Shakti on Stotra Samhita

अन्नपूर्णास्तोत्रम्

Mon, 01 Jan 0001 00:00:00 +0000

अन्नपूर्णास्तोत्रम्

नित्यानन्दकरी वराभयकरी सौन्दर्यरत्नाकरी
निर्धूताखिलघोरपावनकरी प्रत्यक्षमाहेश्वरी।
प्रालेयाचलवंशपावनकरी काशीपुराधीश्वरी
भिक्षां देहि कृपावलम्बनकरी माताऽन्नपूर्णेश्वरी॥१॥

नानारत्नविचित्रभूषणकरी हेमाम्बराडम्बरी
मुक्ताहारविलम्बमानविलसद्-वक्षोजकुम्भान्तरी।
काश्मीरागरुवासिता रुचिकरी काशीपुराधीश्वरी
भिक्षां देहि कृपावलम्बनकरी माताऽन्नपूर्णेश्वरी॥२॥

योगानन्दकरी रिपुक्षयकरी धर्मैकनिष्ठाकरी
चन्द्रार्कानलभासमानलहरी त्रैलोक्यरक्षाकरी।
सर्वैश्वर्यकरी तपःफलकरी काशीपुराधीश्वरी
भिक्षां देहि कृपावलम्बनकरी माताऽन्नपूर्णेश्वरी॥३॥

कैलासाचलकन्दरालयकरी गौरी उमा शङ्करी
कौमारी निगमार्थगोचरकरी ओङ्कारबीजाक्षरी।
मोक्षद्वारकवाटपाटनकरी काशीपुराधीश्वरी
भिक्षां देहि कृपावलम्बनकरी माताऽन्नपूर्णेश्वरी॥४॥

दृश्यादृश्यविभूतिवाहनकरी ब्रह्माण्डभाण्डोदरी
लीलानाटकसूत्रखेलनकरी विज्ञानदीपाङ्कुरी।
श्रीविश्वेशमनःप्रसादनकरी काशीपुराधीश्वरी
भिक्षां देहि कृपावलम्बनकरी माताऽन्नपूर्णेश्वरी॥५॥

आदिक्षान्तसमस्तवर्णनकरी शम्भोस्त्रिभावाकरी
काश्मीरा त्रिपुरेश्वरी त्रिनयनी विश्वेश्वरी शर्वरी।
स्वर्गद्वारकवाटपाटनकरी काशीपुराधीश्वरी
भिक्षां देहि कृपावलम्बनकरी माताऽन्नपूर्णेश्वरी॥६॥

उर्वी सर्वजनेश्वरी जयकरी माता कृपासागरी
वेणीनीलसमानकुन्तलधरी नित्यान्नदानेश्वरी।
साक्षान्मोक्षकरी सदा शुभकरी काशीपुराधीश्वरी
भिक्षां देहि कृपावलम्बनकरी माताऽन्नपूर्णेश्वरी॥७॥

देवी सर्वविचित्ररत्नरचिता दाक्षायणी सुन्दरी
वामे स्वादुपयोधरा प्रियकरी सौभाग्यमाहेश्वरी।
भक्ताभीष्टकरी सदा शुभकरी काशीपुराधीश्वरी
भिक्षां देहि कृपावलम्बनकरी माताऽन्नपूर्णेश्वरी॥८॥

चन्द्रार्कानलकोटिकोटिसदृशी चन्द्रांशुबिम्बाधरी
चन्द्रार्काग्निसमानकुण्डलधरी चन्द्रार्कवर्णेश्वरी।
मालापुस्तकपाशसाङ्कुशधरी काशीपुराधीश्वरी
भिक्षां देहि कृपावलम्बनकरी माताऽन्नपूर्णेश्वरी॥९॥

क्षत्रत्राणकरी महाऽभयकरी माता कृपासागरी
सर्वानन्दकरी सदा शिवकरी विश्वेश्वरी श्रीधरी।
दक्षाक्रन्दकरी निरामयकरी काशीपुराधीश्वरी
भिक्षां देहि कृपावलम्बनकरी माताऽन्नपूर्णेश्वरी॥१०॥

अन्नपूर्णे सदापूर्णे शङ्करप्राणवल्लभे।

ज्ञानवैराग्यसिद्‌ध्यर्थं भिक्षां देहि च पार्वति॥

माता च पार्वती देवी पिता देवो महेश्वरः।

बान्धवाः शिवभक्ताश्च स्वदेशो भुवनत्रयम्॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-अन्नपूर्णास्तोत्रं सम्पूर्णम्॥

दुर्गा-स्तुतिः (अर्जुन-कृता)

Mon, 01 Jan 0001 00:00:00 +0000

दुर्गा-स्तुतिः (अर्जुन-कृता)

सञ्जय उवाच

धार्तराष्ट्रबलं दृष्ट्वा युद्धाय समुपस्थितम्।

अर्जुनस्य हितार्थाय कृष्णो वचनमब्रवीत्॥१॥

श्रीभगवानुवाच

शुचिर्भूत्वा महाबाहो सङ्ग्रामाभिमुखे स्थितः।

पराजयाय शत्रूणां दुर्गास्तोत्रमुदीरय॥२॥

सञ्जय उवाच

एवमुक्तोऽर्जुनः सङ्ख्ये वासुदेवेन धीमता।

अवतीर्य रथात्पार्थः स्तोत्रमाह कृताञ्जलिः॥३॥

अर्जुन उवाच

नमस्ते सिद्धसेनानि आर्ये मन्दरवासिनि।

कुमारि कालि कापालि कपिले कृष्णपिङ्गले॥४॥

भद्रकालि नमस्तुभ्यं महाकालि नमोऽस्तु ते।

चण्डि चण्डे नमस्तुभ्यं तारिणि वरवर्णिनि॥५॥

कात्यायनि महाभागे करालि विजये जये।

शिखिपिच्छध्वजधरे नानाभरणभूषिते॥६॥

अट्टशूलप्रहरणे खड्गखेटकधारिणि।

गोपेन्द्रस्यानुजे ज्येष्ठे नन्दगोपकुलोद्भवे॥७॥

महिषासृक्प्रिये नित्यं कौशिकि पीतवासिनि।

अट्टहासे कोकमुखे नमस्तेऽस्तु रणप्रिये॥८॥

उमे शाकम्भरि श्वेते कृष्णे कैटभनाशिनि।

हिरण्याक्षि विरूपाक्षि सुधूम्राक्षि नमोऽस्तु ते॥९॥

वेदश्रुति महापुण्ये ब्रह्मण्ये जातवेदसि।

जम्बूकटकचैत्येषु नित्यं सन्निहितालये॥१०॥

त्वं ब्रह्मविद्या विद्यानां महानिद्रा च देहिनाम्।

स्कन्दमातर्भगवति दुर्गे कान्तारवासिनि॥११॥

स्वाहाकारः स्वधा चैव कला काष्ठा सरस्वती।

सावित्री वेदमाता च तथा वेदान्त उच्यते॥१२॥

स्तुताऽसि त्वं महादेवि विशुद्धेनान्तरात्मना।

जयो भवतु मे नित्यं त्वत्प्रसादाद् रणाजिरे॥१३॥

कान्तारभयदुर्गेषु भक्तानां चाऽऽलयेषु च।

नित्यं वससि पाताले युद्धे जयसि दानवान्॥१४॥

त्वं जम्भनी मोहिनी च माया ह्रीः श्रीस्तथैव च।

सन्ध्या प्रभावती चैव सावित्री जननी तथा॥१५॥

तुष्टिः पुष्टिर्धृतिर्दीप्तिश्चन्द्रादित्यविवर्धिनी।

भूतिर्भूतिमतां सङ्ख्ये वीक्ष्यसे सिद्धचारणैः॥१६॥

सञ्जय उवाच

दुर्गाचन्द्रकलास्तुतिः

Mon, 01 Jan 0001 00:00:00 +0000

दुर्गाचन्द्रकलास्तुतिः

वेधोहरीश्वरस्तुत्यां विहर्त्रीं विन्ध्यभूधरे।

हरप्राणेश्वरीं वन्दे हन्त्रीं विबुधविद्विषाम्॥१॥

अभ्यर्थनेन सरसीरुहसम्भवस्य
त्यक्त्वोदिता भगवदक्षिपिधानलीलाम्।
विश्वेश्वरी विपदपाकरणे पुरस्तात्
माता ममास्तु मधुकैटभयोर्निहन्त्री॥२॥

प्राङ्निर्जरेषु निहितैर्निजशक्तिलेशैः
एकीभवद्भिरुदिताऽखिललोकगुप्त्यै।
सम्पन्नशस्त्रनिकरा च तदायुधस्थैः
माता ममास्तु महिषान्तकरी पुरस्तात्॥३॥

प्रालेयशैलतनयातनुकान्तिसम्पत्-
कोशोदिता कुवलयच्छविचारुदेहा।
नारायणी नमदभीप्सितकल्पवल्ली
सुप्रीतिमावहतु शुम्भनिशुम्भहन्त्री॥४॥

विश्वेश्वरीति महिषान्तकरीति यस्याः
नारायणीत्यपि च नामभिरङ्कितानि।
सूक्तानि पङ्कजभुवा च सुरर्षिभिश्च
दृष्टानि पावकमुखैश्च शिवां भजे ताम्॥५॥

उत्पत्तिदैत्यहननस्तवनात्मकानि
संरक्षकाण्यखिलभूतहिताय यस्याः।
सूक्तान्यशेषनिगमान्तविदः पठन्ति
तां विश्वमातरमजस्रमभिष्टवीमि॥६॥

ये वैप्रचित्तपुनरुत्थितशुम्भमुख्यैः
दुर्भिक्षघोरसमयेन च कारितासु।
आविष्कृतास्त्रिजगदार्तिषु रूपभेदाः
तैरम्बिका समभिरक्षतु मां विपद्भ्यः॥७॥

सूक्तं यदीयमरविन्दभवादिदृष्टम्
आवर्त्य देव्यनुपदं सुरथः समाधिः।
द्वावप्यवापतुरभीष्टमनन्यलभ्यं
तामादिदेवतरुणीं प्रणमामि मूर्ध्ना॥८॥

माहिष्मतीतनुभवं च रुरुं च हन्तुम्
आविष्कृतैर्निजरसादवतारभेदैः।
अष्टादशाहतनवाहतकोटिसङ्ख्यैः
अम्बा सदा समभिरक्षतु मां विपद्भ्यः॥९॥

एतच्चरित्रमखिलं लिखितं हि यस्याः
सम्पूजितं सदन एव निवेशितं वा।
दुर्गं च तारयति दुस्तरमप्यशेषं
श्रेयः प्रयच्छति च सर्वमुमां भजे ताम्॥१०॥

यत्पूजनस्तुतिनमस्कृतिभिर्भवन्ति
प्रीताः पितामहरमेशहरास्त्रयोऽपि।
तेषामपि स्वकगुणैर्ददती वपूंषि
तामीश्वरस्य तरुणीं शरणं प्रपद्ये॥११॥

कान्तारमध्यदृढलग्नतयाऽवसन्नाः
मग्नाश्च वारिधिजले रिपुभिश्च रुद्धाः।
यस्याः प्रपद्य चरणौ विपदस्तरन्ति
सा मे सदाऽस्तु हृदि सर्वजगत्सवित्री॥१२॥

बन्धे वधे महति मृत्युभये प्रसक्ते
वित्तक्षये च विविधे य महोपतापे।
यत्पादपूजनमिह प्रतिकारमाहुः
सा मे समस्तजननी शरणं भवानी॥१३॥

बाणासुरप्रहितपन्नगबन्धमोक्षः
तद् बाहुदर्पदलनादुषया च योगः।
प्राद्युम्निना द्रुतमलभ्यत यत्प्रसादात्
सा मे शिवा सकलमप्यशुभं क्षिणोतु॥१४॥

पापः पुलस्त्यतनयः पुनरुत्थितो माम्
अद्यापि हर्तुमयमागत इत्युदीतम्।
यत्सेवनेन भयमिन्दिरयाऽवधूतं
तामादिदेवतरुणीं शरणं गतोऽस्मि॥१५॥

यद् ध्यानजं सुखमवाप्यमनन्तपुण्यैः
साक्षात् तमच्युतपरिग्रहमाश्ववापुः।
गोपाङ्गनाः किल यदर्चनपुण्यमात्राः
सा मे सदा भगवती भवतु प्रसन्ना॥१६॥

रात्रिं प्रपद्य इति मन्त्रविदः प्रपन्नान्
उद्बोध्य मृत्यवधिमन्यफलैः प्रलोभ्य।
बुद्ध्वा च तद्विमुखतां प्रतनं नयन्तीम्
आकाशमादिजननीं जगतां भजे ताम्॥१७॥

देशकालेषु दुष्टेषु दुर्गाचन्द्रकलास्तुतिः।

सन्ध्ययोरनुसन्धेया सर्वापद्विनिवृत्तये॥१८॥

॥इति श्रीमदप्पयदीक्षितविरचिता श्रीदुर्गाचन्द्रकलास्तुतिः सम्पूर्णा॥

दुर्गापञ्चरत्नम्

Mon, 01 Jan 0001 00:00:00 +0000

Pancharatnam

दुर्गापञ्चरत्नम्

ते ध्यान-योगानुगता अपश्यन्
त्वामेव देवीं स्वगुणैर्निगूढाम्।
त्वमेव शक्तिः परमेश्वरस्य
मां पाहि सर्वेश्वरि मोक्षदात्रि॥१॥

देवात्मशक्तिः श्रुतिवाक्यगीता
महर्षि लोकस्य पुरः प्रसन्ना।
गुहा परं व्योम सतः प्रतिष्ठा
मां पाहि सर्वेश्वरि मोक्षदात्रि॥२॥

परास्य शक्तिर्विविधैव श्रूयसे
श्वेताश्व-वाक्योदित-देवि दुर्गे।
स्वाभाविकी ज्ञानबलक्रिया ते
मां पाहि सर्वेश्वरि मोक्षदात्रि॥३॥

देवात्मशब्देन शिवात्मभूता
यत्कूर्मवायव्यवचो विवृत्या।
त्वं पाशविच्छेदकरी प्रसिद्धा
मां पाहि सर्वेश्वरि मोक्षदात्रि॥४॥

त्वं ब्रह्मपुच्छा विविधा मयूरी
ब्रह्म-प्रतिष्ठाऽस्युपदिष्ट-गीता।
ज्ञानस्वरूपात्मतयाऽखिलानां
मां पाहि सर्वेश्वरि मोक्षदात्रि॥५॥

॥इति श्री-काञ्चीजगद्गुरु-श्री-चन्द्रशेखरेन्द्रसरस्वती-श्रीचरणैः विरचितं श्री-दुर्गापञ्चरत्नं सम्पूर्णम्॥

PDF:A5 / print Kindle Kindle Scribe

दुर्गास्तोत्रम्

Mon, 01 Jan 0001 00:00:00 +0000

दुर्गास्तोत्रम्

श्री-नारायण उवाच

स्तोत्रं च श्रूयतां ब्रह्मन् सर्वविघ्नविनाशकम्।

सुखदं मोक्षदं सारं भवसन्तारकारणम्॥

श्रीकृष्ण उवाच

त्वमेव सर्वजननी मूलप्रकृतिरीश्वरी।

त्वमेवाऽऽद्या सृष्टिविधौ स्वेच्छया त्रिगुणात्मिका॥१॥

कार्यार्थे सगुणा त्वं च वस्तुतो निर्गुणा स्वयम्।

परब्रह्मस्वरूपा त्वं सत्या नित्या सनातनी॥२॥

तेजःस्वरूपा परमा भक्तानुग्रहविग्रहा।

सर्वस्वरूपा सर्वेशा सर्वाधारा परात्परा॥३॥

सर्वबीजस्वरूपा च सर्वपूज्या निराश्रया।

सर्वज्ञा सर्वतोभद्रा सर्वमङ्गलमङ्गला॥४॥

सर्वबुद्धिस्वरूपा च सर्वशक्तिस्वरूपिणी।

सर्वज्ञानप्रदा देवी सर्वज्ञा सर्वभाविनी॥५॥

त्वं स्वाहा देवदाने च पितृदाने स्वधा स्वयम्।

दक्षिणा सर्वदाने च सर्वशक्तिस्वरूपिणी॥६॥

निद्रा त्वं च दया त्वं च तृष्णा त्वं चाऽऽत्मनः प्रिया।

क्षुत्क्षान्तिः शान्तिरीशा च कान्तिस्तुष्टिश्च शाश्वती॥७॥

श्रद्धा पुष्टिश्च तन्द्रा च लज्जा शोभा प्रभा तथा।

सतां सम्पत्स्वरूपा श्रीर्विपत्तिरसतामिह॥८॥

प्रीतिरूपा पुण्यवतां पापिनां कलहाङ्कुरा।

शश्वत्कर्ममयी शक्तिः सर्वदा सर्वजीविनाम्॥९॥

देवेभ्यः स्वपदो दात्री धातुर्धात्री कृपामयी।

हिताय सर्वदेवानां सर्वासुरविनाशिनी॥१०॥

योगनिद्रा योगरूपा योगदात्री च योगिनाम्।

सिद्धिस्वरूपा सिद्धानां सिद्धिदा सिद्धियोगिनी॥११॥

माहेश्वरी च ब्रह्माणी विष्णुमाया च वैष्णवी।

भद्रदा भद्रकाली च सर्वलोकभयङ्करी॥१२॥

ग्रामे ग्रामे ग्रामदेवी गृहदेवी गृहे गृहे।

सतां कीर्तिः प्रतिष्ठा च निन्दा त्वमसतां सदा॥१३॥

महायुद्धे महामारी दुष्टसंहाररूपिणी।

रक्षास्वरूपा शिष्टानां मातेव हितकारिणी॥१४॥

वन्द्या पूज्या स्तुता त्वं च ब्रह्मादीनां च सर्वदा।

ब्राह्मण्यरूपा विप्राणां तपस्या च तपस्विनाम्॥१५॥

विद्या विद्यावतां त्वं च बुद्धिर्बुद्धिमतां सताम्।

मेधा स्मृतिस्वरूपा च प्रतिभा प्रतिभावताम्॥१६॥

राज्ञां प्रतापरूपा च विशां वाणिज्यरूपिणी।

सृष्टौ सृष्टिस्वरूपा त्वं रक्षारूपा च पालने॥१७॥

तथाऽन्ते त्वं महामारी विश्वे विश्वैश्च पूजिते।

कालरात्रिर्महारात्रिर्मोहरात्रिश्च मोहिनी॥१८॥

दुरत्यया मे माया त्वं यया सम्मोहितं जगत्।

यया मुग्धो हि विद्वांश्च मोक्षमार्गं न पश्यति॥१९॥

फलश्रुतिः

इत्यात्मना कृतं स्तोत्रं दुर्गाया दुर्गनाशनम्।

पूजाकाले पठेद्यो हि सिद्धिर्भवति वाञ्छिता॥२०॥

वन्ध्या च काकवन्ध्या च मृतवत्सा च दुर्भगा।

श्रुत्वा स्तोत्रं वर्षमेकं सुपुत्रं लभते ध्रुवम्॥२१॥

कारागारे महाघोरे यो बद्धो दृढबन्धने।

श्रुत्वा स्तोत्रं मासमेकं बन्धनान्मुच्यते ध्रुवम्॥२२॥

यक्ष्मग्रस्तो गलत्कुष्ठी महाशूली महाज्वरी।

श्रुत्वा स्तोत्रं वर्षमेकं सद्यो रोगात् प्रमुच्यते॥२३॥

पुत्रभेदे प्रजाभेदे पत्‍‌नीभेदे च दुर्गतः।

श्रुत्वा स्तोत्रं मासमेकं लभते नात्र संशयः॥२४॥

राजद्वारे श्मशाने च महारण्ये रणस्थले।

हिंस्रजन्तुसमीपे च श्रुत्वा स्तोत्रं प्रमुच्यते॥२५॥

गृहदाहे च दावाग्नौ दस्युसैन्यसमन्विते।

स्तोत्रश्रवणमात्रेण लभते नात्र संशयः॥२६॥

महादरिद्रो मूर्खश्च वर्षं स्तोत्रं पठेत् तु यः।

विद्यावान् धनवांश्चैव स भवेन्नात्र संशयः॥२७॥

॥इति श्रीब्रह्मवैवर्तमहापुराणे प्रकृतिखण्डे षट्षष्टितमेऽध्याये श्री-नारद-नारायण-संवादे दुर्गोपाख्याने श्री-कृष्णविरचितं श्री-दुर्गास्तोत्रं सम्पूर्णम्॥

गौरीदशकम्

Mon, 01 Jan 0001 00:00:00 +0000

गौरीदशकम्

लीलारब्धस्थापितलुप्ताखिललोकां
लोकातीतैर्योगिभिरन्तश्चिरमृग्याम्।
बालादित्यश्रेणिसमानद्युतिपुञ्जां
गौरीमम्बामम्बुरुहाक्षीमहमीडे॥१॥

प्रत्याहारध्यानसमाधिस्थितिभाजां
नित्यं चित्ते निर्वृतिकाष्ठां कलयन्तीम्।
सत्यज्ञानानन्दमयीं तां तनुरूपां
गौरीमम्बामम्बुरुहाक्षीमहमीडे॥२॥

चन्द्रापीडानन्दितमन्दस्मितवक्त्रां
चन्द्रापीडालङ्कृतनीलालकभाराम्।
इन्द्रोपेन्द्राद्यर्चितपादाम्बुजयुग्मां
गौरीमम्बामम्बुरुहाक्षीमहमीडे॥३॥

आदिक्षान्तामक्षरमूर्त्या विलसन्तीं
भूते भूते भूतकदम्बप्रसवित्रीम्।
शब्दब्रह्मानन्दमयीं तां तडिदाभां
गौरीमम्बामम्बुरुहाक्षीमहमीडे॥४॥

मूलाधारादुत्थितवीथ्या विधिरन्ध्रं
सौरं चान्द्रं व्याप्य विहारज्वलिताङ्गीम्।
येयं सूक्ष्मात् सूक्ष्मतनुस्तां सुखरूपां
गौरीमम्बामम्बुरुहाक्षीमहमीडे॥५॥

नित्यः शुद्धो निष्कल एको जगदीशः
साक्षी यस्याः सर्गविधौ संहरणे च।
विश्वत्राणक्रीडनलोलां शिवपत्नीं
गौरीमम्बामम्बुरुहाक्षीमहमीडे॥६॥

यस्याः कुक्षौ लीनमखण्डं जगदण्डं
भूयो भूयः प्रादुरभूदुत्थितमेव।
पत्या सार्धं तां रजताद्रौ विहरन्तीं
गौरीमम्बामम्बुरुहाक्षीमहमीडे॥७॥

यस्यामोतं प्रोतमशेषं मणिमाला
सूत्रे यद्वत् क्वापि चरं चाप्यचरं च।
तामध्यात्मज्ञानपदव्या गमनीयां
गौरीमम्बामम्बुरुहाक्षीमहमीडे॥८॥

नानाकारैः शक्तिकदम्बैर्भुवनानि
व्याप्य स्वैरं क्रीडति येयं स्वयमेका।
कल्याणीं तां कल्पलतामानतिभाजां
गौरीमम्बामम्बुरुहाक्षीमहमीडे॥९॥

आशापाशक्लेशविनाशं विदधानां
पादाम्भोजध्यानपराणां पुरुषाणाम्।
ईशामीशार्धाङ्गहरां तामभिरामां
गौरीमम्बामम्बुरुहाक्षीमहमीडे॥१०॥

प्रातःकाले भावविशुद्धः प्रणिधानाद्
भक्त्या नित्यं जल्पति गौरीदशकं यः।
वाचां सिद्धिं सम्पदमग्र्यां शिवभक्तिं
तस्यावश्यं पर्वतपुत्री विदधाति॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-गौरीदशकं सम्पूर्णम्॥

गायत्रीस्तोत्रम्

Mon, 01 Jan 0001 00:00:00 +0000

गायत्रीस्तोत्रम्

गायत्री-ध्यानम्

मुक्ता-विद्रुम-हेम-नील-धवलच्छायैर्मुखैस्त्रीक्षणैः
युक्तामिन्दु-निबद्ध-रत्न-मकुटां तत्त्वार्थ-वर्णात्मिकाम्।
गायत्रीं वरदाभयाङ्कुशकशाः शुभ्रं कपालं गदां
शङ्खं चक्रमथारविन्दयुगलं हस्तैर्वहन्तीं भजे॥

नारद उवाच

भक्तानुकम्पिन् सर्वज्ञ हृदयं पापनाशनम्।

गायत्र्याः कथितं तस्माद् गायत्र्याः स्तोत्रमीरय॥१॥

आदिशक्ते जगन्मातर्भक्तानुग्रहकारिणि।

सर्वत्र व्यापिकेऽनन्ते श्रीसन्ध्ये ते नमोऽस्तु ते॥२॥

त्वमेव सन्ध्या गायत्री सावित्री च सरस्वती।

ब्रह्माणी वैष्णवी रौद्री रक्तश्वेता सितेतरा॥३॥

प्रातर्बाला च मध्याह्ने यौवनस्था भवेत् पुनः।

वृद्धा सायं भगवती चिन्त्यते मुनिभिः सदा॥४॥

हंसस्था गरुडारूढा तथा वृषभवाहिनी।

ऋग्वेदाध्यायिनी भूमौ दृश्यते या तपस्विभिः॥५॥

यजुर्वेदं पठन्ती च ह्यन्तरिक्षे विराजते।

या सामगाऽपि सर्वेषु भ्राम्यमाणा तथा भुवि॥६॥

रुद्रलोकं गता त्वं हि विष्णुलोकनिवासिनी।

त्वमेव ब्रह्मणो लोकेऽमर्त्यानुग्रहकारिणी॥७॥

सप्तर्षिप्रीतिजननी माया बहुवरप्रदा।

शिवयोः करनेत्रोत्था ह्यश्रुस्वेदसमुद्भवा॥८॥

आनन्दजननी दुर्गा दशधा परिपठ्यते।

वरेण्या वरदा चैव वरिष्ठा वरवर्णिनी॥९॥

गरिष्ठा च वराही च वरारोहा च सप्तमी।

नीलगङ्गा तथा सन्ध्या सर्वदा भोगमोक्षदा॥१०॥

भागीरथी मर्त्यलोके पाताले भोगवत्यपि।

त्रिलोकवाहिनी देवी स्थानत्रयनिवासिनी॥११॥

भूर्लोकस्था त्वमेवासि धरित्री शोकधारिणी।

भुवो लोके वायुशक्तिः स्वर्लोके तेजसां निधिः॥१२॥

महर्लोके महासिद्धिर्जनलोकेऽजनेत्यपि।

तपस्विनी तपोलोके सत्यलोके तु सत्यवाक्॥१३॥

कमला विष्णुलोके च गायत्री ब्रह्मलोकगा।

रुद्रलोके स्थिता गौरी हरार्धाङ्गनिवासिनी॥१४॥

अहमो महतश्चैव प्रकृतिस्त्वं हि गीयसे।

साम्यावस्थात्मिका त्वं हि शबलब्रह्मरूपिणी॥१५॥

ततः परा पराशक्तिः परमा त्वं हि गीयसे।

इच्छाशक्तिः क्रियाशक्तिर्ज्ञानशक्तिस्त्रिशक्तिदा॥१६॥

गङ्गा च यमुना चैव विपाशा च सरस्वती।

सरयू रेविका सिन्धुर्नर्मदैरावती तथा॥१७॥

गोदावरी शतद्रुश्च कावेरी देवलोकगा।

कौशिकी चन्द्रभागा च वितस्ता च सरस्वती॥१८॥

गण्डकी तापिनी तोया गोमती वेत्रवत्यपि।

इडा च पिङ्गला चैव सुषुम्णा च तृतीयका॥१९॥

गान्धारी हस्तजिह्वा च पूषाऽपूषा तथैव च।

अलम्बुषा कुहूश्चैव शङ्खिनी प्राणवाहिनी॥२०॥

नाडी च त्वं शरीरस्था गीयसे प्राक्तनैर्बुधैः।

हृत्पद्मस्था प्राणशक्तिः कण्ठस्था स्वप्ननायिका॥२१॥

तालुस्था त्वं सदाधारा बिन्दुस्था बिन्दुमालिनी।

मूले तु कुण्डलीशक्तिर्व्यापिनी केशमूलगा॥२२॥

शिखामध्यासना त्वं हि शिखाग्रे तु मनोन्मनी।

किमन्यद् बहुनोक्तेन यत्किञ्चिज्जगतीत्रये॥२३॥

तत्सर्वं त्वं महादेवि श्रिये सन्ध्ये नमोऽस्तु ते।

इतीदं कीर्तितं स्तोत्रं सन्ध्यायां बहुपुण्यदम्॥२४॥

महापापप्रशमनं महासिद्धिविदायकम्।

य इदं कीर्तयेत् स्तोत्रं सन्ध्याकाले समाहितः॥२५॥

अपुत्रः प्राप्नुयात् पुत्रं धनार्थी धनमाप्नुयात्।

सर्वतीर्थतपोदानयज्ञयोगफलं लभेत्॥२६॥

भोगान् भुक्त्वा चिरं कालमन्ते मोक्षमवाप्नुयात्।

तपस्विभिः कृतं स्तोत्रं स्नानकाले तु यः पठेत्॥२७॥

यत्र कुत्र जले मग्नः सन्ध्यामज्जनजं फलम्।

लभते नात्र सन्देहः सत्यं सत्यं तु नारद॥२८॥

शृणुयाद् योऽपि तद्भक्त्या स तु पापात् प्रमुच्यते।

पीयूषसदृशं वाक्यं सन्ध्योक्तं नारदेरितम्॥२९॥

॥इति श्री-गायत्री स्तोत्रं सम्पूर्णम्॥

कल्याणवृष्टिस्तोत्रम्

Mon, 01 Jan 0001 00:00:00 +0000

कल्याणवृष्टिस्तोत्रम्

कल्याणवृष्टिभिरिवामृतपूरिताभिर्-
लक्ष्मीस्वयंवरणमङ्गलदीपिकाभिः।
सेवाभिरम्ब तव पादसरोजमूले
नाकारि किं मनसि भक्तिमतां जनानाम्॥१॥

एतावदेव जननि स्पृहणीयमास्ते
त्वद्वन्दनेषु सलिलस्थगिते च नेत्रे।
सान्निध्यमुद्यदरुणायुतसोदरस्य
त्वद्विग्रहस्य परया सुधया प्लुतस्य॥२॥

ईशित्वभावकलुषाः कति नाम सन्ति
ब्रह्मादयः प्रतियुगं प्रलयाभिभूताः।
एकः स एव जननि स्थिरसिद्धिरास्ते
यः पादयोस्तव सकृत्प्रणतिं करोति॥३॥

लब्ध्वा सकृत् त्रिपुरसुन्दरि तावकीनं
कारुण्यकन्दलितकान्तिभरं कटाक्षम्।
कन्दर्पकोटिसुभगास्त्वयि भक्तिभाजः
सम्मोहयन्ति तरुणीर्भुवनत्रयेषु॥४॥

ह्रीङ्कारमेव तव नाम गृणन्ति वेदा
मातस्त्रिकोणनिलये त्रिपुरे त्रिनेत्रे।
त्वत्संस्मृतौ यमभटादिभयं विहाय
दीव्यन्ति नन्दनवने सह लोकपालैः॥५॥

हन्तुः पुरामधिगलं परिपूर्यमाणः
क्रूरः कथं न भविता गरलस्य वेगः।
आश्वासनाय किल मातरिदं तवार्धं
देहस्य शश्वदमृताप्लुतशीतलस्य॥६॥

सर्वज्ञतां सदसि वाक्पटुतां प्रसूते
देवि त्वदङ्घ्रिसरसीरुहयोः प्रणामः।
किं च स्फुरन्मकुटमुज्ज्वलमातपत्रं
द्वे चामरे च वसुधां महतीं ददाति॥७॥

कल्पद्रुमैरभिमतप्रतिपादनेषु
कारुण्यवारिधिभिरम्ब भवत्कटाक्षैः।
आलोकय त्रिपुरसुन्दरि मामनाथं
त्वय्येव भक्तिभरितं त्वयि दत्तदृष्टिम्॥८॥

हन्तेतरेष्वपि मनांसि निधाय चान्ये
भक्तिं वहन्ति किल पामरदैवतेषु।
त्वामेव देवि मनसा वचसा स्मरामि
त्वामेव नौमि शरणं जगति त्वमेव॥९॥

लक्ष्येषु सत्स्वपि तवाक्षिविलोकनानाम्
आलोकय त्रिपुरसुन्दरि मां कथञ्चित्।
नूनं मयाऽपि सदृशं करुणैकपात्रं
जातो जनिष्यति जनो न च जायते च॥१०॥

ह्रीं ह्रीमिति प्रतिदिनं जपतां जनानां
किं नाम दुर्लभमिह त्रिपुराधिवासे।
मालाकिरीटमदवारणमाननीयान्स्-
तान्सेवते वसुमती स्वयमेव लक्ष्मीः॥११॥

सम्पत्कराणि सकलेन्द्रियनन्दनानि
साम्राज्यदानकुशलानि सरोरुहाक्षि।
त्वद्वन्दनानि दुरितौघहरोद्यतानि
मामेव मातरनिशं कलयन्तु नान्यम्॥१२॥

कल्पोपसंहरण-कल्पित-ताण्डवस्य
देवस्य खण्डपरशोः परमेश्वरस्य।
पाशाङ्कुशैक्षव-शरासन-पुष्पबाणा
सा साक्षिणी विजयते तव मूर्तिरेका॥१३॥

लग्नं सदा भवतु मातरिदं तवार्धं
तेजः परं बहुल-कुङ्कुम-पङ्क-शोणम्।
भास्वत्किरीटममृतांशुकलावतंसं
मध्ये त्रिकोणमुदितं परमामृतार्द्रम्॥१४॥

ह्रीङ्कारमेव तव नाम तदेव रूपं
त्वन्नाम सुन्दरि सरोजनिवासमूले।
त्वत्तेजसा परिणतं वियदादि भूतं
सौख्यं तनोति सरसीरुहसम्भवादेः॥१५॥

ह्रीङ्कारत्रयसम्पुटेन महता मन्त्रेण सन्दीपितं
स्तोत्रं यः प्रतिवासरं तव पुरो मातर्जपेन्मन्त्रवित्।
तस्य क्षोणिभुजो भवन्ति वशगा लक्ष्मीश्चिरस्थायिनी
वाणी निर्मलसूक्तिभारभरिता जागर्ति दीर्घं वयः॥१६॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-कल्याणवृष्टिस्तोत्रं सम्पूर्णम्॥

कामाक्षी-माहात्म्यम्

Mon, 01 Jan 0001 00:00:00 +0000

कामाक्षी-माहात्म्यम्

स्वामिपुष्करिणीतीर्थं पूर्वसिन्धुः पिनाकिनी।

शिलाह्रदश्चतुर्मध्यं यावत् तुण्डीरमण्डलम्॥१॥

मध्ये तुण्डीरभूवृत्तं कम्पा-वेगवती-द्वयोः।

तयोर्मध्यं कामकोष्ठं कामाक्षी तत्र वर्तते॥२॥

स एव विग्रहो देव्या मूलभूतोऽद्रिराड्भुवः।

नान्योऽस्ति विग्रहो देव्याः काञ्च्यां तन्मूलविग्रहः॥३॥

जगत्कामकलाकारं नाभिस्थानं भुवः परम्।

पदपद्मस्य कामाक्ष्याः महापीठमुपास्महे॥४॥

कामकोटिः स्मृतः सोऽयं कारणादेव चिन्नभः।
यत्र कामकृतो धर्मो जन्तुना येन केन वा।
सकृद् वाऽपि सुधर्माणां फलं फलति कोटिशः॥५॥

यो जपेत् कामकोष्ठेऽस्मिन् मन्त्रमिष्टार्थदैवतम्।

कोटिवर्णफलेनैव मुक्तिलोकं स गच्छति॥६॥

यो वसेत् कामकोष्ठेऽस्मिन् क्षणार्धं वा तदर्धकम्।

मुच्यते सर्वपापेभ्यः साक्षाद् देवी नराकृतिः॥७॥

गायत्रीमण्डपाधारं भूनाभिस्थानमुत्तमम्।

पुरुषार्थप्रदं शम्भोर्बिलाभ्रं तं नमाम्यहम्॥८॥

यः कुर्यात् कामकोष्ठस्य बिलाभ्रस्य प्रदक्षिणम्।

पदसङ्ख्याक्रमेणैव गोगर्भजननं लभेत्॥९॥

विश्वकारणनेत्राढ्यां श्रीमत्त्रिपुरसुन्दरीम्।

बन्धकासुरसंहन्त्रीं कामाक्षीं तामहं भजे॥१०॥

पराजन्मदिने काञ्च्यां महाभ्यन्तरमार्गतः।
योऽर्चयेत् तत्र कामाक्षीं कोटिपूजाफलं लभेत्।
तत्फलोत्पन्नकैवल्यं सकृत् कामाक्षिसेवया॥११॥

त्रिस्थाननिलयं देवं त्रिविधाकारमच्युतम्।

प्रतिलिङ्गाग्रसंयुक्तं भूतबन्धं तमाश्रये॥१२॥

य इदं प्रातरुत्थाय स्नानकाले पठेन्नरः।

द्वादशश्लोकमात्रेण श्लोकोक्तफलमाप्नुयात्॥

॥इति श्री-कामाक्षी-विलासे त्रयोविंशेऽध्याये श्री-कामाक्षी-माहात्म्यं सम्पूर्णम्॥

कामाक्षी-स्तोत्रम्

Mon, 01 Jan 0001 00:00:00 +0000

कामाक्षी-स्तोत्रम्

कल्पानोकह-पुष्प-जाल-विलसन्-नीलालकां मातृकां
कान्तां कञ्ज-दलेक्षणां कलि-मल-प्रध्वंसिनीं कालिकाम्।
काञ्ची-नूपुर-हार-दाम-सुभगां काञ्ची-पुरी-नायिकां
कामाक्षीं करि-कुम्भ-सन्निभ-कुचां वन्दे महेशप्रियाम्॥१॥

काशाभांशुक-भासुरां प्रविलसत्-कोशातकी-सन्निभां
चन्द्रार्कानल-लोचनां सुरुचिरालङ्कार-भूषोज्ज्वलाम्।
ब्रह्म-श्रीपति-वासवादि-मुनिभिः संसेविताङ्घ्रि-द्वयां
कामाक्षीं गज-राज-मन्द-गमनां वन्दे महेशप्रियाम्॥२॥

ऐं क्लीं सौर्-इति यां वदन्ति मुनयस्तत्त्वार्थ-रूपां परां
वाचाम् आदिम-कारणं हृदि सदा ध्यायन्ति यां योगिनः।
बालां फाल-विलोचनां नव-जपा-वर्णां सुषुम्नाश्रितां
कामाक्षीं कलितावतंस-सुभगां वन्दे महेशप्रियाम्॥३॥

यत्पादाम्बुज-रेणु-लेशम् अनिशं लब्ध्वा विधत्ते विधिर्-
विश्वं तत् परिपाति विष्णुरखिलं यस्याः प्रसादाच्चिरम्।
रुद्रः संहरति क्षणात् तदखिलं यन्मायया मोहितः
कामाक्षीम् अति-चित्र-चारु-चरितां वन्दे महेशप्रियाम्॥४॥

सूक्ष्मात् सूक्ष्म-तरां सुलक्षित-तनुं क्षान्ताक्षरैर्लक्षितां
वीक्षा-शिक्षित-राक्षसां त्रिभुवन-क्षेमङ्करीम् अक्षयाम्।
साक्षाल्लक्षण-लक्षिताक्षर-मयीं दाक्षायणीं साक्षिणीं
कामाक्षीं शुभलक्षणैः सुललितां वन्दे महेशप्रियाम्॥५॥

ओङ्काराङ्गण-दीपिकाम् उपनिषत्-प्रासाद-पारावतीम्
आम्नायाम्बुधि-चन्द्रिकाम् अघ-तमः-प्रध्वंस-हंस-प्रभाम्।
काञ्ची-पट्टण-पञ्जरान्तर-शुकीं कारुण्य-कल्लोलिनीं
कामाक्षीं शिव-कामराज-महिषीं वन्दे महेशप्रियाम्॥६॥

ह्रीङ्कारात्मक-वर्ण-मात्र-पठनादैन्द्रीं श्रियं तन्वतीं
चिन्मात्रां भुवनेश्वरीम् अनुदिनं भिक्षा-प्रदान-क्षमाम्।
विश्वाघौघ-निवारिणीं विमलिनीं विश्वम्भरां मातृकां
कामाक्षीं परिपूर्ण-चन्द्र-वदनां वन्दे महेशप्रियाम्॥७॥

वाग्-देवीति च यां वदन्ति मुनयः क्षीराब्धि-कन्येति च
क्षोणी-भृत्-तनयेति च श्रुति-गिरो याम् आमनन्ति स्फुटम्।
एकानेक-फल-प्रदां बहु-विधाऽऽकारास्तनूस्तन्वतीं
कामाक्षीं सकलार्ति-भञ्जन-परां वन्दे महेशप्रियाम्॥८॥

मायाम् आदिम-कारणं त्रिजगताम् आराधिताङ्घ्रि-द्वयाम्
आनन्दामृत-वारि-राशि-निलयां विद्यां विपश्चिद्धियाम्।
माया-मानुष-रूपिणीं मणि-लसन्मध्यां महामातृकां
कामाक्षीं करिराज-मन्दगमनां वन्दे महेशप्रियाम्॥९॥

कान्ता काम-दुघा करीन्द्र-गमना कामारि-वामाङ्क-गा
कल्याणी कलितावतार-सुभगा कस्तूरिका-चर्चिता।
कम्पा-तीर-रसाल-मूल-निलया कारुण्य-कल्लोलिनी
कल्याणानि करोतु मे भगवती काञ्ची-पुरी-देवता॥१०॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-कामाक्षीस्तोत्रं सम्पूर्णम्॥

कामाक्षी सुप्रभातम्

Mon, 01 Jan 0001 00:00:00 +0000

Suprabhatam

कामाक्षी सुप्रभातम्

जगदवन विधौ त्वं जागरूका भवानि
तव तु जननि निद्रामात्मवत्कल्पयित्वा।
प्रतिदिवसमहं त्वां बोधयामि प्रभाते
त्वयि कृतमपराधं सर्वमेतं क्षमस्व॥

यदि प्रभातं तव सुप्रभातं
तदा प्रभातं मम सुप्रभातम्।
तस्मात् प्रभाते तव सुप्रभातं
वक्ष्यामि मातः कुरु सुप्रभातम्॥

गुरु-ध्यानम्

यस्याङ्घ्रिपद्म-मकरन्दनिषेवणात् त्वं
जिह्वां गताऽसि वरदे मम मन्दबद्धः।
यस्याम्ब नित्यमनघे हृदये विभासि
तं चन्द्रशेखरगुरुं प्रणमामि नित्यम्॥

जये जयेन्द्रो गुरुणा ग्रहीतो
मठाधिपत्ये शशिशेखरेण।
यथा गुरुः सर्वगुणोपपन्नो
जयत्यसौ मङ्गलमातनोतु॥

शुभं दिशतु नो देवी कामाक्षी सर्वमङ्गला
शुभं दिशतु नो देवी कामकोटी-मठेशः।
शुभं दिशतु तच्छिष्य-सद्गुरुर्नो जयेन्द्रो
सर्वं मङ्गलमेवास्तु मङ्गलानि भवन्तु नः॥

सुप्रभातम्

कामाक्षि देव्यम्ब तवाऽऽर्द्रदृष्ट्या
मूकः स्वयं मूककविर्यथाऽसीत्।
तथा कुरु त्वं परमेशजाये
त्वत्पादमूले प्रणतं दयार्द्रे॥१॥

उत्तिष्ठोत्तिष्ठ वरदे उत्तिष्ठ जगदीश्वरि।

उत्तिष्ठ जगदाधारे त्रैलोक्यं मङ्गलं कुरु॥२॥

शृणोषि कच्चिद् ध्वनिरुत्थितोऽयं
मृदङ्गभेरीपटहानकानाम्।
वेदध्वनिं शिक्षितभूसुराणां
शृणोषि भद्रे कुरु सुप्रभातम्॥३॥

शृणोषि भद्रे ननु शङ्खघोषं
वैतालिकानां मधुरं च गानम्।
शृणोषि मातः पिककुक्कुटानां
ध्वनिं प्रभाते कुरु सुप्रभातम्॥४॥

मातर्निरीक्ष्य वदनं भगवान् शशाङ्को
लज्जान्वितः स्वयमहो निलयं प्रविष्टः।
द्रष्टुं त्वदीय वदनं भगवान् दिनेशो
ह्यायाति देवि सदनं कुरु सुप्रभातम्॥५॥

पश्याम्ब केचिद् धृतपूर्णकुम्भाः
केचिद् दयार्द्रे धृतपुष्पमालाः।
काचित् शुभाङ्ग्यो ननुवाद्यहस्ताः
तिष्ठन्ति तेषां कुरु सुप्रभातम्॥६॥

भेरीमृदङ्गपणवानकवाद्यहस्ताः
स्तोतुं महेशदयिते स्तुतिपाठकास्त्वाम्।
तिष्ठन्ति देवि समयं तव काङ्क्षमाणाः
ह्युत्तिष्ठ दिव्यशयनात् कुरु सुप्रभातम्॥७॥

मातर्निरीक्ष्य वदनं भगवान् त्वदीयं
नैवोत्थितः शशिधिया शयितस्तवाङ्के।
सम्बोधयाऽऽशु गिरिजे विमलं प्रभातं
जातं महेशदयिते कुरु सुप्रभातम्॥८॥

अन्तश्चरन्त्यास्तव भूषणानां
झल्झल्ध्वनिं नूपुरकङ्कणानाम्।
श्रुत्वा प्रभाते तव दर्शनार्थी
द्वारि स्थितोऽहं कुरु सुप्रभातम्॥९॥

वाणी पुस्तकमम्बिके गिरिसुते पद्मानि पद्मासना
रम्भा त्वम्बरडम्बरं गिरिसुता गङ्गा च गङ्गाजलम्।
काली तालयुगं मृदङ्गयुगलं बृन्दा च नन्दा तथा
नीला निर्मलदर्पण-धृतवती तासां प्रभातं शुभम्॥१०॥

उत्थाय देवि शयनाद्भगवान् पुरारिः
स्नातुं प्रयाति गिरिजे सुरलोकनद्याम्।
नैको हि गन्तुमनघे रमते दयार्द्रे
ह्युत्तिष्ठ देवि शयनात् कुरु सुप्रभातम्॥११॥

पश्याम्ब केचित्फलपुष्पहस्ताः
केचित् पुराणानि पठन्ति मातः।
पठन्ति वेदान् बहवस्तवाऽऽरे
तेषां जनानां कुरु सुप्रभातम्॥१२॥

लावण्यशेवधिमवेक्ष्य चिरं त्वदीयं
कन्दर्पदर्पदलनोऽपि वशं गतस्ते।
कामारि-चुम्बित-कपोलयुगं त्वदीयं
द्रष्टुं स्थिता वयमये कुरु सुप्रभातम्॥१३॥

गाङ्गेयतोयममवाह्य मुनीश्वरास्त्वां
गङ्गाजलैः स्नपयितुं बहवो घटांश्च।
धृत्वा शिरःसु भवतीमभिकाङ्क्षमाणाः
द्वारि स्थिता हि वरदे कुरु सुप्रभातम्॥१४॥

मन्दार-कुन्द-कुसुमैरपि जातिपुष्पैः
मालाकृता विरचितानि मनोहराणि।
माल्यानि दिव्यपदयोरपि दातुमम्ब
तिष्ठन्ति देवि मुनयः कुरु सुप्रभातम्॥१५॥

काञ्ची-कलाप-परिरम्भनितम्बबिम्बं
काश्मीर-चन्दन-विलेपित-कण्ठदेशम्।
कामेश-चुम्बित-कपोलमुदारनासां
द्रष्टुं स्थिता वयमये कुरु सुप्रभातम्॥१६॥

मन्दस्मितं विमलचारुविशालनेत्रं
कण्ठस्थलं कमलकोमलगर्भगौरम्।
चक्राङ्कितं च युगलं पदयोर्मृगाक्षि
द्रष्टुं स्थिता वयमये कुरु सुप्रभातम्॥१७॥

मन्दस्मितं त्रिपुरनाशकरं पुरारेः
कामेश्वरप्रणयकोपहरं स्मितं ते।
मन्दस्मितं विपुलहासमवेक्षितुं ते
मातः स्थिता वयमये कुरु सुप्रभातम्॥१८॥

माता शिशूनां परिरक्षणार्थं
न चैव निद्रावशमेति लोके।
माता त्रयाणां जगतां गतिस्त्वं
सदा विनिद्रा कुरु सुप्रभातम्॥१९॥

मातर्मुरारिकमलासनवन्दिताङ्घ्र्याः
हृद्यानि दिव्यमधुराणि मनोहराणि।
श्रोतुं तवाम्ब वचनानि शुभप्रदानि
द्वारि स्थिता वयमये कुरु सुप्रभातम्॥२०॥

दिगम्बरो ब्रह्मकपालपाणिः
विकीर्णकेशः फणिवेष्टिताङ्गः।
तथाऽपि मातस्तव देविसङ्गात्
महेश्वरोऽभूत् कुरु सुप्रभातम्॥२१॥

अयि तु जननि दत्तस्तन्यपानेन देवि
द्रविडशिशुरभूद्वै ज्ञानसम्पन्नमूर्तिः।
द्रविडतनयभुक्तक्षीरशेषं भवानि
वितरसि यदि मातः सुप्रभातं भवेन्मे॥२२॥

जननि तव कुमारः स्तन्यपानप्रभावात्
शिशुरपि तव भर्तुः कर्णमूले भवानि।
प्रणवपदविशेषं बोधयामास देवि
यदि मयि च कृपा ते सुप्रभातं भवेन्मे॥२३॥

त्वं विश्वनाथस्य विशालनेत्रा
हालास्यनाथस्य नु मीननेत्रा।
एकाम्रनाथस्य नु कामनेत्रा
कामेशजाये कुरु सुप्रभातम्॥२४॥

श्रीचन्द्रशेखरगुरुर्भगवान् शरण्ये
त्वत्पादभक्तिभरितः फलपुष्पपाणिः।
एकाम्रनाथदयिते तव दर्शनार्थी
तिष्ठत्ययं यतिवरो मम सुप्रभातम्॥२५॥

एकाम्रनाथदयिते ननु कामपीठे
सम्पूजिताऽसि वरदे गुरुशङ्करेण।
श्रीशङ्करादिगुरुवर्य-समर्चिताङ्घ्रिं
द्रष्टुं स्थिता वयमये कुरु सुप्रभातम्॥२६॥

दुरितशमनदक्षौ मृत्युसन्तासदक्षौ
चरणमुपगतानां मुक्तिदौ ज्ञानदौ तौ।
अभयवरदहस्तौ द्रष्टुमम्ब स्थितोऽहं
त्रिपुरदलनजाये सुप्रभातं ममाऽऽर्ये॥२७॥

मातस्त्वदीयचरणं हरिपद्मजाद्यैः
वन्द्यं रथाङ्ग-सरसीरुह-शङ्खचिह्नम्।
द्रष्टुं च योगिजनमानसराजहंसं
द्वारि स्थितोऽस्मि वरदे कुरु सुप्रभातम्॥२८॥

पश्यन्तु केचिद्वदनं त्वदीयं
स्तुवन्तु कल्याणगुणांस्तवान्ये।
नमन्तु पादाब्जयुगं त्वदीयाः
द्वारि स्थितानां कुरु सुप्रभातम्॥२९॥

केचित् सुमेरोः शिखरेऽतितुङ्गे
केचिन्मणिद्वीपवरे विशाले।
पश्यन्तु केचित् त्वमृताब्धिमध्ये
पश्याम्यहं त्वामिह सुप्रभातम्॥३०॥

शम्भोर्वामाङ्कसंस्थां शशिनिभवदनां नीलपद्मायताक्षीं
श्यामाङ्गां चारुहासां निबिडतरकुचां पक्वबिम्बाधरोष्ठीम्।
कामाक्षीं कामदात्रीं कुटिलकचभरां भूषणैर्भूषिताङ्गीं
पश्यामः सुप्रभाते प्रणतजनिमतामद्य नः सुप्रभातम्॥३१॥

कामप्रदाकल्पतरुर्विभासि
नान्या गतिर्मे ननु चातकोऽहम्।
वर्षस्यमोघः कनकाम्बुधाराः
काश्चित्तु धारा मयि कल्पयाऽऽशु॥३२॥

त्रिलोचनप्रियां वन्दे वन्दे त्रिपुरसुन्दरीम्।

त्रिलोकनायिकां वन्दे सुप्रभातं ममाम्बिके॥३३॥

कामाक्षि देव्यम्ब तवाऽऽर्द्रदृष्ट्या
कृतं मयेदं खलु सुप्रभातम्।
सद्यः फलं मे सुखमम्ब लब्धं
तथा च मे दुःखदशा गता हि॥३४॥

ये वा प्रभाते पुरतस्तवाऽऽर्ये
पठन्ति भक्त्या ननु सुप्रभातम्।
शृण्वन्ति ये वा त्वयि बद्धचित्ताः
तेषां प्रभातं कुरु सुप्रभातम्॥३५॥

॥इति श्री-लक्ष्मीकान्त-शर्मा-विरचितं श्री-कामाक्षीसुप्रभातं सम्पूर्णम्॥

ललितापञ्चरत्नम्

Mon, 01 Jan 0001 00:00:00 +0000

Pancharatnam

ललितापञ्चरत्नम्

प्रातः स्मरामि ललितावदनारविन्दं
बिम्बाधरं पृथुलमौक्तिकशोभिनासम्।
आकर्णदीर्घनयनं मणिकुण्डलाढ्यं
मन्दस्मितं मृगमदोज्ज्वलभालदेशम्॥१॥

प्रातर्भजामि ललिताभुजकल्पवल्लीं
रत्नाङ्गुलीयलसदङ्गुलिपल्लवाढ्याम्।
माणिक्यहेमवलयाङ्गदशोभमानां
पुण्ड्रेक्षुचापकुसुमेषुसृणीर्दधानाम्॥२॥

प्रातर्नमामि ललिताचरणारविन्दं
भक्तेष्टदाननिरतं भवसिन्धुपोतम्।
पद्मासनादिसुरनायकपूजनीयं
पद्माङ्कुशध्वजसुदर्शनलाञ्छनाढ्यम्॥३॥

प्रातः स्तुवे परशिवां ललितां भवानीं
त्रय्यन्तवेद्यविभवां करुणानवद्याम्।
विश्वस्य सृष्टिविलयस्थितिहेतुभूतां
विश्वेश्वरीं निगमवाङ्मनसातिदूराम्॥४॥

प्रातर्वदामि ललिते तव पुण्यनाम
कामेश्वरीति कमलेति महेश्वरीति।
श्रीशाम्भवीति जगतां जननी परेति
वाग्देवतेति वचसा त्रिपुरेश्वरीति॥५॥

यः श्लोकपञ्चकमिदं ललिताम्बिकायाः
सौभाग्यदं सुललितं पठति प्रभाते।
तस्मै ददाति ललिता झटिति प्रसन्ना
विद्यां श्रियं विमलसौख्यमनन्तकीर्तिम्॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-ललितापञ्चरत्नं सम्पूर्णम्॥

PDF:A5 / print Kindle Kindle Scribe

महिषासुरमर्दिनि-स्तोत्रम्

Mon, 01 Jan 0001 00:00:00 +0000

महिषासुरमर्दिनि-स्तोत्रम्

अयि गिरिनन्दिनि नन्दितमेदिनि विश्वविनोदिनि नन्दिनुते
गिरिवर-विन्ध्य-शिरोधिनिवासिनि विष्णुविलासिनि जिष्णुनुते।
भगवति हे शितिकण्ठकुटुम्बिनि भूरिकुटुम्बिनि भूरिकृते
जय जय हे महिषासुरमर्दिनि रम्यकपर्दिनि शैलसुते॥१॥

सुरवरवर्षिणि दुर्धरधर्षिणि दुर्मुखमर्षिणि हर्षरते
त्रिभुवनपोषिणि शङ्करतोषिणि किल्बिषमोषिणि घोषरते।
दनुज-निरोषिणि दितिसुत-रोषिणि दुर्मद-शोषिणि सिन्धुसुते
जय जय हे महिषासुरमर्दिनि रम्यकपर्दिनि शैलसुते॥२॥

अयि जगदम्ब-मदम्ब-कदम्ब-वनप्रिय-वासिनि हासरते
शिखरि शिरोमणि तुङ्ग-हिमालय-शृङ्ग-निजालय-मध्यगते।
मधु-मधुरे मधु-कैटभ-गञ्जिनि कैटभ-भञ्जिनि रासरते
जय जय हे महिषासुरमर्दिनि रम्यकपर्दिनि शैलसुते॥३॥

अयि शतखण्ड-विखण्डित-रुण्ड-वितुण्डित-शुण्ड-गजाधिपते
रिपु-गज-गण्ड-विदारण-चण्ड-पराक्रम-शुण्ड-मृगाधिपते।
निज-भुज-दण्ड-निपातित-खण्ड-विपातित-मुण्ड-भटाधिपते
जय जय हे महिषासुरमर्दिनि रम्यकपर्दिनि शैलसुते॥४॥

अयि रण-दुर्मद-शत्रु-वधोदित-दुर्धर-निर्जर-शक्तिभृते
चतुर-विचार-धुरीण-महाशिव-दूतकृत-प्रमथाधिपते।
दुरित-दुरीह-दुराशय-दुर्मति-दानवदूत-कृतान्तमते
जय जय हे महिषासुरमर्दिनि रम्यकपर्दिनि शैलसुते॥५॥

अयि शरणागत-वैरि-वधूवर-वीर-वराभय-दायकरे
त्रिभुवन-मस्तक-शूल-विरोधि शिरोधि कृतामल-शूलकरे।
दुमिदुमि-तामर-दुन्दुभिनाद-महो-मुखरीकृत-तिग्मकरे
जय जय हे महिषासुरमर्दिनि रम्यकपर्दिनि शैलसुते॥६॥

अयि निज-हुङ्कृति मात्र-निराकृत-धूम्रविलोचन-धूम्रशते
समर-विशोषित-शोणित-बीज-समुद्भव-शोणित-बीजलते।
शिव-शिव-शुम्भ-निशुम्भ-महाहव-तर्पित-भूत-पिशाचरते
जय जय हे महिषासुरमर्दिनि रम्यकपर्दिनि शैलसुते॥७॥

धनुरनु-सङ्ग-रणक्षणसङ्ग-परिस्फुर-दङ्ग-नटत्कटके
कनक-पिशङ्ग-पृषत्क-निषङ्ग-रसद्भट-शृङ्ग-हतावटुके।
कृत-चतुरङ्ग-बलक्षिति-रङ्ग-घटद्बहुरङ्ग-रटद्बटुके
जय जय हे महिषासुरमर्दिनि रम्यकपर्दिनि शैलसुते॥८॥

जय जय जप्य-जयेजय-शब्द-परस्तुति-तत्पर-विश्वनुते
भण-भण-भिञ्जिमि-भिङ्कृत-नूपुर-सिञ्जित-मोहित-भूतपते।
नटित-नटार्ध-नटीनट-नायक-नाटित-नाट्य-सुगानरते
जय जय हे महिषासुरमर्दिनि रम्यकपर्दिनि शैलसुते॥९॥

अयि सुमनः सुमनः सुमनः सुमनः सुमनोहर-कान्तियुते
श्रित-रजनी-रजनी-रजनी-रजनी-रजनीकर-वक्त्रवृते।
सुनयन-विभ्रमर-भ्रमर-भ्रमर-भ्रमर-भ्रमराधिपते
जय जय हे महिषासुरमर्दिनि रम्यकपर्दिनि शैलसुते॥१०॥

सहित-महाहव-मल्लम-तल्लिक-मल्लित-रल्लक-मल्लरते
विरचित-वल्लिक-पल्लिक-मल्लिक-भिल्लिक-भिल्लिक-वर्गवृते।
सितकृत-फुल्लसमुल्ल-सितारुण-तल्लज-पल्लव-सल्ललिते
जय जय हे महिषासुरमर्दिनि रम्यकपर्दिनि शैलसुते॥११॥

अविरल-गण्ड-गलन्मद-मेदुर-मत्त-मतङ्गज-राजपते
त्रिभुवन-भूषण-भूत-कलानिधि रूप-पयोनिधि राजसुते।
अयि सुद-तीजन-लालसमानस-मोहन-मन्मथ-राजसुते
जय जय हे महिषासुरमर्दिनि रम्यकपर्दिनि शैलसुते॥१२॥

कमल-दलामल-कोमल-कान्ति कलाकलितामल-भाललते
सकल-विलास-कलानिलयक्रम-केलि-चलत्कल-हंसकुले।
अलिकुल-सङ्कुल-कुवलय-मण्डल-मौलिमिलद्भकुलालि-कुले
जय जय हे महिषासुरमर्दिनि रम्यकपर्दिनि शैलसुते॥१३॥

करमुरली-रव-वीजित-कूजित-लज्जित-कोकिल-मञ्जुमते
मिलित-पुलिन्द-मनोहर-गुञ्जित-रञ्जितशैल-निकुञ्जगते।
निजगुणभूत-महाशबरीगण-सद्गुण-सम्भृत-केलितले
जय जय हे महिषासुरमर्दिनि रम्यकपर्दिनि शैलसुते॥१४॥

कटितट-पीत-दुकूल-विचित्र-मयूख-तिरस्कृत-चन्द्ररुचे
प्रणत-सुरासुर-मौलिमणिस्फुर-दंशुल-सन्नख-चन्द्ररुचे।
जित-कनकाचल-मौलिपदोर्जित-निर्भर-कुञ्जर-कुम्भकुचे
जय जय हे महिषासुरमर्दिनि रम्यकपर्दिनि शैलसुते॥१५॥

विजित-सहस्रकरैक-सहस्रकरैक-सहस्रकरैकनुते
कृतसुरतारक-सङ्गरतारक-सङ्गरतारक-सूनुसुते।
सुरथ-समाधि समानसमाधि समाधिसमाधि सुजातरते
जय जय हे महिषासुरमर्दिनि रम्यकपर्दिनि शैलसुते॥१६॥

पदकमलं करुणानिलये वरिवस्यति योऽनुदिनं स शिवे
अयि कमले कमलानिलये कमलानिलयः स कथं न भवेत्।
तव पदमेव परम्पदमित्यनुशीलयतो मम किं न शिवे
जय जय हे महिषासुरमर्दिनि रम्यकपर्दिनि शैलसुते॥१७॥

कनकलसत्कल-सिन्धुजलैरनुसिञ्चिनुते गुण-रङ्गभुवं
भजति स किं न शचीकुच-कुम्भ-तटी-परिरम्भ-सुखानुभवम्।
तव चरणं शरणं करवाणि नतामरवाणि निवासि शिवं
जय जय हे महिषासुरमर्दिनि रम्यकपर्दिनि शैलसुते॥१८॥

तव विमलेन्दुकुलं वदनेन्दुमलं सकलं ननु कूलयते
किमु पुरुहूत-पुरीन्दुमुखी-सुमुखीभिरसौ विमुखी क्रियते।
मम तु मतं शिवनामधने भवती कृपया किमुत क्रियते
जय जय हे महिषासुरमर्दिनि रम्यकपर्दिनि शैलसुते॥१९॥

अयि मयि दीनदयालुतया कृपयैव त्वया भवितव्यमुमे
अयि जगतो जननी कृपयाऽसि यथाऽसि तथाऽनुमितासिरते।
यदुचितमत्र भवत्युररि कुरुतादुरुतापमपाकुरुते
जय जय हे महिषासुरमर्दिनि रम्यकपर्दिनि शैलसुते॥२०॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-महिषासुरमर्दिनि-स्तोत्रं सम्पूर्णम्॥

मीनाक्षीपञ्चरत्नम्

Mon, 01 Jan 0001 00:00:00 +0000

Pancharatnam

मीनाक्षीपञ्चरत्नम्

उद्यद्भानु-सहस्रकोटिसदृशां केयूरहारोज्ज्वलां
बिम्बोष्ठीं स्मितदन्तपङ्क्तिरुचिरां पीताम्बरालङ्कृताम्।
विष्णुब्रह्मसुरेन्द्रसेवितपदां तत्त्वस्वरूपां शिवां
मीनाक्षीं प्रणतोऽस्मि सन्ततमहं कारुण्यवारान्निधिम्॥१॥

मुक्ताहारलसत्किरीटरुचिरां पूर्णेन्दुवक्त्रप्रभां
शिञ्जन्नूपुरकिङ्किणीमणिधरां पद्मप्रभाभासुराम्।
सर्वाभीष्टफलप्रदां गिरिसुतां वाणीरमासेवितां
मीनाक्षीं प्रणतोऽस्मि सन्ततमहं कारुण्यवारान्निधिम्॥२॥

श्रीविद्यां शिववामभागनिलयां ह्रीङ्कारमन्त्रोज्ज्वलां
श्रीचक्राङ्कित-बिन्दुमध्यवसतीं श्रीमत्सभानायकीम्।
श्रीमत्षण्मुखविघ्नराजजननीं श्रीमज्जगन्मोहिनीं
मीनाक्षीं प्रणतोऽस्मि सन्ततमहं कारुण्यवारान्निधिम्॥३॥

श्रीमत्सुन्दरनायकीं भयहरां ज्ञानप्रदां निर्मलां
श्यामाभां कमलासनार्चितपदां नारायणस्यानुजाम्।
वीणावेणुमृदङ्गवाद्यरसिकां नानाविधाडाम्बिकां
मीनाक्षीं प्रणतोऽस्मि सन्ततमहं कारुण्यवारान्निधिम्॥४॥

नानायोगिमुनीन्द्रहृन्निवसतीं नानार्थसिद्धिप्रदां
नानापुष्पविराजिताङ्घ्रियुगलां नारायणेनार्चिताम्।
नादब्रह्ममयीं परात्परतरां नानार्थतत्त्वात्मिकां
मीनाक्षीं प्रणतोऽस्मि सन्ततमहं कारुण्यवारान्निधिम्॥५॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-मीनाक्षीपञ्चरत्नं सम्पूर्णम्॥

PDF:A5 / print Kindle Kindle Scribe

मूकपञ्चशती

Mon, 01 Jan 0001 00:00:00 +0000

मूकपञ्चशती

आर्याशतकम्

कारण-पर-चिद्रूपा काञ्चीपुर-सीम्नि कामपीठगता।

काचन विहरति करुणा काश्मीर-स्तबक-कोमलाङ्गलता॥१॥

कञ्चन काञ्ची-निलयं करधृत-कोदण्ड-बाण-सृणि-पाशम्।

कठिन-स्तनभर-नम्रं कैवल्यानन्द-कन्दम् अवलम्बे॥२॥

चिन्तित-फल-परिपोषण-चिन्तामणिरेव काञ्चिनिलया मे।

चिरतर-सुचरित-सुलभा चित्तं शिशिरयतु चित्सुखाधारा॥३॥

कुटिलकचं कठिनकुचं कुन्दस्मित-कान्ति कुङ्कुमच्छायम्।

कुरुते विहृतिं काञ्च्यां कुलपर्वत-सार्वभौम-सर्वस्वम्॥४॥

पञ्चशर-शास्त्रबोधन-परमाचार्येण दृष्टिपातेन।

काञ्चीसीम्नि कुमारी काचन मोहयति कामजेतारम्॥५॥

परया काञ्चीपुरया पर्वत-पर्याय-पीनकुच-भरया।

परतन्त्रा वयमनया पङ्कज-सब्रह्मचारि-लोचनया॥६॥

ऐश्वर्यमिन्दुमौलेः ऐकात्म्य-प्रकृति काञ्चिमध्यगतम्।

ऐन्दव-किशोर-शेखरम् ऐदम्पर्यं चकास्ति निगमानाम्॥७॥

श्रितकम्पा-सीमानं शिथिलित-परमशिव-धैर्य-महिमानम्।

कलये पाटलिमानं कञ्चन कञ्चुकित-भुवन-भूमानम्॥८॥

आदृत-काञ्चीनिलयाम् आद्याम् आरूढ-यौवनाटोपाम्।

आगम-वतंस-कलिकाम् आनन्दाद्वैत-कन्दलीं वन्दे॥९॥

तुङ्गाभिराम-कुचभर-शृङ्गारितम् आश्रयामि काञ्चिगतम्।

गङ्गाधर-परतन्त्रं शृङ्गाराद्वैत-तन्त्र-सिद्धान्तम्॥१०॥

PDF:A5 / print Kindle Kindle Scribe

मूकसारः

Mon, 01 Jan 0001 00:00:00 +0000

मूकसारः

१-आर्याशतके

[कारण-पर-चिद्रूपा काञ्चीपुर-सीम्नि कामपीठगता।

काचन विहरति करुणा काश्मीर-स्तबक-कोमलाङ्गलता]॥१॥१-१

कुण्डलि कुमारि कुटिले चण्डि चराचर-सवित्रि चामुण्डे।

गुणिनि गुहारिणि गुह्ये गुरुमूर्ते त्वां नमामि कामाक्षि॥२॥१-४६

अभिदाकृतिर्भिदाकृतिरचिदाकृतिरपि चिदाकृतिर्मातः।

अनहन्ता त्वमहन्ता भ्रमयसि कामाक्षि शाश्वती विश्वम्॥३॥१-४७

काम-परिपन्थि-कामिनि कामेश्वरि काम-पीठ-मध्य-गते।

काम-दुघा भव कमले काम-कले कामकोटि कामाक्षि॥४॥१-४८

लीये पुर-हर-जाये माये तव तरुण-पल्लव-च्छाये।

चरणे चन्द्रा-भरणे काञ्ची-शरणे नतार्ति-संहरणे॥५॥१-७२

स्मर-मथन-वरण-लोला मन्मथ-हेला-विलास-मणि-शाला।

कनक-रुचि-चौर्य-शीला त्वमम्ब बाला कराब्ज-धृत-माला॥६॥१-७३

अन्तरपि बहिरपि त्वं जन्तुततेरन्तकान्तकृदहन्ते।

चिन्तितसन्तानवतां सन्ततमपि तन्तनीषि महिमानम्॥७॥१-९८

[जय जय जगदम्ब शिवे
जय जय कामाक्षि जय जयाद्रिसुते।
जय जय महेशदयिते
जय जय चिद्गगनकौमुदीधारे]॥८॥१-१००

२-पादारविन्दशतके

जपालक्ष्मीशोणो जनितपरमज्ञाननलिनी-
विकासव्यासङ्गो विफलितजगज्जाड्यगरिमा।
मनःपूर्वाद्रिं मे तिलकयतु कामाक्षि तरसा
तमस्काण्डद्रोही तव चरणपाथोजरमणः॥९॥२-१७

गिरां दूरौ चोरौ जडिमतिमिराणां कृतजगत्
परित्राणौ शोणौ मुनिहृदयलीलैकनिपुणौ।
नखैः स्मेरौ सारौ निगमवचसां खण्डितभव-
ग्रहोन्मादौ पादौ तव जननि कामाक्षि कलये॥१०॥२-४४

भवाम्भोधौ नौकां जडिमविपिने पावकशिखाम्
अमर्त्येन्द्रादीनामधिमुकुटमुत्तंसकलिकाम्।
जगत्तापे ज्योत्स्नामकृतकवचःपञ्जरपुटे
शुकस्त्रीं कामाक्ष्या मनसि कलये पादयुगलीम्॥११॥२-४९

कवित्वश्रीमिश्रीकरणनिपुणौ रक्षणचणौ
विपन्नानां श्रीमन्नलिनमसृणौ शोणकिरणौ।
मुनीन्द्राणामन्तःकरणशरणौ मन्दसरणौ
मनोज्ञौ कामाक्ष्या दुरितहरणौ नौमि चरणौ॥१२॥२-७३

परस्मात्सर्वस्मादपि च परयोर्मुक्तिकरयोः
नखश्रीभिर्ज्योत्स्नाकलिततुलयोस्ताम्रतलयोः।
निलीये कामाक्ष्या निगमनुतयोर्नाकिनतयोः
निरस्तप्रोन्मीलन्नलिनमदयोरेव पदयोः॥१३॥२-७४

रणन्मञ्जीराभ्यां ललितगमनाभ्यां सुकृतिनाम्
मनोवास्तव्याभ्यां मथिततिमिराभ्यां नखरुचा।
निधेयाभ्यां पत्या निजशिरसि कामाक्षि सततम्
नमस्ते पादाभ्यां नलिनमृदुलाभ्यां गिरिसुते॥१४॥२-९६

यशः सूते मातर्मधुरकवितां पक्ष्मलयते
श्रियं दत्ते चित्ते कमपि परिपाकं प्रथयते।
सतां पाशग्रन्थिं शिथिलयति किं किं न कुरुते
प्रपन्ने कामाक्ष्याः प्रणतिपरिपाटी चरणयोः॥१५॥२-९९

मनीषां माहेन्द्रीं ककुभमिव ते कामपि दशाम्
प्रधत्ते कामाक्ष्याश्चरणतरुणादित्यकिरणः।
यदीये सम्पर्के धृतरसमरन्दा कवयताम्
परीपाकं धत्ते परिमलवती सूक्तिनलिनी॥१६॥२-१००

३-स्तुतिशतके

[श्यामा काचन चन्द्रिका त्रिभुवने पुण्यात्मनामानने
सीमाशून्यकवित्ववर्षजननी या काऽपि कादम्बिनी।
मारारातिमनोविमोहनविधौ काचित्तमःकन्दली
कामाक्ष्याः करुणाकटाक्षलहरी कामाय मे कल्पताम्]॥१७॥३-६

राकाचन्द्रसमानकान्तिवदना नाकाधिराजस्तुता
मूकानामपि कुर्वती सुरधुनीनीकाशवाग्वैभवम्।
श्रीकाञ्चीनगरीविहाररसिका शोकापहन्त्री सताम्
एका पुण्यपरम्परा पशुपतेराकारिणी राजते॥१८॥३-११

जाता शीतल-शैलतः सुकृतिनां दृश्या परं देहिनां
लोकानां क्षण-मात्र-संस्मरणतः सन्ताप-विच्छेदिनी।
आश्चर्यं बहु खेलनं वितनुते नैश्चल्य-माबिभ्रती
कम्पायास्तट-सीम्नि काऽपि तटिनी कारुण्य-पाथोमयी॥१९॥३-१२

वरीवर्तु स्थेमा त्वयि मम गिरां देवि मनसो
नरीनर्तु प्रौढा वदनकमले वाक्यलहरी।
चरीचर्तु प्रज्ञाजननि जडिमानः परजने
सरीसर्तु स्वैरं जननि मयि कामाक्षि करुणा॥२०॥३-४८

परा विद्या हृद्याश्रितमदनविद्या मरकत-
प्रभानीला लीलापरवशितशूलायुधमनाः।
तमःपूरं दूरं चरणनतपौरन्दरपुरी-
मृगाक्षी कामाक्षी कमलतरलाक्षी नयतु मे॥२१॥३-५६

यस्या वाटी हृदयकमलं कौसुमी योगभाजाम्
यस्याः पीठी सततशिशिरा शीकरैर्माकरन्दैः।
यस्याः पेटी श्रुतिपरिचलन्मौलिरत्नस्य काञ्ची
सा मे सोमाभरणमहिषी साधयेत्काङ्क्षितानि॥२२॥३-७७

परामृतझरीप्लुता जयति नित्यमन्तश्चरी
भुवामपि बहिश्चरी परमसंविदेकात्मिका।
महद्भिरपरोक्षिता सततमेव काञ्चीपुरे
ममान्वहमहम्मतिर्मनसि भातु माहेश्वरी॥२३॥३-९०

चराचरजगन्मयीं सकलहृन्मयीं चिन्मयीम्
गुणत्रयमयीं जगत्त्रयमयीं त्रिधामामयीम्।
परापरमयीं सदा दशदिशां निशाहर्मयीम्
परां सततसन्मयीं मनसि चिन्मयीं शीलये॥२४॥३-९७

भुवनजननि भूषाभूतचन्द्रे नमस्ते
कलुषशमनि कम्पातीरगेहे नमस्ते।
निखिलनिगमवेद्ये नित्यरूपे नमस्ते
परशिवमयि पाशच्छेदहस्ते नमस्ते॥२५॥३-९९

समरविजयकोटी साधकानन्दधाटी
मृदुगुणपरिपेटी मुख्यकादम्बवाटी।
मुनिनुतपरिपाटी मोहिताजाण्डकोटी
परमशिववधूटी पातु मां कामकोटी॥२६॥३-१०१

४-कटाक्षशतके

मातर्जयन्ति ममता-ग्रह-मोक्षणानि
माहेन्द्र-नील-रुचि-शिक्षण-दक्षिणानि।
कामाक्षि कल्पित-जगत्त्रय-रक्षणानि
त्वद्वीक्षणानि वरदान-विचक्षणानि॥२७॥४-२

नीलोऽपि रागमधिकं जनयन् पुरारेः
लोलोऽपि भक्तिमधिकां दृढयन्नराणाम्।
वक्रोऽपि देवि नमतां समतां वितन्वन्
कामाक्षि नृत्यतु मयि त्वदपाङ्गपातः॥२८॥४-१६

अत्यन्त-शीतलमतन्द्रयतु क्षणार्धम्
अस्तोक-विभ्रममनङ्गविलासकन्दम्।
अल्प-स्मितादृतमपारकृपाप्रवाहम्
अक्षि-प्ररोहमचिरान्मयि कामकोटि॥२९॥४-२४

मातः क्षणं स्नपय मां तव वीक्षितेन
मन्दाक्षितेन सुजनैरपरोक्षितेन।
कामाक्षि कर्म-तिमिरोत्कर-भास्करेण
श्रेयस्करेण मधुप-द्युति-तस्करेण॥३०॥४-४५

कैवल्यदाय करुणारसकिङ्कराय
कामाक्षि कन्दलितविभ्रमशङ्कराय।
आलोकनाय तव भक्तशिवङ्कराय
मातर्नमोऽस्तु परतन्त्रितशङ्कराय॥३१॥४-४७

संसारघर्मपरितापजुषां नराणाम्
कामाक्षि शीतलतराणि तवेक्षितानि।
चन्द्रातपन्ति घनचन्दनकर्दमन्ति
मुक्तागुणन्ति हिमवारिनिषेचनन्ति॥३२॥४-७७

बाणेन पुष्पधनुषः परिकल्प्यमान-
त्राणेन भक्तमनसां करुणाकरेण।
कोणेन कोमलदृशस्तव कामकोटि
शोणेन शोषय शिवे मम शोकसिन्धुम्॥३३॥४-९४

अज्ञातभक्तिरसमप्रसरद्विवेकम्
अत्यन्तगर्वमनधीतसमस्तशास्त्रम्।
अप्राप्तसत्यमसमीपगतं च मुक्तेः
कामाक्षि मामवतु ते करुणाकटाक्षः॥३४॥४-१००

५-मन्दस्मितशतके

कर्पूरैरमृतैर्जगज्जननि ते कामाक्षि चन्द्रातपैः
मुक्ताहारगुणैर्मृणालवलयैर्मुग्धस्मितश्रीरियम्।
श्रीकाञ्चीपुरनायिके समतया संस्तूयते सज्जनैः
तत्तादृङ्मम तापशान्तिविधये किं देवि मन्दायते॥३५॥५-२४

चेतः शीतलयन्तु नः पशुपतेरानन्दजीवातवो
नम्राणां नयनाध्वसीमसु शरच्चन्द्रातपोपक्रमाः।
संसाराख्यसरोरुहाकरखलीकारे तुषारोत्कराः
कामाक्षि स्मरकीर्तिबीजनिकरास्त्वन्मन्दहासाङ्कुराः॥३६॥५-३१

सूतिः श्वेतिमकन्दलस्य वसतिः शृङ्गारसारश्रियः
पूर्तिः सूक्तिझरीरसस्य लहरी कारुण्यपाथोनिधेः।
वाटी काचन कौसुमी मधुरिमस्वाराज्यलक्ष्म्यास्तव
श्रीकामाक्षि ममास्तु मङ्गलकरी हासप्रभाचातुरी॥३७॥५-८५

इन्धाने भववीतिहोत्रनिवहे कर्मौघचण्डानिल-
प्रौढिम्ना बहुलीकृते निपतितं सन्तापचिन्ताकुलम्।
मातर्मां परिषिञ्च किञ्चिदमलैः पीयूषवर्षैरिव
श्रीकामाक्षि तव स्मितद्युतिकणैः शैशिर्यलीलाकरैः॥३८॥५-९४

क्रीडालोलकृपासरोरुहमुखीसौधाङ्गणेभ्यः कवि-
श्रेणीवाक्परिपाटिकामृतझरीसूतीगृहेभ्यः शिवे।
निर्वाणाङ्कुरसार्वभौमपदवीसिंहासनेभ्यस्तव
श्रीकामाक्षि मनोज्ञमन्दहसितज्योतिष्कणेभ्यो नमः॥३९॥५-१००

आर्यामेव विभावयन् मनसि यः पादारविन्दं पुरः
पश्यन्नारभते स्तुतिं स नियतं लब्ध्वा कटाक्ष-च्छविम्।
कामाक्ष्या मृदुल-स्मितांशु-लहरी-ज्योत्स्ना-वयस्यान्विताम्
आरोहत्यपवर्ग-सौध-वलभीमानन्द-वीची-मयीम्॥४०॥५-१०१

॥इति श्री-काञ्चीजगद्गुरु-श्री-चन्द्रशेखरेन्द्रसरस्वती-श्रीचरणैः श्री-मूकमहाकविप्रणीतायाः मूकपञ्चशत्याः सङ्ग्रहीतः मूकसारः सम्पूर्णः॥

परशुरामकृत-दुर्गास्तोत्रम्

Mon, 01 Jan 0001 00:00:00 +0000

परशुरामकृत-दुर्गास्तोत्रम्

श्री-परशुराम उवाच

श्रीकृष्णस्य च गोलोके परिपूर्णतमस्य च।

आविर्भूता विग्रहतः परा सृष्ट्युन्मुखस्य च॥१॥

सूर्यकोटिप्रभायुक्ता वस्त्रालङ्कारभूषिता।

वह्निशुद्धांशुकाधाना सुस्मिता सुमनोहरा॥२॥

नवयौवनसम्पन्ना सिन्दूरारुण्यशोभिता।

ललितं कबरीभारं मालतीमाल्यमण्डितम्॥३॥

अहोऽनिर्वचनीया त्वं चारुमूर्तिं च बिभ्रती।

मोक्षप्रदा मुमुक्षूणां महाविष्णोर्विधिः स्वयम्॥४॥

मुमोह क्षणमात्रेण दृष्ट्वा त्वां सर्वमोहिनीम्।

बालैः सम्भूय सहसा सस्मिता धाविता पुरा॥५॥

सद्भिः ख्याता तेन राधा मूलप्रकृतिरीश्वरी।

कृष्णस्त्वां सहसा भीतो वीर्याधानं चकार ह॥६॥

ततो डिम्भं महज्जज्ञे ततो जातो महान्विराट्।

यस्यैव लोमकूपेषु ब्रह्माण्डान्यखिलानि च॥७॥

राधारतिक्रमेणैव तन्निःश्वासो बभूव ह।

स निःश्वासो महावायुः स विराड्विश्वधारकः॥८॥

भयघर्मजलेनैव पुप्लुवे विश्वगोलकम्।

स विराड् विश्वनिलयो जलराशिर्बभूव ह॥९॥

ततस्त्वं पञ्चधा भूय पञ्चमूर्तीश्च बिभ्रती।

प्राणाधिष्ठातृमूर्तिर्या कृष्णस्य परमात्मनः॥१०॥

कृष्णप्राणाधिकां राधां तां वदन्ति पुराविदः।

वेदाधिष्ठातृमूर्तिर्या वेदशास्त्रप्रसूरपि॥११॥

तं सावित्रीं शुद्धरूपां प्रवदन्ति मनीषिणः।

ऐश्वर्याधिष्ठातृमूर्तिः शान्तिस्त्वं शान्तरूपिणी॥१२॥

लक्ष्मीं वदन्ति सन्तस्तां शुद्धां सत्त्‍‌वस्वरूपिणीम्।

रागाधिष्ठात्री या देवी शुक्लमूर्तिः सतां प्रसूः॥१३॥

सरस्वतीं तां शास्त्रज्ञां शास्त्रज्ञाः प्रवदन्त्यहो।

बुद्धिर्विद्या सर्वशक्तेर्या मूर्तिरधिदेवता॥१४॥

सर्वमङ्गलदा सन्तो वदन्ति सर्वमङ्गलाम्।

सर्वमङ्गलमङ्गल्या सर्वमङ्गलरूपिणी॥१५॥

सर्वमङ्गलबीजस्य शिवस्य निलयेऽधुना।

शिवे शिवास्वरूपा त्वं लक्ष्मीर्नारायणान्तिके॥१६॥

सरस्वती च सावित्री वेदसू‌र्ब्रह्मणः प्रिया।

राधा रासेश्वरस्यैव परिपूर्णतमस्य च॥१७॥

परमानन्दरूपस्य परमानन्दरूपिणी।

त्वत्कलांशांशकलया देवानामपि योषितः॥१८॥

त्वं विद्या योषितः सर्वाः सर्वेषां बीजरूपिणी।

छाया सूर्यस्य चन्द्रस्य रोहिणी सर्वमोहिनी॥१९॥

शची शक्रस्य कामस्य कामिनी रतिरीश्वरी।

वरुणानी जलेशस्य वायोः स्त्रीः प्राणवल्लभा॥२०॥

वह्नेः प्रिया हि स्वाहा च कुबेरस्य च सुन्दरी।

यमस्य तु सुशीला च नैर्ऋतस्य च कैटभी॥२१॥

ऐशानी स्याच्छशिकला शतरूपा मनोः प्रिया।

देवहूतिः कर्दमस्य वसिष्ठस्याप्यरुन्धती॥२२॥

लोपामुद्राऽप्यगस्त्यस्य देवमाताऽदितिस्तथा।

अहल्या गौतमस्यापि सर्वाधारा वसुन्धरा॥२३॥

गङ्गा च तुलसी चापि पृथिव्यां या सरिद्वरा।

एताः सर्वाश्च या ह्यन्या सर्वास्त्वत्कलयाऽम्बिके॥२४॥

गृहलक्ष्मीर्गृहे नॄणां राजलक्ष्मीश्च राजसु।

तपस्विनां तपस्या त्वं गायत्री ब्राह्मणस्य च॥२५॥

सतां सत्त्‍‌वस्वरूपा त्वमसतां कलहाङ्कुरा।

ज्योतीरूपा निर्गुणस्य शक्तिस्त्वं सगुणस्य च॥२६॥

सूर्ये प्रभास्वरूपा त्वं दाहिका च हुताशने।

जले शैत्यस्वरूपा च शोभारूपा निशाकरे॥२७॥

त्वं भूमौ गन्धरूपा च आकाशे शब्दरूपिणी।

क्षुत्पिपासादयस्त्वं च जीविनां सर्वशक्तयः॥२८॥

सर्वबीजस्वरूपा त्वं संसारे साररूपिणी।

स्मृतिर्मेधा च बुद्धिर्वा ज्ञानशक्तिर्विपश्चिताम्॥२९॥

कृष्णेन विद्या या दत्ता सर्वज्ञानप्रसूः शुभा।

शूलिने कृपया सा त्वं यया मृत्युञ्जयः शिवः॥३०॥

सृष्टिपालनसंहारशक्तयस्त्रिविधाश्च याः।

ब्रह्मविष्णुमहेशानां सा त्वमेव नमोऽस्तु ते॥३१॥

मधुकैटभभीत्या च त्रस्तो धाता प्रकम्पितः।

स्तुत्वा मुक्तश्च यां देवीं तां मूर्ध्ना प्रणमाम्यहम्॥३२॥

मधुकैटभयोर्युद्धे त्राताऽसौ विष्णुरीश्वरीम्।

बभूव शक्तिमान् स्तुत्वा तां दुर्गां प्रणमाम्यहम्॥३३॥

त्रिपुरस्य महायुद्धे सरथे पतिते शिवे।

यां तुष्टुवुः सुराः सर्वे तां दुर्गां प्रणमाम्यहम्॥३४॥

विष्णुना वृषरूपेण स्वयं शम्भुः समुत्थितः।

जघान त्रिपुरं स्तुत्वा तां दुर्गां प्रणमाम्यहम्॥३५॥

यदाज्ञया वाति वातः सूर्यस्तपति सन्ततम्।

वर्षतीन्द्रो दहत्यग्निस्तां दुर्गां प्रणमाम्यहम्॥३६॥

यदाज्ञया हि कालश्च शश्वद् भ्रमति वेगतः।

मृत्युश्चरति जन्तूनां तां दुर्गां प्रणमाम्यहम्॥३७॥

स्त्रष्टा सृजति सृष्टिं च पाता पाति यदाज्ञया।

संहर्ता संहरेत् काले तां दुर्गां प्रणमाम्यहम्॥३८॥

ज्योतिःस्वरूपो भगवाञ्छ्रीकृष्णो निर्गुणः स्वयम्।

यया विना न शक्तश्च सृष्टिं कर्तुं नमामि ताम्॥३९॥

रक्ष रक्ष जगन्मातरपराधं क्षमस्व मे।

शिशूनामपराधेन कुतो माता हि कुप्यति॥४०॥

इत्युक्त्वा परशुरामश्च नत्वा तां च रुरोद ह।

तुष्टा दुर्गा सम्भ्रमेण चाभयं च वरं ददौ॥४१॥

अमरो भव हे पुत्र वत्स सुस्थिरतां व्रज।

शर्वप्रसादात् सर्वत्र जयोऽस्तु तव सन्ततम्॥४२॥

सर्वान्तरात्मा भगवांस्तुष्टः स्यात्सन्ततं हरिः।

भक्तिर्भवतु ते कृष्णे शिवदे च शिवे गुरौ॥४३॥

इष्टदेवे गुरौ यस्य भक्तिर्भवति शाश्वती।

तं हन्तुं न हि शक्ताश्च रुष्टा वा सर्वदेवताः॥४४॥

श्रीकृष्णस्य च भक्तस्त्वं शिष्यो वै शङ्करस्य च।

गुरुपत्‍‌नीं स्तौषि यस्मात् कस्त्वां हन्तुमिहेश्वरः॥४५॥

अहो न कृष्णभक्तानामशुभं विद्यते क्वचित्।

अन्यदेवेषु ये भक्ता न भक्ता वा निरङ्कुशाः॥४६॥

चन्द्रमा बलवांस्तुष्टो येषां भाग्यवतां भृगो।

तेषां तारागणा रुष्टाः किं कुर्वन्ति च दुर्बलाः॥४७॥

यस्मै तुष्टः पालयति नरदेवो महान् सुखी।

तस्य किं वा करिष्यन्ति रुष्टा भृत्याश्च दुर्बलाः॥४८॥

इत्युक्त्वा पार्वती तुष्टा दत्त्‍‌वा रामाय चाऽऽशिषम्।

जगामान्तःपुरं तूर्णं हर्षशब्दो बभूव ह॥४९॥

फलश्रुतिः

स्तोत्रं वै काण्वशाखोक्तं पूजाकाले च यः पठेत्।

यात्राकाले च प्रातर्वा वाञ्छितार्थं लभेद्ध्रुवम्॥५०॥

पुत्रार्थी लभते पुत्रं कन्यार्थी कन्यकां लभेत्।

विद्यार्थी लभते विद्यां प्रजार्थी चाऽऽप्नुयात् प्रजाम्॥५१॥

भ्रष्टराज्यो लभेद् राज्यं नष्टवित्तो धनं लभेत्।

यस्य रुष्टो गुरुर्देवो राजा वा बान्धवोऽथवा॥५२॥

तस्मै तुष्टश्च वरदः स्तोत्रराजप्रसादतः।

दस्युग्रस्तो फणिग्रस्तः शत्रुग्रस्तो भयानकः॥५३॥

व्याधिग्रस्तो भवेन्मुक्तः स्तोत्रस्मरणमात्रतः।

राजद्वारे श्मशाने च कारागारे च बन्धने॥५४॥

जलराशौ निमग्नश्च मुक्तस्तत्स्मृतिमात्रतः।

स्वामिभेदे पुत्रभेदे मित्रभेदे च दारुणे॥५५॥

स्तोत्रस्मरणमात्रेण वाञ्छितार्थं लभेद्ध्रुवम्।

कृत्वा हविष्यं वर्षं च स्तोत्रराजं श्रृणोति या॥५६॥

भक्त्या दुर्गां च सम्पूज्य महावन्ध्या प्रसूयते।
लभते सा दिव्यपुत्रं ज्ञानिनं चिरजीविनम्।
असौभाग्या च सौभाग्यं षण्मासश्रवणाल्लभेत्॥५७॥

नवमासं काकवन्ध्या मृतवत्सा च भक्तितः।

स्तोत्रराजं या श्रृणोति सा पुत्रं लभते ध्रुवम्॥५८॥

कन्यामाता पुत्रहीना पञ्चमासं श्रृणोति या।

घटे सम्पूज्य दुर्गां च सा पुत्रं लभते ध्रुवम्॥५९॥

॥इति श्री-ब्रह्मवैवर्तमहापुराणे गणपतिखण्डे पञ्चचत्वारिंशेऽध्याये श्री-नारद-नारायण-संवादे श्री-परशुरामकृतं श्री-दुर्गास्तोत्रं सम्पूर्णम्॥

षष्ठीदेवी-स्तोत्रम्

Mon, 01 Jan 0001 00:00:00 +0000

षष्ठीदेवी-स्तोत्रम्

प्रियव्रत उवाच

नमो देव्यै महादेव्यै सिद्‍ध्यै शान्त्यै नमो नमः।

शुभायै देवसेनायै षष्ठीदेव्यै नमो नमः॥१॥

वरदायै पुत्रदायै धनदायै नमो नमः।

सुखदायै मोक्षदायै षष्ठीदेव्यै नमो नमः॥२॥

शक्तेः षष्ठांशरूपायै सिद्धायै च नमो नमः।

मायायै सिद्धयोगिन्यै षष्ठीदेव्यै नमो नमः॥३॥

पारायै पारदायै च षष्ठीदेव्यै नमो नमः।

सारायै सारदायै च पारायै सर्वकर्मणाम्॥४॥

बालाधिष्ठातृदेव्यै च षष्ठीदेव्यै नमो नमः।
कल्याणदायै कल्याण्यै फलदायै च कर्मणाम्।
प्रत्यक्षायै च भक्तानां षष्ठीदेव्यै नमो नमः॥५॥

पूज्यायै स्कन्दकान्तायै सर्वेषां सर्वकर्मसु।

देवरक्षणकारिण्यै षष्ठीदेव्यै नमो नमः॥६॥

शुद्धसत्त्वस्वरूपायै वन्दितायै नृणां सदा।

हिंसाक्रोधैर्वर्जितायै षष्ठीदेव्यै नमो नमः॥७॥

धनं देहि प्रियां देहि पुत्रं देहि सुरेश्वरि।

धर्मं देहि यशो देहि षष्ठीदेव्यै नमो नमः॥८॥

भूमिं देहि प्रजां देहि देहि विद्यां सुपूजिते।

कल्याणं च जयं देहि षष्ठीदेव्यै नमो नमः॥९॥

इति देवीं च संस्तूय लेभे पुत्रं प्रियव्रतः।

यशस्विनं च राजेन्द्रं षष्ठीदेवीप्रसादतः॥१०॥

षष्ठीस्तोत्रमिदं ब्रह्मण् यः शृणोति च वत्सरम्।

अपुत्रो लभते पुत्रं वरं सुचिरजीवनम्॥११॥

वर्षमेकं च या भक्त्या संयतेदं शृणोति च।

सर्वपापाद्विनिर्मुक्ता महावन्ध्या प्रसूयते॥१२॥

वीरपुत्रं च गुणिनं विद्यावन्तं यशस्विनम्।

सुचिरायुष्मन्तमेव षष्ठीमातृप्रसादतः॥१३॥

काकवन्ध्या च या नारी मृतापत्या च या भवेत्।

वर्षं श्रुत्वा लभेत्पुत्रं षष्ठीदेवीप्रसादतः॥१४॥

रोगयुक्ते च बाले च पिता माता शृणोति च।

मासं च मुच्यते बालः षष्ठीदेवीप्रसादतः॥१५॥

॥इति श्री-ब्रह्मवैवर्तमहापुराणे प्रकृतिखण्डे श्री-नारद-नारायण-संवादे षष्ठ्युपाख्याने श्री-प्रियव्रतविरचितं श्री-षष्ठीदेवीस्तोत्रं सम्पूर्णम्॥

शीतलाष्टकम्

Mon, 01 Jan 0001 00:00:00 +0000

Ashtakam

शीतलाष्टकम्

अस्य श्रीशीतलास्तोत्रस्य महादेव ऋषिः।
अनुष्टुप् छन्दः। शीतला देवता। लक्ष्मीर्बीजम्।
भवानी शक्तिः। सर्वविस्फोटकनिवृत्यर्थे जपे विनियोगः॥

ईश्वर उवाच

वन्देऽहं शीतलां देवीं रासभस्थां दिगम्बराम्।

मार्जनीकलशोपेतां शूर्पालङ्कृतमस्तकाम्॥१॥

वन्देऽहं शीतलां देवीं सर्वरोगभयापहाम्।

यामासाद्य निवर्तेत विस्फोटकभयं महत्॥२॥

शीतले शीतले चेति यो ब्रूयाद् दाहपीडितः।

विस्फोटकभयं घोरं क्षिप्रं तस्य प्रणश्यति॥३॥

यस्त्वामुदकमध्ये तु ध्यात्वा सम्पूजयेन्नरः।

विस्फोटकभयं घोरं गृहे तस्य न जायते॥४॥

शीतले ज्वरदग्धस्य पूतिगन्धयुतस्य च।

प्रणष्टचक्षुषः पुंसस्त्वामाहुर्जीवनौषधम्॥५॥

शीतले तनुजान् रोगान् नृणां हरसि दुस्त्यजान्।

विस्फोटकविदीर्णानां त्वमेकाऽमृतवर्षिणी॥६॥

गलगण्डग्रहा रोगा ये चान्ये दारुणा नृणाम्।

त्वदनुध्यानमात्रेण शीतले यान्ति सङ्क्षयम्॥७॥

न मन्त्रो नौषधं तस्य पापरोगस्य विद्यते।

त्वामेकां शीतले धात्रीं नान्यां पश्यामि देवताम्॥८॥

मृणालतन्तुसदृशीं नाभिहृन्मध्यसंस्थिताम्।

यस्त्वां सञ्चिन्तयेद् देवि तस्य मृत्युर्न जायते॥९॥

अष्टकं शीतलादेव्या यो नरः प्रपठेत् सदा।

विस्फोटकभयं घोरं गृहे तस्य न जायते॥१०॥

श्रोतव्यं पठितव्यं च श्रद्धाभक्तिसमन्वितैः।

उपसर्गविनाशाय परं स्वस्त्ययनं महत्॥११॥

शीतले त्वं जगन्माता शीतले त्वं जगत्पिता।

शीतले त्वं जगद्धात्री शीतलायै नमो नमः॥१२॥

रासभो गर्दभश्चैव खरो वैशाखनन्दनः।

शीतलावाहनश्चैव दूर्वाकन्दनिकृन्तनः॥१३॥

एतानि खरनामानि शीतलाग्रे तु यः पठेत्।

तस्य गेहे शिशूनां च शीतलारुङ् न जायते॥१४॥

शीतलाष्टकमेवेदं न देयं यस्यकस्यचित्।

दातव्यं च सदा तस्मै श्रद्धाभक्तियुताय वै॥१५॥

॥इति श्री-स्कान्दपुराणे श्री-शीतलाष्टकं सम्पूर्णम्॥

श्यामलादण्डकम्

Mon, 01 Jan 0001 00:00:00 +0000

Dandakam

श्यामलादण्डकम्

ध्यानम्

माणिक्यवीणामुपलालयन्तीं
मदालसां मञ्जुलवाग्विलासाम्।
माहेन्द्रनीलद्युतिकोमलाङ्गीं
मातङ्गकन्यां मनसा स्मरामि॥१॥

चतुर्भुजे चन्द्रकलावतंसे कुचोन्नते कुङ्कुमरागशोणे।

पुण्ड्रेक्षुपाशाङ्कुशपुष्पबाणहस्ते नमस्ते जगदेकमातः॥२॥

विनियोगः

माता मरकतश्यामा मातङ्गी मदशालिनी।

कुर्यात् कटाक्षं कल्याणी कदम्बवनवासिनी॥

स्तुतिः

जय मातङ्गतनये जय नीलोत्पलद्युते।

जय सङ्गीतरसिके जय लीलाशुकप्रिये॥

दण्डकम्

जय जननि सुधासमुद्रान्-तरुद्यन्-मणिद्वीप-संरूढ-बिल्वाटवी-मध्य-कल्प-द्रुमाकल्प-कादम्ब-कान्तार-वासप्रिये कृत्तिवासप्रिये सर्वलोकप्रिये'
सादरारब्ध-सङ्गीत-सम्भावना-सम्भ्रमालोल-नीपस्रगाबद्ध-चूलीसनाथत्रिके सानुमत्पुत्रिके'
शेखरीभूत-शीतांशुरेखा-मयूखावली-बद्ध-सुस्निग्ध-नीलालकश्रेणि-शृङ्गारिते लोकसम्भाविते'
कामलीला-धनुः सन्निभ-भ्रूलता-पुष्प-सन्दोह-सन्देह-कृल्लोचने वाक्सुधासेचने'
चारुगोरोचनापङ्क-केलीलला-माभिरामे सुरामे रमे'
प्रोल्लसद्-वालिका-मौक्तिकश्रेणिका-चन्द्रिका-मण्डलोद्भासि-गण्डस्थलन्यस्त-कस्तूरिका-पत्ररेखा-समुद्भूत-सौरभ्य-सम्भ्रान्त-भृङ्गाङ्गनागीत-सान्द्रीभवन्-मन्द्रतन्त्रीस्वरे सुस्वरे भास्वरे'
वल्लकी-वादन-प्रक्रिया-लोल-तालीदलाबद्ध-ताटङ्क-भूषाविशेषान्विते सिद्ध-सम्मानिते'
दिव्यहालाम-दोद्वेलहेलाल-सच्चक्षुरान्दोलन-श्रीसमाक्षिप्त-कर्णैक-नीलोत्पले श्यामले पूरिताशेष-लोकाभि-वाञ्छाफले श्रीफले'
स्वेद-बिन्दूल्लसद्-भाल-लावण्य-निष्यन्द-सन्दोह-सन्देह-कृन्नासिका-मौक्तिके सर्वमन्त्रात्मिके कालिके'
मुग्ध-मन्दस्मितो-दारवक्त्रस्फुरत्-पूग-कर्पूर-ताम्बूल-खण्डोत्करे
ज्ञानमुद्राकरे सर्वसम्पत्करे
पद्मभास्वत्करे श्रीकरे'
कुन्द-पुष्पद्युतिस्निग्ध-दन्तावली-निर्मलालोल-कल्लोल-सम्मेल-नस्मेरशोणाधरे चारुवीणाधरे पक्वबिम्बाधरे'
सुललित-नवयौवनारम्भ-चन्द्रोदयोद्वेल-लावण्य-दुग्धार्णवाविर्भवत्कम्बु-बिम्बोक-भृत्कन्थरे सत्कला-मन्दिरे मन्थरे'
दिव्य-रत्नप्रभा-बन्धुरच्छन्न-हारादि-भूषा-समुद्योतमाना-नवद्याङ्गशोभे शुभे'
रत्न-केयूर-रश्मिच्छटा-पल्लव-प्रोल्लसद्-दोल्लता-राजिते योगिभिः पूजिते'
विश्व-दिङ्मण्डलव्याप्त-माणिक्य-तेजः स्फुरत्-कङ्कणालङ्कृते
विभ्रमालङ्कृते साधुभिः सत्कृते'
वासरारम्भ-वेला-समुज्जृम्भ-माणारविन्द-प्रतिद्वन्द्वि-पाणिद्वये
सन्ततोद्यद्वये अद्वये'
दिव्य-रत्नोर्मिका-दीधिति-स्तोम-सन्ध्यायमा-नाङ्गुली-पल्लवोद्यन्न-खेन्दु-प्रभा-मण्डले सन्नुताखण्डले
चित्प्रभामण्डले प्रोल्लसत्कुण्डले'
तारकाराजि-नीकाश-हारावलिस्मेर-चारुस्तना-भोगभारानमन्मध्य-वल्लीवलिच्छेद-वीची-समुद्यत्-समुल्लास-सन्दर्शिताकार-सौन्दर्य-रत्नाकरे वल्लकी-भृत्करे किङ्कर-श्रीकरे'
हेम-कुम्भोप-मोत्तुङ्ग-वक्षोजभारावनम्रे त्रिलोकावनम्रे'
लसद्वृत्त-गम्भीर-नाभी-सरस्तीर-शैवाल-शङ्काकर-श्यामरोमावली-भूषणे मञ्जुसम्भाषणे'
चारुशिञ्चत्कटीसूत्र-निर्भत्सितानङ्ग-लीला-धनुश्शिञ्चिनी-डम्बरे दिव्यरत्नाम्बरे'
पद्मरागोल्लसन्-मेखला-भास्वर-श्रोणि-शोभाजित-स्वर्ण-भूभृत्तले चन्द्रिका-शीतले'
विकसित-नवकिंशुकाताम्र-दिव्यांशु-कच्छन्न-चारूरु-शोभा-पराभूत-सिन्दूर-शोणाय-मानेन्द्र-मातङ्ग-हस्तार्गले वैभवानर्गले श्यामले'
कोमलस्निग्ध-नीलोत्पलोत्-पादितानङ्ग-तूणीर-शङ्काकरोदाम-जङ्घालते चारुलीलागते'
नम्र-दिक्पाल-सीमन्तिनि
कुन्तलस्निग्ध-नीलप्रभा-पुञ्चसञ्जात-दूर्वाङ्कु-राशङ्क-सारङ्ग-संयोग-रिङ्खन्न-खेन्दूज्ज्वले प्रोज्ज्वले निर्मले'
प्रह्वदेवेश-लक्ष्मीश-भूतेश-तोयेश-वागीश-कीनाश-दैत्येश-यक्षेश-वाय्वग्नि-माणिक्य-संहृष्ट-कोटीर-बाला-तपोद्दामलाक्षा-रसारुण्य-तारुण्य-लक्ष्मी-गृहीताङ्घ्रि-पद्मे
सुपद्मे उमे'
सुरुचिर-नवरत्न-पीठस्थिते सुस्थिते
रत्नपद्मासने रत्नसिंहासने
शङ्खपद्मद्वयोपाश्रिते विश्रिते
तत्र विघ्नेश-दुर्गावटु-क्षेत्रपालैर्युते
मत्तमातङ्ग-कन्या-समूहान्विते'
मञ्जुलामेनकाद्यङ्गनामानिते
भैरवैरष्टभिर्वेष्टिते देवि
वामादिभिः शक्तिभिः सेविते
धात्रि-लक्ष्म्यादि-शक्त्यष्टकैः संयुते
मातृकामण्डलैर्मण्डिते'
यक्ष-गन्धर्व-सिद्धाङ्गना-मण्डलैरर्चिते
पञ्चबाणात्मिके पञ्चबाणेन रत्या च सम्भाविते
प्रीतिभाजा वसन्तेन चानन्दिते'
भक्तिभाजां परं श्रेयसे कल्पसे'
योगिनां मानसे द्योतसे'
छन्दसामोजसा भ्राजसे'
गीत-विद्या-विनोदादि तृष्णेन कृष्णेन सम्पूज्यसे
भक्तिमच्चेतसा वेधसा स्तूयसे
विश्वहृद्येन वाद्येन विद्याधरैर्गीयसे'
श्रवणहरदक्षिणक्वाणया वीणया
किन्नरैर्गीयसे यक्षगन्धर्व-सिद्धाङ्गना-मण्डलैरर्च्यसे'
सर्वसौभाग्य-वाञ्छावतीभिर्वधूभिः
सुराणां समाराध्यसे सर्वविद्याविशेषात्मकं
चाटुगाथा-समुच्चारणं कण्ठ-मूलोल्ल-सद्वर्णराजित्रयं कोमलश्यामलो-दारपक्षद्वयं तुण्डशोभाति-धूरीभवत्
किंशुकाभं तं शुकं लालयन्ती परिक्रीडसे'
पाणिपद्मद्वयेना-क्षमालामपि स्फाटिकीं
ज्ञानसारात्मकं पुस्तकं चापरेणाङ्कुशं
पाशमाबिभ्रति येन सञ्चिन्त्यसे चेतसा तस्य वक्त्रान्तरात् गद्यपद्यात्मिका भारती निःसरेत्' येन वा यावका भाकृतिर्भाव्यसे
तस्य वश्या भवन्ति स्त्रियः पूरुषाः'
येन वा शातकुम्भद्युतिर्भाव्यसे'
सोऽपि लक्ष्मीसहस्रैः परिक्रीडते'
किं न सिद्‌ध्येद्वपुः श्यामलं कोमलं
चन्द्र-चूडान्वितं तावकं ध्यायतः'
तस्य लीला सरोवारिधिः'
तस्य केलीवनं नन्दनं'
तस्य भद्रासनं भूतलं'
तस्य गीर्देवता किङ्करी'
तस्य चाऽऽज्ञाकरी श्री-स्वयम्'
सर्वतीर्थात्मिके सर्वमन्त्रात्मिके सर्वतन्त्रात्मिके सर्वयन्त्रात्मिके'
सर्वपीठात्मिके सर्वसत्त्वात्मिके सर्वशक्त्यात्मिके'
सर्वविद्यात्मिके सर्वयोगात्मिके सर्वरागात्मिके'
सर्वशब्दात्मिके सर्ववर्णात्मिके सर्वविश्वात्मिके सर्वगे'
हे जगन्मातृके' पाहि मां पाहि मां पाहि मां'
देवि तुभ्यं नमो देवि तुभ्यं नमो देवि तुभ्यं नमः॥

त्रिपुरसुन्दर्यष्टकम्

Mon, 01 Jan 0001 00:00:00 +0000

त्रिपुरसुन्दर्यष्टकम्

कदम्बवनचारिणीं मुनिकदम्बकादम्बिनीं
नितम्बजित भूधरां सुरनितम्बिनीसेविताम्।
नवाम्बुरुहलोचनामभिनवाम्बुदश्यामलां
त्रिलोचनकुटुम्बिनीं त्रिपुरसुन्दरीमाश्रये॥१॥

कदम्बवनवासिनीं कनकवल्लकीधारिणीं
महार्हमणिहारिणीं मुखसमुल्लसद्वारुणीम्।
दयाविभवकारिणीं विशदलोचनीं चारिणीं
त्रिलोचनकुटुम्बिनीं त्रिपुरसुन्दरीमाश्रये॥२॥

कदम्बवनशालया कुचभरोल्लसन्मालया
कुचोपमितशैलया गुरुकृपालसद्वेलया।
मदारुणकपोलया मधुरगीतवाचालया
कयाऽपि घननीलया कवचिता वयं लीलया॥३॥

कदम्बवनमध्यगां कनकमण्डलोपस्थितां
षडम्बुरुहवासिनीं सततसिद्धसौदामिनीम्।
विडम्बितजपारुचिं विकचचन्द्रचूडामणिं
त्रिलोचनकुटुम्बिनीं त्रिपुरसुन्दरीमाश्रये॥४॥

कुचाञ्चितविपञ्चिकां कुटिलकुन्तलालङ्कृतां
कुशेशयनिवासिनीं कुटिलचित्तविद्वेषिणीम्।
मदारुणविलोचनां मनसिजारिसम्मोहिनीं
मतङ्गमुनिकन्यकां मधुरभाषिणीमाश्रये॥५॥

स्मरप्रथमपुष्पिणीं रुधिरबिन्दुनीलाम्बरां
गृहीतमधुपात्रिकां मदविघूर्णनेत्राञ्चलाम्।
घनस्तनभरोन्नतां गलितचूलिकां श्यामलां
त्रिलोचनकुटुम्बिनीं त्रिपुरसुन्दरीमाश्रये॥६॥

सकुङ्कुमविलेपनामलकचुम्बिकस्तूरिकां
समन्दहसितेक्षणां सशरचापपाशाङ्कुशाम्।
अशेषजनमोहिनीमरुणमाल्य भूषाम्बरां
जपाकुसुमभासुरां जपविधौ स्मराम्यम्बिकाम्॥७॥

पुरन्दरपुरन्ध्रिका चिकुरबन्धसैरन्ध्रिकां
पितामहपतिव्रता पुटपटीरचर्चारताम्।
मुकुन्दरमणीमणीलसदलङ्क्रियाकारिणीं
भजामि भुवनाम्बिकां सुरवधूटिकाचेटिकाम्॥८॥

॥इति श्रीमत्परमहंसपरिव्राजकाचर्यस्य श्रीगोविन्दभगवत्पूज्यपादशिष्यस्य श्रीमच्छङ्करभगवतः कृतौ श्री-त्रिपुरसुन्दर्यष्टकं सम्पूर्णम्॥

PDF:A5 / print Kindle Kindle Scribe

दुर्गास्तोत्रम् (युधिष्ठिरकृतम्)

Mon, 01 Jan 0001 00:00:00 +0000

दुर्गास्तोत्रम् (युधिष्ठिरकृतम्)

वैशम्पायन उवाच

विराटनगरं रम्यं गच्छमानो युधिष्ठिरः।

अस्तुवन्मनसा देवीं दुर्गां त्रिभुवनेश्वरीम्॥१॥

यशोदागर्भसम्भूतां नारायणवरप्रियाम्।

नन्दगोपकुले जातां मङ्गल्यां कुलवर्धनीम्॥२॥

कंसविद्रावणकरीमसुराणां क्षयङ्करीम्।

शिलातटविनिक्षिप्तामाकाशं प्रति गामिनीम्॥३॥

वासुदेवस्य भगिनीं दिव्यमाल्यविभूषिताम्।

दिव्याम्बरधरां देवीं खड्गखेटकधारिणीम्॥४॥

भारावतरणे पुण्ये ये स्मरन्ति सदा शिवाम्।

तान् वै तारयसे पापात्पङ्के गामिव दुर्बलाम्॥५॥

स्तोतुं प्रचक्रमे भूयो विविधैः स्तोत्रसम्भवैः।

आमन्त्र्य दर्शनाकाङ्क्षी राजा देवीं सहानुजः॥६॥

नमोऽस्तु वरदे कृष्णे कुमारि ब्रह्मचारिणि।

बालार्कसदृशाकारे पूर्णचन्द्रनिभानने॥७॥

चतुर्भुजे चतुर्वक्त्रे पीनश्रोणिपयोधरे।

मयूरपिच्छवलये केयूराङ्गदधारिणि॥८॥

भासि देवि यथा पद्मा नारायणपरिग्रहः।

स्वरूपं ब्रह्मचर्यं च विशदं तव खेचरि॥९॥

कृष्णच्छविसमा कृष्णा सङ्कर्षणसमानना।

बिभ्रती विपुलौ बाहू शक्रध्वजसमुच्छ्रयौ॥१०॥

पात्री च पङ्कजी घण्टी स्त्री विशुद्धा च या भुवि।

पाशं धनुर्महाचक्रं विविधान्यायुधानि च॥११॥

कुण्डलाभ्यां सुपूर्णाभ्यां कर्णाभ्यां च विभूषिता।

चन्द्रविस्पर्धिना देवि मुखेन त्वं विराजसे॥१२॥

मुकुटेन विचित्रेण केशबन्धेन शोभिना।

भुजङ्गाभोगवासेन श्रोणिसूत्रेण राजता॥१३॥

विभ्राजसे चाबद्धेन भोगेनेवेह मन्दरः।

ध्वजेन शिखिपिच्छानामुच्छ्रितेन विराजसे॥१४॥

कौमारं व्रतमास्थाय त्रिदिवं पावितं त्वया।

तेन त्वं स्तूयसे देवि त्रिदशैः पूज्यसेऽपि च॥१५॥

त्रैलोक्यरक्षणार्थाय महिषासुरनाशिनि।

प्रसन्ना मे सुरश्रेष्ठे दयां कुरु शिवा भव॥१६॥

जया त्वं विजया चैव सङ्ग्रामे च जयप्रदा।

ममापि विजयं देहि वरदा त्वं च साम्प्रतम्॥१७॥

विन्ध्ये चैव नगश्रेष्ठे तव स्थानं हि शाश्वतम्।

कालि कालि महाकालि शीधुमांसपशुप्रिये॥१८॥

कृतानुयात्रा भूतैस्त्वं वरदा कामचारिणी।

भारावतारे ये च त्वां संस्मरिष्यन्ति मानवाः॥१९॥

प्रणमन्ति च ये त्वां हि प्रभाते तु नरा भुवि।

न तेषां दुर्लभं किञ्चित् पुत्रतो धनतोऽपि वा॥२०॥

दुर्गात् तारयसे दुर्गे तत् त्वं दुर्गा स्मृता जनैः।
कान्तारेष्ववसन्नानां मग्नानां च महार्णवे।
दस्युभिर्वा निरुद्धानां त्वं गतिः परमा नृणाम्॥२१॥

जलप्रतरणे चैव कान्तारेष्वटवीषु च।

ये स्मरन्ति महादेवि न च सीदन्ति ते नराः॥२२॥

त्वं कीर्तिः श्रीर्धृतिः सिद्धिर्ह्रीर्विद्या सन्ततिर्मतिः।

सन्ध्या रात्रिः प्रभा निद्रा ज्योत्स्ना कान्तिः क्षमा दया॥२३॥

नृणां च बन्धनं मोहं पुत्रनाशं धनक्षयम्।

व्याधिं मृत्युं भयं चैव पूजिता नाशयिष्यसि॥२४॥

सोऽहं राज्यात् परिभ्रष्टः शरणं त्वां प्रपन्नवान्।

प्रणतश्च यथा मूर्ध्ना तव देवि सुरेश्वरि॥२५॥

त्राहि मां पद्मपत्राक्षि सत्ये सत्या भवस्व नः।

शरणं भव मे दुर्गे शरण्ये भक्तवत्सले॥२६॥

एवं स्तुता हि सा देवी दर्शयामास पाण्डवम्।

उपगम्य तु राजानमिदं वचनमब्रवीत्॥२७॥

देव्युवाच