Shatanama on Stotra Samhita

आदित्याष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

आदित्याष्टोत्तरशतनामस्तोत्रम्

नवग्रहाणां सर्वेषां सूर्यादीनां पृथक् पृथक्।

पीडा च दुःसहा राजन् जायते सततं नृणाम्॥१॥

पीडानाशाय राजेन्द्र नामानि शृणु भास्वतः।

सूर्यादीनां च सर्वेषां पीडा नश्यति शृण्वतः॥२॥

आदित्यः सविता सूर्यः पूषाऽर्कः शीघ्रगो रविः।

भगस्त्वष्टाऽर्यमा हंसो हेलिस्तेजोनिधिर्हरिः॥३॥

दिननाथो दिनकरः सप्तसप्तिः प्रभाकरः।

विभावसुर्वेदकर्ता वेदाङ्गो वेदवाहनः॥४॥

हरिदश्वः कालवक्त्रः कर्मसाक्षी जगत्पतिः।

पद्मिनीबोधको भानुर्भास्करः करुणाकरः॥५॥

द्वादशात्मा विश्वकर्मा लोहिताङ्गस्तमोनुदः।

जगन्नाथोऽरविन्दाक्षः कालात्मा कश्यपात्मजः॥६॥

भूताश्रयो ग्रहपतिः सर्वलोकनमस्कृतः।

जपाकुसुमसङ्काशो भास्वानदितिनन्दनः॥७॥

ध्वान्तेभसिंहः सर्वात्मा लोकनेत्रो विकर्तनः।

मार्तण्डो मिहिरः सूरस्तपनो लोकतापनः॥८॥

जगत्कर्ता जगत्साक्षी शनैश्चरपिता जयः।

सहस्ररश्मिस्तरणिर्भगवान् भक्तवत्सलः॥९॥

विवस्वानादिदेवश्च देवदेवो दिवाकरः।

धन्वन्तरिर्व्याधिहर्ता दद्रुकुष्ठविनाशनः॥१०॥

चराचरात्मा मैत्रेयोऽमितो विष्णुर्विकर्तनः।

लोकशोकापहर्ता च कमलाकर आत्मभूः॥११॥

नारायणो महादेवो रुद्रः पुरुष ईश्वरः।

जीवात्मा परमात्मा च सूक्ष्मात्मा सर्वतोमुखः॥१२॥

इन्द्रोऽनलो यमश्चैव नैरृतो वरुणोऽनिलः।

श्रीद ईशान इन्दुश्च भौमः सौम्यो गुरुः कविः॥१३॥

सौरिर्विधुन्तुदः केतुः कालः कालात्मको विभुः।

सर्वदेवमयो देवः कृष्णः कामप्रदायकः॥१४॥

य एतैर्नामभिर्मर्त्यो भक्त्या स्तौति दिवाकरम्।

सर्वपापविनिर्मुक्तः सर्वरोगविवर्जितः॥१५॥

पुत्रवान् धनवाञ्छ्रीमान् जायते स न संशयः।

रविवारे पठेद्यस्तु नामान्येतानि भास्वतः॥१६॥

पीडाशान्तिर्भवेत्तस्य ग्रहाणां च विशेषतः।

सद्यः सुखमवाप्नोति चाऽऽयुर्दीर्घं च नीरुजम्॥१७॥

॥इति श्री-भविष्यपुराणे आदित्य अष्टोत्तरशतनामस्तोत्रं सम्पूर्णम्॥

आञ्जनेयाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

आञ्जनेयाष्टोत्तरशतनामस्तोत्रम्

आञ्जनेयो महावीरो हनुमान् मारुतात्मजः।

तत्त्वज्ञानप्रदः सीतादेवीमुद्राप्रदायकः॥१॥

अशोकवनिकाच्छेत्ता सर्वमायाविभञ्जनः।

सर्वबन्धविमोक्ता च रक्षोविध्वंसकारकः॥२॥

परविद्यापरीहर्ता परशौर्यविनाशकः।

परमन्त्रनिराकर्ता परयन्त्रप्रभेदकः॥३॥

सर्वग्रहविनाशी च भीमसेनसहायकृत्।

सर्वदुःखहरः सर्वलोकचारी मनोजवः॥४॥

पारिजातद्रुमूलस्थः सर्वमन्त्रस्वरूपवान्।

सर्वतन्त्रस्वरूपी च सर्वयन्त्रात्मिकस्तथा॥५॥

कपीश्वरो महाकायः सर्वरोगहरः प्रभुः।

बलसिद्धिकरः सर्वविद्यासम्पत्प्रदायकः॥६॥

कपिसेनानायकश्च भविष्यच्चतुराननः।

कुमारब्रह्मचारी च रत्नकुण्डलदीप्तिमान्॥७॥

चञ्चलद्वालसन्नद्धो लम्बमानशिखोज्ज्वलः।

गन्धर्वविद्यातत्त्वज्ञो महाबलपराक्रमः॥८॥

कारागृहविमोक्ता च शृङ्खलाबन्धमोचकः।

सागरोत्तारकः प्राज्ञो रामदूतः प्रतापवान्॥९॥

वानरः केसरीसूनुः सीताशोकनिवारणः।

अञ्जनागर्भसम्भूतो बालार्कसदृशाननः॥१०॥

विभीषणप्रियकरो दशग्रीवकुलान्तकः।

लक्ष्मणप्राणदाता च वज्रकायो महाद्युतिः॥११॥

चिरञ्जीवी रामभक्तो दैत्यकार्यविघातकः।

अक्षहन्ता काञ्चनाभः पञ्चवक्त्रो महातपाः॥१२॥

लङ्किणीभञ्जनः श्रीमान् सिंहिकाप्राणभञ्जनः।

गन्धमादनशैलस्थो लङ्कापुरविदाहकः॥१३॥

सुग्रीवसचिवो धीरः शूरो दैत्यकुलान्तकः।

सुरार्चितो महातेजो रामचूडामणिप्रदः॥१४॥

कामरूपी पिङ्गलाक्षो वर्धिमैनाकपूजितः।

कबलीकृतमार्तण्डमण्डलो विजितेन्द्रियः॥१५॥

रामसुग्रीवसन्धाता महिरावणमर्दनः।

स्फटिकाभो वागधीशो नवव्याकृतिपण्डितः॥१६॥

चतुर्बाहुर्दीनबन्धुर्महात्मा भक्तवत्सलः।

सञ्जीवननगाहर्ता शुचिर्वाग्मी धृतव्रतः॥१७॥

कालनेमिप्रमथनो हरिमर्कटमर्कटः।

दान्तः शान्तः प्रसन्नात्मा शतकण्ठमदापहः॥१८॥

योगी रामकथालोलः सीतान्वेषणपण्डितः।

वज्रदंष्ट्रो वज्रनखो रुद्रवीर्यसमुद्भवः॥१९॥

इन्द्रजित्प्रहितामोघब्रह्मास्त्रविनिवारकः।

पार्थध्वजाग्रसंवासी शरपञ्जरहेलकः॥२०॥

दशबाहुर्लोकपूज्यो जाम्बवत्प्रीतिवर्धनः।

सीतासमेतश्रीरामपादसेवाधुरन्धरः॥२१॥

॥इति श्री-आञ्जनेयाष्टोत्तरशतनामस्तोत्रं सम्पूर्णम्॥

अन्नपूर्णाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

अन्नपूर्णाष्टोत्तरशतनामस्तोत्रम्

ध्यानम्

सिन्दूराभां त्रिनेत्राममृतशशिकलां खेचरीं रत्नवस्त्रां
पीनोत्तुङ्गस्तनाढ्यामभिनवविलसद्यौवनारम्भरम्याम्।
नानालङ्कारयुक्तां सरसिजनयनामिन्दुसङ्क्रान्तमूर्तिं
देवीं पाशाङ्कुशाढ्यामभयवरकरामन्नपूर्णां नमामि॥

स्तोत्रम्

अन्नपूर्णा शिवा देवी भीमा पुष्टिः सरस्वती।

सर्वज्ञा पार्वती दुर्गा शर्वाणी शिववल्लभा॥१॥

वेदविद्या महाविद्या विद्यादात्री विशारदा।

कुमारी त्रिपुरा बाला लक्ष्मीः श्रीर्भयहारिणी॥२॥

भवानी विष्णुजननी ब्रह्मादिजननी तथा।

गणेशजननी शक्तिः कुमारजननी शुभा॥३॥

भोगप्रदा भगवती भक्ताभीष्टप्रदायिनी।

भवरोगहरा भव्या शुभ्रा परममङ्गला॥४॥

भवानी चञ्चला गौरी चारुचन्द्रकलाधरा।

विशालाक्षी विश्वमाता विश्ववन्द्या विलासिनी॥५॥

आर्या कल्याणनिलया रुद्राणी कमलासना।

शुभप्रदा शुभावर्ता वृत्तपीनपयोधरा॥६॥

अम्बा संहारमथनी मृडानी सर्वमङ्गला।

विष्णुसंसेविता सिद्धा ब्रह्माणी सुरसेविता॥७॥

परमानन्ददा शान्तिः परमानन्दरूपिणी।

परमानन्दजननी परानन्दप्रदायिनी॥८॥

परोपकारनिरता परमा भक्तवत्सला।

पूर्णचन्द्राभवदना पूर्णचन्द्रनिभांशुका॥९॥

शुभलक्षणसम्पन्ना शुभानन्दगुणार्णवा।

शुभसौभाग्यनिलया शुभदा च रतिप्रिया॥१०॥

चण्डिका चण्डमथनी चण्डदर्पनिवारिणी।

मार्तण्डनयना साध्वी चन्द्राग्निनयना सती॥११॥

पुण्डरीकहरा पूर्णा पुण्यदा पुण्यरूपिणी।

मायातीता श्रेष्ठमाया श्रेष्ठधर्मात्मवन्दिता॥१२॥

असृष्टिः सङ्गरहिता सृष्टिहेतुः कपर्दिनी।

वृषारूढा शूलहस्ता स्थितिसंहारकारिणी॥१३॥

मन्दस्मिता स्कन्दमाता शुद्धचित्ता मुनिस्तुता।

महाभगवती दक्षा दक्षाध्वरविनाशिनी॥१४॥

सर्वार्थदात्री सावित्री सदाशिवकुटुम्बिनी।

नित्यसुन्दरसर्वाङ्गी सच्चिदानन्दलक्षणा॥१५॥

नाम्नामष्टोत्तरशतमम्बायाः पुण्यकारणम्।

सर्वसौभाग्यसिद्ध्यर्थं जपनीयं प्रयत्नतः॥१६॥

एतानि दिव्यनामानि श्रुत्वा ध्यात्वा निरन्तरम्।

स्तुत्वा देवीं च सततं सर्वान् कामानवाप्नुयात्॥१७॥

॥इति श्रीशिवरहस्ये श्री-अन्नपूर्णाष्टोत्तरशतनामस्तोत्रं सम्पूर्णम्॥

अर्धनारीश्वराष्टोत्तरशतनामस्तोत्रम्

Mon, 01 Jan 0001 00:00:00 +0000

अर्धनारीश्वराष्टोत्तरशतनामस्तोत्रम्

चामुण्डिकाम्बा श्रीकण्ठः पार्वती परमेश्वरः।

महाराज्ञी महादेवः सदाराध्या सदाशिवः॥१॥

शिवार्धाङ्गी शिवार्धाङ्गो भैरवी कालभैरवः।

शक्तित्रितयरूपाढ्या मूर्तित्रितयरूपवान्॥२॥

कामकोटि-सुपीठस्था काशीक्षेत्रसमाश्रयः।

दाक्षायणी दक्षवैरिः शूलिनी शूलधारकः॥३॥

ह्रीङ्कारपञ्जरशुकी हरिशङ्कररूपवान्।

श्रीमद्गणेशजननी षडानन-सुजन्मभूः॥४॥

पञ्चप्रेतासनारूढा पञ्चब्रह्मस्वरूपभृत्।

चण्डमुण्डशिरश्छेत्री जलन्धरशिरोहरः॥५॥

सिंहवाहा वृषारूढः श्यामाभा स्फटिकप्रभः।

महिषासुरसंहर्त्री गजासुरविमर्दनः॥६॥

महाबलाचलावासा महाकैलासवासभूः।

भद्रकाली वीरभद्रो मीनाक्षी सुन्दरेश्वरः॥७॥

भण्डासुरादिसंहर्त्री दुष्टान्धकविमर्दनः।

मधुकैटभसंहर्त्री मधुरापुरनायकः॥८॥

कालत्रयस्वरूपाढ्या कार्यत्रयविधायकः।

गिरिजाता गिरीशश्च वैष्णवी विष्णुवल्लभः॥९॥

विशालाक्षी विश्वनाथः पुष्पास्त्रा विष्णुमार्गणः।

कौसुम्भवसनोपेता व्याघ्रचर्माम्बरावृतः॥१०॥

मूलप्रकृतिरूपाढ्या परब्रह्मस्वरूपवान्।

रुण्डमालाविभूषाढ्या लसद्रुद्राक्षमालिकः॥११॥

मनोरूपेक्षुकोदण्डा महामेरुधनुर्धरः।

चन्द्रचूडा चन्द्रमौलिर्महामाया महेश्वरः॥१२॥

महाकाली महाकालो दिव्यरूपा दिगम्बरः।

बिन्दुपीठसुखासीना श्रीमदोङ्कारपीठगः॥१३॥

हरिद्राकुङ्कुमालिप्ता भस्मोद्धूलितविग्रहः।

महापद्माटवीलोला महाबिल्वाटवीप्रियः॥१४॥

सुधामयी विषधरो मातङ्गी मकुटेश्वरः।

वेदवेद्या वेदवाजी चक्रेशी विष्णुचक्रदः॥१५॥

जगन्मयी जगद्रूपो मृडानी मृत्युनाशनः।

रामार्चितपदाम्भोजा कृष्णपुत्रवरप्रदः॥१६॥

रमावाणीसुसंसेव्या विष्णुब्रह्मसुसेवितः।

सूर्यचन्द्राग्निनयना तेजस्त्रयविलोचनः॥१७॥

चिदग्निकुण्डसम्भूता महालिङ्गसमुद्भवः।

कम्बुकण्ठी कालकण्ठो वज्रेशी वज्रिपूजितः॥१८॥

त्रिकण्टकी त्रिभङ्गीशो भस्मरक्षा स्मरान्तकः।

हयग्रीववरोद्धात्री मार्कण्डेयवरप्रदः॥१९॥

चिन्तामणिगृहावासा मन्दराचलमन्दिरः।

विन्ध्याचलकृतावासा विन्ध्यशैलार्यपूजितः॥२०॥

मनोन्मनी लिङ्गरूपो जगदम्बा जगत्पिता।

योगनिद्रा योगगम्यो भवानी भवमूर्तिमान्॥२१॥

श्रीचक्रात्मरथारूढा धरणीधरसंस्थितः।

श्रीविद्यावेद्यमहिमा निगमागमसंश्रयः॥२२॥

दशशीर्षसमायुक्ता पञ्चविंशतिशीर्षवान्।

अष्टादशभुजायुक्ता पञ्चाशत्करमण्डितः॥२३॥

ब्राह्म्यादिमातृकारूपा शताष्टेकादशात्मवान्।

स्थिरा स्थाणुस्तथा बाला सद्योजात उमा मृडः॥२४॥

शिवा शिवश्च रुद्राणी रुद्रश्चैवेश्वरीश्वरः।

कदम्बकाननावासा दारुकारण्यलोलुपः॥२५॥

नवाक्षरीमनुस्तुत्या पञ्चाक्षरमनुप्रियः।

नवावरणसम्पूज्या पञ्चायतनपूजितः॥२६॥

देहस्थषट्चक्रदेवी दहराकाशमध्यगः।

योगिनीगणसंसेव्या भृग्वादिप्रमथावृतः॥२७॥

उग्रताराघोररूपः शर्वाणी शर्वमूर्तिमान्।

नागवेणी नागभूषो मन्त्रिणी मन्त्रदैवतः॥२८॥

ज्वलज्जिह्वा ज्वलन्नेत्रो दण्डनाथा दृगायुधः।

पार्थाञ्जनास्त्रसन्दात्री पार्थपाशुपतास्त्रदः॥२९॥

पुष्पवच्चक्रताटङ्का फणिराजसुकुण्डलः।

बाणपुत्रीवरोद्धात्री बाणासुरवरप्रदः॥३०॥

व्यालकञ्चुकसंवीता व्यालयज्ञोपवीतवान्।

नवलावण्यरूपाढ्या नवयौवनविग्रहः॥३१॥

नाट्यप्रिया नाट्यमूर्तिस्त्रिसन्ध्या त्रिपुरान्तकः।

तन्त्रोपचारसुप्रीता तन्त्रादिमविधायकः॥३२॥

नववल्लीष्टवरदा नववीरसुजन्मभूः।

भ्रमरज्या वासुकिज्यो भेरुण्डा भीमपूजितः॥३३॥

निशुम्भशुम्भदमनी नीचापस्मारमर्दनः।

सहस्राराम्बुजारूढा सहस्रकमलार्चितः॥३४॥

गङ्गासहोदरी गङ्गाधरो गौरी त्रियम्बकः।

श्रीशैलभ्रमराम्बाख्या मल्लिकार्जुनपूजितः॥३५॥

भवतापप्रशमनी भवरोगनिवारकः।

चन्द्रमण्डलमध्यस्था मुनिमानसहंसकः॥३६॥

प्रत्यङ्गिरा प्रसन्नात्मा कामेशी कामरूपवान्।

स्वयम्प्रभा स्वप्रकाशः कालरात्री कृतान्तहृत्॥३७॥

सदान्नपूर्णा भिक्षाटो वनदुर्गा वसुप्रदः।

सर्वचैतन्यरूपाढ्या सच्चिदानन्दविग्रहः॥३८॥

सर्वमङ्गलरूपाढ्या सर्वकल्याणदायकः।

राजराजेश्वरी श्रीमद्राजराजप्रियङ्करः॥३९॥

अर्धनारीश्वरस्येदं नाम्नामष्टोत्तरं शतम्।

पठन्नर्चन् सदा भक्त्या सर्वसाम्राज्यमाप्नुयात्॥४०॥

॥इति श्रीस्कान्दपुराणे श्री-अर्धनारीश्वराष्टोत्तरशतनामस्तोत्रं सम्पूर्णम्॥

धन्वन्तर्यष्टोत्तरशतनामस्तोत्रम्

Mon, 01 Jan 0001 00:00:00 +0000

धन्वन्तर्यष्टोत्तरशतनामस्तोत्रम्

ध्यानम्

शङ्खं चक्रं जलौकां दधदमृतघटं चारुदोर्भिश्चतुर्भिः
सूक्ष्मस्वच्छातिहृद्यांशुक-परिविलसन्मौलिमम्भोजनेत्रम्।
कालाम्भोदोज्ज्वलाङ्गं कटितटविलसच्चारूपीताम्बराढ्यं
वन्दे धन्वन्तरिं तं निखिलगदवनप्रौढदावाग्निलीलम्॥

स्तोत्रम्

धन्वन्तरिः सुधापूर्णकलशाढ्यकरो हरिः।

जरामृतित्रस्तदेवप्रार्थनासाधकः प्रभुः॥१॥

निर्विकल्पो निस्समानो मन्दस्मितमुखाम्बुजः।

आञ्जनेयप्रापिताद्रिः पार्श्वस्थविनतासुतः॥२॥

निमग्नमन्दरधरः कूर्मरूपी बृहत्तनुः।

नीलकुञ्चितकेशान्तः परमाद्भुतरूपधृत्॥३॥

कटाक्षवीक्षणाश्वस्तवासुकिः सिंहविक्रमः।

स्मर्तृहृद्रोगहरणो महाविष्ण्वंशसम्भवः॥४॥

प्रेक्षणीयोत्पलश्याम आयुर्वेदाधिदैवतम्।

भेषजग्रहणानेहस्स्मरणीयपदाम्बुजः॥५॥

नवयौवनसम्पन्नः किरीटान्वितमस्तकः।

नक्रकुण्डलसंशोभिश्रवणद्वयशष्कुलिः॥६॥

दीर्घपीवरदोर्दण्डः कम्बुग्रीवोऽम्बुजेक्षणः।

चतुर्भुजः शङ्खधरश्चक्रहस्तो वरप्रदः॥७॥

सुधापात्रोपरिलसदाम्रपत्रलसत्करः।

शतपद्याढ्यहस्तश्च कस्तूरीतिलकाञ्चितः॥८॥

सुकपोलः सुनासश्च सुन्दरभ्रूलताञ्चितः।

स्वङ्गुलीतलशोभाढ्यो गूढजत्रुर्महाहनुः॥९॥

दिव्याङ्गदलसद्बाहुः केयूरपरिशोभितः।

विचित्ररत्नखचितवलयद्वयशोभितः॥१०॥

समोल्लसत्सुजातांसश्चाङ्गुलीयविभूषितः।

सुधागन्धरसास्वादमिलद्भृङ्गमनोहरः॥११॥

लक्ष्मीसमर्पितोत्फुल्लकञ्जमालालसद्गलः।

लक्ष्मीशोभितवक्षस्को वनमालाविराजितः॥१२॥

नवरत्नमणीकॢप्तहारशोभितकन्धरः।

हीरनक्षत्रमालादिशोभारञ्जितदिङ्मुखः॥१३॥

विरजोऽम्बरसंवीतो विशालोराः पृथुश्रवाः।

निम्ननाभिः सूक्ष्ममध्यः स्थूलजङ्घो निरञ्जनः॥१४॥

सुलक्षणपदाङ्गुष्ठः सर्वसामुद्रिकान्वितः।

अलक्तकारक्तपादो मूर्तिमद्वार्धिपूजितः॥१५॥

सुधार्थान्योन्यसंयुध्यद् देवदैतेयसान्त्वनः।

कोटिमन्मथसङ्काशः सर्वावयवसुन्दरः॥१६॥

अमृतास्वादनोद्युक्तदेवसङ्घपरिष्टुतः।

पुष्पवर्षणसंयुक्तगन्धर्वकुलसेवितः॥१७॥

शङ्खतूर्यमृदङ्गादिसुवादित्राप्सरोवृतः।

विष्वक्सेनादियुक्पार्श्वः सनकादिमुनिस्तुतः॥१८॥

साश्चर्यसस्मितचतुर्मुखनेत्रसमीक्षितः।

साशङ्कसम्भ्रमदितिदनुवंश्यसमीडितः॥१९॥

नमनोन्मुखदेवादिमौलीरत्नलसत्पदः।

दिव्यतेजःपुञ्जरूपः सर्वदेवहितोत्सुकः॥२०॥

स्वनिर्गमक्षुब्धदुग्धवाराशिर्दुन्दुभिस्वनः।

गन्धर्वगीतापदानश्रवणोत्कमहामनाः॥२१॥

निष्किञ्चनजनप्रीतो भवसम्प्राप्तरोगहृत्।

अन्तर्हितसुधापात्रो महात्मा मायिकाग्रणीः॥२२॥

क्षणार्धमोहिनीरूपः सर्वस्त्रीशुभलक्षणः।

मदमत्तेभगमनः सर्वलोकविमोहनः॥२३॥

स्रंसन्नीवीग्रन्थिबन्धासक्तदिव्यकराङ्गुलिः।

रत्नदर्वीलसद्धस्तो देवदैत्यविभागकृत्॥२४॥

सङ्ख्यातदेवतान्यासो दैत्यदानववञ्चकः।

देवामृतप्रदाता च परिवेषणहृष्टधीः॥२५॥

उन्मुखोन्मुखदैत्येन्द्रदन्तपङ्कितविभाजकः।

पुष्पवत्सुविनिर्दिष्टराहुरक्षःशिरोहरः॥२६॥

राहुकेतुग्रहस्थानपश्चाद्गतिविधायकः।

अमृतालाभनिर्विण्णयुध्यद् देवारिसूदनः॥२७॥

गरुत्मद्वाहनारूढः सर्वेशस्तोत्रसंयुतः।

स्वस्वाधिकारसन्तुष्टशक्रवह्न्यादिपूजितः॥२८॥

मोहिनीदर्शनायातस्थाणुचित्तविमोहकः।

शचीस्वाहादिदिक्पालपत्नीमण्डलसन्नुतः॥२९॥

वेदान्तवेद्यमहिमा सर्वलोकैकरक्षकः।

राजराजप्रपूज्याङ्घ्रिश्चिन्तितार्थप्रदायकः॥३०॥

धन्वन्तरेर्भगवतो नाम्नामष्टोत्तरं शतम्।

यः पठेत्सततं भक्त्या नीरोगः सुखभाग्भवेत्॥३१॥

॥इति बृहद्ब्रह्मानन्दोपनिषदान्तर्गतं श्री-धन्वन्तर्यष्टोत्तरशतनामस्तोत्रं सम्पूर्णम्॥

दुर्गाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

दुर्गाष्टोत्तरशतनामस्तोत्रम्

न्यासः

अस्य श्रीदुर्गाष्टोत्तरशतनामास्तोत्रमालामन्त्रस्य
महाविष्णुमहेश्वराः ऋषयः। अनुष्टुप् छन्दः।
श्रीदुर्गापरमेश्वरी देवता।
ह्रां बीजम्। ह्रीं शक्तिः। ह्रूं कीलकम्।
सर्वाभीष्टसिद्ध्यर्थे जपहोमार्चने विनियोगः।

स्तोत्रम्

सती साध्वी भवप्रीता भवानी भवमोचनी।

आर्या दुर्गा जया चाऽऽद्या त्रिनेत्रा शूलधारिणी॥१॥

पिनाकधारिणी चित्रा चण्डघण्टा महातपाः।

मनो बुद्धिरहङ्कारा चिद्रूपा च चिदाकृतिः॥२॥

अनन्ता भाविनी भव्या ह्यभव्या च सदागतिः।

शाम्भवी देवमाता च चिन्ता रत्नप्रिया तथा॥३॥

सर्वविद्या दक्षकन्या दक्षयज्ञविनाशिनी।

अपर्णाऽनेकवर्णा च पाटला पाटलावती॥४॥

पट्टाम्बरपरीधाना कलमञ्जीररञ्जिनी।

ईशानी च महाराज्ञी ह्यप्रमेयपराक्रमा॥५॥

रुद्राणी क्रूररूपा च सुन्दरी सुरसुन्दरी।

वनदुर्गा च मातङ्गी मतङ्गमुनिकन्यका॥६॥

ब्राह्मी माहेश्वरी चैन्द्री कौमारी वैष्णवी तथा।

चामुण्डा चैव वाराही लक्ष्मीश्च पुरुषाकृतिः॥७॥

विमला ज्ञानरूपा च क्रिया नित्या च बुद्धिदा।

बहुला बहुलप्रेमा महिषासुरमर्दिनी॥८॥

मधुकैटभहन्त्री च चण्डमुण्डविनाशिनी।

सर्वशास्त्रमयी चैव सर्वदानवघातिनी॥९॥

अनेकशस्त्रहस्ता च सर्वशस्त्रास्त्रधारिणी।

भद्रकाली सदाकन्या कैशोरी युवतिर्यतिः॥१०॥

प्रौढाऽप्रौढा वृद्धमाता घोररूपा महोदरी।

बलप्रदा घोररूपा महोत्साहा महाबला॥११॥

अग्निज्वाला रौद्रमुखी कालरात्री तपस्विनी।

नारायणी महादेवी विष्णुमाया शिवात्मिका॥१२॥

शिवदूती कराली च ह्यनन्ता परमेश्वरी।

कात्यायनी महाविद्या महामेधास्वरूपिणी॥१३॥

गौरी सरस्वती चैव सावित्री ब्रह्मवादिनी।

सर्वतत्त्वैकनिलया वेदमन्त्रस्वरूपिणी॥१४॥

फलश्रुतिः

इदं स्तोत्रं महादेव्या नाम्नाम् अष्टोत्तरं शतम्।

यः पठेत् प्रयतो नित्यं भक्तिभावेन चेतसा॥१५॥

शत्रुभ्यो न भयं तस्य तस्य शत्रुक्षयं भवेत्।

सर्वदुःखदरिद्राच्च सुसुखं मुच्यते ध्रुवम्॥१६॥

विद्यार्थी लभते विद्यां धनार्थी लभते धनम्।

कन्यार्थी लभते कन्यां कन्या च लभते वरम्॥१७॥

ऋणी ऋणाद् विमुच्येत ह्यपुत्रो लभते सुतम्।

रोगाद् विमुच्यते रोगी सुखमत्यन्तमश्नुते॥१८॥

भूमिलाभो भवेत् तस्य सर्वत्र विजयी भवेत्।

सर्वान् कामानवाप्नोति महादेवीप्रसादतः॥१९॥

कुङ्कुमैर्बिल्वपत्रैश्च सुगन्धै रक्तपुष्पकैः।

रक्तपत्रैर्विशेषेण पूजयन् भद्रमश्नुते॥२०॥

॥इति श्री-दुर्गाष्टोत्तरशतनामस्तोत्रं सम्पूर्णम्॥

गणपत्यष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

गणपत्यष्टोत्तरशतनामस्तोत्रम्

ध्यानम्

ॐकारसन्निभमिभाननमिन्दुभालं
मुक्ताग्रबिन्दुममलद्युतिमेकदन्तम्।
लम्बोदरं कलचतुर्भुजमादिदेवं
ध्यायेन्महागणपतिं मतिसिद्धिकान्तम्॥

स्तोत्रम्

गणेश्वरो गणक्रीडो महागणपतिस्तथा।

विश्वकर्ता विश्वमुखो दुर्जयो धूर्जयो जयः॥१॥

सुरूपः सर्वनेत्राधिवासो वीरासनाश्रयः।

योगाधिपस्तारकस्थः पुरुषो गजकर्णकः॥२॥

चित्राङ्गः श्यामदशनो भालचन्द्रश्चतुर्भुजः।

शम्भुतेजा यज्ञकायः सर्वात्मा सामबृंहितः॥३॥

कुलाचलांसो व्योमनाभिः कल्पद्रुमवनालयः।

निम्ननाभिः स्थूलकुक्षिः पीनवक्षा बृहद्भुजः॥४॥

पीनस्कन्धः कम्बुकण्ठो लम्बोष्ठो लम्बनासिकः।

सर्वायवसम्पूर्णः सर्वलक्षणलक्षितः॥५॥

इक्षुचापधरः शूली कान्तिकन्दलिताश्रयः।

अक्षमालाधरो ज्ञानमुद्रावान् विजयावहः॥६॥

कामिनीकामनाकाममालिनीकेलिलालितः।

अमोघसिद्धिराधार आधाराधेयवर्जितः॥७॥

इन्दीवरदलश्याम इन्दुमण्डलनिर्मलः।

कर्मसाक्षी कर्मकर्ता कर्माकर्मफलप्रदः॥८॥

कमण्डलुधरः कल्पः कपर्दी कटिसूत्रभृत्।

कारुण्यदेहः कपिलो गुह्यागमनिरूपितः॥९॥

गुहाशयो गुहाब्धिस्थो घटकुम्भो घटोदरः।

पूर्णानन्दः परानन्दो धनदो धरणीधरः॥१०॥

बृहत्तमो ब्रह्मपरो ब्रह्मण्यो ब्रह्मवित्प्रियः।

भव्यो भूतालयो भोगदाता चैव महामनाः॥११॥

वरेण्यो वामदेवश्च वन्द्यो वज्रनिवारणः।

विश्वकर्ता विश्वचक्षुर्हवनं हव्यकव्यभुक्॥१२॥

स्वतन्त्रः सत्यसङ्कल्पस्तथा सौभाग्यवर्धनः।

कीर्तिदः शोकहारी च त्रिवर्गफलदायकः॥१३॥

चतुर्बाहुश्चतुर्दन्तश्चतुर्थातिथिसम्भवः।

सहस्रशीर्षा पुरुषः सहस्राक्षः सहस्रपात्॥१४॥

कामरूपः कामगतिर्द्विरदो द्वीपरक्षकः।

क्षेत्राधिपः क्षमाभर्ता लयस्थो लड्डुकप्रियः॥१५॥

प्रतिवादिमुखस्तम्भो दुष्टचित्तप्रसादनः।

भगवान् भक्तिसुलभो याज्ञिको याजकप्रियः॥१६॥

इत्येवं देवदेवस्य गणराजस्य धीमतः।

शतमष्टोत्तरं नाम्नां सारभूतं प्रकीर्तितम्॥१७॥

सहस्रनाम्नामाकृष्य मया प्रोक्तं मनोहरम्।
ब्राह्मे मुहूर्ते चोत्थाय स्मृत्वा देवं गणेश्वरम्।
पठेत्स्तोत्रमिदं भक्त्या गणराजः प्रसीदति॥१८॥

॥ इति श्रीगणेशपुराणे उपासनाखण्डे श्रीगणपत्यष्टोत्तरशतनामस्तोत्रं सम्पूर्णम् ॥

गणपति गकार अष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

गणपति गकार अष्टोत्तरशतनामस्तोत्रम्

गकाररूपो गम्बीजो गणेशो गणवन्दितः।

गणनीयो गणोगण्यो गणनातीतसद्गुणः॥१॥

गगनादिकसृद्गङ्गासुतो गङ्गासुतार्चितः।

गङ्गाधरप्रीतिकरो गवीशेड्यो गदापहः॥२॥

गदाधरनुतो गद्यपद्यात्मककवित्वदः।

गजास्यो गजलक्ष्मीवान् गजवाजिरथप्रदः॥३॥

गञ्जानिरतशिक्षाकृद्गणितज्ञो गणोत्तमः।

गण्डदानाञ्चितो गन्ता गण्डोपलसमाकृतिः॥४॥

गगनव्यापको गम्यो गमानादिविवर्जितः।

गण्डदोषहरो गण्डभ्रमद्भ्रमरकुण्डलः॥५॥

गतागतज्ञो गतिदो गतमृत्युर्गतोद्भवः।

गन्धप्रियो गन्धवाहो गन्धसिन्धूरबृन्दगः॥६॥

गन्धादिपूजितो गव्यभोक्ता गर्गादिसन्नुतः।

गरिष्ठो गरभिद्गर्वहरो गरलिभूषणः॥७॥

गविष्ठो गर्जितारावो गभीरहृदयो गदी।

गलत्कुष्ठहरो गर्भप्रदो गर्भार्भरक्षकः॥८॥

गर्भाधारो गर्भवासि-शिशुज्ञान-प्रदायकः।

गरुत्मत्तुल्यजवनो गरुडध्वजवन्दितः॥९॥

गयेडितो गयाश्राद्धफलदश्च गयाकृतिः।

गदाधरावतारी च गन्धर्वनगरार्चितः॥१०॥

गन्धर्वगानसन्तुष्टो गरुडाग्रजवन्दितः।

गणरात्रसमाराध्यो गर्हणस्तुति-साम्यधीः॥११॥

गर्ताभनाभिर्गव्यूतिदीर्घतुण्डो गभस्तिमान्।

गर्हिताचारदूरश्च गरुडोपलभूषितः॥१२॥

गजारिविक्रमो गन्धमूषवाजी गतश्रमः।

गवेषणीयो गहनो गहनस्थमुनिस्तुतः॥१३॥

गवयच्छिद्गण्डकभिद्गह्वरापथवारणः।

गजदन्तायुधो गर्जद्रिपुघ्नो गजकर्णिकः॥१४॥

गजचर्मामयच्छेत्ता गणाध्यक्षो गणार्चितः।

गणिकानर्तनप्रीतो गच्छन् गन्धफली प्रियः॥१५॥

गन्धकादिरसाधीशो गणकानन्ददायकः।

गरभादिजनुर्हर्ता गण्डकीगाहनोत्सुकः॥१६॥

गण्डूषीकृतवाराशिः गरिमालघिमादिदः।

गवाक्षवत्सौधवासी गर्भितो गर्भिणीनुतः॥१७॥

गन्धमादनशैलाभो गण्डभेरुण्डविक्रमः।

गदितो गद्गदारावसंस्तुतो गह्वरीपतिः॥१८॥

गजेशो गरीयान् गद्येड्यो गतभीर्गदितागमः।

गर्हणीय गुणाभावो गङ्गादिकशुचिप्रदः॥१९॥

गणनातीत-विद्या-श्री-बलायुष्यादि-दायकः।

एवं श्रीगणनाथस्य नाम्नामष्टोत्तरं शतम्॥२०॥

पठनाच्छ्रवणात् पुंसां श्रेयः प्रेमप्रदायकम्।

पूजान्ते यः पठेन्नित्यं प्रीतः सन् तस्य विघ्नराट्॥२१॥

यं यं कामयते कामं तं तं शीघ्रं प्रयच्छति।

दूर्वयाभ्यर्चयन् देवमेकविंशतिवासरान्॥२२॥

एकविंशतिवारं यो नित्यं स्तोत्रं पठेद्यदि।

तस्य प्रसन्नो विघ्नेशः सर्वान् कामान् प्रयच्छति॥२३॥

॥ इति श्री-गणपति गकार अष्टोत्तरशतनामस्तोत्रं सम्पूर्णम्॥

गणेशाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

गणेशाष्टोत्तरशतनामस्तोत्रम्

विनायको विघ्नराजो गौरीपुत्रो गणेश्वरः।

स्कन्दाग्रजोऽव्ययो पूतो दक्षोऽध्यक्षो द्विजप्रियः॥१॥

अग्निगर्भच्छिदिन्द्रश्रीप्रदो वाणीबलप्रदः।

सर्वसिद्धिप्रदः शर्वतनयः शर्वरीप्रियः॥२॥

सर्वात्मकः सृष्टिकर्ता देवोऽनेकार्चितः शिवः।

शुद्धो बुद्धिप्रियः शान्तो ब्रह्मचारी गजाननः॥३॥

द्वैमात्रेयो मुनिस्तुत्यो भक्तविघ्नविनाशनः।

एकदन्तश्चतुर्बाहुश्चतुरः शक्तिसंयुतः॥४॥

लम्बोदरः शूर्पकर्णो हरिर्ब्रह्मविदुत्तमः।

कालो ग्रहपतिः कामी सोमसूर्याग्निलोचनः॥५॥

पाशाङ्कुशधरश्चण्डो गुणातीतो निरञ्जनः।

अकल्मषः स्वयंसिद्धः सिद्धार्चितपदाम्बुजः॥६॥

बीजपूरफलासक्तो वरदः शाश्वतः कृतिः।

विद्वत्प्रियो वीतभयो गदी चक्रीक्षुचापधृत्॥७॥

श्रीदोऽजोत्पलकरः श्रीपतिः स्तुतिहर्षितः।

कुलाद्रिभेत्ता जटिलः कलिकल्मषनाशनः॥८॥

चन्द्रचूडामणिः कान्तः पापहारी समाहितः।

आश्रितः श्रीकरः सौम्यो भक्तवाञ्छितदायकः॥९॥

शान्तः कैवल्यसुखदः सच्चिदानन्दविग्रहः।

ज्ञानी दयायुतो दान्तो ब्रह्म द्वेषविवर्जितः॥१०॥

प्रमत्तदैत्यभयदः श्रीकण्ठो विबुधेश्वरः।

रमार्चितो विधिर्नागराजयज्ञोपवीतवान्॥११॥

स्थूलकण्ठः स्वयङ्कर्ता सामघोषप्रियो परः।

स्थूलतुण्डोऽग्रणीर्धीरो वागीशः सिद्धिदायकः॥१२॥

दूर्वाबिल्वप्रियोऽव्यक्तमूर्तिरद्भुतमूर्तिमान्।

शैलेन्द्रतनुजोत्सङ्गखेलनोत्सुकमानसः॥१३॥

स्वलावण्यसुधासारजितमन्मथविग्रहः।
समस्तजगदाधारो मायी मूषिकवाहनः।
हृष्टस्तुष्टः प्रसन्नात्मा सर्वसिद्धिप्रदायकः॥१४॥

॥इति श्री-गणेशाष्टोत्तरशतनामस्तोत्रं सम्पूर्णम्॥

गङ्गाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

गङ्गाष्टोत्तरशतनामस्तोत्रम्

ध्यानम्

सितमकरनिषण्णां शुभ्रवर्णां त्रिनेत्रां
करधृतकलशोद्यत्सोत्पलामत्यभीष्टाम्।
विधिहरिहररूपां सेन्दुकोटीरचूडां
कलितसितदुकूलां जाह्नवीं तां नमामि॥

स्तोत्रम्

श्री-नारद उवाच

गङ्गा नाम परं पुण्यं कथितं परमेश्वर।

नामानि कति शस्तानि गङ्गायाः प्रणिशंस मे॥१॥

श्री-महादेव उवाच

नाम्नां सहस्रमध्ये तु नामाष्टशतमुत्तमम्।

जाह्नव्या मुनिशार्दूल तानि मे शृणु तत्त्वतः॥२॥

गङ्गा त्रिपथगा देवी शम्भुमौलिविहारिणी।

जाह्नवी पापहन्त्री च महापातकनाशिनी॥३॥

पतितोद्धारिणी स्रोतस्वती परमवेगिनी।

विष्णुपादाब्जसम्भूता विष्णुदेहकृतालया॥४॥

स्वर्गाब्धिनिलया साध्वी स्वर्णदी सुरनिम्नगा।

मन्दाकिनी महावेगा स्वर्णशृङ्गप्रभेदिनी॥५॥

देवपूज्यतमा दिव्या दिव्यस्थान निवासिनी।

सुचारुनीररुचिरा महापर्वतभेदिनी॥६॥

भागीरथी भगवती महामोक्षप्रदायिनी।

सिन्धुसङ्गगता शुद्धा रसातलनिवासिनी॥७॥

महाभोगा भोगवती सुभगानन्ददायिनी।

महापापहरा पुण्या परमाह्लाददायिनी॥८॥

पार्वती शिवपत्नी च शिवशीर्षगतालया।

शम्भोर्जटामध्यगता निर्मला निर्मलानना॥९॥

महाकलुषहन्त्री च जह्नुपुत्री जगत्प्रिया।

त्रैलोक्यपावनी पूर्णा पूर्णब्रह्मस्वरूपिणी॥१०॥

जगत्पूज्यतमा चारुरूपिणी जगदम्बिका।

लोकानुग्रहकर्त्री च सर्वलोकदयापरा॥११॥

याम्यभीतिहरा तारा पारा संसारतारिणी।

ब्रह्माण्डभेदिनी ब्रह्मकमण्डलुकृतालया॥१२॥

सौभाग्यदायिनी पुंसां निर्वाणपददायिनी।

अचिन्त्यचरिता चारुरुचिरातिमनोहरा॥१३॥

मर्त्यस्था मृत्युभयहा स्वर्गमोक्षप्रदायिनी।

पापापहारिणी दूरचारिणी वीचिधारिणी॥१४॥

कारुण्यपूर्णा करुणामयी दुरितनाशिनी।

गिरिराजसुता गौरीभगिनी गिरिशप्रिया॥१५॥

मेनकागर्भसम्भूता मैनाकभगिनीप्रिया।

आद्या त्रिलोकजननी त्रैलोक्यपरिपालिनी॥१६॥

तीर्थश्रेष्ठतमा श्रेष्ठा सर्वतीर्थमयी शुभा।

चतुर्वेदमयी सर्वा पितृसन्तृप्तिदायिनी॥१७॥

शिवदा शिवसायुज्यदायिनी शिववल्लभा।

तेजस्विनी त्रिनयना त्रिलोचनमनोरमा॥१८॥

सप्तधारा शतमुखी सगरान्वयतारिणी।

मुनिसेव्या मुनिसुता जह्नुजानुप्रभेदिनी॥१९॥

मकरस्था सर्वगता सर्वाशुभनिवारिणी।

सुदृश्या चाक्षुषीतृप्तिदायिनी मकरालया॥२०॥

सदानन्दमयी नित्यानन्ददा नगपूजिता।

सर्वदेवाधिदेवैश्च परिपूज्यपदाम्बुजा॥२१॥

एतानि मुनिशार्दूल नामानि कथितानि ते।

शस्तानि जाह्नवीदेव्याः सर्वपापहराणि च॥२२॥

य इदं पठते भक्त्या प्रातरुत्थाय नारद।

गङ्गायाः परमं पुण्यं नामाष्टशतमेव हि॥२३॥

तस्य पापानि नश्यन्ति ब्रह्महत्यादिकान्यपि।

आरोग्यमतुलं सौख्यं लभते नात्र संशयः॥२४॥

यत्र कुत्रापि संस्नायात्पठेत्स्तोत्रमनुत्तमम्।

तत्रैव गङ्गास्नानस्य फलं प्राप्नोति निश्चितम्॥२५॥

प्रत्यहं प्रपठेदेतद् गङ्गानामशताष्टकम्।

सोऽन्ते गङ्गामनुप्राप्य प्रयाति परमं पदम्॥२६॥

गङ्गायां स्नानसमये यः पठेद् भक्तिसंयुतः।

सोऽश्वमेधसहस्राणां फलमाप्नोति मानवः॥२७॥

गवामयुतदानस्य यत्फलं समुदीरितम्।

तत्फलं समवाप्नोति पञ्चम्यां प्रपठन्नरः॥२८॥

कार्त्तिक्यां पौर्णमास्यां तु स्नात्वा सगरसङ्गमे।

यः पठेत्स महेशत्वं याति सत्यं न संशयः॥२९॥

॥इति श्रीमद्भागवते महापुराणे श्रीगङ्गाष्टोत्तरशतनामस्तोत्रं सम्पूर्णम्॥

गौर्यष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

गौर्यष्टोत्तरशतनामस्तोत्रम्

गौरी गणेशजननी गिरिराजतनूद्भवा।

गुहाम्बिका जगन्माता गङ्गाधरकुटुम्बिनी॥१॥

वीरभद्रप्रसूर्विश्वव्यापिनी विश्वरूपिणी।

अष्टमूर्त्यात्मिका कष्टदारिद्र्यशमनी शिवा॥२॥

शाम्भवी शङ्करी बाला भवानी भद्रदायिनी।

माङ्गल्यदायिनी सर्वमङ्गला मञ्जुभाषिणी॥३॥

महेश्वरी महामाया मन्त्राराध्या महाबला।

हेमाद्रिजा हैमवती पार्वती पापनाशिनी॥४॥

नारायणांशजा नित्या निरीशा निर्मलाऽम्बिका।

मृडानी मुनिसंसेव्या मानिनी मेनकात्मजा॥५॥

कुमारी कन्यका दुर्गा कलिदोषनिषूदिनी।

कात्यायनी कृपापूर्णा कल्याणी कमलार्चिता॥६॥

सती सर्वमयी चैव सौभाग्यदा सरस्वती।

अमलाऽमरसंसेव्या अन्नपूर्णाऽमृतेश्वरी॥७॥

अखिलागमसंसेव्या सुखसच्चित्सुधारसा।

बाल्याराधितभूतेशा भानुकोटिसमद्युतिः॥८॥

हिरण्मयी परा सूक्ष्मा शीतांशुकृतशेखरा।

हरिद्राकुङ्कुमाराध्या सर्वकालसुमङ्गली॥९॥

सर्वबोधप्रदा सामशिखा वेदान्तलक्षणा।

कर्मब्रह्ममयी कामकलना काङ्क्षितार्थदा॥१०॥

चन्द्रार्कायुतताटङ्का चिदम्बरशरीरिणी।

श्रीचक्रवासिनी देवी कला कामेश्वरप्रिया॥११॥

मारारातिप्रियार्धाङ्गी मार्कण्डेयवरप्रदा।

पुत्रपौत्रप्रदा पुण्या पुरुषार्थप्रदायिनी॥१२॥

सत्यधर्मरता सर्वसाक्षिणी सर्वरूपिणी।

श्यामला बगला चण्डी मातृका भगमालिनी॥१३॥

शूलिनी विरजा स्वाहा स्वधा प्रत्यङ्गिराम्बिका।

आर्या दाक्षायणी दीक्षा सर्ववस्तूत्तमोत्तमा॥१४॥

शिवाभिधाना श्रीविद्या प्रणवार्थस्वरूपिणी।
ह्रीङ्कारी नादरूपा च त्रिपुरा त्रिगुणेश्वरी।
सुन्दरी स्वर्णगौरी च षोडशाक्षरदेवता॥१५॥

॥इति श्री-गौर्यष्टोत्तरशतनामस्तोत्रं सम्पूर्णम्॥

गोदाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

गोदाष्टोत्तरशतनामस्तोत्रम्

ध्यानम्

शतमखमणि नीला चारुकह्लारहस्ता
स्तनभरनमिताङ्गी सान्द्रवात्सल्यसिन्धुः।
अलकविनिहिताभिः स्रग्भिराकृष्टनाथा
विलसतु हृदि गोदा विष्णुचित्तात्मजा नः॥

स्तोत्रम्

श्रीरङ्गनायकी गोदा विष्णुचित्तात्मजा सती।

गोपीवेषधरा देवी भूसुता भोगशालिनी॥१॥

तुलसीकाननोद्भूता श्रीधन्विपुरवासिनी।

भट्टनाथप्रियकरी श्रीकृष्णहितभोगिनी॥२॥

आमुक्तमाल्यदा बाला रङ्गनाथप्रिया परा।

विश्वम्भरा कलालापा यतिराजसहोदरी॥३॥

कृष्णानुरक्ता सुभगा सुलभश्रीः सलक्षणा।

लक्ष्मीप्रियसखी श्यामा दयाञ्चितदृगञ्चला॥४॥

फल्गुन्याविर्भवा रम्या धनुर्मासकृतव्रता।

चम्पकाशोक-पुन्नाग-मालती-विलसत्-कचा॥५॥

आकारत्रयसम्पन्ना नारायणपदाश्रिता।

श्रीमदष्टाक्षरीमन्त्र-राजस्थित-मनोरथा॥६॥

मोक्षप्रदाननिपुणा मनुरत्नाधिदेवता।

ब्रह्मण्या लोकजननी लीलामानुषरूपिणी॥७॥

ब्रह्मज्ञानप्रदा माया सच्चिदानन्दविग्रहा।

महापतिव्रता विष्णुगुणकीर्तनलोलुपा॥८॥

प्रपन्नार्तिहरा नित्या वेदसौधविहारिणी।

श्रीरङ्गनाथमाणिक्यमञ्जरी मञ्जुभाषिणी॥९॥

पद्मप्रिया पद्महस्ता वेदान्तद्वयबोधिनी।

सुप्रसन्ना भगवती श्रीजनार्दनदीपिका॥१०॥

सुगन्धवयवा चारुरङ्गमङ्गलदीपिका।

ध्वजवज्राङ्कुशाब्जाङ्क-मृदुपाद-लताञ्चिता॥११॥

तारकाकारनखरा प्रवालमृदुलाङ्गुली।

कूर्मोपमेय-पादोर्ध्वभागा शोभनपार्ष्णिका॥१२॥

वेदार्थभावतत्त्वज्ञा लोकाराध्याङ्घ्रिपङ्कजा।

आनन्दबुद्बुदाकार-सुगुल्फा परमाऽणुका॥१३॥

तेजःश्रियोज्ज्वलधृतपादाङ्गुलि-सुभूषिता।

मीनकेतन-तूणीर-चारुजङ्घा-विराजिता॥१४॥

ककुद्वज्जानुयुग्माढ्या स्वर्णरम्भाभसक्थिका।

विशालजघना पीनसुश्रोणी मणिमेखला॥१५॥

आनन्दसागरावर्त-गम्भीराम्भोज-नाभिका।

भास्वद्बलित्रिका चारुजगत्पूर्ण-महोदरी॥१६॥

नववल्लीरोमराजी सुधाकुम्भायितस्तनी।

कल्पमालानिभभुजा चन्द्रखण्ड-नखाञ्चिता॥१७॥

सुप्रवाशाङ्गुलीन्यस्तमहारत्नाङ्गुलीयका।

नवारुणप्रवालाभ-पाणिदेश-समञ्चिता॥१८॥

कम्बुकण्ठी सुचुबुका बिम्बोष्ठी कुन्ददन्तयुक्।

कारुण्यरस-निष्यन्द-नेत्रद्वय-सुशोभिता॥१९॥

मुक्ताशुचिस्मिता चारुचाम्पेयनिभनासिका।

दर्पणाकार-विपुल-कपोल-द्वितयाञ्चिता॥२०॥

अनन्तार्क-प्रकाशोद्यन्मणि-ताटङ्क-शोभिता।

कोटिसूर्याग्निसङ्काश-नानाभूषण-भूषिता॥२१॥

सुगन्धवदना सुभ्रू अर्धचन्द्रललाटिका।

पूर्णचन्द्रानना नीलकुटिलालकशोभिता॥२२॥

सौन्दर्यसीमा विलसत्-कस्तूरी-तिलकोज्ज्वला।

धगद्ध-गायमानोद्यन्मणि-सीमन्त-भूषणा॥२३॥

जाज्वल्यमान-सद्रत्न-दिव्यचूडावतंसका।

सूर्यार्धचन्द्र-विलसत्-भूषणाञ्चित-वेणिका॥२४॥

अत्यर्कानल-तेजोधिमणि-कञ्चुकधारिणी।

सद्रत्नाञ्चितविद्योत-विद्युत्कुञ्जाभ-शाटिका॥२५॥

नानामणिगणाकीर्ण-हेमाङ्गदसुभूषिता।

कुङ्कुमागरु-कस्तूरी-दिव्यचन्दन-चर्चिता॥२६॥

स्वोचितौज्ज्वल्य-विविध-विचित्र-मणि-हारिणी।

असङ्ख्येय-सुखस्पर्श-सर्वातिशय-भूषणा॥२७॥

मल्लिका-पारिजातादि दिव्यपुष्प-स्रगञ्चिता।

श्रीरङ्गनिलया पूज्या दिव्यदेशसुशोभिता॥२८॥

॥इति श्री-गोदाष्टोत्तरशतनामस्तोत्रं सम्पूर्णम्॥

हरिहराष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

हरिहराष्टोत्तरशतनामस्तोत्रम्

ध्यानम्

माधवोमाधवावीशौ सर्वसिद्धिविधायिनौ।

वन्दे परस्परात्मानौ परस्परनुतिप्रियौ॥

स्तोत्रम्

गोविन्द माधव मुकुन्द हरे मुरारे
शम्भो शिवेश शशिशेखर शूलपाणे।
दामोदराच्युत जनार्दन वासुदेव
त्याज्या भटा य इति सन्ततमामनन्ति॥१॥

गङ्गाधरान्धकरिपो हर नीलकण्ठ
वैकुण्ठ कैटभरिपो कमठाब्जपाणे।
भूतेश खण्डपरशो मृड चण्डिकेश
त्याज्या भटा य इति सन्ततमामनन्ति॥२॥

विष्णो नृसिंह मधुसूदन चक्रपाणे
गौरीपते गिरिश शङ्कर चन्द्रचूड।
नारायणासुरनिबर्हणा शार्ङ्गपाणे
त्याज्या भटा य इति सन्ततमामनन्ति॥३॥

मृत्युञ्जयोग्र विषमेक्षण कामशत्रो
श्रीकान्त पीतवसनाम्बुदनील शौरे।
ईशान कृत्तिवसन त्रिदशैकनाथ
त्याज्या भटा य इति सन्ततमामनन्ति॥४॥

लक्ष्मीपते मधुरिपो पुरुषोत्तमाद्य
श्रीकण्ठ दिग्वसन शान्त पिनाकपाणे।
आनन्दकन्द धरणीधर पद्मनाभ
त्याज्या भटा य इति सन्ततमामनन्ति॥५॥

सर्वेश्वर त्रिपुरसूदन देवदेव
ब्रह्मण्यदेव गरुडध्वज शङ्खपाणे।
त्र्यक्षोरगाभरण बालमृगाङ्कमौले
त्याज्या भटा य इति सन्ततमामनन्ति॥६॥

श्रीराम राघव रमेश्वर रावणारे
भूतेश मन्मथरिपो प्रमथाधिनाथ।
चाणूरमर्दन हृषीकपते मुरारे
त्याज्या भटा य इति सन्ततमामनन्ति॥७॥

शूलिन् गिरीश रजनीशकलावतंस
कंसप्रणाशन सनातन केशिनाश।
भर्ग त्रिनेत्र भव भूतपते पुरारे
त्याज्या भटा य इति सन्ततमामनन्ति॥८॥

गोपीपते यदुपते वसुदेवसूनो
कर्पूरगौर वृषभध्वज भालनेत्र।
गोवर्धनोद्धरण धर्मधुरीण गोप
त्याज्या भटा य इति सन्ततमामनन्ति॥९॥

स्थाणो त्रिलोचन पिनाकधर स्मरारे
कृष्णानिरुद्ध कमलाकर कल्मषारे।
विश्वेश्वर त्रिपथगार्द्रजटाकलाप
त्याज्या भटा य इति सन्ततमामनन्ति॥१०॥

अष्टोत्तराधिकशतेन सुचारुनाम्नां
सन्दर्भितां ललितरत्नकदम्बकोन।
सन्नामकां दृढगुणां द्विजकण्ठगां यः
कुर्यादिमांस्रजमहो स यमं न पश्येत्॥११॥

अगस्तिरुवाच

हरिहरपुत्राष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

हरिहरपुत्राष्टोत्तरशतनामस्तोत्रम्

महाशास्ता महादेवो महादेवसुतोऽव्ययः।

लोककर्ता लोकभर्ता लोकहन्ता परात्परः॥१॥

त्रिलोकरक्षको धन्वी तपस्वी भूतसैन्यकः।

मन्त्रवेत्ता महावेत्ता मारुतो जगदीश्वरः॥२॥

लोकाध्यक्षोऽग्रणीः श्रीमान् अप्रमेयपराक्रमः।

सिंहारूढो गजारूढो हयारूढो महेश्वरः॥३॥

नानाशास्त्रधरोऽनर्घो नानाविद्याविशारदः।

नानारूपधरो वीरो नानाप्राणिनिषेवितः॥४॥

भूतेशः पूजितो भृत्यो भुजङ्गाभरणोत्तमः।

इक्षुधन्वी पुष्पबाणो महारूपो महाप्रभुः॥५॥

मायादेवीसुतो मान्यो महानीतो महागुणः।

महाशैवो महारुद्रो वैष्णवो विष्णुपूजकः॥६॥

विघ्नेशो वीरभद्रेशो भैरवो षण्मुखध्रुवः।

मेरुशृङ्गसमासीनो मुनिसङ्घनिषेवितः॥७॥

देवो भद्रो जगन्नाथो गणनाथो गणेश्वरः।

महायोगी महामायी महाज्ञानी महाधिपः॥८॥

देवशास्ता भूतशास्ता भीमहासपराक्रमः।

नागहारश्च नागेशो व्योमकेशः सनातनः॥९॥

कालज्ञो निर्गुणो नित्यो नित्यतृप्तो निराश्रयः।

लोकाश्रयो गुणाधीशश्चतुःषष्टिकलामयः॥१०॥

ऋग्यजुःसामरूपी च मल्लकासुरभञ्जनः।

त्रिमूर्तिर्दैत्यमथनो प्रकृतिः पुरुषोत्तमः॥११॥

सुगुणश्च महाज्ञानी कामदः कमलेक्षणः।

कल्पवृक्षो महावृक्षो विद्यावृक्षो विभूतिदः॥१२॥

संसारतापविच्छेत्ता पशुलोकभयङ्करः।

रोगहन्ता प्राणदाता परगर्वविभञ्जनः॥१३॥

सर्वशास्त्रार्थतत्त्वज्ञो नीतिमान् पापभञ्जनः।

पुष्कलापूर्णसंयुक्तो परमात्मा सतां गतिः॥१४॥

अनन्तादित्यसङ्काशः सुब्रह्मण्यानुजो बली।

भक्तानुकम्पी देवेशो भगवान् भक्तवत्सलः॥१५॥

॥इति श्री-हरिहरपुत्राष्टोत्तरशतनामस्तोत्रं सम्पूर्णम्॥

हयग्रीवाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

हयग्रीवाष्टोत्तरशतनामस्तोत्रम्

ध्यानम्

वन्दे पूरितचन्द्रमण्डलगतं श्वेतारविन्दासनं
मन्दाकिन्यमृताब्धिकुन्दकुमुदक्षीरेन्दुहासं हरिम्।
मुद्रापुस्तकशङ्खचक्रविलसच्छ्रीमद्भुजामण्डितं
नित्यं निर्मलभारतीपरिमलं विश्वेशमश्वाननम्॥१॥

ज्ञानानन्दमयं देवं निर्मलं स्फटिकाकृतिम्।

आधारं सर्वविद्यानां हयग्रीवमुपास्महे॥

स्तोत्रम्

हयग्रीवो महाविष्णुः केशवो मधुसूदनः।

गोविन्दः पुण्डरीकाक्षो विष्णुर्विश्वम्भरो हरिः॥२॥

आदित्यः सर्ववागीशः सर्वाधारः सनातनः।

निराधारो निराकारो निरीशो निरुपद्रवः॥३॥

निरञ्जनो निष्कलङ्को नित्यतृप्तो निरामयः।

चिदानन्दमयः साक्षी शरण्यः सर्वदायकः॥४॥

श्रीमान् लोकत्रयाधीशः शिवः सारस्वतप्रदः।

वेदोद्धर्त्ता वेदनिधिर्वेदवेद्यः प्रभूतनः॥५॥

पूर्णः पूरयिता पुण्य़ः पुण्यकीर्तिः परात्परः।

परमात्मा परञ्ज्योतिः परेशः पारगः परः॥६॥

र्सर्ववेदात्मको विद्वान् वेदवेदाङ्गपारगः।

सकलोपनिषद्वेद्यो निष्कलः सर्वशास्त्रकृत्॥७॥

अक्षमालाज्ञानमुद्रायुक्तहस्तो वरप्रदः।

पुराणपुरुषः श्रेष्ठः शरण्यः परमेश्वरः॥८॥

शान्तो दान्तो जितक्रोधो जितामित्रो जगन्मयः।

जगन्मृत्युहरो जीवो जयदो जाड्यनाशनः॥९॥

जनप्रियो जनस्तुत्यो जापकप्रियकृत्प्रभुः।

विमलो विश्वरूपश्च विश्वगोप्ता विधिस्तुतः॥१०॥

विधीन्द्रशिवसंस्तुत्यः शान्तिदः क्षान्तिपारगः।

श्रेयप्रदः श्रुतिमयः श्रेयसां पतिरीश्वरः॥११॥

अच्युतोऽनन्तरूपश्च प्राणदः पृथिवीपतिः।

अव्यक्तो व्यक्तरूपश्च सर्वसाक्षी तमोहरः॥१२॥

अज्ञाननाशको ज्ञानी पूर्णचन्द्रसमप्रभः।

ज्ञानदो वाक्पतिर्योगी योगीशः सर्वकामदः॥१३॥

महायोगी महामौनी मौनीशः श्रेयसां पतिः।

हंसः परमहंसश्च विश्वगोप्ता विराट् स्वराट्॥१४॥

शुद्धस्फटिकसङ्काशो जटामण्डलसंयुतः।

आदिमध्यान्तरहितः सर्ववागीश्वरेश्वरः॥१५॥

॥इति श्री-हयग्रीवाष्टोत्तरशतनामस्तोत्रं सम्पूर्णम्॥

कार्त्तिकेयाष्टोत्तरशतनामस्तोत्रम्

Mon, 01 Jan 0001 00:00:00 +0000

कार्त्तिकेयाष्टोत्तरशतनामस्तोत्रम्

ध्यानम्

सिन्दूरारुणकान्तिमिन्दुवदनं केयूरहारादिभिः
दिव्यैराभरणैर्विभूषिततनुं स्वर्गस्य सौख्यप्रदम्।
अम्भोजाभयशक्तिकुक्कुटधरं रत्नाङ्गरागांशुकं
सुब्रह्मण्यमुपास्महे प्रणमतां भीतिप्रणाशोद्यतम्॥

स्तोत्रम्

विश्वामित्रस्तु भगवान् कुमारं शरणं गतः।

स्तवं दिव्यं सम्प्रचक्रे महासेनस्य चापि सः॥१॥

अष्टोत्तरशतनाम्नां शृणु त्वं तानि फाल्गुन।

जपेन येषां पापानि यान्ति ज्ञानमवाप्नुयात्॥२॥

त्वं ब्रह्मवादी त्वं ब्रह्मा ब्रह्मब्राह्मणवत्सलः।

ब्रह्मण्यो ब्रह्मदेवश्च ब्रह्मदो ब्रह्मसङ्ग्रहः॥३॥

त्वं परं परमं तेजो मङ्गलानां च मङ्गलम्।

अप्रमेयगुणश्चैव मन्त्राणां मन्त्रगो भवान्॥४॥

त्वं सावित्रीमयो देवः सर्वत्रैवापराजितः।

मन्त्रः सर्वात्मको देवः षडक्षरवतां वरः॥५॥

गवां पुत्रः सुरारिघ्नः सम्भवो भवभावनः।

पिनाकी शत्रुहा चैव कूटः स्कन्दः सुराग्रणीः॥६॥

द्वादशो भूर्भुवो भावी भुवःपुत्रो नमस्कृतः।

नागराजः सुधर्मात्मा नाकपृष्ठः सनातनः॥७॥

हेमगर्भो महागर्भो जयश्च विजयेश्वरः।

त्वं कर्ता त्वं विधाता च नित्योऽनित्योऽरिमर्दनः॥८॥

महासेनो महातेजा वीरसेनश्चमूपतिः।

सुरसेनः सुराध्यक्षो भीमसेनो निरामयः॥९॥

शौरिर्यदुर्महातेजा वीर्यवान् सत्यविक्रमः।

तेजोगर्भोऽसुररिपुः सुरमूर्तिः सुरोर्जितः॥१०॥

कृतज्ञो वरदः सत्यः शरण्यः साधुवत्सलः।

सुव्रतः सूर्यसङ्काशो वह्निगर्भो रणोत्सुकः॥११॥

पिप्पली शीघ्रगो रौद्रिर्गाङ्गेयो रिपुदारणः।

कार्त्तिकेयः प्रभुः क्षान्तो नीलदंष्ट्रो महामनाः॥१२॥

निग्रहो निग्रहाणां च नेता त्वं दैत्यसूदनः।

प्रग्रहः परमानन्दः क्रोधघ्नस्तारकोऽच्छिदः॥१३॥

कुक्कुटी बहुलो वादी कामदो भूरिवर्धनः।

अमोघोऽमृतदो ह्यग्निः शत्रुघ्नः सर्वबोधनः॥१४॥

अनघो ह्यमरः श्रीमानुन्नतो ह्यग्निसम्भवः।

पिशाचराजः सूर्याभः शिवात्मा त्वं सनातनः॥१५॥

एवं स सर्वभूतानां संस्तुतः परमेश्वरः।

नाम्नामष्टशतेनायं विश्वामित्रमहर्षिणा॥१६॥

प्रसन्नमूर्तिराहेदं मुनीन्द्र व्रियतामिति।

मम त्वया द्विजश्रेष्ठ स्तुतिरेषा विनिर्मिता॥१७॥

भविष्यति मनोभीष्टप्राप्तये प्राणिनां भुवि।

विवर्धते कुले लक्ष्मीस्तस्य यः प्रपठेदिमम्॥१८॥

न राक्षसाः पिशाचा वा न भूतानि न चाऽऽपदः।

विघ्नकारीणि तद्गेहे यत्रैवं संस्तुवन्ति माम्॥१९॥

दुःस्वप्नं न च पश्येत्स बद्धो मुच्येत बन्धनात्।

स्तवस्यास्य प्रभावेण दिव्यभावः पुमान्भवेत्॥२०॥

॥इति श्रीस्कन्दमहापुराणे माहेश्वरखण्डान्तर्गते कुमारिकाखण्डे श्रीकार्त्तिकेयाष्टोत्तरशतनामस्तोत्रं सम्पूर्णम्॥

कृष्णाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

कृष्णाष्टोत्तरशतनामस्तोत्रम्

ॐ अस्य श्रीकृष्णाष्टोत्तरशतनामस्तोत्रस्य श्रीशेष ऋषिः।
अनुष्टुप्-छन्दः। श्रीकृष्णो देवता।
श्रीकृष्णप्रीत्यर्थे श्री-कृष्णाष्टोत्तरशतनामजपे विनियोगः।

ध्यानम्

शिखिमुकुटविशेषं नीलपद्माङ्गदेशं
विधुमुखकृतकेशं कौस्तुभापीतवेशम्।
मधुररवकलेशं शं भजे भ्रातृशेषं
व्रजजनवनितेशं माधवं राधिकेशम्॥

श्रीशेष उवाच

वसुन्धरे वरारोहे जनानामस्ति मुक्तिदम्।

सर्वमङ्गलमूर्धन्यमणिमाद्यष्टसिद्धिदम्॥

महापातककोटिघ्नं सर्वतीर्थफलप्रदम्।

समस्तजपयज्ञानां फलदं पापनाशनम्॥

शृणु देवि प्रवक्ष्यामि नाम्नामष्टोत्तर शतम्।

सहस्रनाम्नां पुण्यानां त्रिरावृत्या तु यत्फलम्॥

एकावृत्या तु कृष्णस्य नामैकं तत्प्रयच्छति।

तस्मात्पुण्यतरं चैतत्स्तोत्रं पातकनाशनम्॥

नाम्नामष्टोत्तरशतस्याहमेव ऋषिः प्रिये।

छन्दोऽनुष्टुब्देवता तु योगः कृष्णप्रियावहः॥

स्तोत्रम्

श्रीकृष्णः कमलानाथो वासुदेवः सनातनः।

वसुदेवात्मजः पुण्यो लीलामानुषविग्रहः॥१॥

श्रीवत्सकौस्तुभधरो यशोदावत्सलो हरिः।

चतुर्भुजात्तचक्रासिगदाशङ्खाम्बुजायुधः॥२॥

देवकीनन्दनः श्रीशो नन्दगोपप्रियात्मजः।

यमुनावेगसंहारी बलभद्रप्रियानुजः॥३॥

पूतनाजीवितहरः शकटासुरभञ्जनः।

नन्दव्रजजनानन्दी सच्चिदानन्दविग्रहः॥४॥

नवनीतविलिप्ताङ्गो नवनीतनटोऽनघः।

नवनीतनवाहारो मुचुकुन्दप्रसादकः॥५॥

षोडशस्त्रीसहस्रेशस्त्रिभङ्गी मधुराकृतिः।

शुकवागमृताब्धीन्दुर्गोविन्दो योगिनां पतिः॥६॥

वत्सवाटचरोऽनन्तो धेनुकासुरभञ्जनः।

तृणीकृततृणावर्तो यमलार्जुनभञ्जनः॥७॥

उत्तालतालभेत्ता च तमालश्यामलाकृतिः।

गोपगोपीश्वरो योगी कोटिसूर्यसमप्रभः॥८॥

इलापतिः परञ्ज्योतिर्यादवेन्द्रो यदूद्वहः।

वनमाली पीतवासाः पारिजातापहारकः॥९॥

गोवर्धनाचलोद्धर्ता गोपालः सर्वपालकः।

अजो निरञ्जनः कामजनकः कञ्जलोचनः॥१०॥

मधुहा मथुरानाथो द्वारकानायको बली।

वृन्दावनान्तसञ्चारी तुलसीदामभूषणः॥११॥

स्यमन्तकमणेर्हर्ता नरनारायणात्मकः।

कुब्जाकृष्णाम्बरधरो मायी परमपूरुषः॥१२॥

मुष्टिकासुरचाणूरमल्लयुद्धविशारदः।

संसारवैरी कंसारिर्मुरारिर्नरकान्तकः॥१३॥

अनादिब्रह्मचारी च कृष्णाव्यसनकर्षकः।

शिशुपालशिरश्छेत्ता दुर्योधनकुलान्तकः॥१४॥

विदुराक्रूरवरदो विश्वरूपप्रदर्शकः।

सत्यवाक् सत्यसङ्कल्पः सत्यभामारतो जयी॥१५॥

सुभद्रापूर्वजो विष्णुर्भीष्ममुक्तिप्रदायकः।

जगद्गुरुर्जगन्नाथो वेणुनादविशारदः॥१६॥

वृषभासुरविध्वंसी बाणासुरकरान्तकः।

युधिष्ठिरप्रतिष्ठाता बर्हिबर्हावतंसकः॥१७॥

पार्थसारथिरव्यक्तो गीतामृतमहोदधिः।

कालीयफणिमाणिक्यरञ्जितश्रीपदाम्बुजः॥१८॥

दामोदरो यज्ञभोक्ता दानवेन्द्रविनाशकः।

नारायणः परब्रह्म पन्नगाशनवाहनः॥१९॥

जलक्रीडासमासक्तगोपीवस्त्रापहारकः।

पुण्यश्लोकस्तीर्थपादो वेदवेद्यो दयानिधिः॥२०॥

सर्वतीर्थात्मकः सर्वग्रहरूपी परात्परः।

इत्येवं कृष्णदेवस्य नाम्नामष्टोत्तरं शतम्॥२१॥

कृष्णेन कृष्णभक्तेन श्रुत्वा गीतामृतं पुरा।

स्तोत्रं कृष्णप्रियकरं कृतं तस्मान्मया श्रुतम्॥२२॥

कृष्णप्रेमामृतं नाम परमानन्ददायकम्।

अत्युपद्रवदुःखघ्नं परमायुष्यवर्धनम्॥२३॥

दानं व्रतं तपस्तीर्थं यत्कृतं त्विह जन्मनि।

पठतां शृण्वतां चैव कोटिकोटिगुणं भवेत्॥२४॥

पुत्त्रप्रदमपुत्त्राणामगतीनां गतिप्रदम्।

धनावहं दरिद्राणां जयेच्छूनां जयावहम्॥२५॥

शिशूनां गोकुलानां च पुष्टिदं पुण्यवर्धनम्।

बालरोगग्रहादीनां शमनं शान्तिकारकम्॥२६॥

अन्ते कृष्णस्मरणदं भवतापत्रयापहम्।

असिद्धसाधकं भद्रे जपादिकरमात्मनाम्॥२७॥

कृष्णाय यादवेन्द्राय ज्ञानमुद्राय योगिने।

नाथाय रुक्मिणीशाय नमो वेदान्तवेदिने॥२८॥

इमं मन्त्रं महादेवि जपन्नेव दिवानिशम्।

सर्वग्रहानुग्रहभाक् सर्वप्रियतमो भवेत्॥२९॥

पुत्रपौत्रैः परिवृतः सर्वसिद्धिसमृद्धिमान्।

निषेव्यभोगानन्तेऽपि कृष्णसायुज्यमाप्युनात्॥३०॥

॥ इति श्रीब्रह्माण्डे महापुराणे वायुप्रोक्ते मध्यभागे तृतीय उपोद्घातपादे भार्गवचरिते षट्त्रिंशत्तमोऽध्यायान्तर्गत श्रीकृष्णाष्टोत्तरशतनामस्तोत्रं सम्पूर्णम् ॥

लक्ष्म्यष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

लक्ष्म्यष्टोत्तरशतनामस्तोत्रम्

ध्यानम्

वन्दे पद्मकरां प्रसन्नवदनां सौभाग्यदां भाग्यदां
हस्ताभ्यामभयप्रदां मणिगणैर्नानाविधैर्भूषिताम्।
भक्ताभीष्टफलप्रदां हरिहरब्रह्मादिभिः सेवितां
पार्श्वे पङ्कजशङ्खपद्मनिधिभिर्युक्तां सदा शक्तिभिः॥

सरसिजनिलये सरोजहस्ते धवलतमांशुकगन्धमाल्यशोभे।

भगवति हरिवल्लभे मनोज्ञे त्रिभुवनभूतिकरि प्रसीद मह्यम्॥

स्तोत्रम्

प्रकृतिं विकृतिं विद्यां सर्वभूतहितप्रदाम्।

श्रद्धां विभूतिं सुरभिं नमामि परमात्मिकाम्॥१॥

वाचं पद्मालयां पद्मां शुचिं स्वाहां स्वधां सुधाम्।

धन्यां हिरण्मयीं लक्ष्मीं नित्यपुष्टां विभावरीम्॥२॥

अदितिं च दितिं दीप्तां वसुधां वसुधारिणीम्।

नमामि कमलां कान्तां क्षमां क्षीरोदसम्भवाम्॥३॥

अनुग्रहप्रदां बुद्धिमनघां हरिवल्लभाम्।

अशोकाममृतां दीप्तां लोकशोकविनाशिनीम्॥४॥

नमामि धर्मनिलयां करुणां लोकमातरम्।

पद्मप्रियां पद्महस्तां पद्माक्षीं पद्मसुन्दरीम्॥५॥

पद्मोद्भवां पद्ममुखीं पद्मनाभप्रियां रमाम्।

पद्ममालाधरां देवीं पद्मिनीं पद्मगन्धिनीम्॥६॥

पुण्यगन्धां सुप्रसन्नां प्रसादाभिमुखीं प्रभाम्।

नमामि चन्द्रवदनां चन्द्रां चन्द्रसहोदरीम्॥७॥

चतुर्भुजां चन्द्ररूपामिन्दिरामिन्दुशीतलाम्।

आह्लादजननीं पुष्टिं शिवां शिवकरीं सतीम्॥८॥

विमलां विश्वजननीं तुष्टिं दारिद्र्यनाशिनीम्।

प्रीतिपुष्करिणीं शान्तां शुक्लमाल्याम्बरां श्रियम्॥९॥

भास्करीं बिल्वनिलयां वरारोहां यशस्विनीम्।

वसुन्धरामुदाराङ्गां हरिणीं हेममालिनीम्॥१०॥

धनधान्यकरीं सिद्धिं स्त्रैणसौम्यां शुभप्रदाम्।

नृपवेश्मगतानन्दां वरलक्ष्मीं वसुप्रदाम्॥११॥

शुभां हिरण्यप्राकारां समुद्रतनयां जयाम्।

नमामि मङ्गलां देवीं विष्णुवक्षःस्थलस्थिताम्॥१२॥

विष्णुपत्नीं प्रसन्नाक्षीं नारायणसमाश्रिताम्।

दारिद्र्यध्वंसिनीं देवीं सर्वोपद्रवहारिणीम्॥१३॥

नवदुर्गां महाकालीं ब्रह्मविष्णुशिवात्मिकाम्।

त्रिकालज्ञानसम्पन्नां नमामि भुवनेश्वरीम्॥१४॥

लक्ष्मीं क्षीरसमुद्रराजतनयां श्रीरङ्गधामेश्वरीं
दासीभूतसमस्तदेववनितां लोकैकदीपाङ्कुराम्।
श्रीमन्मन्दकटाक्षलब्धविभवब्रह्मेन्द्रगङ्गाधरां
त्वां त्रैलोक्यकुटुम्बिनीं सरसिजां वन्दे मुकुन्दप्रियाम्॥१५॥

मातर्नमामि कमले कमलायताक्षि
श्रीविष्णुहृत्कमलवासिनि विश्वमातः।
क्षीरोदजे कमलकोमलगर्भगौरि
लक्ष्मि प्रसीद सततं नमतां शरण्ये॥१६॥

फलश्रुतिः

त्रिकालं यो जपेद् विद्वान् षण्मासं विजितेन्द्रियः।

दारिद्र्यध्वंसनं कृत्वा सर्वमाप्नोत्ययत्नतः॥१७॥

देवीनामसहस्रेषु पुण्यमष्टोत्तरं शतम्।

येन श्रियमवाप्नोति कोटिजन्मदरिद्रितः॥१८॥

भृगुवारे शतं धीमान् पठेद् वत्सरमात्रकम्।

अष्टैश्वर्यमवाप्नोति कुबेर इव भूतले॥१९॥

दारिद्र्यमोचनं नाम स्तोत्रमम्बापरं शतम्।

येन श्रियमवाप्नोति कोटिजन्मदरिद्रितः॥२०॥

भुक्त्वा तु विपुलान् भोगानस्याः सायुज्यमाप्नुयात्।
प्रातःकाले पठेन्नित्यं सर्वदुःखोपशान्तये।
पठंस्तु चिन्तयेद् देवीं सर्वाभरणभूषिताम्॥२१॥

॥इति श्री-लक्ष्म्यष्टोत्तरशतनामस्तोत्रं सम्पूर्णम्॥

लक्ष्मीनारायणाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

लक्ष्मीनारायणाष्टोत्तरशतनामस्तोत्रम्

श्रीर्विष्णुः कमला शार्ङ्गी लक्ष्मीर्वैकुण्ठनायकः।

पद्मालया चतुर्बाहुः क्षीराब्धितनयाऽच्युतः॥१॥

इन्दिरा पुण्डरीकाक्षो रमा गरुडवाहनः।

भार्गवी शेषपर्यङ्को विशालाक्षी जनार्दनः॥२॥

स्वर्णाङ्गी वरदो देवी हरिरिन्दुमुखी प्रभुः।

सुन्दरी नरकध्वंसी लोकमाता मुरान्तकः॥३॥

भक्तप्रिया दानवारिरम्बिका मधुसूदनः।

वैष्णवी देवकीपुत्रो रुक्मिणी केशिमर्दनः॥४॥

वरलक्ष्मी जगन्नाथः कीरवाणी हलायुधः।

नित्या सत्यव्रतो गौरी शौरिः कान्ता सुरेश्वरः॥५॥

नारायणी हृषीकेशः पद्महस्ता त्रिविक्रमः।

माधवी पद्मनाभश्च स्वर्णवर्णा निरीश्वरः॥६॥

सती पीताम्बरः शान्ता वनमाली क्षमाऽनघः।

जयप्रदा बलिध्वंसी वसुधा पुरुषोत्तमः॥७॥

राज्यप्रदाऽखिलाधारो माया कंसविदारणः।

महेश्वरी महादेवो परमा पुण्यविग्रहः॥८॥

रमा मुकुन्दः सुमुखी मुचुकुन्दवरप्रदः।

वेदवेद्याऽब्धि-जामाता सुरूपाऽर्केन्दुलोचनः॥९॥

पुण्याङ्गना पुण्यपादो पावनी पुण्यकीर्तनः।

विश्वप्रिया विश्वनाथो वाग्रूपी वासवानुजः॥१०॥

सरस्वती स्वर्णगर्भो गायत्री गोपिकाप्रियः।

यज्ञरूपा यज्ञभोक्ता भक्ताभीष्टप्रदा गुरुः॥११॥

स्तोत्रक्रिया स्तोत्रकारः सुकुमारी सवर्णकः।

मानिनी मन्दरधरो सावित्री जन्मवर्जितः॥१२॥

मन्त्रगोप्त्री महेष्वासो योगिनी योगवल्लभः।

जयप्रदा जयकरो रक्षित्री सर्वरक्षकः॥१३॥

अष्टोत्तरशतं नाम्नां लक्ष्म्या नारायणस्य च।

यः पठेत् प्रातरुत्थाय सर्वदा विजयी भवेत्॥१४॥

॥इति श्री-लक्ष्मीनारायणाष्टोत्तरशतनामस्तोत्रं सम्पूर्णम्॥

नृसिंहाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

नृसिंहाष्टोत्तरशतनामस्तोत्रम्

नारसिंहो महासिंहो दिव्यसिंहो महाबलः।

उग्रसिंहो महादेवः स्तम्भजश्चोग्रलोचनः॥१॥

रौद्रः सर्वाद्भुतः श्रीमान् योगानन्दस्त्रिविक्रमः।

हरिः कोलाहलश्चक्री विजयो जयवर्धनः॥२॥

पञ्चाननः परब्रह्म अघोरो घोरविक्रमः।

ज्वालामुखो ज्वालामाली महाज्वालो महाप्रभुः॥३॥

निटिलाक्षः सहस्राक्षो दुर्निरीक्ष्यः प्रतापनः।

महादंष्ट्रायुधः प्राज्ञश्चण्डकोपी सदाशिवः॥४॥

हिरण्यकशिपुध्वंसी दैत्यदानवभञ्जनः।

गुणभद्रो महाभद्रो बलभद्रो सुभद्रकः॥५॥

करालो विकरालश्च विकर्ता सर्वकर्तृकः।

शिंशुमारस्त्रिलोकात्मा ईशः सर्वेश्वरो विभुः॥६॥

भैरवाडम्बरो दिव्यश्चाच्युतः कविमाधवः।

अधोक्षजोऽक्षरः शर्वो वनमाली वरप्रदः॥७॥

विश्वम्भरोऽद्भुतो भव्यो विष्णुश्च पुरुषोत्तमः।

अमोघास्त्रो नखास्त्रश्च सूर्यज्योतिः सुरेश्वरः॥८॥

सहस्रबाहुः सर्वज्ञः सर्वसिद्धिप्रदायकः।

वज्रदंष्ट्रो वज्रनखो महानादः परन्तपः॥९॥

सर्वमन्त्रैकरूपश्च सर्वयन्त्रविदारणः।

सर्वतन्त्रात्मकोऽव्यक्तः सुव्यक्तो भक्तवत्सलः॥१०॥

वैशाखशुक्लसम्भूतः शरणागतवत्सलः।

उदारकीर्तिः पुण्यात्मा महात्मा चण्डविक्रमः॥११॥

वेदत्रयप्रपूज्यश्च भगवान् परमेश्वरः।

श्रीवत्साङ्कः श्रीनिवासो जगद्व्यापी जगन्मयः॥१२॥

जगत्पालो जगन्नाथो महाकायो द्विरूपभृत्।

परमात्मा परञ्ज्योतिर्निर्गुणश्च नृकेसरी॥१३॥

परतत्त्वं परन्धाम सच्चिदानन्दविग्रहः।

लक्ष्मीनृसिंहः सर्वात्मा धीरः प्रह्लादपालकः॥१४॥

॥इति श्री-नृसिंहाष्टोत्तरशतनामस्तोत्रं सम्पूर्णम्॥

रामाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

रामाष्टोत्तरशतनामस्तोत्रम्

ध्यानम्

श्रीराघवं दशरथात्मजमप्रमेयं
सीतापतिं रघुकुलान्वयरत्नदीपम्।
आजानुबाहुमरविन्ददलायताक्षं
रामं निशाचरविनाशकरं नमामि॥

स्तोत्रम्

श्रीरामो रामचन्द्रश्च रामभद्रश्च शाश्वतः।

राजीवलोचनः श्रीमान् राजेन्द्रो रघुपुङ्गवः॥१॥

जानकीवल्लभो जैत्रो जितामित्रो जनार्दनः।

विश्वामित्रप्रियो दान्तः शरण्यत्राणतत्परः॥२॥

वालिप्रमथनो वाग्मी सत्यवाक् सत्यविक्रमः।

सत्यव्रतो व्रतधरः सदा हनुमदाश्रयः॥३॥

कौसलेयः खरध्वंसी विराधवधपण्डितः।

विभीषणपरित्राता हरकोदण्डखण्डनः॥४॥

सप्ततालप्रभेत्ता च दशग्रीवशिरोहरः।

जामदग्न्यमहादर्पदलनस्ताडकान्तकृत्॥५॥

वेदान्तपारो वेदात्मा भवबन्धैकभेषजः।

दूषणत्रिशिरोरिश्च त्रिमूर्तिस्त्रिगुणस्त्रयी॥६॥

त्रिविक्रमस्त्रिलोकात्मा पुण्यचारित्रकीर्तनः।

त्रिलोकरक्षको धन्वी दण्डकारण्यवासकृत्॥७॥

अहल्यापावनश्चैव पितृभक्तो वरप्रदः।

जितेन्द्रियो जितक्रोधो जितलोभो जगद्गुरुः॥८॥

ऋक्षवानरसङ्घाती चित्रकूटसमाश्रयः।

जयन्तत्राणवरदः सुमित्रापुत्रसेवितः॥९॥

सर्वदेवाधिदेवश्च मृतवानरजीवनः।

मायामारीचहन्ता च महाभोगो महाभुजः॥१०॥

सर्वदेवस्तुतः सौम्यो ब्रह्मण्यो मुनिसत्तमः।

महायोगो महोदारः सुग्रीवस्थिरराज्यदः॥११॥

सर्वपुण्याधिकफलः स्मृतः सर्वाघनाशनः।

आदिपुरुषो महापुरुषः परमः पुरुषस्तथा॥१२॥

पुण्योदयो महासारः पुराणः पुरुषोत्तमः।

स्मितवक्त्रो मितभाषी पूर्वभाषी च राघवः॥१३॥

अनन्तगुणगम्भीरो धीरो दान्तगुणोत्तमः।

मायामानुषचारित्रो महादेवाभिपूजितः॥१४॥

सेतुकृज्जितवारीशः सर्वतीर्थमयो हरिः।

श्यामाङ्गः सुन्दरः शूरः पीतवासा धनुर्धरः॥१५॥

सर्वयज्ञाधिपो यज्ञो जरामरणवर्जितः।

शिवलिङ्गप्रतिष्ठाता सर्वाघगणवर्जितः॥१६॥

परमात्मा परं ब्रह्म सच्चिदानन्दविग्रहः।

परञ्ज्योतिः परन्धाम पराकाशः परात्परः॥१७॥

परेशः पारगः पारः सर्वभूतात्मकः शिवः।

इति श्रीरामचन्द्रस्य नाम्नामष्टोत्तरं शतम्॥१८॥

फलश्रुतिः

गुह्याद् गुह्यतरं देवि तव स्नेहात् प्रकीर्तितम्।

यः पठेच्छृणुयाद् वाऽपि भक्तियुक्तेन चेतसा॥१॥

स सर्वैर्मुच्यते पापैः कल्पकोटिशतोद्भवैः।

जलानि स्थलतां यान्ति शत्रवो यान्ति मित्रताम्॥२॥

राजानो दासतां यान्ति वह्नयो यान्ति सौम्यताम्।

आनुकूल्यं च भूतानि स्थैर्यं यान्ति चलाः श्रियः॥३॥

अनुग्रहं ग्रहा यान्ति शान्तिमायान्त्युपद्रवाः।

पठतो भक्तिभावेन नरस्य गिरिसम्भवे॥४॥

यः पठेत् परया भक्त्या तस्य वश्यं जगत्त्रयम्।

यं यं कामं प्रकुरुते तं तमाप्नोति कीर्तनात्॥५॥

कल्पकोटिसहस्राणि कल्पकोटिशतानि च।

वैकुण्ठे मोदते नित्यं दशपूर्वैर्देशापरैः॥६॥

रामं दूर्वादलश्यामं पद्माक्षं पीतवाससम्।

स्तुवन्ति नामभिर्दिव्यैर्न ते संसारिणो जनाः॥७॥

रामाय रामभद्राय रामचन्द्राय वेधसे।

रघुनाथाय नाथाय सीतायाः पतये नमः॥८॥

इमं मन्त्रं महादेवि जपन्नेव दिवानिशम्।

सर्वपापविनिर्मुक्तो विष्णुसायुज्यमाप्नुयात्॥९॥

॥इति श्री-पाद्मे महापुराणे उत्तरखण्डे उमामहेश्वरसंवादे रामचन्द्राष्टोत्तरशतनामकथनं नामैकाशीत्यधिकद्विशततमेऽध्याये श्रीरामचन्द्राष्टोत्तरशतनामस्तोत्रं सम्पूर्णम्॥

सरस्वत्यष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

सरस्वत्यष्टोत्तरशतनामस्तोत्रम्

ध्यानम्

या कुन्देन्दुतुषारहारधवला या शुभ्रवस्त्रावृता
या वीणावरदण्डमण्डितकरा या श्वेतपद्मासना।
या ब्रह्माच्युतशङ्करप्रभृतिभिर्देवैः सदा पूजिता
सा मां पातु सरस्वती भगवती निःशेषजाड्यापहा॥

स्तोत्रम्

सरस्वती महाभद्रा महामाया वरप्रदा।

श्रीप्रदा पद्मनिलया पद्माक्षी पद्मवक्त्रका॥१॥

शिवानुजा पुस्तकभृज्ज्ञानमुद्रा रमा परा।

कामरूपा महाविद्या महापातकनाशिनी॥२॥

महाश्रया मालिनी च महाभोगा महाभुजा।

महाभागा महोत्साहा दिव्याङ्गा सुरवन्दिता॥३॥

महाकाली महापाशा महाकारा महाङ्कुशा।

पीता च विमला विश्वा विद्युन्माला च वैष्णवी॥४॥

चन्द्रिका चन्द्रवदना चन्द्रलेखविभूषिता।

सावित्री सुरसा देवी दिव्यालङ्कारभूषिता॥५॥

वाग्देवी वसुदा तीव्रा महाभद्रा महाबला।

भोगदा भारती भामा गोविन्दा गोमती शिवा॥६॥

जटिला विन्ध्यवासा च विन्ध्याचलविराजिता।

चण्डिका वैष्णवी ब्राह्मी ब्रह्मज्ञानैकसाधना॥७॥

सौदामिनी सुधामूर्तिः सुभद्रा सुरपूजिता।

सुवासिनी सुनासा च विनिद्रा पद्मलोचना॥८॥

विद्यारूपा विशालाक्षी ब्रह्मजाया महाफला।

त्रयीमूर्ती त्रिकालज्ञा त्रिगुणा शास्त्ररूपिणी॥९॥

शुम्भासुरप्रमथिनी शुभदा च स्वरात्मिका।

रक्तबीजनिहन्त्री च चामुण्डा चाम्बिका तथा॥१०॥

मुण्डकायप्रहरणा धूम्रलोचनमर्दना।

सर्वदेवस्तुता सौम्या सुरासुरनमस्कृता॥११॥

कालरात्रिः कलाधारा रूपसौभाग्यदायिनी।

वाग्देवी च वरारोहा वाराही वारिजासना॥१२॥

चित्राम्बरा चित्रगन्धा चित्रमाल्यविभूषिता।

कान्ता कामप्रदा वन्द्या विद्याधरसुपूजिता॥१३॥

श्वेतानना नीलभुजा चतुर्वर्गफलप्रदा।

चतुराननसाम्राज्या रक्तमध्या निरञ्जना॥१४॥

हंसासना नीलजङ्घा ब्रह्मविष्णुशिवात्मिका।

एवं सरस्वतीदेव्या नाम्नामष्टोत्तरं शतम्॥१५॥

॥इति श्री-सरस्वत्यष्टोत्तरशतनामस्तोत्रं सम्पूर्णम्॥

शक्त्यष्टोत्तरशतदिव्यस्थानीयनामस्तोत्रम्

Mon, 01 Jan 0001 00:00:00 +0000

Shatanama Stotram

शक्त्यष्टोत्तरशतदिव्यस्थानीयनामस्तोत्रम्

दक्ष उवाच

एवमुक्तोऽब्रवीद् दक्षः केषु केषु मयाऽनघे।

तीर्थेषु च त्वं द्रष्टव्या स्तोतव्या कैश्च नामभिः॥

देव्युवाच

सर्वगा सर्वभूतेषु द्रष्टव्या सर्वतो भुवि।

सप्तलोकेषु यत्किञ्चिद् रहितं न मया विना॥

तथाऽपि येषु स्थानेषु द्रष्टव्याः सिद्धिमीप्सुभिः।

स्मर्तव्या भूतिकामैर्वा तानि वक्ष्यामि तत्त्वतः॥

स्तोत्रम्

वाराणस्यां विशालाक्षी नैमिषे लिङ्गधारिणी।

प्रयागे ललिता देवी कामुका गन्धमादने॥१॥

मानसे कुमुदा नाम विश्वकाया तथेश्वरे।

गोमन्ते गोमती नाम मन्दरे कामचारिणी॥२॥

मदोत्कटा चैत्ररथे जयन्ती हस्तिनापुरे।

कान्यकुब्जे तथा गौरी रम्भा मलयपर्वते॥३॥

एकाम्रके कीर्तिमती विश्वां विश्वेश्वरे विदुः।

पुष्करे पुरुहूतेति केदारे मार्गदायिनी॥४॥

नन्दा हिमवतः पृष्ठे गोकर्णे भद्रकर्णिका।

स्थानेश्वरे भवानी तु बिल्वके बिल्वपत्रिका॥५॥

श्रीशैले माधवी नाम भद्रा भद्रेश्वरे तथा।

जया वराहशैले तु कमला कमलालये॥६॥

रुद्रकोट्यां च रुद्राणी काली कालञ्जरे गिरौ।

महालिङ्गे तु कपिला मर्कोटे मुकुटेश्वरी॥७॥

शालग्रामे महादेवी शिवलिङ्गे जलप्रिया।

मायापुर्यां कुमारी तु सन्ताने ललिता तथा॥८॥

उत्पलाक्षी सहस्राक्षे हिरण्याक्षे महोत्पला।

गयायां मङ्गला नाम विमला पुरुषोत्तमे॥९॥

विपाशायामघोराक्षी पाटला पुण्ड्रवर्धने।

नारायणी सुपार्श्वे तु त्रिकूटे रुद्रसुन्दरी॥१०॥

विपुले विपुला नाम कल्याणी मलयाचले।

कौटवी कोटितीर्थेषु सुगन्धा माधवे वने॥११॥

गोदाश्रमे त्रिसन्ध्या तु गङ्गाद्वारे रतिप्रिया।

शिवकुण्डे शिवानन्दा नन्दिनी देविकातटे॥१२॥

रुक्मिणी द्वारवत्यां तु राधा वृन्दावने वने।

देवकी मथुरायां तु पाताले परमेश्वरी॥१३॥

चित्रकूटे तथा सीता विन्ध्ये विन्ध्याधिवासिनी।

सह्यद्वारे करीरा तु हरिश्चन्द्रे तु चन्द्रिका॥१४॥

रमणा रामतीर्थे तु यमुनायां मृगावती।

करवीरे महालक्ष्मीरुमादेवी विनायके॥१५॥

अरोगा वैद्यनाथे तु महाकाले महेश्वरी।

अभयेत्युष्णतीर्थेषु चामृता विन्ध्यकन्दरे॥१६॥

माण्डव्ये माण्डवी नाम स्वाहा माहेश्वरे पुरे।

छागलाण्डे प्रचण्डा तु चण्डिकामरकण्टके॥१७॥

सोमेश्वरे वरारोहा प्रभासे पुष्करावती।

देवमाता सरस्वत्यां पारा पारातटे मता॥१८॥

महालये महाभागा पयोष्ण्यां पिङ्गलेश्वरी।

सिंहिका कृतशौचे तु कार्त्तिकेये तु शङ्करी॥१९॥

उत्पलावर्तके लोला सुभद्रा शोणसङ्गमे।

महासिद्धवने लक्ष्मीरनङ्गा भरताश्रमे॥२०॥

जालन्धरे विश्वमुखी तारा किष्किन्धपर्वते।

देवदारुवने पुष्टिर्मेधा काश्मीरमण्डले॥२१॥

भीमादेवी हिमाद्रौ तु पुष्टिर्विश्वेश्वरे तथा।

कपालमोचने शुद्धिर्माता कायावरोहणे॥२२॥

शङ्खोद्धारे ध्वनिर्नाम धृतिः पिण्डारके तथा।

काला तु चन्द्रभागायामच्चोदे शिवकारिणी॥२३॥

वेणायाममृता नाम बदर्याम् उर्वशी तथा।

औषधी चोत्तरकुरौ कुशद्वीपे कुशोदका॥२४॥

मन्मथा हेमकूटे तु मुकुटे सत्यवादिनी।

अश्वत्थे वन्दनीया तु निधिर्वैश्रवणालये॥२५॥

गायत्री वेदवदने पार्वती शिवसन्निधौ।

देवलोके तथेन्द्राणी ब्रह्मास्येषु सरस्वती॥२६॥

सूर्यबिम्बे प्रभा नाम मातॄणां वैष्णवी तथा।

अरुन्धती सतीनां तु रामासु च तिलोत्तमा॥२७॥

चित्ते ब्रह्मकला नाम शक्तिः सर्वशरीरिणाम्।

एतदुद्देशतः प्रोक्तं नामाष्टशतमुत्तमम्॥२८॥

अष्टोत्तरं च तीर्थानां शतमेतदुदाहृतम्।

यः पठेच्छृणुयाद्वाऽपि सर्वपापैः प्रमुच्यते॥२९॥

एषु तीर्थेषु यः कृत्वा स्नानं पश्यन्ति मां नरः।

सर्वपापविनिर्मुक्तः कल्पं शिवपुरे वसेत्॥३०॥

यस्तु मत्परमः कालं करोत्येतेषु मानवः।

स भित्त्वा ब्रह्मसदनं पदमभ्येति शाङ्करम्॥३१॥

नामाष्टशतकं यस्तु श्रावयेच्छिवसन्निधौ।

तृतीयायामथाष्टम्यां बहुपुत्रो भवेन्नरः॥३२॥

गोदाने श्राद्धकाले वा अहन्यहनि वा पुनः।

देवार्चनविधौ विद्वान् पठन् ब्रह्माधिगच्छति॥३३॥

एवं वदन्ती सा तत्र ददाहात्मानमात्मना।

स्वायम्भुवेऽपि काले च दक्षप्राचेतसोऽभवत्॥३४॥

पार्वती चाभवद् देवी शिवदेहार्धधारिणी।

मेनागर्भसमुत्पन्ना भुक्तिमुक्तिफलप्रदा॥३५॥

अरुन्धती जपन्त्येतत्तदाप्ता योगमुत्तमम्।

पुरूरवाश्च राजर्षिर्लोकेषु जयतामगात्॥३६॥

ययातिः पुत्रलाभं तु धनलाभं तु भार्गवः।
तथाऽन्ये देवदैत्याश्च ब्राह्मणाः क्षत्रियास्तथा।
वैश्याः शूद्राश्च बहवः सिद्धिमीयुर्यथेप्सिताम्॥३७॥

यत्रेतल्लिखितं तिष्ठेत् पूज्यते देवसन्निधौ।

न तत्र शोकदौर्गत्यं कदाचिदपि जायते॥३८॥

॥इति श्रीमत्स्यमहापुराणे त्रयोदशेऽध्याये श्री-शक्त्यष्टोत्तरशतदिव्यस्थानीयनामस्तोत्रं सम्पूर्णम्॥

शङ्कराचार्याष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

शङ्कराचार्याष्टोत्तरशतनामस्तोत्रम्

ध्यानम्

कैलासाचल-मध्यस्थं कामिताभीष्टदायकम्।

ब्रह्मादि-प्रार्थना-प्राप्त-दिव्यमानुष-विग्रहम्॥

भक्तानुग्रहणैकान्त-शान्त-स्वान्त-समुज्ज्वलम्।

संयज्ञं संयमीन्द्राणां सार्वभौमं जगद्गुरुम्॥

किङ्करीभूतभक्तैनः पङ्कजातविशोषणम्।

ध्यायामि शङ्कराचार्यं सर्वलोकैकशङ्करम्॥

स्तोत्रम्

श्रीशङ्कराचार्यवर्यो ब्रह्मज्ञानप्रदायकः।

अज्ञानतिमिरादित्यः सुज्ञानाम्बुधिचन्द्रमा॥१॥

वर्णाश्रमप्रतिष्ठाता श्रीमान् मुक्तिप्रदायकः।

शिष्योपदेशनिरतो भक्ताभीष्टप्रदायकः॥२॥

सूक्ष्मतत्त्वरहस्यज्ञः कार्याकार्यप्रबोधकः।

ज्ञानमुद्राञ्चितकरः शिष्य-हृत्ताप-हारकः॥३॥

पारिव्राज्याश्रमोद्धर्ता सर्वतन्त्रस्वतन्त्रधीः।

अद्वैतस्थापनाचार्यः साक्षाच्छङ्कररूपभृत्॥४॥

षण्मतस्थापनाचार्यस्त्रयीमार्गप्रकाशकः।

वेदवेदान्ततत्त्वज्ञो दुर्वादिमतखण्डनः॥५॥

वैराग्यनिरतः शान्तः संसारार्णवतारकः।

प्रसन्नवदनाम्भोजः परमार्थप्रकाशकः॥६॥

पुराणस्मृतिसारज्ञो नित्यतृप्तो महच्छुचिः।

नित्यानन्दो निरातङ्को निःसङ्गो निर्मलात्मकः॥७॥

निर्ममो निरहङ्कारो विश्ववन्द्यपदाम्बुजः।

सत्त्वप्रधानः सद्भावः सङ्ख्यातीतगुणोज्ज्वलः॥८॥

अनघः सारहृदयः सुधीः सारस्वतप्रदः।

सत्यात्मा पुण्यशीलश्च साङ्ख्ययोगविचक्षणः॥९॥

तपोराशिर्महातेजा गुणत्रयविभागवित्।

कलिघ्नः कालधर्मज्ञस्तमोगुणनिवारकः॥१०॥

भगवान् भारतीजेता शारदाह्वानपण्डितः।

धर्माधर्मविभागज्ञो लक्ष्यभेदप्रदर्शकः॥११॥

नादबिन्दुकलाभिज्ञो योगिहृत्पद्मभास्करः।

अतीन्द्रिय-ज्ञाननिधिर्नित्यानित्यविवेकवान्॥१२॥

चिदानन्दश्चिन्मयात्मा परकाय-प्रवेशकृत्।

अमानुष-चरित्राढ्यः क्षेमदायी क्षमाकरः॥१३॥

भवो भद्रप्रदो भूरिमहिमा विश्वरञ्जकः।

स्वप्रकाशः सदाधारो विश्वबन्धुः शुभोदयः॥१४॥

विशालकीर्तिर्वागीशः सर्वलोकहितोत्सुकः।

कैलासयात्रा-सम्प्राप्त-चन्द्रमौलि-प्रपूजकः॥१५॥

काञ्च्यां श्रीचक्र-राजाख्य-यन्त्रस्थापन-दीक्षितः।

श्रीचक्रात्मक-ताटङ्क-पोषिताम्बा-मनोरथः॥१६॥

श्रीब्रह्मसूत्रोपनिषद्भाष्यादिग्रन्थकल्पकः।

चतुर्दिक्चतुराम्नायप्रतिष्ठाता महामतिः॥१७॥

द्विसप्तति-मतोच्छेत्ता सर्वदिग्विजयप्रभुः।

काषायवसनोपेतो भस्मोद्धूलितविग्रहः॥१८॥

ज्ञानात्मकैकदण्डाढ्यः कमण्डलुलसत्करः।

व्याससन्दर्शनप्रीतो भगवत्पादसंज्ञकः॥१९॥

चतुःषष्टिकलाभिज्ञो ब्रह्मराक्षस-मोक्षदः।

सौन्दर्यलहरीमुख्यबहुस्तोत्रविधायकः॥२०॥

श्रीमन्मण्डनमिश्राख्यस्वयम्भूजयसन्नुतः।

तोटकाचार्यसम्पूज्यः पद्मपादार्चिताङ्घ्रिकः॥२१॥

हस्तामलकयोगीन्द्रब्रह्मज्ञानप्रदायकः।

सुरेश्वरादि-सच्छिष्य-सन्न्यासाश्रम-दायकः॥२२॥

निर्व्याजकरुणामूर्तिर्जगत्पूज्यो जगद्गुरुः।
भेरीपटहवाद्यादिराजलक्षणलक्षितः।
सकृत्स्मरणसन्तुष्टः सर्वज्ञो ज्ञानदायकः॥२३॥

॥इति श्री-शङ्कराचार्याष्टोत्तरशतनामस्तोत्रं सम्पूर्णम्॥

शिवाष्टोत्तरशतदिव्यस्थानीयनामस्तोत्रम्

Mon, 01 Jan 0001 00:00:00 +0000

Shatanama Stotram

शिवाष्टोत्तरशतदिव्यस्थानीयनामस्तोत्रम्

अष्टोत्तरशतं भूमौ स्थितं क्षेत्रं वदाम्यहम्।

कैवल्यशैले श्रीकण्ठः केदारो हिमवत्यपि॥१॥

काशीपुर्यां विश्वनाथः श्रीशैले मल्लिकार्जुनः।

प्रयागे नीलकण्ठेशो गयायां रुद्रनामकः॥२॥

नीलकण्ठेश्वरः साक्षात् कालञ्जरपुरे शिवः।

द्राक्षारामे तु भीमेशो मायूरे चाम्बिकेश्वरः॥३॥

ब्रह्मावर्ते देवलिङ्गः प्रभासे शशिभूषणः।

वृषध्वजाभिधः श्रीमतिः श्वेतहस्तिपुरेश्वरः॥४॥

गोकर्णेशस्तु गोकर्णे सोमेशः सोमनाथके।

श्रीरूपाख्ये त्यागराजो वेदे वेदपुरीश्वरः॥५॥

भीमारामे तु भीमेशो मन्थने कालिकेश्वरः।

मधुरायां चोक्कनाथो मानसे माधवेश्वरः॥६॥

श्रीवाञ्छके चम्पकेशः पञ्चवट्यां वटेश्वरः।

गजारण्ये तु वैद्येशस्तीर्थाद्रौ तीर्थकेश्वरः॥७॥

कुम्भकोणे तु कुम्भेशो लेपाक्ष्यां पापनाशनः।

कण्वपुर्यां तु कण्वेशो मध्ये मध्यार्जुनेश्वरः॥८॥

हरिहरपुरे श्रीशङ्करनारायणेश्वरः।

विरञ्चिपुर्यां मार्गेशः पञ्चनद्यां गिरीश्वरः॥९॥

पम्पापुर्यां विरूपाक्षः सोमाद्रौ मल्लिकार्जुनः।

त्रिमकूटे त्वगस्त्येशः सुब्रह्मण्येऽहिपेश्वरः॥१०॥

महाबलेश्वरः साक्षान्महाबलशिलोच्चये।

रविणा पूजितो दक्षिणावर्तेऽर्केश्वरः स्वयम्॥११॥

वेदारण्ये महापुण्ये वेदारण्येश्वराभिधः।

मूर्तित्रयात्मकः सोमपुर्यां सोमेश्वराभिधः॥१२॥

अवन्त्यां रामलिङ्गेशः काश्मीरे विजयेश्वरः।

महानन्दिपुरे साक्षान्महानन्दिपुरेश्वरः॥१३॥

कोटितीर्थे तु कोटीशो वृद्धे वृद्धाचलेश्वरः।

महापुण्ये तत्र ककुद्गिरौ गङ्गाधरेश्वरः॥१४॥

चामराज्याख्यनगरे चामराजेश्वरः स्वयम्।

नन्दीश्वरो नन्दिगिरौ चण्डेशो बधिराचले॥१५॥

नञ्जुण्डेशो गरपुरे शतशृङ्गे।

घनानन्दाचले सोमो नल्लूरे विमलेश्वरः॥१६॥

नीडानाथपुरे साक्षान्नीडानाथेश्वरः स्वयम्।

एकान्ते रामलिङ्गेशः श्रीनागे कुण्डलीश्वरः॥१७॥

श्रीकन्यायां त्रिभङ्गीश उत्सङ्गे राघवेश्वरः।

मत्स्यतीर्थे तु तीर्थेशस्त्रिकूटे ताण्डवेश्वरः॥१८॥

प्रसन्नाख्यपुरे मार्गसहायेशो वरप्रदः।

गण्डक्यां शिवनाभस्तु श्रीपतौ श्रीपतीश्वरः॥१९॥

धर्मपुर्यां धर्मलिङ्गः कन्याकुब्जे कलाधरः।

वाणिग्रामे विरिञ्चेशो नेपाले नकुलेश्वरः॥२०॥

मार्कण्डेयो जगन्नाथे स्वयम्भूर्नर्मदातटे।

धर्मस्थले मञ्जुनाथो व्यासेशस्तु त्रिरूपके॥२१॥

स्वर्णावत्यां कलिङ्गेशो निर्मले पन्नगेश्वरः।

पुण्डरीके जैमिनीशोऽयोध्यायां मधुरेश्वरः॥२२॥

सिद्धवट्यां तु सिद्धेशः श्रीकूर्मे त्रिपुरान्तकः।

मणिकुण्डलतीर्थे तु मणिमुक्तानदीश्वरः॥२३॥

वटाटव्यां कृत्तिवासास्त्रिवेण्यां सङ्गमेश्वरः।

स्तनिताख्ये तु मल्लेश इन्द्रकीलेऽर्जुनेश्वरः॥२४॥

शेषाद्रौ कपिलेशस्तु पुष्पे पुष्पगिरीश्वरः।

भुवनेशश्चित्रकूटे तूज्जिन्यां कालिकेश्वरः॥२५॥

ज्वालामुख्यां शूलटङ्को मङ्गल्यां सङ्गमेश्वरः।

बृहतीशस्तञ्जापुर्यां रामेशो वह्निपुष्करे॥२६॥

लङ्काद्वीपे तु मत्स्येशः कूर्मेशो गन्धमादने।

विन्ध्याचले वराहेशो नृसिंहः स्यादहोबिले॥२७॥

कुरुक्षेत्रे वामनेशस्ततः कपिलतीर्थके।

तथा परशुरामेशः सेतौ रामेश्वराभिधः॥२८॥

साकेते बलरामेशो बौद्धेशो वारणावते।

तत्त्वक्षेत्रे च कल्कीशः कृष्णेशः स्यान्महेन्द्रके॥२९॥

॥इति ललितागमे ज्ञानपादे शिवलिङ्गप्रादुर्भावपटलान्तर्गते श्रीशिवाष्टोत्तरशतदिव्यस्थानीयनामस्तोत्रं सम्पूर्णम्॥

शिवाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

शिवाष्टोत्तरशतनामस्तोत्रम्

न्यासः

अस्य शिवाष्टोत्तरशतनामस्तोत्रस्य विष्णुर्ऋषिः, अनुष्टुप् छन्दः,
शिवः परमेश्वरो देवता, शिवप्रसादसिद्ध्यर्थे जपे विनियोगः।

ध्यानम्

ध्यायेन्नित्यं महेशं रजतगिरिनिभं चारुचन्द्रावतंसं
रत्नाकल्पोज्ज्वलाङ्गं परशुमृगवराभीतिहस्तं प्रसन्नम्।
पद्मासीनं समन्तात् स्तुतममरगणैर्व्याघ्रकृत्तिं वसानं
विश्वाद्यं विश्वबीजं निखिलभयहरं पञ्चवक्त्रं त्रिनेत्रम्॥

स्तोत्रम्

शिवो महेश्वरः शम्भुः पिनाकी शशिशेखरः।

वामदेवो विरूपाक्षः कपर्दी नीललोहितः॥१॥

शङ्करः शूलपाणिश्च खट्वाङ्गी विष्णुवल्लभः।

शिपिविष्टोऽम्बिकानाथः श्रीकण्ठो भक्तवत्सलः॥२॥

भवः शर्वस्त्रिलोकीशः शितिकण्ठः शिवाप्रियः।

उग्रः कपाली कामारिरन्धकासुरसूदनः॥३॥

गङ्गाधरो ललाटाक्षः कालकालः कृपानिधिः।

भीमः परशुहस्तश्च मृगपाणिर्जटाधरः॥४॥

कैलासवासी कवची कठोरस्त्रिपुरान्तकः।

वृषाङ्को वृषभारूढो भस्मोद्धूलितविग्रहः॥५॥

सामप्रियः स्वरमयस्त्रयीमूर्तिरनीश्वरः।

सर्वज्ञः परमात्मा च सोमसूर्याग्निलोचनः॥६॥

हविर्यज्ञमयः सोमः पञ्चवक्त्रः सदाशिवः।

विश्वेश्वरो वीरभद्रो गणनाथः प्रजापतिः॥७॥

हिरण्यरेता दुर्धर्षो गिरीशो गिरिशोऽनघः।

भुजङ्गभूषणो भर्गो गिरिधन्वा गिरिप्रियः॥८॥

कृत्तिवासाः पुरारातिर्भगवान् प्रमथाधिपः।

मृत्युञ्जयः सूक्ष्मतनुर्जगद्व्यापी जगद्गुरुः॥९॥

व्योमकेशो महासेनजनकश्चारुविक्रमः।

रुद्रो भूतपतिः स्थाणुरहिर्बुध्न्यो दिगम्बरः॥१०॥

अष्टमूर्तिरनेकात्मा सात्त्विकः शुद्धविग्रहः।

शाश्वतः खण्डपरशुरजः पाशविमोचकः॥११॥

मृडः पशुपतिर्देवो महादेवोऽव्ययो हरिः।

पूषदन्तभिदव्यग्रो दक्षाध्वरहरो हरः॥१२॥

भगनेत्रभिदव्यक्तः सहस्राक्षः सहस्रपात्।

अपवर्गप्रदोऽनन्तस्तारकः परमेश्वरः॥१३॥

फलश्रुतिः

इमानि दिव्यनामानि जप्यन्ते सर्वदा मया।

नामकल्पलतेयं मे सर्वाभीष्टप्रदायिनि॥

नामान्येतानि सुभगे शिवदानि न संशयः।

वेदसर्वस्वभूतानि नामान्येतानि वस्तुतः॥

एतानि यानि नामानि तानि सर्वार्थदान्यतः।

जप्यन्ते सादरं नित्यं मया नियमपूर्वकम्॥

वेदेषु शिवनामानि श्रेष्ठान्यघहराणि च।

सन्त्यनन्तानि सुभगे वेदेषु विविधेष्वपि॥

तेभ्यो नामानि सङ्गृह्य कुमाराय महेश्वरः।

अष्टोत्तरसहस्रं तु नाम्नामुपदिशत् पुरा॥

॥इति शिवरहस्ये सप्तमेंऽशे त्रयोदशेऽध्याये नामकल्पलता नाम शिवाष्टोत्तरशतनामस्तोत्रं सम्पूर्णम्॥

सीताष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

सीताष्टोत्तरशतनामस्तोत्रम्

ध्यानम्

वामाङ्गे रघुनायकस्य रुचिरे या संस्थिता शोभना
या विप्राधिपयानरम्यनयना या विप्रपालानना।
विद्युत्पुञ्जविराजमानवसना भक्तार्तिसङ्खण्डना
श्रीमद्राघवपादपद्मयुगलन्यस्तेक्षणा साऽवतु॥

स्तोत्रम्

श्रीसीता जानकी देवी वैदेही राघवप्रिया।

रमाऽवनिसुता रामा राक्षसान्तप्रकारिणी॥१॥

रत्नगुप्ता मातुलुङ्गी मैथिली भक्ततोषदा।

पद्माक्षजा कञ्जनेत्रा स्मितास्या नूपुरस्वना॥२॥

वैकुण्ठनिलया मा श्रीर्मुक्तिदा कामपूरणी।

नृपात्मजा हेमवर्णा मृदुलाङ्गी सुभाषिणी॥३॥

कुशाम्बिका दिव्यदा च लवमाता मनोहरा।

हनुमद्वन्दितपदा मुग्धा केयूरधारिणी॥४॥

अशोकवनमध्यस्था रावणादिकमोहिनी।

विमानसंस्थिता सुभ्रूः सुकेशी रशनान्विता॥५॥

रजोरूपा सत्त्वरूपा तामसी वह्निवासिनी।

हेममृगासक्तचित्ता वाल्मीक्याश्रमवासिनी॥६॥

पतिव्रता महामाया पीतकौशेयवासिनी।

मृगनेत्रा च बिम्बोष्ठी धनुर्विद्याविशारदा॥७॥

सौम्यरूपा दशरथस्नुषा चामरवीजिता।

सुमेधादुहिता दिव्यरूपा त्रैलोक्यपालिनी॥८॥

अन्नपूर्णा महालक्ष्मीर्धीर्लज्जा च सरस्वती।

शान्तिः पुष्टिः क्षमा गौरी प्रभाऽयोध्यानिवासिनी॥९॥

वसन्तशीतला गौरी स्नानसन्तुष्टमानसा।

रमानामभद्रसंस्था हेमकुम्भपयोधरा॥१०॥

सुरार्चिता धृतिः कान्तिः स्मृतिर्मेधा विभावरी।

लघूदरा वरारोहा हेमकङ्कणमण्डिता॥११॥

द्विजपत्न्यर्पितनिजभूषा राघवतोषिणी।

श्रीरामसेवानिरता रत्नताटङ्कधारिणी॥१२॥

रामवामाङ्गसंस्था च रामचन्द्रैकरञ्जनी।

सरयूजलसङ्क्रीडाकारिणी राममोहिनी॥१३॥

सुवर्णतुलिता पुण्या पुण्यकीर्तिः कलावती।

कलकण्ठा कम्बुकण्ठा रम्भोरुर्गजगामिनी॥१४॥

रामार्पितमना रामवन्दिता रामवल्लभा।

श्रीरामपदचिह्नाङ्का रामरामेतिभाषिणी॥१५॥

रामपर्यङ्कशयना रामाङ्घ्रिक्षालिनी वरा।

कामधेन्वन्नसन्तुष्टा मातुलुङ्गकरे धृता॥१६॥

दिव्यचन्दनसंस्था श्रीर्मूलकासुरमर्दिनी।

एवमष्टोत्तरशतं सीतानाम्नां सुपुण्यदम्॥१७॥

फलश्रुतिः

ये पठन्ति नरा भूम्यां ते धन्याः स्वर्गगामिनः।

अष्टोत्तरशतं नाम्नां सीतायाः स्तोत्रमुत्तमम्॥१८॥

जपनीयं प्रयत्नेन सर्वदा भक्तिपूर्वकम्।

सन्ति स्तोत्राण्यनेकानि पुण्यदानि महान्ति च॥१९॥

नानेन सदृशानीह तानि सर्वाणि भूसुर।

स्तोत्राणामुत्तमं चेदं भुक्तिमुक्तिप्रदं नृणाम्॥२०॥

एवं सुतीक्ष्ण ते प्रोक्तमष्टोत्तरशतं शुभम्।

सीतानाम्नां पुण्यदं च श्रवणान्मङ्गलप्रदम्॥२१॥

नरैः प्रातः समुत्थाय पठितव्यं प्रयत्नतः।

सीतापूजनकालेऽपि सर्ववाञ्छितदायकम्॥२२॥

॥इति श्री-आनन्दरामायणे श्रीसीताष्टोत्तरशतनामस्तोत्रं सम्पूर्णम्॥

सुब्रह्मण्याष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

सुब्रह्मण्याष्टोत्तरशतनामस्तोत्रम्

ध्यानम्

शक्तिहस्तं विरूपाक्षं शिखिवाहं षडाननम्।

दारुणं रिपुरोगघ्नं भावये कुक्कुटध्वजम्॥

स्तोत्रम्

स्कन्दो गुहः षण्मुखश्च फालनेत्रसुतः प्रभुः।

पिङ्गलः कृत्तिकासूनुः शिखिवाहो द्विषड्भुजः॥१॥

द्विषण्णेत्रः शक्तिधरः पिशिताशप्रभञ्जनः।

तारकासुरसंहारी रक्षोबलविमर्दनः॥२॥

मत्तः प्रमत्तोन्मत्तश्च सुरसैन्यसुरक्षकः।

देवसेनापतिः प्राज्ञः कृपालुर्भक्तवत्सलः॥३॥

उमासुतः शक्तिधरः कुमारः क्रौञ्चदारणः।

सेनानीरग्निजन्मा च विशाखः शङ्करात्मजः॥४॥

शिवस्वामी गणस्वामी सर्वस्वामी सनातनः।

अनन्तमूर्तिरक्षोभ्यः पार्वतीप्रियनन्दनः॥५॥

गङ्गासुतः शरोद्भूत आहूतः पावकात्मजः।

जृम्भः प्रजृम्भ उज्जृम्भः कमलासनसंस्तुतः॥६॥

एकवर्णो द्विवर्णश्च त्रिवर्णः सुमनोहरः।

चतुर्वर्णः पञ्चवर्णः प्रजापतिरहःपतिः॥७॥

अग्निगर्भः शमीगर्भो विश्वरेता सुरारिहा।

हरिद्वर्णः शुभकरो वटुश्च पटुवेषभृत्॥८॥

पूषा गभस्तिर्गहनश्चन्द्रवर्णः कलाधरः।

मायाधरो महामायी कैवल्यः शङ्करात्मजः॥९॥

विश्वयोनिरमेयात्मा तेजोयोनिरनामयः।

परमेष्ठी परब्रह्म वेदगर्भो विराट्सुतः॥१०॥

पुलिन्दकन्याभर्ता च महासारस्वतावृतः।

आश्रिताखिलदाता च चोरघ्नो रोगनाशनः॥११॥

अनन्तमूर्तिरानन्दः शिखण्डी-कृतकेतनः।

डम्भः परमडम्भश्च महाडम्भो वृषाकपिः॥१२॥

कारणोत्पत्ति-देहश्च कारणातीत-विग्रहः।

अनीश्वरोऽमृतः प्राणः प्राणायामपरायणः॥१३॥

विरुद्धहन्तो वीरघ्नो रक्तश्यामगलोऽपि च।
सुब्रह्मण्यो गुहः प्रीतो ब्रह्मण्यो ब्राह्मणप्रियः।
वंशवृद्धिकरो वेदवेद्योऽक्षयफलप्रदः॥१४॥

॥इति श्री-सुब्रह्मण्याष्टोत्तरशतनामस्तोत्रं सम्पूर्णम्॥

सूर्याष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

सूर्याष्टोत्तरशतनामस्तोत्रम्

धौम्य उवाच

सूर्योऽर्यमा भगस्त्वष्टा पूषाऽर्कः सविता रविः।

गभस्तिमानजः कालो मृत्युर्धाता प्रभाकरः॥१॥

पृथिव्यापश्च तेजश्च खं वायुश्च परायणम्।

सोमो बृहस्पतिः शुक्रो बुधोऽङ्गारक एव च॥२॥

इन्द्रो विवस्वान् दीप्तांशुः शुचिः शौरिः शनैश्चरः।

ब्रह्मा विष्णुश्च रुद्रश्च स्कन्दो वै वरुणो यमः॥३॥

वैद्युतो जाठरश्चाग्निरैन्धनस्तेजसां पतिः।

धर्मध्वजो वेदकर्ता वेदाङ्गो वेदवाहनः॥४॥

कृतं त्रेता द्वापरश्च कलिः सर्वमलाश्रयः।

कलाकाष्ठामुहूर्तश्च क्षपा यामस्तथा क्षणः॥५॥

संवत्सरकरोऽश्वत्थः कालचक्रो विभावसुः।

पुरुषः शाश्वतो योगी व्यक्ताव्यक्तः सनातनः॥६॥

कालाध्यक्षः प्रजाध्यक्षो विश्वकर्मा तमोनुदः।

वरुणः सागरोंऽशुश्च जीमूतो जीवनोऽरिहा॥७॥

भूताश्रयो भूतपतिः सर्वलोकनमस्कृतः।

स्रष्टा संवर्तको वह्निः सर्वस्यादिरलोलुपः॥८॥

अनन्तः कपिलो भानुः कामदः सर्वतोमुखः।

जयो विशालो वरदः सर्वभूतनिषेवितः॥९॥

मनः सुपर्णो भूतादिः शीघ्रगः प्राणधारकः।

धन्वतरिर्धूमकेतुरादिदेवोऽदितेः सुतः॥१०॥

द्वादशात्माऽरविन्दाक्षः पिता माता पितामहः।

स्वर्गद्वारं प्रजाद्वारं मोक्षद्वारं त्रिविष्टपम्॥११॥

देहकर्ता प्रशान्तात्मा विश्वात्मा विश्वतोमुखः।

चराचरात्मा सूक्ष्मात्मा मैत्रेयः करुणान्वितः॥१२॥

एतद् वै कीर्तनीयस्य सूर्यस्यामिततेजसः।

नामाष्टशतकं चेदं प्रोक्तमेतत् स्वयम्भुवा॥१३॥

सुरगणपितृयक्षसेवितं ह्यसुरनिशाचरसिद्धवन्दितम्।

वरकनकहुताशनप्रभं प्रणिपतितोऽस्मि हिताय भास्करम्॥१४॥

सूर्योदये यः सुसमाहितः पठेत्
स पुत्रदारान् धनरत्नसञ्चयान्।
लभेत जातिस्मरतां नरः सदा
धृतिं च मेधां च स विन्दते पुमान्॥१५॥

इमं स्तवं देववरस्य यो नरः
प्रकीर्तयेच्छुद्धमनाः समाहितः।
विमुच्यते शोकदवाग्निसागरात्
लभेत कामान् मनसा यथेप्सितान्॥१६॥

॥इति श्रीमन्महाभारते वनपर्वणि धौम्ययुधिष्ठिरसंवादे श्री-सूर्याष्टोत्तरशतनामस्तोत्रं सम्पूर्णम्॥

तुलस्यष्टोत्तरशतनामस्तोत्रम्

Mon, 01 Jan 0001 00:00:00 +0000

तुलस्यष्टोत्तरशतनामस्तोत्रम्

स्तोत्रम्

तुलसी पावनी पूज्या वृन्दावननिवासिनी
ज्ञानदात्री ज्ञानमयी निर्मला सर्वपूजिता

सती पतिव्रता वृन्दा क्षीराब्धिमथनोद्भवा।

कृष्णवर्णा रोगहन्त्री त्रिवर्णा सर्वकामदा॥१॥

लक्ष्मीसखी नित्यशुद्धा सुदती भूमिपावनी।

हरिद्रान्नैकनिरता हरिपादकृतालया॥२॥

पवित्ररूपिणी धन्या सुगन्धिन्यमृतोद्भवा।

सुरूपाऽऽरोग्यदा तुष्टा शक्तित्रितयरूपिणी॥३॥

देवी देवर्षिसंस्तुत्या कान्ता विष्णुमनःप्रिया।

भूतवेतालभीतिघ्नी महापातकनाशिनी॥४॥

मनोरथप्रदा मेधा कान्तिर्विजयदायिनी।

शङ्खचक्रगदापद्मधारिणी कामरूपिणी॥५॥

अपवर्गप्रदा श्यामा कृशमध्या सुकेशिनी।

वैकुण्ठवासिनी नन्दा बिम्बोष्ठी कोकिलस्वरा॥६॥

कपिला निम्नगाजन्मभूमिरायुष्यदायिनी।

वनरूपा दुःखनाशिन्यविकारा चतुर्भुजा॥७॥

गरुत्मद्वाहना शान्ता दान्ता विघ्ननिवारिणी।

श्रीविष्णुमूलिका पुष्टिस्त्रिवर्गफलदायिनी॥८॥

महाशक्तिर्महामाया लक्ष्मीवाणीसुपूजिता।

सुमङ्गल्यर्चनप्रीता सौमङ्गल्यविवर्धिनी॥९॥

चातुर्मास्योत्सवाराध्या विष्णुसान्निध्यदायिनी।

उत्थानद्वादशीपूज्या सर्वदेवप्रपूजिता॥१०॥

गोपीरतिप्रदा नित्या निर्गुणा पार्वतीप्रिया।

अपमृत्युहरा राधाप्रिया मृगविलोचना॥११॥

अम्लाना हंसगमना कमलासनवन्दिता।

भूलोकवासिनी शुद्धा रामकृष्णादिपूजिता॥१२॥

सीतापूज्या राममनःप्रिया नन्दनसंस्थिता।

सर्वतीर्थमयी मुक्ता लोकसृष्टिविधायिनी॥१३॥

प्रातर्दृश्या ग्लानिहन्त्री वैष्णवी सर्वसिद्धिदा।

नारायणी सन्ततिदा मूलमृद्धारिपावनी॥१४॥

अशोकवनिकासंस्था सीताध्याता निराश्रया।

गोमतीसरयूतीररोपिता कुटिलालका॥१५॥

अपात्रभक्ष्यपापघ्नी दानतोयविशुद्धि।

श्रुतिधारणसुप्रीता शुभा सर्वेष्टदायिनी॥१६॥

नाम्नां शतं साष्टकं तत्तुलस्याः सर्वमङ्गलम्।
सौमङ्गल्यप्रदं प्रातः पठेद् भक्त्या सुभाग्यदम्।
लक्ष्मीपतिप्रसादेन सर्वविद्याप्रदं नृणाम्॥१७॥

॥इति श्री-तुलस्यष्टोत्तरशतनामस्तोत्रं सम्पूर्णम्॥

वेङ्कटेशाष्टोत्तरशतनामस्तोत्रम्

Mon, 01 Jan 0001 00:00:00 +0000

Shatanama Stotram

वेङ्कटेशाष्टोत्तरशतनामस्तोत्रम्

सिद्धा ऊचुः

भगवन् वेङ्कटेशस्य नाम्नामष्टोत्तरं शतम्।

अनुब्रूहि दयासिन्धो क्षिप्रसिद्धिप्रदं नृणाम्॥

नारद उवाच

सावधानेन मनसा शृण्वन्तु तदिदं शुभम्।

जप्तं वैखानसैः पूर्वं सर्वसौभाग्यवर्धनम्॥

स्तोत्रम्

ओङ्कारपरमार्थश्च नरनारायणात्मकः।

मोक्षलक्ष्मीप्राणकान्तो वेङ्कटाचलनायकः॥१॥

करुणापूर्णहृदयः टेङ्कारजपसौख्यदः।

शास्त्रप्रमाणगम्यश्च यमाद्यष्टाङ्गगोचरः॥२॥

भक्तलोकैकवरदो वरेण्यो भयनाशनः।

यजमानस्वरूपश्च हस्तन्यस्तसुदर्शनः॥३॥

रमावतारङ्गेशो णाकारजपसुप्रियः।

यज्ञेशो गतिदाता च जगतीवल्लभो वरः॥४॥

रक्षःसन्दोहसंहर्ता वर्चस्वी रघुपुङ्गवः।

दानधर्मपरो याजी घनश्यामलविग्रहः॥५॥

हरादिसर्वदेवेड्यो रामो यदुकुलाग्रणीः।

श्रीनिवासो महात्मा च तेजस्वी तत्त्वसन्निधिः॥६॥

त्वमर्थलक्ष्यरूपश्च रूपवान् पावनो यशः।

सर्वेशो कमलाकान्तो लक्ष्मीसल्लापसम्मुखः॥७॥

चतुर्मुखप्रतिष्ठाता राजराजवरप्रदः।

चतुर्वेदशिरोरत्नं रमणो नित्यवैभवः॥८॥

दासवर्गपरित्राता नारदादिमुनिस्तुतः।

यादवाचलवासी च खिद्यद्भक्तार्तिभञ्जनः॥९॥

लक्ष्मीप्रसादको विष्णुर्देवेशो रम्यविग्रहः।

माधवो लोकनाथश्च लालिताखिलसेवकः॥१०॥

यक्षगन्धर्ववरदः कुमारो मातृकार्चितः।

रटद्बालकपोषी च शेषशैलकृतस्थलः॥११॥

षाड्गुण्यपरिपूर्णश्च द्वैतदोषनिवारणः।

तिर्यग्जन्त्वर्चिताङ्घ्रिश्च नेत्रानन्दकरोत्सवः॥१२॥

द्वादशोत्तमलीलश्च दरिद्रजनरक्षकः।

शत्रुकृत्यादिभीतिघ्नो भुजङ्गशयनप्रियः॥१३॥

जाग्रद्रहस्यावासो यः शिष्टानां परिपालकः।

वरेण्यः पूर्णबोधश्च जन्मसंसारभेषजम्॥१४॥

कार्त्तिकेयवपुर्धारी यतिशेखरभावितः।

नरकादिभयध्वंसी रथोत्सवकलाधरः॥१५॥

लोकार्चामुख्यमूर्तिश्च केशवाद्यवतारवान्।

शास्त्रश्रुतानन्तलीलो यमशिक्षानिबर्हणः॥१६॥

मानसंरक्षणपर इरिणाङ्कुरधान्यदः।

नेत्रहीनाक्षिदायी च मतिहीनमतिप्रदः॥१७॥

हिरण्यदानसङ्ग्राही मोहजालनिकृन्तनः।

दधिलाजाक्षतार्च्यश्च यातुधानविनाशनः॥१८॥

यजुर्वेदशिखागम्यो वेङ्कटो दक्षिणास्थितः।

सारपुष्करणीतीरो रात्रौदेवगणार्चितः॥१९॥

यत्नवत्फलसन्धाता श्रीञ्जपाद्धनवृद्धिकृत्।

क्लीङ्कारजापिकाम्यार्थप्रदानसदयान्तरः॥२०॥

सौं सर्वसिद्धिसन्धाता नमस्कर्तुरभीष्टदः।

मोहिताखिललोकश्च नानारूपव्यवस्थितः॥२१॥

राजीवलोचनो यज्ञवराहो गणवेङ्कटः।

तेजोराशीक्षणः स्वामी हार्दाविद्यानिवारणः॥२२॥

इति श्रीवेङ्कटेशस्य नाम्नामष्टोत्तरं शतम्।
प्रातः प्रातः समुत्थाय यः पठेद् भक्तिमान्नरः।
सर्वेष्टार्थानवाप्नोति वेङ्कटेशप्रसादतः॥

॥इति श्री-वेङ्कटेशाष्टोत्तरशतनामस्तोत्रं सम्पूर्णम्॥

विष्णोरष्टोत्तरशतदिव्यस्थानीयनामस्तोत्रम्

Mon, 01 Jan 0001 00:00:00 +0000

Shatanama Stotram

विष्णोरष्टोत्तरशतदिव्यस्थानीयनामस्तोत्रम्

अष्टोत्तरशतस्थानेष्वाविर्भूतं जगत्पतिम्।

नमामि जगतामीशं नारायणमनन्यधीः॥१॥

श्रीवैकुण्ठे वासुदेवमामोदे कर्षणाह्वयम्।

प्रद्युम्नं च प्रमोदाख्ये सम्मोदे चानिरुद्धकम्॥२॥

सत्यलोके तथा विष्णुं पद्माक्षं सूर्यमण्डले।

क्षीराब्धौ शेषशयनं श्वेतद्वीपेतु तारकम्॥३॥

नारायणं बदर्याख्ये नैमिषे हरिमव्ययम्।

शालग्रामं हरिक्षेत्रे अयोध्यायां रघूत्तमम्॥४॥

मथुरायां बालकृष्णं मायायां मधुसूदनम्।

काश्यां तु भोगशयनमवन्त्यामवनीपतिम्॥५॥

द्वारवत्यां यादवेन्द्रं व्रजे गोपीजनप्रियम्।

वृन्दावने नन्दसूनुं गोविन्दं कालियह्रदे॥६॥

गोवर्धने गोपवेषं भवघ्नं भक्तवत्सलम्।

गोमन्तपर्वते शौरिं हरिद्वारे जगत्पतिम्॥७॥

प्रयागे माधवं चैव गयायां तु गदाधरम्।

गङ्गासागरगे विष्णुं चित्रकूटे तु राघवम्॥८॥

नन्दिग्रामे राक्षसघ्नं प्रभासे विश्वरूपिणम्।

श्रीकूर्मे कूर्ममचलं नीलाद्रौ पुरुषोत्तमम्॥९॥

सिंहाचले महासिंहं गदिनं तुलसीवने।

घृतशैले पापहरं श्वेताद्रौ सिंहरूपिणम्॥१०॥

योगानन्दं धर्मपुर्यां काकुले त्वान्ध्रनायकम्।

अहोबिले गारुडाद्रौ हिरण्यासुरमर्दनम्॥११॥

विट्ठलं पाण्डुरङ्गे तु वेङ्कटाद्रौ रमासखम्।

नारायणं यादवाद्रौ नृसिंहं घटिकाचले॥१२॥

वरदं वारणगिरौ काञ्च्यां कमललोचनम्।

यथोक्तकारिणं चैव परमेशपुराश्रयम्॥१३॥

पाण्डवानां तथा दूतं त्रिविक्रममथोन्नतम्।

कामासिक्यां नृसिंहं च तथाष्टभुजसज्ञकम्॥१४॥

मेघाकारं शुभाकारं शेषाकारं तु शोभनम्।

अन्तरा शितिकण्ठस्य कामकोट्यां शुभप्रदम्॥१५॥

कालमेघं खगारूढं कोटिसूर्यसमप्रभम्।

दिव्यं दीपप्रकाशं च देवानामधिपं मुने॥१६॥

प्रवालवर्णं दीपाभं काञ्च्यामष्टादशस्थितम्।

श्रीगृध्रसरसस्तीरे भान्तं विजयराघवम्॥१७॥

वीक्षारण्ये महापुण्ये शयानं वीरराघवम्।

तोताद्रौ तुङ्गशयनं गजार्तिघ्नं गजस्थले॥१८॥

महाबलं बलिपुरे भक्तिसारे जगत्पतिम्।

महावराहं श्रीमुष्णे महीन्द्रे पद्मलोचनम्॥१९॥

श्रीरङ्गे तु जगन्नाथं श्रीधामे जानकीप्रियम्।

सारक्षेत्रे सारनाथं खण्डने हरचापहम्॥२०॥

श्रीनिवासस्थले पूर्णं सुवर्णं स्वर्णमन्दिरे।

व्याघ्रपुर्यां महाविष्णुं भक्तिस्थाने तु भक्तिदम्॥२१॥

श्वेतह्रदे शान्तमूर्तिमग्निपुर्यां सुरप्रियम्।

भर्गाख्यं भार्गवस्थाने वैकुण्ठाख्ये तु माधवम्॥२२॥

पुरुषोत्तमे भक्तसखं चक्रतीर्थे सुदर्शनम्।

कुम्भकोणे चक्रपाणिं भूतस्थाने तु शार्ङ्गिणम्॥२३॥

कपिस्थले गजार्तिघ्नं गोविन्दं चित्रकूटके।

अनुत्तमं चोत्तमायां श्वेताद्रौ पद्मलोचनम्॥२४॥

पार्थस्थले परब्रह्म कृष्णाकोट्यां मधुद्विषम्।

नन्दपुर्यां महानन्दं वृद्धपुर्यां वृषाश्रयम्॥२५॥

असङ्गं सङ्गमग्रामे शरण्ये शरणं महत्।

दक्षिणद्वारकायां तु गोपालं जगतां पतिम्॥२६॥

सिंहक्षेत्रे महासिंहं मल्लारिं मणिमण्डपे।

निबिडे निबिडाकारं धानुष्के जगदीश्वरम्॥२७॥

मौहूरे कालमेघं तु मधुरायां तु सुन्दरम्।

वृषभाद्रौ महापुण्ये परमस्वामिसज्ञकम्॥२८॥

श्रीमद्वरगुणे नाथं कुरुकायां रमासखम्।

गोष्ठीपुरे गोष्ठपतिं शयानं दर्भसंस्तरे॥२९॥

धन्विमङ्गलके शौरिं बलाढ्यं भ्रमरस्थले।

कुरङ्गे तु तथा पूर्णं कृष्णामेकं वटस्थले॥३०॥

अच्युतं क्षुद्रनद्यां तु पद्मनाभमनन्तके।

एतानि विष्णोः स्थानानि पूजितानि महात्मभिः॥३१॥

अधिष्ठितानि देवेश तत्रासीनं च माधवम्।

यः स्मरेत्सततं भक्त्या चेतसानन्यगामिना॥३२॥

स विधूयातिसंसारबन्धं याति हरेः पदम्।

अष्टोत्तरशतं विष्णोः स्थानानि पठता स्वयम्॥३३॥

अधीताः सकला वेदाः कृताश्च विविधा मखाः।

सम्पादिता तथा मुक्तिः परमानन्ददायिनी॥३४॥

अवगाढानि तीर्थानि ज्ञातः स भगवान् हरिः।
आद्यमेतत्स्वयं व्यक्तं विमानं रङ्गसज्ञकम्।
श्रीमुष्णं वेङ्कटाद्रिं च शालग्रामं च नैमिषम्॥३५॥

तोताद्रिं पुष्करं चैव नरनारायणाश्रमम्।

अष्टौ मे मूर्तयः सन्ति स्वयं व्यक्ता महीतले॥३६॥

॥ इति श्रीविष्णोरष्टोत्तरशतदिव्यस्थानीयनामस्तोत्रं सम्पूर्णम् ॥

व्यासाष्टोत्तरशतनामस्तोत्रम्

Mon, 01 Jan 0001 00:00:00 +0000

व्यासाष्टोत्तरशतनामस्तोत्रम्

नारायणकुलोद्भूतो नारायणपरो वरः।

नारायणावतारश्च नारायणवशंवदः॥१॥

स्वयम्भूवंशसम्भूतो वसिष्ठकुलदीपकः।

शक्तिपौत्रः पापहन्ता पराशरसुतोऽमलः॥२॥

द्वैपायनो मातृभक्तः शिष्टः सत्यवतीसुतः।

स्वयमुद्भूतवेदश्च चतुर्वेदविभागकृत्॥३॥

महाभारतकर्ता च ब्रह्मसूत्रप्रजापतिः।

अष्टादशपुराणानां कर्ता श्यामः प्रशिष्यकः॥४॥

शुकतातः पिङ्गजटः प्रांशुर्दण्डी मृगाजिनः।

वश्यवाग् ज्ञानदाता च शङ्करायुःप्रदः शुचिः॥५॥

मातृवाक्यकरो धर्मी कर्मी तत्त्वार्थदर्शकः।

सञ्जयज्ञानदाता च प्रतिस्मृत्युपदेशकः॥६॥

सर्वधर्मोपदेष्टा च मृतदर्शनपण्डितः।

विचक्षणः प्रहृष्टात्मा पर्वपूज्यः प्रभुर्मुनिः॥७॥

वीरो विश्रुतविज्ञानः प्राज्ञश्चाज्ञाननाशनः।

ब्राह्मकृत् पाद्मकृद् धीरो विष्णुकृच्छिवकृत् तथा॥८॥

श्रीभागवतकर्ता च भविष्यरचनादरः।

नारदाख्यस्य कर्ता च मार्कण्डेयकरोऽग्निकृत्॥९॥

ब्रह्मवैवर्तकर्ता च लिङ्गकृच्च वराहकृत्।

स्कान्दकर्ता वामनकृत् कूर्मकर्ता च मत्स्यकृत्॥१०॥

गरुडाख्यस्य कर्ता च ब्रह्माण्डाख्यपुराणकृत्।

उपपुराणानां कर्ता पुराणः पुरुषोत्तमः॥११॥

काशिवासी ब्रह्मनिधिर्गीतादाता महामतिः।

सर्वज्ञः सर्वसिद्धिश्च सर्वशास्त्रप्रवर्तकः॥१२॥

सर्वाश्रयः सर्वहितः सर्वः सर्वगुणाश्रयः।

विशुद्धः शुद्धिकृद् दक्षो विष्णुभक्तः शिवार्चकः॥१३॥

देवीभक्तः स्कन्दरुचिर्गणेशादृच्च योगवित्।

पैलाचार्य ऋचः कर्ता शाकल्यार्यश्च याजुषः॥१४॥

जैमिन्यार्यः सामकर्ता सुमन्त्वार्योऽप्यथर्वकृत्।

रोमहर्षणसूतार्यो लोकाचार्यो महामुनिः॥१५॥

व्यासकाशीरतिर्विश्वपूज्यो विश्वेशपूजकः।

शान्तः शान्ताकृतिः शान्तचित्तः शान्तिप्रदस्तथा॥१६॥

॥इति व्यासाष्टोत्तरशतनामस्तोत्रं सम्पूर्णम्॥