Navagraha on Stotra Samhita

आदित्यहृदयम्

Mon, 01 Jan 0001 00:00:00 +0000

आदित्यहृदयम्

ततो युद्धपरिश्रान्तं समरे चिन्तया स्थितम्।

रावणं चाग्रतो दृष्ट्वा युद्धाय समुपस्थितम्॥१॥

दैवतैश्च समागम्य द्रष्टुमभ्यागतो रणम्।

उपागम्याब्रवीद् रामम् अगस्त्यो भगवान् ऋषिः॥२॥

राम राम महाबाहो शृणु गुह्यं सनातनम्।

येन सर्वानरीन् वत्स समरे विजयिष्यसि॥३॥

आदित्यहृदयं पुण्यं सर्वशत्रुविनाशनम्।

जयावहं जपेन्नित्यम् अक्षय्यं परमं शिवम्॥४॥

सर्वमङ्गलमाङ्गल्यं सर्वपापप्रणाशनम्।

चिन्ताशोकप्रशमनम् आयुर्वर्धनमुत्तमम्॥५॥

रश्मिमन्तं समुद्यन्तं देवासुरनमस्कृतम्।

पूजयस्व विवस्वन्तं भास्करं भुवनेश्वरम्॥६॥

सर्वदेवात्मको ह्येष तेजस्वी रश्मिभावनः।

एष देवासुरगणान् लोकान् पाति गभस्तिभिः॥७॥

एष ब्रह्मा च विष्णुश्च शिवः स्कन्दः प्रजापतिः।

महेन्द्रो धनदः कालो यमः सोमो ह्यपां पतिः॥८॥

पितरो वसवः साध्या ह्यश्विनौ मरुतो मनुः।

वायुर्वह्निः प्रजाप्राण ऋतुकर्ता प्रभाकरः॥९॥

आदित्यः सविता सूर्यः खगः पूषा गभस्तिमान्।

सुवर्णसदृशो भानुर्विश्वरेता दिवाकरः॥१०॥

हरिदश्वः सहस्रार्चिः सप्तसप्तिर्मरीचिमान्।

तिमिरोन्मथनः शम्भुस्त्वष्टा मार्तण्ड अंशुमान्॥११॥

हिरण्यगर्भः शिशिरस्तपनो भास्करो रविः।

अग्निगर्भोऽदितेः पुत्रः शङ्खः शिशिरनाशनः॥१२॥

व्योमनाथस्तमोभेदी ऋग्यजुस्सामपारगः।

घनवृष्टिरपां मित्रो विन्ध्यवीथीप्लवङ्गमः॥१३॥

आतपी मण्डली मृत्युः पिङ्गलः सर्वतापनः।

कविर्विश्वो महातेजा रक्तः सर्वभवोद्भवः॥१४॥

नक्षत्रग्रहताराणाम् अधिपो विश्वभावनः।

तेजसामपि तेजस्वी द्वादशात्मन् नमोऽस्तु ते॥१५॥

नमः पूर्वाय गिरये पश्चिमायाद्रये नमः।

ज्योतिर्गणानां पतये दिनाधिपतये नमः॥१६॥

जयाय जयभद्राय हर्यश्वाय नमो नमः।

नमो नमः सहस्रांशो आदित्याय नमो नमः॥१७॥

नम उग्राय वीराय सारङ्गाय नमो नमः।

नमः पद्मप्रबोधाय मार्तण्डाय नमो नमः॥१८॥

ब्रह्मेशानाच्युतेशाय सूर्यायादित्यवर्चसे।

भास्वते सर्वभक्षाय रौद्राय वपुषे नमः॥१९॥

तमोघ्नाय हिमघ्नाय शत्रुघ्नायामितात्मने।

कृतघ्नघ्नाय देवाय ज्योतिषां पतये नमः॥२०॥

तप्तचामीकराभाय वह्नये विश्वकर्मणे।

नमस्तमोऽभिनिघ्नाय रुचये लोकसाक्षिणे॥२१॥

नाशयत्येष वै भूतं तदेव सृजति प्रभुः।

पायत्येष तपत्येष वर्षत्येष गभस्तिभिः॥२२॥

एष सुप्तेषु जागर्ति भूतेषु परिनिष्ठितः।

एष एवाग्निहोत्रं च फलं चैवाग्निहोत्रिणाम्॥२३॥

वेदाश्च क्रतवश्चैव क्रतूनां फलमेव च।

यानि कृत्यानि लोकेषु सर्व एष रविः प्रभुः॥२४॥

एनमापत्सु कृच्छ्रेषु कान्तारेषु भयेषु च।

कीर्तयन् पुरुषः कश्चिन्नावसीदति राघव॥२५॥

पूजयस्वैनमेकाग्रो देवदेवं जगत्पतिम्।

एतत् त्रिगुणितं जप्त्वा युद्धेषु विजयिष्यसि॥२६॥

अस्मिन् क्षणे महाबाहो रावणं त्वं वधिष्यसि।

एवमुक्त्वा तदाऽगस्त्यो जगाम च यथाऽऽगतम्॥२७॥

एतच्छ्रुत्वा महातेजा नष्टशोकोऽभवत्तदा।

धारयामास सुप्रीतो राघवः प्रयतात्मवान्॥२८॥

आदित्यं प्रेक्ष्य जप्त्वा तु परं हर्षमवाप्तवान्।

त्रिराचम्य शुचिर्भूत्वा धनुरादाय वीर्यवान्॥२९॥

रावणं प्रेक्ष्य हृष्टात्मा युद्धाय समुपागमत्।

सर्वयत्नेन महता वधे तस्य धृतोऽभवत्॥३०॥

अथ रविरवदन्निरीक्ष्य रामं मुदितमनाः परमं प्रहृष्यमाणः।

निशिचरपतिसङ्क्षयं विदित्वा सुरगणमध्यगतो वचस्त्वरेति॥३१॥

॥इत्यार्षे श्रीमद्रामायणे वाल्मीकीये आदिकाव्ये युद्धकाण्डे आदित्यहृदयं नाम सप्तोत्तरशततमः सर्गः॥

अङ्गारकस्तोत्रम्

Mon, 01 Jan 0001 00:00:00 +0000

Nama Stotram

अङ्गारकस्तोत्रम्

अङ्गारकः शक्तिधरो लोहिताङ्गो धरासुतः।

कुमारो मङ्गलो भौमो महाकायो धनप्रदः॥१॥

ऋणहर्ता दृष्टिकर्ता रोगकृद्रोगनाशनः।

विद्युत्प्रभो व्रणकरः कामदो धनहृत् कुजः॥२॥

सामगानप्रियो रक्तवस्त्रो रक्तायतेक्षणः।

लोहितो रक्तवर्णश्च सर्वकर्मावबोधकः॥३॥

रक्तमाल्यधरो हेमकुण्डली ग्रहनायकः।

नामान्येतानि भौमस्य यः पठेत्सततं नरः॥४॥

ऋणं तस्य च दौर्भाग्यं दारिद्र्यं च विनश्यति।
धनं प्राप्नोति विपुलं स्त्रियं चैव मनोरमाम्।
वंशोद्द्योतकरं पुत्रं लभते नात्र संशयः॥५॥

योऽर्चयेदह्नि भौमस्य मङ्गलं बहुपुष्पकैः।

सर्वा नश्यति पीडा च तस्य ग्रहकृता ध्रुवम्॥६॥

॥इति श्री-स्कान्दपुराणे श्री-अङ्गारकस्तोत्रं सम्पूर्णम्॥

PDF:A5 / print Kindle Kindle Scribe

बृहस्पतिस्तोत्रम्

Mon, 01 Jan 0001 00:00:00 +0000

Nama Stotram

बृहस्पतिस्तोत्रम्

गुरुर्बृहस्पतिर्जीवः सुराचार्यो विदां वरः।

वागीशो धिषणो दीर्घश्मश्रुः पीताम्बरो युवा॥१॥

सुधादृष्टिर्ग्रहाधीशो ग्रहपीडापहारकः।

दयाकरः सौम्यमूर्तिः सुरार्च्यः कुङ्मलद्युतिः॥२॥

लोकपूज्यो लोकगुरुर्नीतिज्ञो नीतिकारकः।

तारापतिश्चाङ्गिरसो वेदवेद्यः पितामहः॥३॥

भक्त्या बृहस्पतिं स्मृत्वा नामान्येतानि यः पठेत्।

अरोगी बलवान् श्रीमान् पुत्रवान् स भवेन्नरः॥४॥

जीवेद् वर्षशतं मर्त्यः पापं नश्यति नश्यति।

यः पूजयेद्गुरुदिने पीतगन्धाक्षताम्बरैः॥५॥

पुष्पदीपोपहारैश्च पूजयित्वा बृहस्पतिम्।

ब्राह्मणान्भोजयित्वा च पीडाशान्तिर्भवेद्गुरोः॥६॥

॥इति श्रीस्कान्दपुराणे श्री-बृहस्पतिस्तोत्रं सम्पूर्णम्॥

PDF:A5 / print Kindle Kindle Scribe

बुधपञ्चविंशतिनामस्तोत्रम्

Mon, 01 Jan 0001 00:00:00 +0000

Nama Stotram

बुधपञ्चविंशतिनामस्तोत्रम्

बुधो बुद्धिमतां श्रेष्ठो बुद्धिदाता धनप्रदः।

प्रियङ्गुकलिकाश्यामः कञ्जनेत्रो मनोहरः॥१॥

ग्रहोपमो रौहिणेयो नक्षत्रेशो दयाकरः।

विरुद्धकार्यहन्ता च सौम्यो बुद्धिविवर्धनः॥२॥

चन्द्रात्मजो विष्णुरूपी ज्ञानिज्ञो ज्ञानिनायकः।

ग्रहपीडाहरो दारपुत्रधान्यपशुप्रदः॥३॥

लोकप्रियः सौम्यमूर्तिर्गुणदो गुणिवत्सलः।

पञ्चविंशतिनामानि बुधस्यैतानि यः पठेत्॥४॥

स्मृत्वा बुधं सदा तस्य पीडा सर्वा विनश्यति।

तद्दिने वा पठेद्यस्तु लभते स मनोगतम्॥५॥

॥इति श्री-पद्मपुराणे श्री-बुधपञ्चविंशतिनामस्तोत्रं सम्पूर्णम्॥

PDF:A5 / print Kindle Kindle Scribe

चन्द्राष्टविंशतिनामस्तोत्रम्

Mon, 01 Jan 0001 00:00:00 +0000

Nama Stotram

चन्द्राष्टविंशतिनामस्तोत्रम्

चन्द्रस्य शृणु नामानि शुभदानि महीपते।

यानि श्रुत्वा नरो दुःखान्मुच्यते नात्र संशयः॥१॥

सुधाकरो विधुः सोमो ग्लौरब्जः कुमुदप्रियः।

लोकप्रियः शुभ्रभानुश्चन्द्रमा रोहिणीपतिः॥२॥

शशी हिमकरो राजा द्विजराजो निशाकरः।

आत्रेय इन्दुः शीतांशुरोषधीशः कलानिधिः॥३॥

जैवातृको रमाभ्राता क्षीरोदार्णवसम्भवः।

नक्षत्रनायकः शम्भुशिरश्चूडामणिर्विभुः॥४॥

तापहर्ता नभोदीपो नामान्येतानि यः पठेत्।

प्रत्यहं भक्तिसंयुक्तस्तस्य पीडा विनश्यति॥५॥

तद्दिने च पठेद्यस्तु लभेत्सर्वं समीहितम्।

ग्रहादीनां च सर्वेषां भवेच्चन्द्रबलं सदा॥६॥

॥इति श्री-चन्द्राष्टविंशतिनामस्तोत्रं सम्पूर्णम्॥

PDF:A5 / print Kindle Kindle Scribe

Chandra Grahana Pidaparihara Shlokam

Mon, 01 Jan 0001 00:00:00 +0000

चन्द्रग्रहण-पीडापरिहारश्लोकः

इन्द्रोऽनलो दण्डधरश्च ऋक्षः प्रचेतसो वायु-कुबेर-ईशाः।

मज्जन्म-ऋक्षे मम राशि-संस्थे सोमोऽपरागं शमयन्तु सर्वे॥

PDF:A5 / print Kindle Kindle Scribe

द्वादशार्यासूर्यस्तुतिः

Mon, 01 Jan 0001 00:00:00 +0000

द्वादशार्यासूर्यस्तुतिः

उद्यन्नद्य विवस्वानारोहन्नुत्तरां दिवं देवः।

हृद्रोगं मम सूर्यो हरिमाणं चाऽऽशु नाशयतु॥१॥

निमिषार्धेनैकेन द्वे च शते द्वे सहस्रे द्वे।

क्रममाण योजनानां नमोऽस्तु ते नलिननाथाय॥२॥

कर्म-ज्ञान-ख-दशकं मनश्च जीव इति विश्व-सर्गाय।

द्वादशधा यो विचरति स द्वादश-मूर्तिरस्तु मोदाय॥३॥

त्वं हि यजुर्ऋक् साम त्वमागमस्त्वं वषट्कारः।

त्वं विश्वं त्वं हंसस्त्वं भानो परमहंसश्च॥४॥

शिवरूपाज्ज्ञानमहं त्वत्तो मुक्तिं जनार्दनाकारात्।

शिखिरूपादैश्वर्यं त्वत्तश्चारोग्यमिच्छामि॥५॥

त्वचि दोषा दृशि दोषा हृदि दोषा येऽखिलेन्द्रियज-दोषाः।

तान् पूषा हतदोषः किञ्चिद् रोषाग्निना दहतु॥६॥

धर्मार्थ-काम-मोक्ष-प्रतिरोधानुग्र-ताप-वेग-करान्।

बन्दी-कृतेन्द्रिय-गणान् गदान् विखण्डयतु चण्डांशुः॥७॥

येन विनेदं तिमिरं जगदेत्य ग्रसति चरमचरमखिलम्।

धृतबोधं तं नलिनीभर्तारं हर्तारमापदामीडे॥८॥

यस्य सहस्राभीशोरभीशु-लेशो हिमांशु-बिम्बगतः।

भासयति नक्तमखिलं भेदयतु विपद्-गणानरुणः॥९॥

तिमिरमिव नेत्र-तिमिरं पटलमिवाशेष-रोग-पटलं नः।

काशमिवाधि-निकायं कालपिता रोगयुक्ततां हरतात्॥१०॥

वाताश्मरी-गदार्शस्त्वग्-दोष-महोदर-प्रमेहांश्च।

ग्रहणी-भगन्दराख्या महतीस्त्वं मे रुजो हंसि॥११॥

त्वं माता त्वं शरणं त्वं धाता त्वं धनं त्वमाचार्यः।

त्वं त्राता त्वं हर्ता विपदामर्क प्रसीद मम भानो॥१२॥

इत्यार्या-द्वादशकं साम्बस्य पुरो नभःस्थलात् पतितम्।

पठतां भाग्य-समृद्धिः समस्त-रोग-क्षयश्च स्यात्॥१३॥

॥इति श्री-द्वादशार्यासूर्यस्तुतिः सम्पूर्णा॥

केतुपञ्चविंशतिनामस्तोत्रम्

Mon, 01 Jan 0001 00:00:00 +0000

Nama Stotram

केतुपञ्चविंशतिनामस्तोत्रम्

केतुः कालः कलयिता धूम्रकेतुर्विवर्णकः।

लोककेतुर्महाकेतुः सर्वकेतुर्भगप्रदः॥१॥

रौद्रो रुद्रप्रियो रुद्रः क्रूरकर्मा सुगन्धधृक्।

पलालधूमसङ्काशश्चित्रयज्ञोपवीतधृक्॥२॥

तारागणविमर्दी च जैमिनेयो ग्रहाधिपः।

गणेशदेवो विघ्नेशो विषरोगार्तिनाशनः॥३॥

प्रव्राज्यदो ज्ञानदश्च तीर्थयात्राप्रवर्तकः।

पञ्चविंशतिनामानि केतोर्यः सततं पठेत्॥४॥

तस्य नश्यति बाधा च सर्वा केतुप्रसादतः।

धनधान्यपशूनां च भवेद्वृद्धिर्न संशयः॥५॥

॥इति श्री-स्कान्दपुराणे श्री-केतुपञ्चविंशतिनामस्तोत्रं सम्पूर्णम्॥

PDF:A5 / print Kindle Kindle Scribe

नवग्रहमङ्गलाष्टकम्

Mon, 01 Jan 0001 00:00:00 +0000

नवग्रहमङ्गलाष्टकम्

भास्वानर्कसमिच्च रक्तकिरणः सिंहाधिपः काश्यपो
गुर्विन्दोश्च कुजस्य मित्रमरिगः त्रिस्थः शुभः प्राङ्मुखः।
शत्रुर्भार्गवसौरयोः प्रियः कुजः कालिङ्गदेशाधिपो
मध्ये वर्तुलमण्डले स्थितिमितः कुर्यात् सदा मङ्गलम्॥१॥

चन्द्रः कर्कटकप्रभुः सितरुचिश्चात्रेयगोत्रोद्भवः
चाग्नेये चतुरश्रकोऽपरमुखो गौर्यर्चया तर्पितः।
षट्सप्ताग्निदशाद्यशोभनफलोऽशत्रुर्बुधार्कप्रियः
सौम्यो यामुनदेशपर्णजसमित्कुर्यात् सदा मङ्गलम्॥२॥

भौमो दक्षिणदिक्त्रिकोणनिलयोऽवन्तीपतिः खादिर-
प्रीतो वृश्चिकमेषयोरधिपतिर्गुर्वर्कचन्द्रप्रियः।
ज्ञारिः षट्त्रिशुभप्रदश्च वसुधादाता गुहाधीश्वरो
भारद्वाजकुलाधिपोऽरुणरुचिः कुर्यात् सदा मङ्गलम्॥३॥

सौम्यः पीत उदङ्मुखः समिदपामार्गोऽत्रिगोत्रोद्भवो
बाणेशानगतः सुहृद्रविसुतो वैरीकृतानुष्णरुक्।
कन्यायुग्मपतिर्दशाष्टमचतुःषण्णेत्रगः शोभनो
विष्ण्वाराधनतर्पितो मगधपः कुर्यात् सदा मङ्गलम्॥४॥

जीवश्चोत्तरदिङ्मुखोत्तरककुभ्जातोऽङ्गिरो गोत्रदः
पीतोऽश्वत्थसमिच्च सिन्ध्वधिपतिः चापर्क्षमीनाधिपः।
सूर्येन्दुक्षितिजप्रियः सितबुधारातिः समो भानुजे
सप्तापत्यतपोऽर्थगः शुभकरः कुर्यात् सदा मङ्गलम्॥५॥

शुक्रो भार्गवगोत्रजः सितरुचिः पूर्वाननः पूर्वदिक्
काम्बोजाधिपतिस्तुलावृषभगश्चौदुम्बरैस्तर्पितः।
सौम्यर्क्योः सुहृदम्बिकास्तुतिवशात् प्रीतोर्कचन्द्राहितो
नारीभोगकरः शुभो भृगुसुतः कुर्यात् सदा मङ्गलम्॥६॥

सौरिः कृष्णरुचिश्च पश्चिममुखः सौराष्ट्रपः काश्यपो
नाथः कुम्भमृगर्क्षयोः प्रियसुहृत् शुक्रज्ञयोर्रुद्रगः।
षट्त्रिस्थः शुभदो शुभो धनुगतिश्चापाकृतौ मण्डले
सन्तिष्ठन् चिरजीवितादिफलदः कुर्यात् सदा मङ्गलम्॥७॥

राहुर्बर्बरदेशपो निरृतौ कृष्णाङ्गशूर्पासनो
याम्याशाभिमुखश्च चन्द्ररविरुध् पैडीनसिः क्रौर्यवान्।
षट्त्रिस्थः शुभकृत् करालवदनः प्रीतश्च दूर्वाहुतौ
दुर्गापूजनतः प्रसन्नहृदयः कुर्यात् सदा मङ्गलम्॥८॥

केतुर्जैमिनिगोत्रजः कुशसमिद्वायव्यकोणेस्थितः
चित्राङ्कध्वजलाञ्छनो हि भगवान् याम्याननः शोभनः।
सन्तुष्टो गणनाथपूजनवशात् गङ्गादितीर्थप्रदः
षट्त्रिस्थः शुभकृच्च चित्रिततनुः कुर्यात् सदा मङ्गलम्॥९॥

॥इति श्री-नवग्रहमङ्गलाष्टकं सम्पूर्णम्॥

नवग्रहपीडाहरस्तोत्रम्

Mon, 01 Jan 0001 00:00:00 +0000

नवग्रहपीडाहरस्तोत्रम्

ग्रहाणामादिरादित्यो लोकरक्षणकारकः।

विषमस्थानसम्भूतां पीडां हरतु मे रविः॥१॥

रोहिणीशः सुधामूर्तिः सुधागात्रः सुधाशनः।

विषमस्थानसम्भूतां पीडां हरतु मे विधुः॥२॥

भूमिपुत्रो महातेजा जगतां भयकृत् सदा।

वृष्टिकृद्वृष्टिहर्ता च पीडां हरतु मे कुजः॥३॥

उत्पातरूपो जगतां चन्द्रपुत्रो महाद्युतिः।

सूर्यप्रियकरो विद्वान् पीडां हरतु मे बुधः॥४॥

देवमन्त्री विशालाक्षः सदा लोकहिते रतः।

अनेकशिष्यसम्पूर्णः पीडां हरतु मे गुरुः॥५॥

दैत्यमन्त्री गुरुस्तेषां प्राणदश्च महामतिः।

प्रभुस्ताराग्रहाणां च पीडां हरतु मे भृगुः॥६॥

सूर्यपुत्रो दीर्घदेहो विशालाक्षः शिवप्रियः।

मन्दचारः प्रसन्नात्मा पीडां हरतु मे शनिः॥७॥

महाशिरा महावक्त्रो दीर्घदंष्ट्रो महाबलः।

अतनुश्चोर्ध्वकेशश्च पीडां हरतु मे शिखी॥८॥

अनेकरूपवर्णैश्च शतशोऽथ सहस्रशः।

उत्पातरूपो जगतां पीडां हरतु मे तमः॥९॥

॥इति ब्रह्माण्डपुराणोक्तं नवग्रहपीडाहरस्तोत्रं सम्पूर्णम्॥

नवग्रहस्तोत्रम्

Mon, 01 Jan 0001 00:00:00 +0000

नवग्रहस्तोत्रम्

जपाकुसुमसङ्काशं काश्यपेयं महाद्युतिम्।

तमोरिं सर्वपापघ्नं प्रणतोऽस्मि दिवाकरम्॥१॥

दधिशङ्खतुषाराभं क्षीरोदार्णवसम्भवम्।

नमामि शशिनं सोमं शम्भोर्मुकुटभूषणम्॥२॥

धरणीगर्भसम्भूतं विद्युत्कान्तिसमप्रभम्।

कुमारं शक्तिहस्तं तं मङ्गलं प्रणमाम्यहम्॥३॥

प्रियङ्गुकलिकाश्यामं रूपेणाप्रतिमं बुधम्।

सौम्यं सौम्यगुणोपेतं तं बुधं प्रणमाम्यहम्॥४॥

देवानां च ऋषीणां च गुरुं काञ्चनसन्निभम्।

बुद्धिभूतं त्रिलोकेशं तं नमामि बृहस्पतिम्॥५॥

हिमकुन्दमृणालाभं दैत्यानां परमं गुरुम्।

सर्वशास्त्रप्रवक्तारं भार्गवं प्रणमाम्यहम्॥६॥

नीलाञ्जनसमाभासं रविपुत्रं यमाग्रजम्।

छायामार्तण्डसम्भूतं तं नमामि शनैश्चरम्॥७॥

अर्धकायं महावीर्यं चन्द्रादित्यविमर्दनम्।

सिंहिकागर्भसम्भूतं तं राहुं प्रणमाम्यहम्॥८॥

पलाशपुष्पसङ्काशं तारकाग्रहमस्तकम्।

रौद्रं रौद्रात्मकं घोरं तं केतुं प्रणमाम्यहम्॥९॥

इति व्यासमुखोद्गीतं यः पठेत् सुसमाहितः।

दिवा वा यदि वा रात्रौ विघ्नशान्तिर्भविष्यति॥१०॥

नरनारीनृपाणां च भवेद्दुःस्वप्ननाशनम्।

ऐश्वर्यमतुलं तेषामारोग्यं पुष्टिवर्धनम्॥११॥

ग्रहनक्षत्रजाः पीडास्तस्कराग्निसमुद्भवाः।

ताः सर्वाः प्रशमं यान्ति व्यासो ब्रूते न संशयः॥१२॥

॥इति श्रीव्यासविरचितं नवग्रहस्तोत्रं सम्पूर्णम्॥

राहुपञ्चविंशतिनामस्तोत्रम्

Mon, 01 Jan 0001 00:00:00 +0000

Nama Stotram

राहुपञ्चविंशतिनामस्तोत्रम्

राहुर्दानवमन्त्री च सिंहिकाचित्तनन्दनः।

अर्धकायः सदा क्रोधी चन्द्रादित्यविमर्दनः॥१॥

रौद्रो रुद्रप्रियो दैत्यः स्वर्भानुर्भानुभीतिदः।

ग्रहराजः सुधापायी राकातिथ्यभिलाषुकः॥२॥

कालदृष्टिः कालरूपः श्रीकण्ठहृदयाश्रयः।

विधुन्तुदः सैंहिकेयो घोररूपो महाबलः॥३॥

ग्रहपीडाकरो दंष्ट्री रक्तनेत्रो महोदरः।

पञ्चविंशतिनामानि स्मृत्वा राहुं सदा नरः॥४॥

यः पठेन्महती पीडा तस्य नश्यति केवलम्।

आरोग्यं पुत्रमतुलां श्रियं धान्यं पशूंस्तथा॥५॥

ददाति राहुस्तस्मै यः पठते स्तोत्रमुत्तमम्।

सततं पठते यस्तु जीवेद् वर्षशतं नरः॥६॥

॥ इति श्रीस्कान्दपुराणे श्री-राहुपञ्चविंशतिनामस्तोत्रं सम्पूर्णम्॥

PDF:A5 / print Kindle Kindle Scribe

दशरथकृत शनैश्चराष्टकम्

Mon, 01 Jan 0001 00:00:00 +0000

Ashtakam

दशरथकृत शनैश्चराष्टकम्

अस्य श्रीशनैश्चरस्तोत्रमन्त्रस्य दशरथ ऋषिः। शनैश्चरो देवता।
त्रिष्टुप् छन्दः। शनैश्चरप्रीत्यर्थे जपे विनियोगः।

दशरथ उवाच

कोणोऽन्तको रौद्र यमोऽथ बभ्रुः कृष्णः शनिः पिङ्गलमन्दसौरिः।

नित्यं स्मृतो यो हरते च पीडां तस्मै नमः श्रीरविनन्दनाय॥१॥

सुरासुराः किम्पुरुषोरगेन्द्रा गन्धर्वविद्याधरपन्नगाश्च।

पीड्यन्ति सर्वे विषमस्थितेन तस्मै नमः श्रीरविनन्दनाय॥२॥

नरा नरेन्द्राः पशवो मृगेन्द्रा वन्याश्च ये कीटपतङ्गभृङ्गाः।

पीड्यन्ति सर्वे विषमस्थितेन तस्मै नमः श्रीरविनन्दनाय॥३॥

देशाश्च दुर्गाणि वनानि यत्र सेनानिवेशाः पुरपत्तनानि।

पीड्यन्ति सर्वे विषमस्थितेन तस्मै नमः श्रीरविनन्दनाय॥४॥

तिलैर्यवैर्माषगुडान्नदानैर्लोहेन नीलाम्बरदानतो वा।

प्रीणाति मन्त्रैर्निजवासरे च तस्मै नमः श्रीरविनन्दनाय॥५॥

प्रयागकूले यमुनातटे च सरस्वतीपुण्यजले गुहायाम्।

यो योगिनां ध्यानगतोऽपि सूक्ष्मस्तस्मै नमः श्रीरविनन्दनाय॥६॥

अन्यप्रदेशात् स्वगृहं प्रविष्टस्तदीयवारे स नरः सुखी स्यात्।

गृहाद्गतो यो न पुनः प्रयाति तस्मै नमः श्रीरविनन्दनाय॥७॥

स्रष्टा स्वयम्भूर्भुवनत्रयस्य त्राता हरीशो हरते पिनाकी।

एकस्त्रिधा ऋग्यजुस्साममूर्तिस्तस्मै नमः श्रीरविनन्दनाय॥८॥

शन्यष्टकं यः प्रयतः प्रभाते नित्यं सुपुत्रैः पशुबान्धवैश्च।

पठेत् तु सौख्यं भुवि भोगयुक्तः प्राप्नोति निर्वाणपदं तदन्ते॥

कोणस्थः पिङ्गलो बभ्रुः कृष्णो रौद्रोऽन्तको यमः।

सौरिः शनैश्चरो मन्दः पिप्पलादेन संस्तुतः॥

एतानि दशनामानि प्रातरुत्थाय यः पठेत्।

शनैश्चरकृता पीडा न कदाचिद् भविष्यति॥

॥इति श्री-दशरथकृतं श्री-शनैश्चराष्टकं सम्पूर्णम्॥

शुक्रचतुर्विंशतिनामस्तोत्रम्

Mon, 01 Jan 0001 00:00:00 +0000

Nama Stotram

शुक्रचतुर्विंशतिनामस्तोत्रम्

शृण्वन्तु मुनयः सर्वे शुक्रस्तोत्रमिदं शुभम्।।

रहस्यं सर्वभूतानां शुक्रप्रीतिकरं शुभम्॥ १॥॥१॥

येषां सङ्कीर्तनान्नित्यं सर्वान् कामानवाप्नुयात्।

तानि शुक्रस्य नामानि कथयामि शुभानि च॥२॥

शुक्रः शुभग्रहः श्रीमान् वर्षकृद् वर्षविघ्नकृत्।

तेजोनिधिर्ज्ञानदाता योगी योगविदां वरः॥३॥

दैत्यसञ्जीवनो धीरो दैत्यनेतोशना कविः।

नीतिकर्ता ग्रहाधीशो विश्वात्मा लोकपूजितः॥४॥

शुक्लमाल्याम्बरधरः श्रीचन्दनसमप्रभः।

अक्षमालाधरः काव्यः तपोमूर्तिर्धनप्रदः॥५॥

चतुर्विंशतिनामानि अष्टोत्तरशतं यथा।

देवस्याग्रे विशेषेण पूजां कृत्वा विधानतः॥६॥

य इदं पठति स्तोत्रं भार्गवस्य महात्मनः।

विषमस्थोऽपि भगवान् तुष्टः स्यान्नात्र संशयः॥७॥

स्तोत्रं भृगोरिदमनन्तगुणप्रदं यो
भक्त्या पठेच्च मनुजो नियतः शुचिः सन्।
प्राप्नोति नित्यमतुलां श्रियमीप्सितार्थान्
राज्यं समस्तधनधान्ययुतां समृद्धिम्॥८॥

॥इति श्री-स्कान्दपुराणे श्री-शुक्रचतुर्विंशतिनामस्तोत्रं सम्पूर्णम्॥

Surya Grahana Pidaparihara Shlokam

Mon, 01 Jan 0001 00:00:00 +0000

सूर्यग्रहण-पीडापरिहारश्लोकः

इन्द्रोऽनलो दण्डधरश्च ऋक्षः प्रचेतसो वायु-कुबेर-ईशाः।

मज्जन्म-ऋक्षे मम राशि-संस्थे अर्कोऽपरागं शमयन्तु सर्वे॥

PDF:A5 / print Kindle Kindle Scribe

सूर्यकवचम्

Mon, 01 Jan 0001 00:00:00 +0000

Kavacham

सूर्यकवचम्

याज्ञवल्क्य उवाच

शृणुष्व मुनिशार्दूल सूर्यस्य कवचं शुभम्।

शरीरारोग्यदं दिव्यं सर्वसौभाग्यदायकम्॥१॥

देदीप्यमानमुकुटं स्फुरन्मकरकुण्डलम्।

ध्यात्वा सहस्रकिरणं स्तोत्रमेतदुदीरयेत्॥२॥

शिरो मे भास्करः पातु ललाटं मेऽमितद्युतिः।

नेत्रे दिनमणिः पातु श्रवणे वासरेश्वरः॥३॥

घ्राणं घर्मघृणिः पातु वदनं वेदवाहनः।

जिह्वां मे मानदः पातु कण्ठं मे सुरवन्दितः॥४॥

स्कन्धौ प्रभाकरः पातु वक्षः पातु जनप्रियः।

पातु पादौ द्वादशात्मा सर्वाङ्गं सकलेश्वरः॥५॥

सूर्यरक्षात्मकं स्तोत्रं लिखित्वा भूर्जपत्रके।

दधाति यः करे तस्य वशगाः सर्वसिद्धयः॥६॥

सुस्नातो यो जपेत् सम्यग् योऽधीते स्वस्थमानसः।

स रोगमुक्तो दीर्घायुः सुखं पुष्टिं च विन्दति॥७॥

॥इति श्री-याज्ञवल्क्यमुनिविरचितं श्री-सूर्यकवचस्तोत्रं सम्पूर्णम्॥

PDF:A5 / print Kindle Kindle Scribe

सूर्यमण्डल-स्तोत्रम्

Mon, 01 Jan 0001 00:00:00 +0000

सूर्यमण्डल-स्तोत्रम्

नमोऽस्तु सूर्याय सहस्ररश्मये सहस्रशाखान्वितसम्भवात्मने।

सहस्रयोगोद्भवभावभागिने सहस्रसङ्ख्यायुगधारिणे नमः॥

यन्मण्डलं दीप्तिकरं विशालं रत्नप्रभं तीव्रमनादिरूपम्।

दारिद्र्यदुःखक्षयकारणं च पुनातु मां तत्सवितुर्वरेण्यम्॥१॥

यन्मण्डलं देवगणैः सुपूजितं विप्रैः स्तुतं भावनमुक्तिकोविदम्।

तं देवदेवं प्रणमामि सूर्यं पुनातु मां तत्सवितुर्वरेण्यम्॥२॥

यन्मण्डलं ज्ञानघनं त्वगम्यं त्रैलोक्यपूज्यं त्रिगुणात्मरूपम्।

समस्त-तेजोमय-दिव्यरूपं पुनातु मां तत्सवितुर्वरेण्यम्॥३॥

यन्मण्डलं गूढमतिप्रबोधं धर्मस्य वृद्धिं कुरुते जनानाम्।

यत्सर्वपापक्षयकारणं च पुनातु मां तत्सवितुर्वरेण्यम्॥४॥

यन्मण्डलं व्याधिविनाशदक्षं यदृग्यजुःसामसु सम्प्रगीतम्।

प्रकाशितं येन च भूर्भुवः स्वः पुनातु मां तत्सवितुर्वरेण्यम्॥५॥

यन्मण्डलं वेदविदो वदन्ति गायन्ति यच्चारण-सिद्धसङ्घाः।

यद्योगिनो योगजुषां च सङ्घाः पुनातु मां तत्सवितुर्वरेण्यम्॥६॥

यन्मण्डलं सर्वजनैश्च पूजितं ज्योतिश्च कुर्यादिह मर्त्यलोके।

यत्कालकालाद्यमनादिरूपं पुनातु मां तत्सवितुर्वरेण्यम्॥७॥

यन्मण्डलं विष्णुचतुर्मुखाख्यं यदक्षरं पापहरं जनानाम्।

यत्कालकल्पक्षयकारणं च पुनातु मां तत्सवितुर्वरेण्यम्॥८॥

यन्मण्डलं विश्वसृजं प्रसिद्धमुत्पत्ति-रक्षा-प्रलय-प्रगल्भम्।

यस्मिञ्जगत्संहरतेऽखिलं च पुनातु मां तत्सवितुर्वरेण्यम्॥९॥

यन्मण्डलं सर्वगतस्य विष्णोरात्मा परं धाम विशुद्धतत्त्वम्।

सूक्ष्मान्तरैर्योगपथानुगम्यं पुनातु मां तत्सवितुर्वरेण्यम्॥१०॥

यन्मण्डलं वेदविदो वदन्ति गायन्ति यच्चारण-सिद्धसङ्घाः।

यन्मण्डलं वेदविदः स्मरन्ति पुनातु मां तत्सवितुर्वरेण्यम्॥११॥

यन्मण्डलं वेदविदोपगीतं यद्योगिनां योगपथानुगम्यम्।

तत्सर्ववेद्यं प्रणमामि सूर्यं पुनातु मां तत्सवितुर्वरेण्यम्॥१२॥

सूर्यमण्डलसुस्तोत्रं यः पठेत् सततं नरः।

सर्वपापविशुद्धात्मा सूर्यलोके महीयते॥१३॥

॥इति श्री-भविष्योत्तरपुराणे श्रीकृष्णार्जुनसंवादे सूर्यमण्डलस्तोत्रं सम्पूर्णम्॥

सूर्यप्रातःस्मरणस्तोत्रम्

Mon, 01 Jan 0001 00:00:00 +0000

Pratah Smaranam

सूर्यप्रातःस्मरणस्तोत्रम्

प्रातः स्मरामि खलु तत्सवितुर्वरेण्यं
रूपं हि मण्डलमृचोऽथ तनुर्यजूंषि।
सामानि यस्य किरणाः प्रभवादिहेतुं
ब्रह्माहरात्मकमलक्ष्यमचिन्त्यरूपम्॥१॥

प्रातर्नमामि तरणिं तनुवाङ्मनोभिर्-
ब्रह्मेन्द्रपूर्वकसुरैर्नुतमर्चितं च।
वृष्टिप्रमोचनविनिग्रहहेतुभूतं
त्रैलोक्यपालनपरं त्रिगुणात्मकं च॥२॥

प्रातर्भजामि सवितारमनन्तशक्तिं
पापौघशत्रुभयरोगहरं परं च।
तं सर्वलोककलनात्मककालमूर्तिं
गोकण्ठबन्धनविमोचनमादिदेवम्॥३॥

श्लोकत्रयमिदं भानोः प्रातः प्रातः पठेत् तु यः।

स सर्वव्याधिनिर्मुक्तः परं सुखमवाप्नुयात्॥

॥इति श्री-सूर्यप्रातःस्मरणस्तोत्रं सम्पूर्णम्॥

PDF:A5 / print Kindle Kindle Scribe

सूर्यस्तवराजः

Mon, 01 Jan 0001 00:00:00 +0000

सूर्यस्तवराजः

वसिष्ठ उवाच

स्तुवंस्तत्र ततः साम्बः कृशो धमनि सन्ततः।

राजन् नामसहस्रेण सहस्रांशुं दिवाकरम्॥१॥

खिद्यमानं तु तं दृष्ट्वा सूर्यः कृष्णात्मजं तदा।

स्वप्ने तु दर्शनं दत्त्वा पुनर्वचनमब्रवीत्॥२॥

श्री-सूर्य उवाच

साम्ब साम्ब महाबाहो शृणु जाम्बवतीसुत।

अलं नामसहस्रेण पठंस्त्वेवं स्तवं शुभम्॥३॥

यानि नामानि गुह्यानि पवित्राणि शुभानि च।

तानि ते कीर्तयिष्यामि श्रुत्वा तमवधारय॥४॥

ॐ विकर्तनो विवस्वांश्च मार्तण्डो भास्करो रविः।

लोकप्रकाशकः श्रीमाँल्लोकचक्षुर्ग्रहेश्वरः॥५॥

लोकसाक्षी त्रिलोकेशः कर्ता हर्ता तमिस्रहा।

तपनस्तापनश्चैव शुचिः सप्ताश्ववाहनः॥६॥

गभस्तिहस्तो ब्रह्मा च सर्वदेवनमस्कृतः।

एकविंशतिरित्येष स्तव इष्टः सदा मम॥७॥

शरीरारोग्यदश्चैव धनवृद्धियशस्करः।

स्तवराज इति ख्यातस्त्रिषु लोकेषु विश्रुतः॥८॥

य एतेन महाबाहो द्वे सन्ध्येऽस्तमनोदये।

स्तौति मां प्रणतो भूत्वा सर्वपापैः प्रमुच्यते॥९॥

कायिकं वाचिकं चापि मानसं यच्च दुष्कृतम्।

तत् सर्वमेकजाप्येन प्रणश्यति ममाग्रतः॥१०॥

एष जप्यश्च होमश्च सन्ध्योपासनमेव च।

बलिमन्त्रोऽर्घ्यमन्त्रश्च धूपमन्त्रस्तथैव च॥११॥

अन्नप्रदाने स्नाने च प्रणिपाते प्रदक्षिणे।

पूजितोऽयं महामन्त्रः सर्वव्याधिहरः शुभः॥१२॥

एवमुक्त्वा तु भगवान् भास्करो जगदीश्वरः।

आमन्त्र्य कृष्णतनयं तत्रैवान्तरधीयत॥१३॥

साम्बोऽपि स्तवराजेन स्तुत्वा सप्ताश्ववाहनम्।

पूतात्मा नीरुजः श्रीमांस्तस्माद् रोगाद्विमुक्तवान्॥१४॥

॥इति साम्बपुराणे रोगापनयने श्रीसूर्यवक्त्रविनिर्गतः स्तवराजः सम्पूर्णः॥

सूर्यस्तुतिः

Mon, 01 Jan 0001 00:00:00 +0000

सूर्यस्तुतिः

नमो नमो वरेण्याय वरदायांशुमालिने।

ज्योतिर्मय नमस्तुभ्यमनन्तायाजिताय ते॥१॥

त्रिलोकचक्षुषे तुभ्यं त्रिगुणायामृताय च।

नमो धर्माय हंसाय जगज्जननहेतवे॥२॥

नरनारीशरीराय नमो मीढुष्टमाय ते।

प्रज्ञानायाखिलेशाय सप्ताश्वाय त्रिमूर्तये॥३॥

नमो व्याहृतिरूपाय त्रिलक्षायाशुगामिने।

हर्यश्वाय नमस्तुभ्यं नमो हरितबाहवे॥४॥

एकलक्षविलक्षाय बहुलक्षाय दण्डिने।

एकसंस्थद्विसंस्थाय बहुसंस्थाय ते नमः॥५॥

शक्तित्रयाय शुक्लाय रवये परमेष्ठिने।

त्वं शिवस्त्वं हरिर्देव त्वं ब्रह्मा त्वं दिवस्पतिः॥६॥

त्वमोङ्कारो वषट्कारः स्वधा स्वाहा त्वमेव हि।

त्वामृते परमात्मानं न तत्पश्यामि दैवतम्॥७॥

॥इति श्री-सौरपुराणान्तर्गता मनुकृता सूर्यस्तुतिः सम्पूर्णा॥

PDF:A5 / print Kindle Kindle Scribe

सूर्यार्यास्तोत्रम्

Mon, 01 Jan 0001 00:00:00 +0000

सूर्यार्यास्तोत्रम्

शुकतुण्डच्छवि-सवितुश्चण्डरुचेः पुण्डरीकवनबन्धोः।

मण्डलमुदितं वन्दे कुण्डलमाखण्डलाशायाः॥१॥

यस्योदयास्तसमये सुरमुकुट-निघृष्ट-चरणकमलोऽपि।

कुरुतेञ्जलिं त्रिनेत्रः स जयति धाम्नां निधिः सूर्यः॥२॥

उदयाचल-तिलकाय प्रणतोऽस्मि विवस्वते ग्रहेशाय।

अम्बर-चूडामणये दिग्वनिताकर्णपूराय॥३॥

जयति जनानन्दकरः करनिकर-निरस्त-तिमिर-सङ्घातः।

लोकालोकालोकः कमलारुणमण्डलः सूर्यः॥४॥

प्रतिबोधित-कमलवनः कृतघटनश्चक्रवाकमिथुनानाम्।

दर्शित-समस्तभुवनः परहितनिरतो रविः सदा जयति॥५॥

अपनयतु सकलकलिकृतमलपटलं सप्रतप्तकनकाभः।

अरविन्द-वृन्द-विघटन-पटुतरकिरणोत्करः सविता॥६॥

उदयाद्रि-चारुचामरहरित हयखुरपरिहितरेणुराग।

हरितहय हरितपरिकर गगनाङ्गनदीपक नमस्तेऽस्तु॥७॥

उदितवति त्वयि विकसति मुकुलीयति समस्त-मस्तमितबिम्बे।

न ह्यन्यस्मिन्दिनकर सकलं कमलायते भुवनम्॥८॥

जयति रविरुदयसमये बालातपः कनकसन्निभो यस्य।

कुसुमाञ्जलिरिव जलधौ तरन्ति रथसप्तयः सप्त॥९॥

आर्याः साम्बपुरे सप्त आकाशात्पतिता भुवि।

यस्य कण्ठे गृहे वाऽपि न स लक्ष्म्या वियुज्यते॥१०॥

आर्याः सप्त सदा यस्तु सप्तम्यां सप्तधा जपेत्।

तस्य गेहं च देहं च पद्मा सत्यं न मुञ्चति॥११॥

निधिरेश दरिद्राणां रोगिणां परमौषधम्।

सिद्धिः सकलकार्याणां गाथेयं संसृता रवेः॥१२॥

॥इति श्रीयाज्ञवल्क्यविरचितं सूर्यार्यास्तोत्रं सम्पूर्णम्॥