Nadi on Stotra Samhita

गङ्गादशहरास्तोत्रम्

Mon, 01 Jan 0001 00:00:00 +0000

गङ्गादशहरास्तोत्रम्

ब्रह्मोवाच

नमः शिवायै गङ्गायै शिवदायै नमो नमः।

नमस्ते रुद्ररूपिण्यै शाङ्कर्यै ते नमो नमः॥१॥

नमस्ते विश्वरूपिण्यै ब्रह्ममूर्त्यै नमो नमः।

सर्वदेवस्वरूपिण्यै नमो भेषजमूर्तये॥२॥

सर्वस्य सर्वव्याधीनां भिषक्-श्रेष्ठे नमोऽस्तु ते।

स्थाणुजङ्गमसम्भूतविषहन्त्र्यै नमो नमः॥३॥

भोगोपभोगदायिन्यै भोगवत्यै नमो नमः।

मन्दाकिन्यै नमस्तेऽस्तु स्वर्गदायै नमो नमः॥४॥

नमस्त्रैलोक्यभूषायै जगद्धात्र्यै नमो नमः।

नमः त्रिशुक्लसंस्थायै तेजोवत्यै नमो नमः॥५॥

नन्दायै लिङ्गधारिण्यै नारायण्यै नमो नमः।

नमस्ते विश्वमुख्यायै रेवत्यै ते नमो नमः॥६॥

बृहत्यै ते नमस्तेऽस्तु लोकधात्र्यै नमो नमः।

नमस्ते विश्वमित्रायै नन्दिन्यै ते नमो नमः॥७॥

पृथ्व्यै शिवामृतायै च सुवृषायै नमो नमः।

शान्तायै च वरिष्ठायै वरदायै नमो नमः॥८॥

उस्रायै सुखदोग्ध्र्यै च सञ्जीविन्यै नमो नमः।

ब्रह्मिष्ठायै ब्रह्मदायै दुरितघ्न्यै नमो नमः॥९॥

प्रणतार्तिप्रभञ्जिन्यै जगन्मात्रे नमोऽस्तु ते।

सर्वापत्प्रतिपक्षायै मङ्गलायै नमो नमः॥१०॥

शरणागतदीनार्तपरित्राणपरायणे।

सर्वस्यार्तिहरे देवि नारायणि नमोऽस्तुते॥११॥

निर्लेपायै दुर्गहन्त्र्यै दक्षायै ते नमो नमः।

परात्परतरे तुभ्यं नमस्ते मोक्षदे सदा॥१२॥

गङ्गे ममाग्रतो भूया गङ्गे मे देवि पृष्ठतः।

गङ्गे मे पार्श्वयोरेहि त्वयि गङ्गेऽस्तु मे स्थितिः॥१३॥

आदौ त्वमन्ते मध्ये च सर्वं त्वं गां गते शुभे।
त्वमेव मूलप्रकृतिस्त्वं हि नारायणः परः।
गङ्गे त्वं परमात्मा च शिवस्तुभ्यं नमः शिवे॥१४॥

य इदं पठति स्तोत्रं भक्त्या नित्यं नरोऽपि यः।

शृणुयाच्छ्रद्धया युक्तः कायवाक्चित्तसम्भवैः॥१५॥

दशधा संस्थितैर्दोषैः सर्वैरेव प्रमुच्यते।

सर्वान्कामानवाप्नोति प्रेत्य ब्रह्मणि लीयते॥१६॥

ज्येष्ठे मासि सिते पक्षे दशमी हस्तसंयुता।

तस्यां दशम्यामेतच्च स्तोत्रं गङ्गाजले स्थितः॥१७॥

यः पठेद्दशकृत्वस्तु दरिद्रो वाऽपि चाक्षमः।

सोऽपि तत्फलमाप्नोति गङ्गां सम्पूज्य यत्नतः॥१८॥

अदत्तानामुपादानं हिंसा चैवाविधानतः।

परदारोपसेवा च कायिकं त्रिविधं स्मृतम्॥१९॥

पारुष्यमनृतं चैव पैशुन्यं चापि सर्वशः।

असम्बद्धप्रलापश्च वाङ्मयं स्याच्चतुर्विधम्॥२०॥

परद्रव्येष्वभिध्यानं मनसाऽनिष्टचिन्तनम्।

वितथाभिनिवेशश्च मानसं त्रिविधं स्मृतम्॥२१॥

एतानि दश पापानि हर त्वं मम जाह्नवि।

दशपापहरा यस्मात्तस्माद् दशहरा स्मृता॥२२॥

त्रयस्त्रिंशच्छतं पूर्वान् पितॄनथ पितामहान्।

उद्धरत्येव संसारान्मन्त्रेणानेन पूजिता॥२३॥

नमो भगवत्यै दशपापहरायै गङ्गायै नारायण्यै रेवत्यै
शिवायै दक्षायै अमृतायै विश्वरूपिण्यै नन्दिन्यै ते नमो नमः॥

गङ्गाकर्षणाष्टकम्

Mon, 01 Jan 0001 00:00:00 +0000

गङ्गाकर्षणाष्टकम्

शम्भो भवन्नामनिरन्तरानुसन्धानभाग्येन भवन्तमेव।

यद्येष सर्वत्र तथाऽन्त्यजेऽद्य पश्यत्यहो कोऽत्र कृतोऽपराधः॥१॥

अस्त्वेष मन्तुः पितृयज्ञनिष्ठे गङ्गाप्लवो यो विहितोऽपचित्यै।

दूरात्तु तन्नामजपेन शुद्धिर्न स्यात् कथं मे स्मृतिरर्थवादः॥२॥

त्वन्नामनिष्ठा न हि तावती मे श्रद्धा यतः कर्मसु न प्रदग्धा।

त्रैशङ्कवं मे पशुपान्तरायो मुच्येय तस्मात्कथमार्तबन्धो॥३॥

यद्यद्य ते श्राद्धविनष्टिरिष्टा कोऽहं ततोऽन्यच्चरितुं समर्थः।

श्राद्धे वृताः पूर्वदिनोपवासा नान्यत्र भुञ्जीयुरिदं तु खिद्ये॥४॥

श्रद्धालवः श्राद्धविघातभीत्या स्वात्मोपरोधं विगणय्य धीराः।

यत्प्रोचुरत्रापचितिं महान्तः तत्रोचितं यद्दयया विधेहि॥५॥

गङ्गाधर त्वद्भजनान्तरायभीत्या गृहे कूपकृतावगाहः।

जाने न तीर्थान्तरमद्य गङ्गामासादयेयं कथमार्तबन्धो॥६॥

नाहं तपस्वी सगरान्ववायो जाने न जह्वश्चरति क्व वेति।

शम्भो जटाजूटमपावृणुष्वेत्यभ्यर्थने नालमयं वराकः॥७॥

गङ्गाधराख्या गतिरत्र नान्या तामाश्रये सङ्कटमोचनाय।

हन्त प्रवाहः कथमत्र कूपे विस्फूर्जतीशः खलु मे प्रसन्नः॥८॥

गङ्गेति गङ्गेति हरेति गृह्णन् आप्लावितोऽहं दयया पुरारेः।

कूपोत्थितोऽयं करुणाप्रवाहः गाङ्गश्चिरायात्र जनान् पुनातु॥९॥

॥इति श्रीमच्छ्रीधरार्यकृतं गङ्गाकर्षणाष्टकं सम्पूर्णम्॥

गङ्गाष्टकम्

Mon, 01 Jan 0001 00:00:00 +0000

गङ्गाष्टकम्

भगवति भवलीलामौलिमाले तवाम्भः
कणमणुपरिमाणं प्राणिनो ये स्पृशन्ति।
अमरनगरनारीचामरमरग्राहिणीनां
विगतकलिकलङ्कातङ्कमङ्के लुठन्ति॥१॥

ब्रह्माण्डं खण्डयन्ती हरशिरसि जटावल्लिमुल्लासयन्ती
स्वर्लोकादापतन्ती कनकगिरिगुहागण्डशैलात् स्खलन्ती।
क्षोणी पृष्ठे लुठन्ती दुरितचयचमूं निर्भरं भर्त्सयन्ती
पाथोधिं पूरयन्ती सुरनगरसरित् पावनी नः पुनातु॥२॥

मज्जनमातङ्गकुम्भच्युतमदमदिरामोदमत्तालिजालं
स्नानैः सिद्धाङ्गनानां कुचयुगविगलत् कुङ्कुमासङ्गपिङ्गम्।
सायं प्रातर्मुनीनां कुशकुसुमचयैश्छिन्नतीरस्थनीरं
पायान्नो गाङ्गमम्भः करिकलभकराक्रान्तरं हस्तरङ्गम्॥३॥

आदावादिपितामहस्य नियमव्यापारपात्रे जलं
पश्चात् पन्नगशायिनो भगवतः पादोदकं पावनम्।
भूयः शम्भुजटाविभूषणमणिर्जह्नोर्महर्षेरियं
कन्या कल्मषनाशिनी भगवती भागीरथी पातु माम्॥४॥

शैलेन्द्रादवतारिणी निजजल-मज्जज्जनोत्तारिणी
पारावारविहारिणी भवभयश्रेणी-समुत्सारिणी।
शेषाहेरनुकारिणी हरशिरोवल्लीदलाकारिणी
काशीप्रान्तविहारिणी विजयते गङ्गा मनोहारिणी॥५॥

कुतो वीची वीचिस्तव यदि गता लोचनपथं
त्वमापीता पीताम्बरपुग्निवासं वितरसि।
त्वदुत्सङ्गे गङ्गे पतति यदि कायस्तनुभृतां
तदा मातः शान्तक्रतवपदलाभोऽप्यतिलघुः॥६॥

भगवति तव तीरे नीरमात्राशनोऽहं
विगतविषयतृष्णः कृष्णमाराधयामि।
सकलकलुषभङ्गे स्वर्गसोपानगङ्गे
तरलतरतरङ्गे देवि गङ्गे प्रसीद॥७॥

मातर्जाह्नवी शम्भुसङ्गवलिते मौलौ निधायाञ्जलिं
त्वत्तीरे वपुषोऽवसानसमये नारायणाङ्घ्रिद्वयम्।
सानन्दं स्मरतो भविष्यति मम प्राणप्रयाणोत्सवे
भूयाद् भक्तिरविच्युता हरिहराद्वैतात्मिका शाश्वती॥८॥

गङ्गाष्टकमिदं पुण्यं यः पठेत् प्रयतो नरः।

सर्वपापविनिर्भुक्तो विष्णुलोकं स गच्छति॥९॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-गङ्गाष्टकं सम्पूर्णम्॥

कावेरी प्रार्थना

Mon, 01 Jan 0001 00:00:00 +0000

कावेरी प्रार्थना

मरुद्वृधे महाभागे महादेवि मनोहरे।

सर्वाभीष्टप्रदे देवि स्नास्थितां पुण्यवर्धिनि॥१॥

सर्वपापक्षयकरे मम पापं विनाशय।

कवेरकन्ये कावेरि समुद्रमहिषिप्रिये॥२॥

देहि मे भक्तिमुक्ति त्वं सर्वतीर्थस्वरूपिणि।

सिन्धुवर्ये दयासिन्धो मामुद्धर दयाम्बुधे॥३॥

स्त्रियं देहि सुतं देहि श्रियं देहि ततः स्वगा।

आयुष्यं देहि चाऽऽरोग्यं ऋणान्मुक्तं कुरुष्व माम्॥४॥

तासां च सरितां मध्ये सह्यकन्याऽघनाशिनि।

कावेरि लोकविख्याता जनतापनिवारिणि॥५॥

॥इति श्री-ब्रह्माण्ड पुराणे कावरी प्रार्थना सम्पूर्णा॥

PDF:A5 / print Kindle Kindle Scribe

नर्मदाष्टकम्

Mon, 01 Jan 0001 00:00:00 +0000

नर्मदाष्टकम्

सबिन्दु-सिन्धु-सुस्खलत्-तरङ्ग-भङ्ग-रञ्जितं
द्विषत्सु पाप-जात-जातकादि-वारि-संयुतम्।
कृतान्त-दूत-काल-भूत-भीति-हारि-वर्मदे
त्वदीय-पाद-पङ्कजं नमामि देवि नर्मदे॥१॥

त्वदम्बु-लीन-दीन-मीन-दिव्य-सम्प्रदायकं
कलौ मलौघ-भार-हारि-सर्व-तीर्थ-नायकम्।
सुमच्छ-कच्छ-नक्र-चक्र-वाक-चक्र-शर्मदे
त्वदीय-पाद-पङ्कजं नमामि देवि नर्मदे॥२॥

महा-गभीर-नीर-पूर-पाप-धूत-भूतलं
ध्वनत्-समस्त-पातकारि-दारिताप-दाछलम्।
जगल्लये महाभये मृकण्डु-सूनु-हर्म्यदे
त्वदीय-पादपङ्कजं नमामि देवि नर्मदे॥३॥

गतं तदैव मे भयं त्वदम्बु वीक्षितं यदा
मृकण्डु-सूनु-शौनका-सुरारि-सेवितं सदा।
पुनर्-भवाब्धि-जन्मजं भवाब्धि-दुःख-वर्मदे
त्वदीय-पाद-पङ्कजं नमामि देवि नर्मदे॥४॥

अलक्ष्य-लक्ष-किन्नरामरासुरादि-पूजितं
सुलक्ष-नीर-तीर-धीर-पक्षि-लक्ष-कूजितम्।
वसिष्ठ-शिष्ट-पिप्पलादि-कर्दमादि-शर्मदे
त्वदीय-पादपङ्कजं नमामि देवि नर्मदे॥५॥

सनत्कुमार-नाचिकेत-कश्यपात्रि-षत्पदैः
धृतं स्वकीय-मानसेषु नारदादि-षत्पदैः।
रवीन्दु-रन्ति-देव-देवराज-कर्म-शर्मदे
त्वदीय-पाद-पङ्कजं नमामि देवि नर्मदे॥६॥

अलक्ष-लक्ष-लक्ष-पाप-लक्ष-सारसायुधं
ततस्तु जीव-जन्तु-तन्तु-भुक्ति-मुक्ति-दायकम्।
विरिञ्चि-विष्णु-शङ्कर-स्वकीय-धाम-वर्मदे
त्वदीय-पाद-पङ्कजं नमामि देवि नर्मदे॥७॥

अहो धृतं स्वनं श्रुतं महेशि-केश-जातटे
किरात-सूत-बाडबेषु पण्डिते शठे नटे।
दुरन्त-पाप-तापहारि-सर्व-जन्तु-शर्मदे
त्वदीय-पाद-पङ्कजं नमामि देवि नर्मदे॥८॥

इदं तु नर्मदाष्टकं त्रिकालमेव ये सदा
पठन्ति ते निरन्तरं न यान्ति दुर्गतिं कदा।
सुलभ्यदेहदुर्लभं महेशधामगौरवं
पुनर्भवा नरा न वै विलोकयन्ति रौरवम्॥९॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-नर्मदाष्टकम् सम्पूर्णम्॥

त्रिवेणीस्तोत्रम्

Mon, 01 Jan 0001 00:00:00 +0000

त्रिवेणीस्तोत्रम्

मुक्तामयालङ्कृतमुद्रवेणी भक्ताभयत्राणसुबद्धवेणी।

मत्तालिगुञ्जन्मकरन्दवेणी श्रीमत्प्रयागे जयति त्रिवेणी॥१॥

लोकत्रयैश्वर्यनिदानवेणी तापत्रयोच्चाटनबद्धवेणी।

धर्मा-ऽर्थकामाकलनैकवेणी श्रीमत्प्रयागे जयति त्रिवेणी॥२॥

मुक्ताङ्गनामोहन-सिद्धवेणी भक्तान्तरानन्द-सुबोधवेणी।

वृत्त्यन्तरोद्वेगविवेकवेणी श्रीमत्प्रयागे जयति त्रिवेणी॥३॥

दुग्धोदधिस्फूर्जसुभद्रवेणी नीलाभ्रशोभाललिता च वेणी।

स्वर्णप्रभाभासुरमध्यवेणी श्रीमत्प्रयागे जयति त्रिवेणी॥४॥

विश्वेश्वरोत्तुङ्गकपर्दिवेणी विरिञ्चिविष्णुप्रणतैकवेणी।

त्रयीपुराणा सुरसार्धवेणी श्रीमत्प्रयागे जयति त्रिवेणी॥५॥

माङ्गल्यसम्पत्तिसमृद्धवेणी मात्रान्तरन्यस्तनिदानवेणी।

परम्परापातकहारिवेणी श्रीमत्प्रयागे जयति त्रिवेणी॥६॥

निमज्जदुन्मज्जमनुष्यवेणी त्रयोदयोभाग्यविवेकवेणी।

विमुक्तजन्माविभवैकवेणी श्रीमत्प्रयागे जयति त्रिवेणी॥७॥

सौन्दर्यवेणी सुरसार्धवेणी माधुर्यवेणी महनीयवेणी।

रत्नैकवेणी रमणीयवेणी श्रीमत्प्रयागे जयति त्रिवेणी॥८॥

सारस्वताकार-विघातवेणी कालिन्दकन्यामयलक्ष्यवेणी।

भागीरथीरूप-महेशवेणी श्रीमत्प्रयागे जयति त्रिवेणी॥९॥

श्रीमद्भवानीभवनैकवेणी लक्ष्मीसरस्वत्यभिमानवेणी।

माता त्रिवेणी त्रयीरत्नवेणी श्रीमत्प्रयागे जयति त्रिवेणी॥१०॥

त्रिवेणीदशकं स्तोत्रं प्रातर्नित्यं पठेन्नरः।

तस्य वेणी प्रसन्ना स्याद् विष्णुलोकं स गच्छति॥११॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-त्रिवेणीस्तोत्रं सम्पूर्णम्॥

यमुनाष्टकम्

Mon, 01 Jan 0001 00:00:00 +0000

यमुनाष्टकम्

मुरारिकायकालिमाललामवारिधारिणी
तृणीकृतत्रिविष्टपा त्रिलोकशोकहारिणी।
मनोऽनुकूलकूलकुञ्जपुञ्जधूतदुर्मदा
धुनोतु नो मनोमलं कलिन्दनन्दिनी सदा॥१॥

मलापहारिवारिपूरिभूरिमण्डितामृता
भृशं प्रवातकप्रपञ्चनातिपण्डितानिशा।
सुनन्दनन्दिनाङ्गसङ्गरागरञ्जिता हिता
धुनोतु नो मनोमलं कलिन्दनन्दिनी सदा॥२॥

लसत्तरङ्गसङ्गधूतभूतजातपातका
नवीनमाधुरीधुरीणभक्तिजातचातका।
तटान्तवा सदा सहंससंसृताह्निकामदा
धुनोतु नो मनोमलं कलिन्दनन्दिनी सदा॥३॥

विहाररासस्वेदभेदधीरतीरमारुता
गता गिरामगोचरे यदीयनीरचारुता।
प्रवाहसाहचर्यपूतमेदिनीनदीनदा
धुनोतु नो मनोमलं कलिन्दनन्दिनी सदा॥४॥

तरङ्गसङ्गसैकतान्तरातितं सदासिता
शरन्निशाकरांशुमञ्जुमञ्जरी सभाजिता।
भवार्चनाप्रचारुणाम्बुनाऽधुना विशारदा
धुनोतु नो मनोमलं कलिन्दनन्दिनी सदा॥५॥

जलान्तकेलिकारिचारुराधिकाङ्गरागिणी
स्वभर्तुरन्यदुर्लभाङ्गताङ्गतांशभागिनी।
स्वदत्तसुप्तसप्तसिन्धुभेदिनातिकोविदा
धुनोतु नो मनोमलं कलिन्दनन्दिनी सदा॥६॥

जलच्युताच्युताङ्गरागलम्पटालिशालिनी
विलोलराधिकाकचान्तचम्पकालिमालिनी।
सदावगाहनावतीर्णभर्तृभृत्यनारदा
धुनोतु नो मनोमलं कलिन्दनन्दिनी सदा॥७॥

सदैव नन्दिनन्दकेलिशालिकुञ्जमञ्जुला
तटोत्थफुल्लमल्लिकाकदम्बरेणुसूज्ज्वला।
जलावगाहिनां नृणां भवाब्धिसिन्धुपारदा
धुनोतु नो मनोमलं कलिन्दनन्दिनी सदा॥८॥

॥इति श्रीमत्परमहंसपरिव्राजकाचार्यस्य श्री-गोविन्द-भगवत्पूज्य-पाद-शिष्यस्य
श्रीमच्छङ्करभगवतः कृतौ श्री-यमुनाष्टकं सम्पूर्णम्॥

PDF:A5 / print Kindle Kindle Scribe