Rama on Stotra Samhita

अहल्याकृत-रामस्तोत्रम्

Mon, 01 Jan 0001 00:00:00 +0000

अहल्याकृत-रामस्तोत्रम्

अहल्योवाच

अहो कृतार्थाऽस्मि जगन्निवास ते
पादाब्जसंलग्नरजः कणादहम्।
स्पृशामि यत्पद्मजशङ्करादिभिः
विमृग्यते रन्धितमानसैः सदा॥१॥

अहो विचित्रं तव राम चेष्टितं
मनुष्यभावेन विमोहितं जगत्।
चलस्यजस्रं चरणादिवर्जितः
सम्पूर्ण आनन्दमयोऽतिमायिकः॥२॥

यत्पादपङ्कजपरागपवित्रगात्रा
भागीरथी भवविरिञ्चिमुखान् पुनाति।
साक्षात्स एव मम दृग्विषयो यदाऽऽस्ते
किं वर्ण्यते मम पुराकृतभागधेयम्॥३॥

मर्त्यावतारे मनुजाकृतिं हरिं
रामाभिधेयं रमणीयदेहिनम्।
धनुर्धरं पद्मविशाललोचनं
भजामि नित्यं न परान् भजिष्ये॥४॥

यत्पादपङ्कजरजः श्रुतिभिर्विमृग्यं
यन्नाभिपङ्कजभवः कमलासनश्च।
यन्नामसाररसिको भगवान् पुरारिः
तं रामचन्द्रमनिशं हृदि भावयामि॥५॥

यस्यावतारचरितानि विरिञ्चिलोके
गायन्ति नारदमुखा भवपद्मजाद्याः।
आनन्दजाश्रुपरिषिक्तकुचाग्रसीमा
वागीश्वरी च तमहं शरणं प्रपद्ये॥६॥

सोऽयं परात्मा पुरुषः पुराणः
एकः स्वयं ज्योतिरनन्त आद्यः।
मायातनुं लोकविमोहनीयां
धत्ते परानुग्रह एष रामः॥७॥

अयं हि विश्वोद्भवसंयमानाम्
एकः स्वमायागुणबिम्बितो यः।
विरिञ्चिविष्ण्वीश्वरनामभेदान्
धत्ते स्वतन्त्रः परिपूर्ण आत्मा॥८॥

नमोऽस्तु ते राम तवाङ्घ्रिपङ्कजं
श्रिया धृतं वक्षसि लालितं प्रियात्।
आक्रान्तमेकेन जगत्त्रयं पुरा
ध्येयं मुनीन्द्रैरभिमानवर्जितैः॥९॥

जगतामादिभूतस्त्वं जगत् त्वं जगदाश्रयः।

सर्वभूतेष्वसंयुक्त एको भाति भवान् परः॥१०॥

ओङ्कारवाच्यस्त्वं राम वाचामविषयः पुमान्।

वाच्यवाचकभेदेन भवानेव जगन्मयः॥११॥

कार्यकारणकर्तृत्वफलसाधनभेदतः।

एको विभासि राम त्वं मायया बहुरूपया॥१२॥

त्वन्मायामोहितधियस्त्वां न जानन्ति तत्त्वतः।

मानुषं त्वाऽभिमन्यन्ते मायिनं परमेश्वरम्॥१३॥

आकाशवत् त्वं सर्वत्र बहिरन्तर्गतोऽमलः।

असङ्गो ह्यचलो नित्यः शुद्धो बुद्धः सदव्ययः॥१४॥

योषिन्मूढाऽहमज्ञा ते तत्त्वं जाने कथं विभो।

तस्मात् ते शतशो राम नमस्कुर्यामनन्यधीः॥१५॥

देव मे यत्रकुत्रापि स्थिताया अपि सर्वदा।

त्वत्पादकमले सक्ता भक्तिरेव सदाऽस्तु मे॥१६॥

नमस्ते पुरुषाध्यक्ष नमस्ते भक्तवत्सल।

नमस्तेऽस्तु हृषीकेश नारायण नमोऽस्तु ते॥१७॥

भवभयहरमेकं भानुकोटिप्रकाशं
करधृतशरचापं कालमेघावभासम्।
कनकरुचिरवस्त्रं रत्नवत्कुण्डलाढ्यं
कमलविशदनेत्रं सानुजं राममीडे॥१८॥

स्तुत्वैवं पुरुषं साक्षाद् राघवं पुरतः स्थितम्।

परिक्रम्य प्रणम्याऽऽशु सानुज्ञाता ययौ पतिम्॥१९॥

अहल्यया कृतं स्तोत्रं यः पठेद् भक्तिसंयुतः।

स मुच्यतेऽखिलैः पापैः परं ब्रह्माधिगच्छति॥२०॥

पुत्राद्यर्थे पठेद् भक्त्या रामं हृदि निधाय च।

संवत्सरेण लभते वन्ध्या अपि सुपुत्रकम्॥२१॥

सर्वान् कामानवाप्नोति रामचन्द्रप्रसादतः॥२२॥

ब्रह्मघ्नो गुरुतल्पगोऽपि पुरुषः स्तेयी सुरापोऽपि वा
मातृभ्रातृविहिंसकोऽपि सततं भोगैकबद्धातुरः।
नित्यं स्तोत्रमिदं जपन् रघुपतिं भक्त्या हृदिस्थं स्मरन्
ध्यायन् मुक्तिमुपैति किं पुनरसौ स्वाचारयुक्तो नरः॥२३॥

॥इति श्रीमदध्यात्मरामायणे श्री-अहल्याविरचितं श्री-रामचन्द्रस्तोत्रं सम्पूर्णम्॥

आपदुद्धारण-स्तोत्रम्

Mon, 01 Jan 0001 00:00:00 +0000

आपदुद्धारण-स्तोत्रम्

ॐ आपदामपहर्तारं दातारं सर्वसम्पदाम्।

लोकाभिरामं श्रीरामं भूयो भूयो नमाम्यहम्॥१॥

आर्तानामार्तिहन्तारं भीतानां भीतिनाशनम्।

द्विषतां कालदण्डं तं रामचन्द्रं नमाम्यहम्॥२॥

नमः कोदण्डहस्ताय सन्धीकृतशराय च।

खण्डिताखिलदैत्याय रामायाऽऽपन्निवारिणे॥३॥

रामाय रामभद्राय रामचन्द्राय वेधसे।

रघुनाथाय नाथाय सीतायाः पतये नमः॥४॥

अग्रतः पृष्ठतश्चैव पार्श्वतश्च महाबलौ।

आकर्णपूर्णधन्वानौ रक्षेतां रामलक्ष्मणौ॥५॥

सन्नद्धः कवची खड्गी चापबाणधरो युवा।

गच्छन् ममाग्रतो नित्यं रामः पातु सलक्ष्मणः॥६॥

अच्युतानन्तगोविन्द नामोच्चारणभेषजात्।

नश्यन्ति सकला रोगाः सत्यं सत्यं वदाम्यहम्॥७॥

सत्यं सत्यं पुनः सत्यमुद्धृत्य भुजमुच्यते।

वेदाच्छास्त्रं परं नास्ति न देवं केशवात्परम्॥८॥

शरीरे जर्जरीभूते व्याधिग्रस्ते कलेवरे।

औषधं जाह्नवीतोयं वैद्यो नारायणो हरिः॥९॥

आलोड्य सर्वशास्त्राणि विचार्य च पुनः पुनः।

इदमेकं सुनिष्पन्नं ध्येयो नारायणो हरिः॥१०॥

PDF:A5 / print Kindle Kindle Scribe

ब्रह्मकृतरामस्तवः

Mon, 01 Jan 0001 00:00:00 +0000

ब्रह्मकृतरामस्तवः

ततो हि दुर्मना रामः श्रुत्वैवं वदतां गिरः।

दध्यौ मुहूर्तं धर्मात्मा बाष्पव्याकुललोचनः॥१॥

ततो वैश्रवणो राजा यमश्च पितृभिः सह।

सहस्राक्षश्च देवेशो वरुणश्च जलेश्वरः॥२॥

षडर्धनयनः श्रीमान्महादेवो वृषध्वजः।

कर्ता सर्वस्य लोकस्य ब्रह्मा ब्रह्मविदां वरः॥३॥

एते सर्वे समागम्य विमानैः सूर्यसन्निभैः।

आगम्य नगरीं लङ्काम् अभिजग्मुश्च राघवम्॥४॥

ततः सहस्ताभरणान् प्रगृह्य विपुलान् भुजान्।

अब्रुवंस्त्रिदशश्रेष्ठाः प्राञ्जलिं राघवं स्थितम्॥५॥

कर्ता सर्वस्य लोकस्य श्रेष्ठो ज्ञानविदां विभुः।

उपेक्षसे कथं सीतां पतन्तीं हव्यवाहने॥६॥

कथं देवगणश्रेष्ठम् आत्मानं नावबुध्यसे।

ऋतधामा वसुः पूर्वं वसूनां त्वं प्रजापतिः॥७॥

त्रयाणां त्वं हि लोकानाम् आदिकर्ता स्वयम्प्रभुः।

रुद्राणामष्टमो रुद्रः साध्यानामसि पञ्चमः॥८॥

अश्विनौ चापि ते कर्णौ चन्द्रसूर्यौ च चक्षुषी।

अन्ते चादौ च लोकानाम् दृश्यसे त्वं परन्तप॥९॥

उपेक्षसे च वैदेहीं मानुषः प्राकृतो यथा।

इत्युक्तो लोकपालैस्तैः स्वामी लोकस्य राघवः॥१०॥

अब्रवीत् त्रिदशश्रेष्ठान् रामो धर्मभृतां वरः।

आत्मानं मानुषं मन्ये रामं दशरथात्मजम्॥११॥

योऽहं यस्य यतश्चाहं भगवांस्तद् ब्रवीतु मे।

इति ब्रुवन्तं काकुत्स्थं ब्रह्मा ब्रह्मविदां वरः॥१२॥

अब्रवीच्छृणु मे राम सत्यं सत्यपराक्रम।

भवान् नारायणो देवः श्रीमांश्चक्रायुधः प्रभुः॥१३॥

एकशृङ्गो वराहस्त्वं भूतभव्यसपत्नजित्।

अक्षरं ब्रह्म सत्यं च मध्ये चान्ते च राघव॥१४॥

लोकानां त्वं परो धर्मो विष्वक्सेनश्चतुर्भुजः।

शार्ङ्गधन्वा हृषीकेशः पुरुषः पुरुषोत्तमः॥१५॥

अजितः खड्गधृद् विष्णुः कृष्णश्चैव सनातनः।

सेनानीर्ग्रामणीश्च त्वं बुद्धिः सत्त्वं क्षमा दमः॥१६॥

प्रभवश्चाप्ययश्च त्वम् उपेन्द्रो मधुसूदनः।

इन्द्रकर्मा महेन्द्रस्त्वं पद्मनाभो रणान्तकृत्॥१७॥

शरण्यं शरणं च त्वाम् आहुर्दिव्या महर्षयः।

सहस्रशृङ्गो वेदात्मा शतशीर्षो महर्षभः॥१८॥

त्वं त्रयाणां हि लोकानाम् आदिकर्ता स्वयम्प्रभुः।

सिद्धानामपि साध्यानाम् आश्रयश्चासि पूर्वजः॥१९॥

त्वं यज्ञस्त्वं वषट्कारस्त्वमोङ्कारः परात्परः।

प्रभवं निधनं वा ते नो विदुः को भवानिति॥२०॥

दृश्यसे सर्वभूतेषु ब्राह्मणेषु च गोषु च।

दिक्षु सर्वासु गगने पर्वतेषु वनेषु च॥२१॥

सहस्रचरणः श्रीमान् शतशीर्षः सहस्रदृक्।

त्वं धारयसि भूतानि पृथिवीं च सपर्वताम्॥२२॥

अन्ते पृथिव्याः सलिले दृश्यसे त्वं महोरगः।

त्रीन् लोकान् धारयन् राम देवगन्धर्वदानवान्॥२३॥

अहं ते हृदयं राम जिह्वा देवी सरस्वती।

देवा गात्रेषु रोमाणि ब्रह्मणा निर्मिताः प्रभो॥२४॥

निमेषस्ते भवेद् रात्रिरुन्मेषस्ते भवेद् दिवा।

संस्कारास्तेऽभवन् वेदा न तदस्ति त्वया विना॥२५॥

जगत् सर्वं शरीरं ते स्थैर्यं ते वसुधातलम्।

अग्निः कोपः प्रसादस्ते सोमः श्रीवत्सलक्षणः॥२६॥

त्वया लोकास्त्रयः क्रान्ताः पुरा स्वैर्विक्रमैस्त्रिभिः।

महेन्द्रश्च कृतो राजा बलिं बद्ध्वा महासुरम्॥२७॥

सीता लक्ष्मीर्भवान् विष्णुः देवः कृष्णः प्रजापतिः।

वधार्थं रावणस्येह प्रविष्टो मानुषीं तनुम्॥२८॥

तदिदं नः कृतं कार्यं त्वया धर्मभृतां वर।

निहतो रावणो राम प्रहृष्टो दिवमाक्रम॥२९॥

अमोघं बलवीर्यं ते अमोघस्ते पराक्रमः।

अमोघं दर्शनं राम अमोघस्तव संस्तवः॥३०॥

अमोघास्ते भविष्यन्ति भक्तिमन्तो नरा भुवि।

ये त्वां देवं ध्रुवं भक्ताः पुराणं पुरुषोत्तमम्॥३१॥

प्राप्नुवन्ति सदा कामान् इह लोके परत्र च।
इममार्षं स्तवं नित्यम् इतिहासं पुरातनम्।
ये नराः कीर्तयिष्यन्ति तेषां नास्ति पराभवः॥३२॥

॥इत्यार्षे श्रीमद्रामायणे वाल्मीकीये आदिकाव्ये चतुर्विंशतिसहस्रिकायां संहितायां युद्धकाण्डे ब्रह्मकृतरामस्तवो नाम विंशत्यधिकशततमः सर्गः॥

देवैः कृतं राम-स्तोत्रम्

Mon, 01 Jan 0001 00:00:00 +0000

देवैः कृतं राम-स्तोत्रम्

शेष उवाच

अथाभिषिक्तं रामं तु तुष्टुवुः प्रणताः सुराः।

रावणाभिधदैत्येन्द्र वधहर्षितमानसाः॥१॥

देवा ऊचुः

जय दाशरथे सुरार्तिहञ्जय जय दानववंशदाहक।

जय देववराङ्गनागणग्रहणव्यग्रकरारिदारक॥२॥

तवयद्दनुजेन्द्रनाशनं कवयो वर्णयितुं समुत्सुकाः।

प्रलये जगतान्ततीः पुनर्ग्रससे त्वं भुवनेशलीलया॥३॥

जय जन्मजरादिदुःखकैः परिमुक्तप्रबलोद्धरोद्धर।

जय धर्मकरान्वयाम्बुधौ कृतजन्मन्नजरामराच्युत॥४॥

तव देववरस्य नामभिर्बहुपापा अपि ते पवित्रिताः।

किमु साधुद्विजवर्यपूर्वकाः सुतनुं मानुषतामुपागताः॥५॥

हरविरिञ्चिनुतं तव पादयोर्युगलमीप्सितकामसमृद्धिदम्।

हृदि पवित्रयवादिकचिह्नितैः सुरचितं मनसा स्पृहयामहे॥६॥

यदि भवान्न दधात्यभयं भुवो मदनमूर्ति तिरस्करकान्तिभृत्।

सुरगणा हि कथं सुखिनः पुनर्ननु भवन्ति घृणामय पावन॥७॥

यदा यदास्मान्दनुजाहि दुःखदास्तदा तदा त्वं भुवि जन्मभाग्भवेः।

अजोऽव्ययोऽपीशवरोऽपि सन्विभो स्वभावमास्थाय निजं निजार्चितः॥८॥

मृतसुधासदृशैरघनाशनैः सुचरितैरवकीर्य महीतलम्।

अमनुजैर्गुणशंसिभिरीडितः प्रविश चाशु पुनर्हि स्वकं पदम्॥९॥

अनादिराद्योजररूपधारी हारी किरीटी मकरध्वजाभः।

जयं करोतु प्रसभं हतारिः स्मरारि संसेवितपादपद्मः॥१०॥

इत्युक्त्वा ते सुराः सर्वे ब्रह्मेन्द्रप्रमुखा मुहुः।

प्रणेमुररिनाशेन प्रीणिता रघुनायकम्॥११॥

इति स्तुत्यातिसंहृष्टो रघुनाथो महायशाः।

प्रोवाच तान्सुरान्वीक्ष्य प्रणतान्नतकन्धरान्॥१२॥

श्रीराम उवाच

एकश्लोकि रामायणम्

Mon, 01 Jan 0001 00:00:00 +0000

Ekashloki

एकश्लोकि रामायणम्

आदौ रामतपोवनादिगमनं हत्वा मृगं काञ्चनं
वैदेहीहरणं जटायुमरणं सुग्रीवसम्भाषणम्।
वालीनिर्दलनं समुद्रतरणं लङ्कापुरीदाहनं
पश्चाद्रावणकुम्भकर्णहननमेतद्धि रामायणम्॥

PDF:A5 / print Kindle Kindle Scribe

गायत्री-रामायणम्

Mon, 01 Jan 0001 00:00:00 +0000

गायत्री-रामायणम्

शुक्लाम्बरधरं विष्णुं शशिवर्णं चतुर्भुजम्।

प्रसन्नवदनं ध्यायेत् सर्वविघ्नोपशान्तये॥

वागीशाद्याः सुमनसः सर्वार्थानामुपक्रमे।

यं नत्वा कृतकृत्याः स्युस्तं नमामि गजाननम्॥

श्री-गुरु-प्रार्थना

गुरुर्ब्रह्मा गुरुर्विष्णुर्गुरुर्देवो महेश्वरः।

गुरुः साक्षात् परं ब्रह्म तस्मै श्री-गुरवे नमः॥

सदाशिवसमारम्भां शङ्कराचार्यमध्यमाम्।

अस्मदाचार्यपर्यन्तां वन्दे गुरुपरम्पराम्॥

अखण्डमण्डलाकारं व्याप्तं येन चराचरम्।

तत्पदं दर्शितं येन तस्मै श्री-गुरवे नमः॥

श्री-सरस्वती-प्रार्थना

दोर्भिर्युक्ता चतुर्भिः स्फटिकमणिनिभैरक्षमालां दधाना
हस्तेनैकेन पद्मं सितमपि च शुकं पुस्तकं चापरेण।
भासा कुन्देन्दुशङ्खस्फटिकमणिनिभा भासमानाऽसमाना
सा मे वाग्देवतेयं निवसतु वदने सर्वदा सुप्रसन्ना॥

श्री-वाल्मीकि-नमस्क्रिया

कूजन्तं राम रामेति मधुरं मधुराक्षरम्।

आरुह्य कविताशाखां वन्दे वाल्मीकिकोकिलम्॥१॥

वाल्मीकेर्मुनिसिंहस्य कवितावनचारिणः।

शृण्वन् रामकथानादं को न याति परां गतिम्॥२॥

यः पिबन् सततं रामचरितामृतसागरम्।

अतृप्तस्तं मुनिं वन्दे प्राचेतसमकल्मषम्॥३॥

श्री-हनुमन्नमस्क्रिया

गोष्पदीकृत-वाराशिं मशकीकृत-राक्षसम्।

रामायण-महामाला-रत्नं वन्देऽनिलात्मजम्॥१॥

अञ्जनानन्दनं वीरं जानकीशोकनाशनम्।

कपीशमक्षहन्तारं वन्दे लङ्काभयङ्करम्॥२॥

उल्लङ्घ्य सिन्धोः सलिलं सलीलं यः शोकवह्निं जनकात्मजायाः।

आदाय तेनैव ददाह लङ्कां नमामि तं प्राञ्जलिराञ्जनेयम्॥३॥

आञ्जनेयमतिपाटलाननं काञ्चनाद्रि-कमनीय-विग्रहम्।

पारिजात-तरुमूल-वासिनं भावयामि पवमान-नन्दनम्॥४॥

यत्र यत्र रघुनाथकीर्तनं तत्र तत्र कृतमस्तकाञ्जलिम्।

बाष्पवारिपरिपूर्णलोचनं मारुतिं नमत राक्षसान्तकम्॥५॥

मनोजवं मारुततुल्यवेगं जितेन्द्रियं बुद्धिमतां वरिष्ठम्।

वातात्मजं वानरयूथमुख्यं श्रीरामदूतं शिरसा नमामि॥६॥

श्री-रामायण-प्रार्थना

यः कर्णाञ्जलिसम्पुटैरहरहः सम्यक् पिबत्यादरात्
वाल्मीकेर्वदनारविन्दगलितं रामायणाख्यं मधु।
जन्म-व्याधि-जरा-विपत्ति-मरणैरत्यन्त-सोपद्रवं
संसारं स विहाय गच्छति पुमान् विष्णोः पदं शाश्वतम्॥१॥

तदुपगत-समास-सन्धियोगं
सममधुरोपनतार्थ-वाक्यबद्धम्।
रघुवरचरितं मुनिप्रणीतं
दशशिरसश्च वधं निशामयध्वम्॥२॥१-२-४३

वाल्मीकि-गिरिसम्भूता रामसागरगामिनी।

पुनातु भुवनं पुण्या रामायणमहानदी॥३॥

श्लोकसारजलाकीर्णं सर्गकल्लोलसङ्कुलम्।

काण्डग्राहमहामीनं वन्दे रामायणार्णवम्॥४॥

वेदवेद्ये परे पुंसि जाते दशरथात्मजे।

वेदः प्राचेतसादासीत् साक्षाद्रामायणात्मना॥५॥

श्री-राम-ध्यानम्

वैदेहीसहितं सुरद्रुमतले हैमे महामण्डपे
मध्ये पुष्पकमासने मणिमये वीरासने सुस्थितम्।
अग्रे वाचयति प्रभञ्जनसुते तत्त्वं मुनिभ्यः परं
व्याख्यान्तं भरतादिभिः परिवृतं रामं भजे श्यामलम्॥१॥

वामे भूमिसुता पुरश्च हनुमान् पश्चात् सुमित्रासुतः
शत्रुघ्नो भरतश्च पार्श्वदलयोर्वाय्वादिकोणेषु च।
सुग्रीवश्च विभीषणश्च युवराट् तारासुतो जाम्बवान्
मध्ये नीलसरोजकोमलरुचिं रामं भजे श्यामलम्॥२॥

रामं रामानुजं सीतां भरतं भरतानुजम्।

सुग्रीवं वायुसूनुं च प्रणमामि पुनः पुनः॥३॥

नमोऽस्तु रामाय सलक्ष्मणाय
देव्यै च तस्यै जनकात्मजायै।
नमोऽस्तु रुद्रेन्द्रयमानिलेभ्यो
नमोऽस्तु चन्द्रार्कमरुद्गणेभ्यः॥४॥५-१३-५९

ॐ श्री-गुरुभ्यो नमः।

रामस्तोत्रम्

Mon, 01 Jan 0001 00:00:00 +0000

रामस्तोत्रम्

मुनय ऊचुः

नमस्ते रामचन्द्राय लोकानुग्रहकारिणे।

अरावणं जगत्कर्तुमवतीर्णाय भूतले॥६३॥

ताटिकादेहसंहर्त्रे गाधिजाध्वररक्षिणे।

नमस्ते जितमारीच सुबाहुप्राणहारिणे॥६४॥

अहल्यामुक्तिसन्दायिपादपङ्कजरेणवे।

नमस्ते हरकोदण्डलीलाभञ्जनकारिणे॥६५॥

नमस्ते मैथिलीपाणिग्रहणोत्सवशालिने।

नमस्ते रेणुकापुत्रपराजयविधायिने॥६६॥

सहलक्ष्मणसीताभ्यां कैकेय्यास्तु वरद्वयात्।

सत्यं पितृवचः कर्तुं नमो वनमुपेयुषे॥६७॥

भरतप्रार्थनादत्तपादुकायुगुलाय ते।

नमस्ते शरभङ्गस्य स्वर्गप्राप्त्यैकहेतवे॥६८॥

नमो विराधसंहर्त्रे गृध्रराजसखाय ते।

मायामृगमहाक्रूरमारीचाङ्गविदारिणे॥६९॥

सीतापहारिलोकेशयुद्धत्यक्तकलेवरम्।

जटायुषं तु सन्दह्य तत्कैवल्यप्रदायिने॥७०॥

नमः कबन्धसंहर्त्रे शबरीपूजिताङ्घ्रये।

प्राप्तसुग्रीवसख्याय कृतवालिवधाय ते॥७१॥

नमः कृतवते सेतुं समुद्रे वरुणालये।

सर्वराक्षससंहर्त्रे रावणप्राणहारिणे॥७२॥

संसाराम्बुधिसन्तारपोतपादाम्बुजाय ते।

नमो भक्तार्तिसंहर्त्रे सच्चिदानन्दरूपिणे॥७३॥

नमस्ते रामभद्राय जगतामृद्धिहेतवे।

रामादिपुण्यनामानि जपतां पापहारिणे॥७४॥

नमस्ते सर्वलोकानां सृष्टिस्थित्यन्तकारिणे।

नमस्ते करुणामूर्ते भक्तरक्षणदीक्षित॥७५॥

ससीताय नमस्तुभ्यं विभीषणसुखप्रद।

लङ्केश्वरवधाद्राम पालितं हि जगत्त्वया॥७६॥

रक्ष रक्ष जगन्नाथ पाह्यस्माञ्जानकीपते।

स्तुत्वैवं मुनयः सर्वे तूष्णीं तस्थुर्द्विजोत्तमाः॥७७॥

श्रीसूत उवाच

नामरामायणम्

राम राम जय राजा राम।

राम राम जय सीता राम॥

॥इति श्रीलक्ष्मणाचार्यविरचितं नामरामायणं सम्पूर्णम्॥

रामभुजङ्गप्रयातस्तोत्रम्

Mon, 01 Jan 0001 00:00:00 +0000

रामभुजङ्गप्रयातस्तोत्रम्

विशुद्धं परं सच्चिदानन्द-रूपं
गुणाधारमाधार-हीनं वरेण्यम्।
महान्तं विभान्तं गुहान्तं गुणान्तं
सुखान्तं स्वयं धाम रामं प्रपद्ये॥१॥

शिवं नित्यमेकं विभुं तारकाख्यं
सुखाकारमाकार-शून्यं सुमान्यम्।
महेशं कलेशं सुरेशं परेशं
नरेशं निरीशं महीशं प्रपद्ये॥२॥

यदाऽवर्णयत् कर्ण-मूलेऽन्त-काले
शिवो राम रामेति रामेति काश्याम्।
तदेकं परं तारक-ब्रह्म-रूपं
भजेऽहं भजेऽहं भजेऽहं भजेऽहम्॥३॥

महारत्न-पीठे शुभे कल्प-मूले
सुखासीनमादित्य-कोटि-प्रकाशम्।
सदा जानकी-लक्ष्मणोपेतमेकं
सदा रामचन्द्रं भजेऽहं भजेऽहम्॥४॥

क्वणद्रत्न-मञ्जीर-पादारविन्दं
लसन्मेखला-चारु-पीताम्बराढ्यम्।
महारत्न-हारोल्लसत्-कौस्तुभाङ्गं
नदच्चञ्चरी-मञ्जरी-लोल-मालम्॥५॥

लसच्चन्द्रिका-स्मेर-शोणाधराभं
समुद्यत्-पतङ्गेन्दु-कोटि-प्रकाशम्।
नमद्-ब्रह्म-रुद्रादि-कोटीर-रत्न-
स्फुरत्-कान्ति-नीराजना-ऽऽराधिताङ्घ्रिम्॥६॥

पुरः प्राञ्जलीनाञ्जनेयादि-भक्तान्
स्व-चिन्मुद्रया भद्रया बोधयन्तम्।
भजेऽहं भजेऽहं सदा रामचन्द्रं
त्वदन्यं न मन्ये न मन्ये न मन्ये॥७॥

यदा मत्समीपं कृतान्तः समेत्य
प्रचण्ड-प्रतापैर्-भटैर्-भीषयेन्माम्।
तदाऽऽविष्करोषि त्वदीयं स्वरूपं
तदापत्-प्रणाशं स-कोदण्ड-बाणम्॥८॥

निजे मानसे मन्दिरे सन्निधेहि
प्रसीद प्रसीद प्रभो रामचन्द्र।
स-सौमित्रिणा कैकयी-नन्दनेन
स्व-शक्त्याऽनुभक्त्या च संसेव्यमान॥९॥

स्वभक्ताग्रगण्यैः कपीशैर्-महीशैर्-
अनीकैरनेकैश्च राम प्रसीद।
नमस्ते नमोऽस्त्वीश राम प्रसीद
प्रशाधि प्रशाधि प्रकाशं प्रभो माम्॥१०॥

त्वमेवासि दैवं परं मे यदेकं
सुचैतन्यमेतत् त्वदन्यं न मन्ये।
यतोऽभूदमेयं वियद्-वायु-तेजो-
जलोर्व्यादि-कार्यं चरं चाचरं च॥११॥

नमः सच्चिदानन्द-रूपाय तस्मै
नमो देव-देवाय रामाय तुभ्यम्।
नमो जानकी-जीवितेशाय तुभ्यं
नमः पुण्डरीकायताक्षाय तुभ्यम्॥१२॥

नमो भक्ति-युक्तानुरक्ताय तुभ्यं
नमः पुण्य-पुञ्जैक-लभ्याय तुभ्यम्।
नमो वेद-वेद्याय चाऽऽद्याय पुंसे
नमः सुन्दरायेन्दिरा-वल्लभाय॥१३॥

नमो विश्व-कर्त्रे नमो विश्व-हर्त्रे
नमो विश्व-भोक्त्रे नमो विश्व-मात्रे।
नमो विश्व-नेत्रे नमो विश्व-जेत्रे
नमो विश्व-पित्रे नमो विश्व-मात्रे॥१४॥

नमस्ते नमस्ते समस्त-प्रपञ्च-
प्रभाग-प्रवीण प्रमाण-प्रवीण।
मदीयं मनस्-त्वत्-पद-द्वन्द्व-सेवां
विधातुं प्रवृत्तं सुचैतन्य-सिद्ध्यै॥१५॥

शिलाऽपि त्वदङ्घ्रि-क्षमा-सङ्गि-रेणु-
प्रसादाद्धि चैतन्यमाधत्त राम।
नरस्-त्वत्पद-द्वन्द्व-सेवा-विधानात्
सुचैतन्यमेतीति किं चित्रमद्य॥१६॥

पवित्रं चरित्रं विचित्रं त्वदीयं
नरा ये स्मरन्त्यन्वहं रामचन्द्र।
भवन्तं भवान्तं भरन्तं भजन्तो
लभन्ते कृतान्तं न पश्यन्त्यतोऽन्ते॥१७॥

स पुण्यः स गण्यः शरण्यो ममायं
नरो वेद यो देव-चूडामणिं त्वाम्।
सदाकारमेकं चिदानन्द-रूपं
मनो-वागगम्यं परं धाम राम॥१८॥

प्रचण्ड-प्रताप-प्रभावाभिभूत-
प्रभूतारि-वीर प्रभो रामचन्द्र।
बलं ते कथं वर्ण्यतेऽतीव बाल्ये
यतोऽखण्डि चण्डीश-कोदण्ड-दण्डः॥१९॥

दशग्रीवमुग्रं सपुत्रं समित्रं
सरिद्-दुर्ग-मध्यस्थ-रक्षो-गणेशम्।
भवन्तं विना राम वीरो नरो वा-
ऽसुरो वाऽमरो वा जयेत् कस्-त्रिलोक्याम्॥२०॥

सदा राम रामेति रामामृतं ते
सदाराममानन्द-निष्यन्द-कन्दम्।
पिबन्तं नमन्तं सुदन्तं हसन्तं
हनूमन्तमन्तर्भजे तं नितान्तम्॥२१॥

सदा राम रामेति रामामृतं ते
सदाराममानन्द-निष्यन्द-कन्दम्।
पिबन्नन्वहं नन्वहं नैव मृत्योर्-
बिभेमि प्रसादादसादात् तवैव॥२२॥

असीता-समेतैरकोदण्ड-भूषैर्-
असौमित्रि-वन्द्यैरचण्ड-प्रतापैः।
अलङ्केश-कालैरसुग्रीव-मित्रैर्-
अरामाभिधेयैरलं दैवतैर्नः॥२३॥

अवीरासन-स्थैरचिन्मुद्रिकाढ्यैर्-
अभक्ताञ्जनेयादि-तत्त्व-प्रकाशैः।
अमन्दार-मूलैरमन्दार-मालैर्-
अरामाभिधेयैरलं दैवतैर्नः॥२४॥

असिन्धु-प्रकोपैरवन्द्य-प्रतापैर्-
अबन्धु-प्रयाणैरमन्द-स्मिताढ्यैः।
अदण्ड-प्रवासैरखण्ड-प्रबोधैर्-
अरामाभिधेयैरलं दैवतैर्नः॥२५॥

हरे राम सीतापते रावणारे
खरारे मुरारेऽसुरारे परेति।
लपन्तं नयन्तं सदा-कालमेवं
समालोकयाऽऽलोकयाऽशेष-बन्धो॥२६॥

नमस्ते सुमित्रा-सुपुत्राभिवन्द्य
नमस्ते सदा कैकयी-नन्दनेड्य।
नमस्ते सदा वानराधीश-वन्द्य
नमस्ते नमस्ते सदा रामचन्द्र॥२७॥

प्रसीद प्रसीद प्रचण्ड-प्रताप
प्रसीद प्रसीद प्रचण्डारि-काल।
प्रसीद प्रसीद प्रपन्नानुकम्पिन्
प्रसीद प्रसीद प्रभो रामचन्द्र॥२८॥

भुजङ्ग-प्रयातं परं वेद-सारं
मुदा रामचन्द्रस्य भक्त्या च नित्यम्।
पठन् सन्ततं चिन्तयन् स्वान्तरङ्गे
स एव स्वयं रामचन्द्रः स धन्यः॥२९॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-रामभुजङ्गप्रयातस्तोत्रं सम्पूर्णम्॥

रामद्वादशनामस्तोत्रम्

Mon, 01 Jan 0001 00:00:00 +0000

Nama Stotram

रामद्वादशनामस्तोत्रम्

प्रथमं श्रीधरं विद्याद् द्वितीयं रघुनायकम्।

तृतीयं रामचन्द्रं च चतुर्थं रावणान्तकम्॥१॥

पञ्चमं लोकपूज्यं च षष्ठमं जानकीपतिम्।

सप्तमं वासुदेवं च श्रीरामं चाष्टमं तथा॥२॥

नवमं जलदश्यामं दशमं लक्ष्मणाग्रजम्।

एकादशं च गोविन्दं द्वादशं सेतुबन्धनम्॥३॥

द्वादशैतानि नामानि यः पठेछ्रद्धयान्वितः।

अर्धरात्रे तु द्वादश्यां कुष्ठदारिद्र्यनाशनम्॥४॥

अरण्ये चैव सङ्ग्रामे अग्नौ भयनिवारणम्।

ब्रह्महत्या सुरापानं गोहत्यादि निवारणम्॥५॥

सप्तवारं पठेन्नित्यं सर्वारिष्टनिवारणम्।
ग्रहणे च जले स्थित्वा नदीतीरे विशेषतः।
अश्वमेधशतं पुण्यं ब्रह्मलोकं गमिष्यति॥६॥

॥इति श्री-स्कान्दपुराणे उत्तरखण्डे श्री-उमामहेश्वरसंवादे श्री-रामद्वादशनामस्तोत्रं सम्पूर्णम्॥

PDF:A5 / print Kindle Kindle Scribe

शम्भुकृत-रामस्तवः

Mon, 01 Jan 0001 00:00:00 +0000

शम्भुकृत-रामस्तवः

महादेव उवाच

नमो मूलप्रकृतये नित्याय परमात्मने।

सच्चिदानन्दरूपाय विश्वरूपाय वेधसे॥२४॥

नमो निरन्तरानन्द कन्दमूलाय विष्णवे।

जगत्त्रयकृतानन्द मूर्तये दिव्यमूर्तये॥२५॥

नमो ब्रह्मेन्द्रपूज्याय शङ्कराभयदाय च।

नमो विष्णुस्वरूपाय सर्वरूप नमो नमः॥२६॥

उत्पत्तिस्थितिसंहारकारिणे त्रिगुणात्मने।

नमोऽस्तु निर्गतोपाधिस्वरूपाय महात्मने॥२७॥

अनया विद्यया देव्या सीतयोपाधिकारिणे।

नमः पुम्प्रकृतिभ्यां च युवाभ्यां जगतां कृते॥२८॥

जगन्मातापितृभ्यां च जनन्यै राघवाय च।

नमः प्रपञ्चरूपिण्यै निष्प्रपञ्चस्वरूपिणे॥२९॥

नमो ध्यानस्वरूपिण्यै योगिध्येयात्ममूर्तये।

परिणामापरीणामरिक्ताभ्यां च नमो नमः॥३०॥

कूटस्थबीजरूपिण्यै सीतायै राघवाय च।

सीता लक्ष्मीर्भवान् विष्णुः सीता गौरी भवान् शिवः॥३१॥

सीता स्वयं हि सावित्री भवान् ब्रह्मा चतुर्मुखः।

सीता शची भवान् शक्रः सीता स्वाहाऽनलो भवान्॥३२॥

सीता संहारिणी देवी यमरूपधरो भवान्।

सीता हि सर्वसम्पत्तिः कुबेरस्त्वं रघूत्तम॥३३॥

सीता देवी च रुद्राणी भवान् रुद्रो महाबलः।

सीता तु रोहिणी देवी चन्द्रस्त्वं लोकसौख्यदः॥३४॥

सीता संज्ञा भवान्सूर्यः सीता रात्रिर्दिवा भवान्।

सीता देवी महाकाली महाकालो भवान्सदा॥३५॥

स्त्रीलिङ्गेषु त्रिलोकेषु यत्तत्सर्वं हि जानकी।

पुन्नाम लाञ्छितं यत्तु तत्सर्वं हि भवान् प्रभो॥३६॥

सर्वत्र सर्वदेवेश सीता सर्वत्र धारिणी।

तदा त्वमपि च त्रातुं तच्छक्तिर्विश्वधारिणी॥३७॥

तस्मात्कोटिगुणं पुण्यं युवाभ्यां परिचिह्नितम्।

चिह्नितं शिवशक्तिभ्यां चरितं तव शान्तिदम्॥३८॥

आवां राम जगत्पूज्यौ मम पूज्यौ सदा युवाम्।

त्वन्नामजापिनी गौरी त्वन्मन्त्रजपवानहम्॥३९॥

मुमूर्षोर्मणिकर्ण्यां तु अर्धोदकनिवासिनः।

अहं दिशामि ते मन्त्रं तारकं ब्रह्मदायकम्॥४०॥

अतस्त्वं जानकीनाथ परब्रह्मासि निश्चितम्।

त्वन्मायामोहिताः सर्वे न त्वां जानन्ति तत्वतः॥४१॥

ईश्वर उवाच

रामस्तवराजस्तोत्रम्

Mon, 01 Jan 0001 00:00:00 +0000

रामस्तवराजस्तोत्रम्

अस्य श्रीरामचन्द्रस्तवराजस्तोत्रमन्त्रस्य सनत्कुमारऋषिः।
श्रीरामो देवता। अनुष्टुप् छन्दः। सीता बीजम्। हनुमान् शक्तिः।
श्रीरामप्रीत्यर्थे जपे विनियोगः॥

सूत उवाच

सर्वशास्त्रार्थतत्त्वज्ञं व्यासं सत्यवतीसुतम्।

धर्मपुत्रः प्रहृष्टात्मा प्रत्युवाच मुनीश्वरम्॥१॥

युधिष्ठिर उवाच

भगवन् योगिनां श्रेष्ठ सर्वशास्त्रविशारद।

किं तत्त्वं किं परं जाप्यं किं ध्यानं मुक्तिसाधनम्॥२॥

श्रोतुमिच्छामि तत्सर्वं ब्रूहि मे मुनिसत्तम।

वेदव्यास उवाच

धर्मराज महाभाग शृणु वक्ष्यामि तत्त्वतः॥३॥

यत्परं यद्गुणातीतं यज्ज्योतिरमलं शिवम्।

तदेव परमं तत्त्वं कैवल्यपदकारणम्॥४॥

श्रीरामेति परं जाप्यं तारकं ब्रह्मसंज्ञकम्।

ब्रह्महत्यादिपापघ्नमिति वेदविदो विदुः॥५॥

श्रीराम रामेति जना ये जपन्ति च सर्वदा।

तेषां भुक्तिश्च मुक्तिश्च भविष्यति न संशयः॥६॥

स्तवराजं पुरा प्रोक्तं नारदेन च धीमता।

तत्सर्वं सम्प्रवक्ष्यामि हरिध्यानपुरःसरम्॥७॥

तापत्रयाग्निशमनं सर्वाघौघनिकृन्तनम्।

दारिद्र्यदुःखशमनं सर्वसम्पत्करं शिवम्॥८॥

विज्ञानफलदं दिव्यं मोक्षैकफलसाधनम्।

नमस्कृत्य प्रवक्ष्यामि रामं कृष्णं जगन्मयम्॥९॥

अयोध्यानगरे रम्ये रत्नमण्डपमध्यगे।

स्मरेत्कल्पतरोर्मूले रत्नसिंहासनं शुभम्॥१०॥

तन्मध्येऽष्टदलं पद्मं नानारत्नैश्च वेष्टितम्।

स्मरेन्मध्ये दाशरथिं सहस्रादित्यतेजसम्॥११॥

पितुरङ्कगतं राममिन्द्रनीलमणिप्रभम्।

कोमलाङ्गं विशालाक्षं विद्युद्वर्णाम्बरावृतम्॥१२॥

भानुकोटिप्रतीकाशकिरीटेन विराजितम्।

रत्नग्रैवेयकेयूररत्नकुण्डलमण्डितम्॥१३॥

रत्नकङ्कणमञ्जीरकटिसूत्रैरलङ्कृतम्।

श्रीवत्सकौस्तुभोरस्कं मुक्ताहारोपशोभितम्॥१४॥

दिव्यरत्नसमायुक्तमुद्रिकाभिरलङ्कृतम्।

राघवं द्विभुजं बालं राममीषत्स्मिताननम्॥१५॥

तुलसीकुन्दमन्दारपुष्पमाल्यैरलङ्कृतम्।

कर्पूरागरुकस्तूरीदिव्यगन्धानुलेपनम्॥१६॥

योगशास्त्रेष्वभिरतं योगेशं योगदायकम्।

सदा भरतसौमित्रशत्रुघ्नैरुपशोभितम्॥१७॥

विद्याधरसुराधीशसिद्धगन्धर्वकिन्नरैः।

योगीन्द्रैर्नारदाद्यैश्च स्तूयमानमहर्निशम्॥१८॥

विश्वामित्रवसिष्ठादिमुनिभिः परिसेवितम्।

सनकादिमुनिश्रेष्ठैर्योगिवृन्दैश्च सेवितम्॥१९॥

रामं रघुवरं वीरं धनुर्वेदविशारदम्।

मङ्गलायतनं देवं रामं राजीवलोचनम्॥२०॥

सर्वशास्त्रार्थतत्त्वज्ञमानन्दकरसुन्दरम्।

कौसल्यानन्दनं रामं धनुर्बाणधरं हरिम्॥२१॥

एवं सञ्चिन्तयन् विष्णुं यज्ज्योतिरमलं विभुम्।

प्रहृष्टमानसो भूत्वा मुनिवर्यः स नारदः॥२२॥

सर्वलोकहितार्थाय तुष्टाव रघुनन्दनम्।

कृताञ्जलिपुटो भूत्वा चिन्तयन्नद्भुतं हरिम्॥२३॥

यदेकं यत्परं नित्यं यदनन्तं चिदात्मकम्।

यदेकं व्यापकं लोके तद्रूपं चिन्तयाम्यहम्॥२४॥

विज्ञानहेतुं विमलायताक्षम्
प्रज्ञानरूपं स्वसुखैकहेतुं।
श्रीरामचन्द्रं हरिमादिदेवम्
परात्परं राममहं भजामि॥२५॥

कविं पुराणं पुरुषं पुरस्तात्
सनातनं योगिनमीशितारम्।
अणोरणीयांसमनन्तवीर्यम्
प्राणेश्वरं राममसौ ददर्श॥२६॥

नारद उवाच

रामरक्षास्तोत्रम्

Mon, 01 Jan 0001 00:00:00 +0000

Kavacham

रामरक्षास्तोत्रम्

अस्य श्रीरामरक्षास्तोत्रमन्त्रस्य।
बुधकौशिक ऋषिः। श्रीसीतारामचन्द्रो देवता।
अनुष्टुप् छन्दः। सीता शक्तिः। श्रीमद्-हनुमान कीलकम्।
श्रीरामचन्द्रप्रीत्यर्थे रामरक्षास्तोत्रजपे विनियोगः॥

ध्यानम्

ध्यायेदाजानुबाहुं धृतशरधनुषं बद्धपद्मासनस्थं
पीतं वासो वसानं नवकमलदलस्पर्धिनेत्रं प्रसन्नम्।
वामाङ्कारूढ-सीतामुखकमलमिलल्लोचनं नीरदाभं
नानालङ्कारदीप्तं दधतमुरुजटामण्डनं रामचन्द्रम्॥

चरितं रघुनाथस्य शतकोटि-प्रविस्तरम्।

एकैकमक्षरं पुंसां महापातकनाशनम्॥

ध्यात्वा नीलोत्पलश्यामं रामं राजीवलोचनं
जानकीलक्ष्मणोपेतं जटामुकुटमण्डितम्।
सासितूणधनुर्बाणपाणिं नक्तञ्चरान्तकं
स्वलीलया जगत्त्रातुम् आविर्भूतम् अजं विभुम्॥

रामरक्षां पठेत्प्राज्ञः पापघ्नीं सर्वकामदाम्॥

कवचम्

शिरो मे राघवः पातु भालं दशरथात्मजः।

कौसल्येयो दृशौ पातु विश्वामित्रप्रियः श्रुती॥१॥

घ्राणं पातु मखत्राता मुखं सौमित्रिवत्सलः।

जिह्वां विद्यानिधिः पातु कण्ठं भरतवन्दितः॥२॥

स्कन्धौ दिव्यायुधः पातु भुजौ भग्नेशकार्मुकः।

करौ सीतापतिः पातु हृदयं जामदग्न्यजित्॥३॥

मध्यं पातु खरध्वंसी नाभिं जाम्बवदाश्रयः।

गुह्यं जितेन्द्रियः पातु पृष्ठः पातु रघूत्तमः॥४॥

वक्षः पातु कबन्धारिः स्तनौ गीर्वाणवन्दितः।

पार्श्वो कुलपतिः पातु कुक्षिमिक्ष्वाकुनन्दनः॥५॥

सुग्रीवेशः कटी पातु सक्थिनी हनुमत्प्रभुः।

ऊरू रघूत्तमः पातु रक्षःकुलविनाशकृत्॥६॥

जानुनी सेतुकृत् पातु जङ्घे दशमुखान्तकः।

पादौ विभीषणश्रीदः पातु रामोऽखिलं वपुः॥७॥

एतां रामबलोपेतां रक्षां यः सुकृती पठेत्।

स चिरायुः सुखी पुत्री विजयी विनयी भवेत्॥८॥

पातालभूतलव्योमचारिणश्छद्मचारिणः।

न द्रष्टुमपि शक्तास्ते रक्षितं रामनामभिः॥९॥

रामेति रामभद्रेति रामचन्द्रेति वा स्मरन्।

नरो न लिप्यते पापैर्भुक्तिं मुक्तिं च विन्दति॥१०॥

जगजैत्रैकमन्त्रेण रामनाम्नाऽभिरक्षितम्।

यः कण्ठे धारयेत्तस्य करस्थाः सर्वसिद्धयः॥११॥

वज्रपञ्जरनामेदं यो रामकवचं स्मरेत्।

अव्याहताज्ञः सर्वत्र लभते जयमङ्गलम्॥१२॥

आदिष्टवान् यथा स्वप्ने रामरक्षामिमां हरः।

तथा लिखितवान् प्रातः प्रबुद्धो बुधकौशिकः॥१३॥

आरामः कल्पवृक्षाणां विरामः सकलापदाम्।

अभिरामस्त्रिलोकानां रामः श्रीमान् स नः प्रभुः॥१४॥

तरुणौ रूपसम्पन्नौ सुकुमारौ महाबलौ।

पुण्डरीकविशालाक्षौ चीरकृष्णाजिनाम्बरौ॥१५॥

फलमूलाशनौ दान्तौ तापसौ ब्रह्मचारिणौ।

पुत्रौ दशरथस्यैतौ भ्रातरौ रामलक्ष्मणौ॥१६॥

शरण्यौ सर्वसत्त्वानां श्रेष्ठौ सर्वधनुष्मताम्।

रक्षः कुलनिहन्तारौ त्रायेतां नो रघूत्तमौ॥१७॥

आत्तसज्जधनुषाविषुस्पृशौ अक्षयाशुगनिषङ्गसङ्गिनौ।

रक्षणाय मम रामलक्ष्मणौ अग्रतः पथि सदैव गच्छताम्॥१८॥

सन्नद्धः कवची खड्गी चापबाणधरो युवा।

यच्छन्मनोरथोऽस्माकं रामः पातु सलक्ष्मणः॥१९॥

रामो दाशरथिः शूरो लक्ष्मणानुचरो बली।

काकुत्स्थः पुरुषः पूर्णः कौसल्येयो रघूत्तमः॥२०॥

वेदान्तवेद्यो यज्ञेशः पुराणपुरुषोत्तमः।

जानकीवल्लभः श्रीमान् अप्रमेयपराक्रमः॥२१॥

इत्येतानि जपन्नित्यं मद्भक्तः श्रद्धयान्वितः।

अश्वमेधाधिकं पुण्यं सम्प्राप्नोति न संशयः॥२२॥

॥इति श्री-पद्मपुराणे वेदव्यासकृतौ भगवद्वसिष्ठ-श्री-बुधकौशिकप्रणीतं वज्रपञ्जरं नाम श्री-रामकवचं सम्पूर्णम्॥

रामाष्टकम्

Mon, 01 Jan 0001 00:00:00 +0000

Ashtakam

रामाष्टकम्

भजे विशेषसुन्दरं समस्तपापखण्डनम्।

स्वभक्तचित्तरञ्जनं सदैव राममद्वयम्॥१॥

जटाकलापशोभितं समस्तपापनाशकम्।

स्वभक्तभीतिभञ्जनं भजे ह राममद्वयम्॥२॥

निजस्वरूपबोधकं कृपाकरं भवापहम्।

समं शिवं निरञ्जनं भजे ह राममद्वयम्॥३॥

सहप्रपञ्चकल्पितं ह्यनामरूपवास्तवम्।

निराकृतिं निरामयं भजे ह राममद्वयम्॥४॥

निष्प्रपञ्चनिर्विकल्पनिर्मलं निरामयम्।

चिदेकरूपसन्ततं भजे ह राममद्वयम्॥५॥

भवाब्धिपोतरूपकं ह्यशेषदेहकल्पितम्।

गुणाकरं कृपाकरं भजे ह राममद्वयम्॥६॥

महासुवाक्यबोधकैर्विराजमानवाक्पदैः।

परं ब्रह्मसद्व्यापकं भजे ह राममद्वयम्॥७॥

शिवप्रदं सुखप्रदं भवच्छिदं भ्रमापहम्।

विराजमानदेशिकं भजे ह राममद्वयम्॥८॥

रामाष्टकं पठति यः सुखदं सुपुण्यं
व्यासेन भाषितमिदं शृणुते मनुष्यः।
विद्यां श्रियं विपुलसौख्यमनन्तकीर्तिं
सम्प्राप्य देहविलये लभते च मोक्षम्॥९॥

॥इति श्री-व्यासविरचितं श्री-रामाष्टकं सम्पूर्णम्॥

PDF:A5 / print Kindle Kindle Scribe

हनुमत्कृतं श्री-सीता-राम-स्तोत्रम्

Mon, 01 Jan 0001 00:00:00 +0000

हनुमत्कृतं श्री-सीता-राम-स्तोत्रम्

अयोध्या-पुर-नेतारं मिथिला-पुर-नायिकाम्।

इक्ष्वाकूणाम् अलङ्कारं वैदेहानाम् अलङ्क्रियाम्॥१॥

रघूणां कुल-दीपं च निमीनां कुल-दीपिकाम्।

सूर्य-वंश-समुद्भूतं सोम-वंश-समुद्भवाम्॥२॥

पुत्रं दशरथस्यापि पुत्रीं जनक-भूपतेः।

वसिष्ठ-अनुमताचारं शतानन्द-मतानुगाम्॥३॥

कौसल्या-गर्भ-सम्भूतं वेदि-गर्भोदितां स्वयम्।

पुण्डरीक-विशालाक्षं स्फुरद् इन्दीवरेक्षणाम्॥४॥

चन्द्र-कान्ताननाम्भोजं चन्द्रबिम्ब-उपमाननाम्।

मत्त-मातङ्ग-गमनं मत्त-सारस-गामिनीम्॥५॥

चन्दनार्द्र-भुजा-मध्यं कुङ्कुमाक्त-कुच-स्थलीम्।

चापालङ्कृत-हस्ताब्जं पद्मालङ्कृत-पाणिकाम्॥६॥

शरणागतगोप्तारं प्रणिपातप्रसादिकाम्।

ताली-दल-श्यामलाङ्गं तप्त-चामीकर-प्रभाम्॥७॥

दिव्य-सिंहासनारूढं दिव्य-स्रग्-वस्त्र-भूषणाम्।

अनुक्षणं कटाक्षाभ्याम् अन्योन्य-ईक्षण-काङ्क्षिणौ॥८॥

अन्योन्य-सदृशाकारौ त्रैलोक्य-गृह-दम्पती।

इमौ युवां प्रणम्याहं भजाम्यद्य कृतार्थताम्॥९॥

अनया स्तोति यः स्तुत्या रामं सीतां च भक्तितः।

तस्य तौ तनुतां प्रीतौ सम्पदः सकला अपि॥१०॥

इतीदं रामचन्द्रस्य जानक्याश्च विशेषतः।
कृतं हनुमता पुण्यं स्तोत्रं सद्यो विमुक्ति-दम्।
यः पठेत्प्रातरुत्थाय सर्वान् कामानवाप्नुयात्॥११॥

॥इति श्री-हनूमत्कृतं श्री-सीतारामस्तोत्रं सम्पूर्णम्॥

सीता-विवाह-चूर्णिका

Mon, 01 Jan 0001 00:00:00 +0000

सीता-विवाह-चूर्णिका

(१) अथ जनक-नृपतिर्-मनोरथ-महार्णव-पारं गत्वा,
(२) परमानन्द-जलधौ निमग्नः
(३) जगच्चक्षुः-कुल-भूषणस्य
(४) जगत्-त्रय-संरक्षण-दीक्षितस्य
(५) नत-जन-कल्प-तरोः
(६) श्रीकोदण्ड-दीक्षा-गुरोः
(७) विवाह-महोत्सवाय,
(८) क्षिति-रथ-वर–पूरित-मनो-रथ–भगीरथ-वंश-जातं
(९) अतिरथ-महारथ-पृथिवी-पति-वन्दितं
(१०) दशरथ-महाराजं
(११) रथ-गज-तुरग-पदाति-सहितं
(१२) स-मन्त्रि-पुरोहितं
(१३) स-पुत्र-कलत्रं
(१४) सामात्यं स-परिवारम् आनाय्य सत्कृत्य,
(१५) नाना-विध-क्रमुक-नारिकेल-रम्भादि-फल-युक्त-सहस्र-शातकुम्भ-स्तम्भ-भूषिते
(१६) जम्भारि-चिर-काङ्क्षिते
(१७) परिपूर्ण-मनोरथ-परमानन्द-पौर-भक्तजन-परस्परकृत-सल्लापे
(१८) सकल-जन-मनोहरालापे
(१९) किरीट-कवच-कुण्डल-केयूर-नूपुर-मुक्ताहार–विभूषित–नानाविध-मृदुल-चित्रासनस्थ–नानादेशागत–राजवर्य-वृन्दे
(२०) लोचनानन्दे
(२१) नानाविध-वर्ण-स्वर्णपुष्प-स्तबक-कोटि-देदीप्यमान–मलय-चन्दनारु-गुग्गुलु-गोघृतादि-दिव्य-परिमल-वासना-वस्तु-घुमघुमायमान-सभान्तरे
(२२) निरन्तर-मणि-खचित-मुकुर-परम्परे
(२३) भेरी-मृदङ्ग-मद्दल-काहल-दुन्दुभि-तुरीय-तुम्बुरु-वीणा-वेणु-नूपुर-मड्डुक-डिण्डिम-डमरुक-जञ्झरि-झल्लरि-धवलशङ्ख-पणव-पटहाद्यष्टादश-वाद्य-घोष-सन्तत-शब्दायमान-सकल-दिगन्तरे
(२४) नारद-तुम्बुरु-वीणागान-मनोहरे
(२५) सवत्स-गोसहस्राद्यनेक-कोटि-हिरण्य-वस्त्राभरण-भूदान-बहुमान-सन्तोषित–पात्रभूतोभय-सम्बन्धि-राजश्रेष्ठ-वंशावलि-नाम-गोत्र-प्रवरोच्चारण-निपुण–वसिष्ठ-वामदेव-विश्वामित्र-शतानन्दादि-सकल-मुनिगण-सङ्कीर्ण–विवाह-वेदि-मध्ये
(२६) कृत-स्तव-सिद्ध-साध्ये
(२७) अब्जभव-जिष्णुमुख-हृष्ट-सकल-त्रिदश-सप्तमरुद् अष्टवसु-यक्षगण-सिद्धजन-रुद्रगण-सत्कृत–पवित्रतर–मित्र-कुल-रत्न-सुगुण-स्तव-समस्त-प्रशस्त-बिरुद-स्तोम-निनदे
(२८) निरस्त-धनदेन्द्र-बिरुदे
(२९) सङ्क्रन्दनाद्यमर-वृन्दावकीर्यमाण-मन्दार-कुसुम-मुख–नन्दक-वर्षे
(३०) नवरत्न-मणिखचित-कनकमय-मण्टपे
(३१) किञ्चिद् आरब्ध-तारुण्यं
(३२) नत-जनैक-कारुण्यं
(३३) विदलित-महेश-चापं
(३४) विधिमुख-सुरादिविदित-प्रतापं
(३५) परिहृत-मुनिजन-तापं
(३६) भानुकुल-रत्न-दीपं
(३७) सम्पूरित-भक्त-जन-कामं
(३८) सजल-जलधर-श्यामं
(३९) सकल-लोकाभिरामं
(४०) श्रीरामं सन्निवेश्य,
(४१) केतकी-चम्पक-मल्लिका-कुसुमाद्यलङ्कृत-नीलालक-वेणीं
(४२) कलहंस-गामिनीं
(४३) करुणावलोकिनीं
(४४) अगणित-कल्याण-गुण-गण-शीलाम्
(४५) अनघ-मणि-खचित-हेमकण्ठीं
(४६) स्वर-जित-कल-कण्ठीं
(४७) हाटक-मणिमय-ताटङ्कालङ्कृत-कपोलाम्
(४८) अरविन्द-सुन्दर-मन्दहास-मुखीं
(४९) श्रीरघुनन्दनाभिमुखीं कृत्वा
(५०) ‘इयं सीता मम सुता सहधर्मचरी तव।
प्रतीच्छ चैनां भद्रं ते पाणिं गृह्णीष्व पाणिना॥’
(५१) इति क्षीराब्धिरिव महालक्ष्मीं श्रीमते नारायणाय
(५२) शोभन-मन्त्राक्षत-हिरण्योदक-धारा-सहितं
(५३) मन्द-स्मितां सीतां
(५४) श्रीराम-चन्द्र-करारविन्दे समर्पयामास॥

विवाह-मङ्गलाष्टकम्

Mon, 01 Jan 0001 00:00:00 +0000

विवाह-मङ्गलाष्टकम्

लक्ष्मीर्यस्य परिग्रहः कमल-भूः सूनुर्गरुत्मान् रथः
पौत्रश्चन्द्र-विभूषणः सुर-गुरु शेषश्च शय्या पुनः।
ब्रह्माण्डं वर-मन्दिरं सुर-गणाः यस्य प्रभोः सेवकाः
स त्रैलोक्य-कुटुम्ब-पालन-परः कुर्याद्धरिर्मङ्गलम्॥१॥

ब्रह्मा-वायु-गिरीश-शेष-गरुडा देवेन्द्र-कामौ गुरुः
चन्द्रार्कौ वरुणानलौ मनु-यमौ वित्तेश-विघ्नेश्वरौ।
नासत्यौ निरृतिर्मरुद् गण-युताः पर्जन्य-मित्रादयः
सस्त्रीकाः सुर-पुङ्गवाः प्रतिदिनं कुर्वन्तु नो मङ्गलम्॥२॥

विश्वामित्र-पराशरौर्व-भृगवो-ऽगस्त्यः पुलस्त्यः क्रतुः
श्रीमानत्रि-मरीचि-कौत्स-पुलहाः शक्तिर्वसिष्ठोऽङ्गिराः।
माण्डव्यो जमदग्नि-गौतम-भरद्वाजादयस्तापसाः
श्रीमद् विष्णु-पदाब्ज-भक्ति-निरताः कुर्वन्तु नो मङ्गलम्॥३॥

मान्धाता नहुषोऽम्बरीष-सगरौ राजा पृथुर्हैहयः
श्रीमान् धर्म-सुतो नलो दशरथो रामो ययातिर्यदुः।
इक्ष्वाकुश्च विभीषणश्च भरतश्चोत्तानपाद-ध्रुवा-
वित्येते भुवि भूभुजाः प्रतिदिनं कुर्वन्तु नो मङ्गलम्॥४॥

श्री-मेरुर्हिमवांश्च मन्दर-गिरिः कैलास-शैलस्तथा
माहेन्द्रो मलयश्च विन्ध्य-निषधौ सिंहस्तथा रैवतः।
सह्याद्रिर्वर-गन्धमादन-गिरिर्मैनाक-गोमान्तका-
वित्येते भुवि भूधराश्च प्रतिदिनं सततं कुर्वन्तु नो मङ्गलम्॥५॥

गङ्गा-सिन्धु-सरस्वती च यमुना गोदावरी नर्मदा
कृष्णा भीमरथी च फल्गु-सरयूः श्री-गण्डकी गोमती।
कावेरी-कपिला-प्रयाग-किटिजा-नेत्रावतीत्यादयो
नद्यः श्रीहरि-पाद-पङ्कज-भवाः कुर्वन्तु नो मङ्गलम्॥६॥

वेदाश्चोपनिषद्-गणाश्च विविधाः साङ्गाः पुराणान्विता
वेदान्ता अपि मन्त्र-तन्त्र-सहितास्तर्काः स्मृतीनां गणाः।
काव्यालङ्कृति-नीति-नाटक-युताः शब्दाश्च नाना-विधाः
श्रीविष्णोर्गुण-नाम-कीर्तन-पराः कुर्वन्तु नो मङ्गलम्॥७॥

आदित्यादि-नव-ग्रहाः शुभ-करा मेषादयो राशयो
नक्षत्राणि स-योगकाश्च तिथयस्तद्-देवतास्तद्-गणाः।
मासाब्दा ऋतवस्तथैव दिवसाः सन्ध्यास्तथा रात्रयः
सर्वे स्थावर-जङ्गमाः प्रतिदिनं कुर्वन्तु नो मङ्गलम्॥८॥

इत्येतद् वर-मङ्गलाष्टकमिदं श्रीवादिराजेश्वरे-
णाऽख्यातं जगतामभीष्ट-फल-दं सर्वाशुभ-ध्वंसनम्।
माङ्गल्यादि-शुभ-क्रियासु सततं सन्ध्यासु वा यः पठेद्
धर्मार्थादि-समस्त-वाञ्छित-फलं प्राप्नोत्यसौ मानवः॥

॥इति श्रीवादिराजेश्वरयतिविरचितं मङ्गलाष्टकं सम्पूर्णम्॥