवार्चितायै॥८॥
नमो जगन्मण्डलमण्डनाय
नमो मणिभ्राजितमण्डनायै।
नमोऽस्तु वेदान्तगणस्तुताय
नमोऽस्तु विश्वेश्वरसंस्तुतायै॥९॥
नमोऽस्तु सर्वामरपूजिताय
नमोऽस्तु पद्मार्चितपादुकायै।
नमः शिवालिङ्गितविग्रहाय
नमः शिवालिङ्गितविग्रहायै॥१०॥
नमो नमस्ते जनकाय नित्यं
नमो नमस्ते गिरिजे जनन्यै।
नमो नमोऽनङ्गहराय नित्यं
नमो नमोऽनङ्गविवर्धनायै॥११॥
नमो नमस्तेऽस्तु विषाशनाय
नमो नमस्तेऽस्तु सुधाशनायै।
नमो नमस्तेऽस्तु महेश्वराय
श्रीचन्दने देवि नमो नमस्ते॥१२॥
॥इति श्री-कार्त्तिकेयविरचिता श्री-शिवशिवास्तुतिः सम्पूर्णा॥