Other on Stotra Samhita

अवैधव्यप्रार्थनास्तोत्रम्

Mon, 01 Jan 0001 00:00:00 +0000

अवैधव्यप्रार्थनास्तोत्रम्

ओङ्कारपूर्विके देवि वीणापुस्तकधारिणि।

वेदमातर्नमस्तुभ्यं अवैधव्यं प्रयच्छ मे॥

पतिव्रते महाभागे भर्तुश्च प्रियवादिनि।
अवैधव्यं च सौभाग्यं देहि त्वं मम सुव्रते।
पुत्रान् पौत्रांश्च सौख्यं च सौमङ्गल्यं च देहि मे॥

‌

❀

PDF:A5 / print Kindle Kindle Scribe

कलिदोषनिवारणस्तोत्रम्

Mon, 01 Jan 0001 00:00:00 +0000

कलिदोषनिवारणस्तोत्रम्

कार्कोटकस्य नागस्य दमयन्त्या नलस्य च।

ऋतुपर्णस्य राजर्षेः कीर्तनं कलिनाशनम्॥

PDF:A5 / print Kindle Kindle Scribe

कार्तवीर्यार्जुन-द्वादशनामस्तोत्रम्

Mon, 01 Jan 0001 00:00:00 +0000

कार्तवीर्यार्जुन-द्वादशनामस्तोत्रम्

ॐ श्रीं क्रों कार्तवीर्यार्जुनाय नमः।

कार्तवीर्यार्जुनो नाम राजा बाहुसहस्रवान्।

तस्य स्मरणमात्रेण गतं नष्टं च लभ्यते॥१॥

कार्तवीर्यः खलद्वेषी कृतवीर्यसुतो बली।

सहस्रबाहुः शत्रुघ्नो रक्तवासा धनुर्धरः॥२॥

रक्तगन्धो रक्तमाल्यो राजा स्मर्तुरभीष्टदः।

द्वादशैतानि नामानि कार्तवीर्यस्य यः पठेत्॥३॥

सम्पदस्तत्र जायन्ते जनस्तत्र वशं गतः।

आनयत्याशु दूरस्थं क्षेमलाभयुतं प्रियम्॥४॥

सहस्रबाहुसशरं महितं सचापं
रक्ताम्बरं रक्तकिरीटकुण्डलम्।
चोरादि-दुष्टभय-नाशम् इष्टदं तं
ध्यायेन्महाबल-विजृम्भित-कार्तवीर्यम्॥५॥

यस्य स्मरणमात्रेण सर्वदुःखक्षयो भवेत्।

यन्नामानि महावीर्यश्चार्जुनः कृतवीर्यवान्॥६॥

हैहयाधिपतेः स्तोत्रं सहस्रावृत्तिकारितम्।

वाञ्चितार्थप्रदं नृणां स्वराज्यं सुकृतं यदि॥७॥

॥इति श्री-कार्तवीर्यार्जुन-द्वादशनाम-स्तोत्रम्॥

PDF:A5 / print Kindle Kindle Scribe

रोगनिवारणश्लोकाः

Mon, 01 Jan 0001 00:00:00 +0000

रोगनिवारणश्लोकाः

ममोपात्त- + श्री-परमेश्वर-प्रीत्यर्थं ज्वर-औपसर्गिकादि-नानाविध-साङ्क्रामिक-रोगाणाम् उन्मूलनार्थम् आरोग्य-प्राप्त्यर्थम् अस्मद्देशीयानां विदेशीयानां चापि सर्वेषां व्याधि-भय-निवृत्त्यर्थं सर्वलोकक्षेमार्थं रोगनिवारक-भगवन्नाम-स्तोत्र-पारायणं करिष्ये ।

अच्युतानन्तगोविन्द-नामोच्चारणभेषजात्।

नश्यन्ति सकला रोगाः सत्यं सत्यं वदाम्यहम्॥

शरीरे जर्जरीभूते व्याधिग्रस्ते कलेवरे।

औषधं जाह्नवीतोयं वैद्यो नारायणो हरिः॥

सुमीनाक्षिपते शम्भो सोमसुन्दरनायक।

इमाम् आपदमुत्पन्नां मदीयां नाशय प्रभो॥

आर्ता विषण्णाः शिथिलाश्च भीताः
घोरेषु च व्याधिषु वर्तमानाः।
सङ्कीर्त्य नारायणशब्दमात्रं
विमुक्तदुःखाः सुखिनो भवन्ति॥

बालाम्बिकेश वैद्येश भवरोगहरेति च।

जपेन्नामत्रयं नित्यं महारोगनिवारणम्॥

पञ्चापगेश जप्येश प्रणतार्तिहरेति च।

जपेन्नामत्रयं नित्यं पुनर्जन्म न विद्यते॥

अपस्मारकुष्ठक्षयार्शः-प्रमेह-
ज्वरोन्मादगुल्मादिरोगा महान्तः।
पिशाचाश्च सर्वे भवत्पत्रभूतिं
विलोक्य क्षणात् तारकारे द्रवन्ते॥

किरन्तीमङ्गेभ्यः किरणनिकुरुम्बामृतरसं
हृदि त्वामाधत्ते हिमकरशिलामूर्तिमिव यः।
स सर्पाणां दर्पं शमयति शकुन्ताधिप इव
ज्वरप्लुष्टान् दृष्ट्या सुखयति सुधाधारसिरया॥

मृगाः पक्षिणो दंशका ये च दुष्टाः
तथा व्याधयो बाधका ये मदङ्गे।
भवच्छक्तितीक्ष्णाग्रभिन्नाः सुदूरे
विनश्यन्तु ते चूर्णितक्रौञ्चशैल॥

क्रिमि-नाशन-मन्त्राः

(तैत्तिरीयारण्यकम्/प्रपाठकः – ४/अनुवाकाः ३६--४०)
अत्रि॑णा त्वा क्रिमे हन्मि।
कण्वे॑न ज॒मद॑ग्निना।
वि॒श्वाव॑सो॒र्ब्रह्म॑णा ह॒तः।
क्रिमी॑णा॒ꣳ॒ राजा᳚।
अप्ये॑षाꣴ स्थ॒पति॑र्ह॒तः।
अथो॑ मा॒ताऽथो॑ पि॒ता।
अथो᳚ स्थू॒रा अथो᳚ क्षु॒द्राः।
अथो॑ कृ॒ष्णा अथो᳚ श्वे॒ताः।
अथो॑ आ॒शाति॑का ह॒ताः।
श्वे॒ताभिः॑ स॒ह सर्वे॑ ह॒ताः॥७७॥
आह॒राव॑द्य।
शृ॒तस्य॑ ह॒विषो॒ यथा᳚।
तथ्स॒त्यम्।
यद॒मुं य॒मस्य॒ जम्भ॑योः।
आद॑धामि॒ तथा॒ हि तत्।
खण्फण्म्रसि॑॥७८॥
ब्रह्म॑णा त्वा शपामि।
ब्रह्म॑णस्त्वा श॒पथे॑न शपामि।
घो॒रेण॑ त्वा॒ भृगू॑णां॒ चक्षु॑षा॒ प्रेक्षे᳚।
रौ॒द्रेण॒ त्वाङ्गि॑रसां॒ मन॑सा ध्यायामि।
अ॒घस्य॑ त्वा॒ धार॑या विद्ध्यामि।
अध॑रो॒ मत्प॑द्यस्वासौ॥७९॥
उत्तु॑द शिमिजावरि।
तल्पे॑जे॒ तल्प॒ उत्तु॑द।
गि॒रीꣳ रनु॒ प्रवे॑शय।
मरी॑ची॒रुप॒ सन्नु॑द।
याव॑दि॒तः पु॒रस्ता॑दु॒दया॑ति॒ सूर्यः॑।
ताव॑दि॒तो॑ऽमुं ना॑शय।
यो᳚ऽस्मान्द्वेष्टि॑।
यं च॑ व॒यं द्वि॒ष्मः॥८०॥
भूर्भुवः॒ सुवो॒ भूर्भुवः॒ सुवो॒ भूर्भुवः॒ सुवः॑।
भुवो᳚ऽद्धायि॒ भुवो᳚ऽद्धायि॒ भुवो᳚ऽद्धायि।
नृ॒म्णायि नृ॒म्णं नृ॒म्णायि नृ॒म्णं नृ॒म्णायि नृ॒म्णम्।
नि॒धाय्यो॑ वायि नि॒धाय्यो॑ वायि नि॒धाय्यो॑ वायि।
ए अ॒स्मे अ॒स्मे।
सुव॒र्न ज्योतीः᳚॥८१॥

यमभयनिवारणस्तोत्रम्

Mon, 01 Jan 0001 00:00:00 +0000

यमभयनिवारणस्तोत्रम्

अतिभीषण कटुभाषण यम किङ्कर पटली
कृतताडन परिपीडन मरणागमसमये।
उमया सह मम चेतसि यमशासन निवसन्
शिव शङ्कर शिव शङ्कर हर मे हर दुरितम्॥

PDF:A5 / print Kindle Kindle Scribe

यमाष्टकम्

Mon, 01 Jan 0001 00:00:00 +0000

यमाष्टकम्

श्रीनारायण उवाच

हरेरुत्कीर्तनं श्रुत्वा सावित्री यमवक्त्रतः।

साश्रुनेत्रा सपुलका यमं पुनरुवाच सा॥१॥

सावित्र्युवाच

हरेरुत्कीर्तनं धर्म स्वकुलोद्धारकारणम्।

श्रोतॄणां चैव वक्तॄणां जन्ममृत्युजराहरम्॥२॥

दानानां च व्रतानां च सिद्धीनां तपसां परम्।

योगानां चैव वेदानां सेवनं कीर्तनं हरेः॥३॥

मुक्तत्वममरत्वं च सर्वसिद्धित्वमेव वा।

श्रीकृष्णसेवनस्यैव कलां नार्हन्ति षोडशीम्॥४॥

भजामि केन विधिना श्रीकृष्णं प्रकृतेः परम्।

मूढां मामबलां तात वद वेदविदां वर॥५॥

शुभकर्मविपाकं च श्रुतं नॄणां मनोहरम्।

कर्माशुभविपाकं च तन्मे व्याख्यातुमर्हसि॥६॥

इत्युक्त्वा सा सती ब्रह्मन् भक्तिनम्रात्मकन्धरा।

तुष्टाव धर्मराजं च वेदोक्तेन स्तवेन च॥७॥

सावित्र्युवाच

तपसा धर्ममाराध्य पुष्करे भास्करः पुरा।

धर्मांशं यं सुतं प्राप धर्मराजं नमाम्यहम्॥८॥

समता सर्वभूतेषु यस्य सर्वस्य साक्षिणः।

अतो यन्नाम शमनमिति तं प्रणमाम्यहम्॥९॥

येनान्तश्च कृतो विश्वे सर्वेषां जीविनां परम्।

कामानुरूपकालेन तं कृतान्तं नमाम्यहम्॥१०॥

बिभर्ति दण्डं दण्ड्याय पापिनां शुद्धिहेतवे।

नमामि तं दण्डधरं यः शास्ता सर्वकर्मणाम्॥११॥

विश्वे च कलयत्येव सर्वायुश्चापि सन्ततम्।

अतीव दुर्निवार्यं च तं कालं प्रणमाम्यहम्॥१२॥

तपस्वी वैष्णवो धर्मी यः संयमी विजितेन्द्रियः।

जीविनां कर्मफलदं तं यमं प्रणमाम्यहम्॥१३॥

स्वात्मारामश्च सर्वज्ञो मित्रं पुण्यकृतां भवेत्।

पापिनां क्लेशदो यस्य पुण्यं मित्रं नमाम्यहम्॥१४॥

यज्जन्म ब्रह्मणो वंशे ज्वलन्तं ब्रह्मतेजसा।

यो ध्यायति परं ब्रह्म ब्रह्मवंशं नमाम्यहम्॥१५॥

इत्युक्त्वा सा च सावित्री प्रणनाम यमं मुने।

यमस्तां विष्णुभजनं कर्मपाकमुवाच ह॥१६॥

इदं यमाष्टकं नित्यं प्रातरुत्थाय यः पठेत्।

यमात्तस्य भयं नास्ति सर्वपापात्प्रमुच्यते॥१७॥

महापापी यदि पठेन्नित्यं भक्त्या च नारद।

यमः करोति संशुद्धं कायव्यूहेन निश्चितम्॥१८॥

॥इति श्री-ब्रह्मवैवर्तमहापुराणे प्रकृतिखण्डे श्री-नारद-नारायण-संवादे श्री-तुलस्योपाख्याने श्री-सावित्रीकृतयमस्तोत्रं सम्पूर्णम्॥